In-​Nies Għala Qed Jitilqu r-​Reliġjonijiet Tradizzjonali?

IR-​RELIĠJONIJIET LI JISTQARRU li jibbażaw it-​tagħlim tagħhom fuq dak taʼ Ġesù Kristu għandhom xi 1.7 biljun prattikant. Il-​Kristjaneżmu huwa meqjus bħala l-​akbar reliġjon fid-​dinja, u saħansitra akbar fin-​numru mir-​reliġjonijiet popolari bħall-​Buddiżmu, il-​Ħinduiżmu, u l-​Islam. Madankollu, ir-​rapporti juru li f’ħafna pajjiżi li jgħidu li huma Kristjani, il-​Kristjaneżmu qed jitlef il-​kontroll li għandu fuq in-​nies.

In-​nies minn kull sfond soċjali qed jabbandunaw il-​knejjes tagħhom. Ronald F. Inglehart, riċerkatur fl-​Università taʼ Michigan u d-​direttur taʼ l-​Istħarriġ tal-​Valuri fid-​Dinja, qal li l-​irwol tar-​reliġjon qed jonqos ħafna fil-​pajjiżi żviluppati. Ir-​rivista Bible Review tikkwota dak li qal hu: “Mhux talli l-​attendenza taʼ kull ġimgħa fil-​knisja nieżla b’rata mgħaġġla, imma talli l-​pajjiżi Amerikani Latini issa qed jibagħtu missjunarji biex isalvaw il-​ħajjiet tan-​nies li kienu ġew jikkolonizzawhom.” Hu jsostni li l-​“waqgħa tar-​reliġjon” qed tidher partikolarment f’xi pajjiżi Ewropej tat-​tramuntana. Fin-​Norveġja u d-​Danimarka, 5 fil-​mija biss tal-​popolazzjoni jmorru l-​knisja regolarment. Fl-​Isvezja l-​figura hija baxxa, 4 fil-​mija, u fir-​Russja 2 fil-​mija.

Rapporti mill-​Ġermanja juru li bejn is-​snin 1984 u l-​1993, in-​numru taʼ dawk li jmorru l-​knisja regolarment fost il-​Kattoliċi uffiċjali niżel minn 25.3 fil-​mija għal 19 fil-​mija. Sa l-​1992, 4 fil-​mija biss mill-​Protestanti kienu qed jattendu regolarment il-​quddiesa tal-​Ħadd. Fl-​1999, Christianity Today irrapportat: “Wieħed minn kull għaxar Ġermaniżi biss imur il-​knisja kull ġimgħa.”

Rigward in-​nuqqas taʼ nies li jemmnu fil-​Britannja, il-​gazzetta The Guardian tgħid: “Il-​Kristjanità qatt ma kienet f’kundizzjoni agħar milli hi.” L-​artiklu jgħid li ‘għall-​qassis u l-​presbiteru, is-​snin mill-​1950 sa l-​2000 kienu l-​agħar 50 sena mis-​sekli kollha.’ Waqt li tirreferi għal rapport speċjali dwar ir-​reliġjon fir-​Renju Unit, il-​gazzetta turi li mhux iż-​żgħażagħ biss imma anki dawk imdaħħlin fiż-​żmien qed jitilfu l-​fidi fir-​reliġjon organizzata. Din tgħid: “In-​nies imdaħħlin fiż-​żmien qed jitilfu l-​fidi f’Alla iktar ma jikbru. Ir-​riċerka ġdida li qed tikkonferma t-​tendenza se tixxokkja l-​knejjes tal-​Britannja li jinsabu fi kriżi, li s’issa qiesu lil dawk imdaħħlin fiż-​żmien bħala l-​qafas dejjiemi tal-​kongregazzjonijiet tagħhom li qegħdin dejjem jonqsu.”

Hemm tendenzi simili barra l-​Ewropa. Per eżempju, ir-​rivista Kanadiża Alberta Report tgħid li l-​Kanada qed tesperjenza “waqgħa fit-​twemmin u l-​qima istituzzjonali” u li “t-​triplu tal-​Kanadiżi jippreferu l-​fantasiji tagħhom stess dwar Alla milli jissottomettu ruħhom għal twemmin definit.”

Ħafna nies sempliċement ma jħossuhomx għonja jew imdawlin spiritwalment billi jattendu l-​quddiesa tal-​knisja. Skond ir-​rivista Kanadiża Maclean’s, kemm il-​Lhud u kemm il-​Kattoliċi li ġew intervistati f’ermitaġġ, jew irtir reliġjuż għall-​Ħindu fil-​Ħimalaja, esprimew din l-​opinjoni: “Ma bqajniex nitqanqlu minn ritwali mingħajr emozzjoni.” Tabilħaqq, anki wara ħafna snin t’attendenza regulari fil-​knisja, xi wħud jaħsbu bejnhom u bejn ruħhom, ‘X’tgħallimt tassew fil-​knisja? Ninsab eqreb t’Alla bħala riżultat?’ Mhux taʼ b’xejn li, bħalma jpoġġiha l-​awtur Gregg Easterbrook, “fil-​Punent, il-​faqar spiritwali ħa post il-​faqar materjali bħala l-​bżonn prinċipali taʼ żmienna.”

M’għandniex xi ngħidu, hemm ħafna pajjiżi fejn il-​figuri taʼ l-​attendenza fil-​knisja huma ogħla. Madankollu, li wieħed imur il-​knisja mhux dejjem ifisser li qed iżomm lealment mat-​tagħlim tal-​knisja. Per eżempju, il-​gazzetta Awstraljana The Age tgħid li fil-​Punent, in-​numru tal-​Kristjani li jipprattikaw ir-​reliġjon tagħhom qed jonqos b’rata mgħaġġla. Fil-​biċċa l-​kbira taʼ l-​Afrika, l-​Asja u l-​Amerika Latina, il-​Kristjanità hija bħal velu li minn warajh ħafna nies qed ikomplu jħaddnu t-​twemmin eżotiku taʼ xi tribù jew kult. Dan it-​twemmin ħafna drabi jikkontradixxi u m’għandu xejn x’jaqsam mat-​tagħlim tradizzjonali Kristjan, li ilu snin sħaħ imwarrab uffiċjalment.

Għala hawn tant nies, żgħar u kbar, li qed jabbandunaw il-​knejjes tagħhom? Mid-​dehra, fattur kbir huwa d-​diżappunt.

Ir-​Rekord mill-​Agħar tar-​Reliġjon

The Guardian tosserva dan li ġej: “Il-​knisja Kattolika Rumana kellha rekord ħażin dwar kemm ftehmet minn taħt mal-​faxxiżmu matul is-​seklu 20, mill-​prosit li tat lill-​Ġeneral Franco wara l-​gwerra ċivili Spanjola, sa l-​isforzi reċenti li saru għan-​nom tal-​Ġeneral Pinochet.” Il-​Guardian semmiet ukoll li Papa Piju XII, il-​papa taʼ żmien il-​gwerra, kien kuntent li jagħmel arranġament maʼ [Hitler] u jevita li jħossu imbarazzat billi, per eżempju, jikkundanna l-​Olokawst.

The Age tistqarr li l-​Kristjanità wriet li l-​istqarrijiet tagħha kienu foloz f’wisq okkażjonijiet. Il-​Kristjani ma rnexxilhomx jippreservaw il-​paċi ġewwinija u l-​unità tagħhom stess. Bħala prova taʼ dan, il-​ħafna gwerer taʼ serq u konkwisti ġew ġustifikati billi ntqal li l-​iskop tagħhom kien li jikkonvertu n-​nies lejn Kristu. Il-​fidi, it-​tama, u l-​imħabba suppost li huma l-​iktar virtujiet Kristjani importanti, imma dawk li jgħidu li qed jipprovaw jilħqu dawn il-​virtujiet jistgħu jkunu ċiniċi u indifferenti daqs dawk li m’humiex Kristjani u x’aktarx ma jagħmlux iktar karità minn dawk li m’humiex Kristjani. Il-​gazzetta kompliet tgħid li kien pajjiż Kristjan li ta bidu għall-​Olokawst u pajjiż Kristjan ieħor li qanqal il-​biżaʼ kbir tal-​gwerra atomika fuq il-​Ġappun.

Xi wħud għandhom mnejn jargumentaw li l-​Kristjaneżmu ilu jħeġġeġ virtujiet bħall-​prudenza, il-​qawwa, ir-​rażna, u l-​ġustizzja. Madankollu, The Age tikkummenta: “Sewwa, ġeneralment il-​Kristjani fl-​Ewropa, fl-​Amerika taʼ Fuq, u fl-​Awstralja jaħlu ħafna iktar milli hu xieraq mir-​riżorsi taʼ l-​Art u jkomplu jittolleraw l-​isfruttar, il-​moħqrija, u d-​disprezz taʼ l-​ambjent taʼ pajjiżi ġirien inqas qawwija biex jissodisfaw ix-​xewqat tagħhom.”

Rigward il-​futur tal-​Kristjaneżmu, The Age tkompli li mingħajr struttura taʼ ideat organizzati u stabbli, il-​Kristjanità qatt ma tistaʼ tittama li jerġaʼ jkollha l-​qawwa soċjali li kellha fis-​sekli li għaddew. Il-​gazzetta kompliet tgħid li dan jistaʼ jkun tajjeb jew ħażin, jiddependi mill-​ħarsa taʼ dak li jkun, imma li din hija r-​realtà li se tiffaċċja l-​Kristjanità fis-​snin li ġejjin.

Bħala riżultat taʼ din il-​korruzzjoni fid-​dinja tar-​reliġjon organizzata, ħafna qed jitilqu mill-​knejjes stabbiliti. Imma l-​alternattiva li jsibu tissodisfalhom tassew il-​bżonnijiet tagħhom? Hija din is-​soluzzjoni?

[Stampi f’paġna 7]

Ċerimonji elaborati jħallu lil ħafna jħossuhom mhux sodisfati spiritwalment

[Stampa f’paġna 7]

Ħafna telqu mir-​reliġjonijiet tradizzjonali minħabba l-​irwol tagħhom f’li jappoġġaw il-​gwerer u l-​gvernijiet politiċi kefrin

[Sors]

ritratt: age fotostock