Mingħand il-​Qarrejja

Familji b’Ġenitur Wieħed Ma nistax nispjega kemm ħadt gost naqra s-​serje t’artikli tal-​bidu “Familji b’Ġenitur Wieħed Jistgħu Jirnexxu.” (8 t’Ottubru, 2002) Inkun irrid nerġaʼ naqraha darba wara l-​oħra! Jien ġenitur waħdi b’żewġt itfal. Kull darba li naqra dawn l-​artikli, inqawwi qalbi għax nara li nistaʼ nirnexxi u li miniex waħdi. Grazzi ħafna!

C. B., Stati Uniti

Grazzi ħafna talli stampajtu dawn l-​artikli. Kont għadni kif bdejt inħossni skuraġġita minħabba ċ-​ċirkustanzi preżenti tiegħi bħala ġenitur waħdi u li kelli nerġaʼ nibda naħdem wara li kont ili nieħu ħsieb uliedi d-​dar għal bosta snin. Madankollu, l-​artikli tawni t-​tama u l-​inkuraġġiment li kelli bżonn. Qed nippjana biex napplika s-​suġġerimenti, bħal per eżempju li nkun organizzata tajjeb u li jkolli studju tal-​Bibbja regulari mal-​familja. Se nżomm din ir-​rivista fejn nistaʼ nsibha malajr u se naqraha kull meta nerġaʼ nibda nħossni skuraġġita.

B. A., Stati Uniti

Pingwini Ir-​raġel tiegħi ma ħalliex liż-​żewġ uliedi subien jistudjaw il-​Bibbja. Bħala riżultat, uliedi m’humiex interessati li jistudjaw. Imma grazzi għall-​artikli istruttivi tagħkom, xorta waħda nistaʼ nedukahom b’mod spiritwali. Jien nagħżel dawk l-​artikli li ma jsemmux il-​Bibbja jew lil Alla b’mod speċifiku imma li jistgħu jkunu taʼ interess għal uliedi. Per eżempju, għamilt kopja taʼ l-​artiklu “Ara Ġejjin il-​Pingwini Żgħar Jimmarċjaw Qishom f’Parata! (8 taʼ Novembru, 2002) u poġġejtu ġo folder żgħir li għamilt għalihom u semmejtu L-​Għeġubijiet tan-​Natura. Nitlob lil Jehovah biex ibierek l-​isforzi tiegħi biex nipperswadi lil uliedi.

J. G., Franza

Iż-​Żgħażagħ Jistaqsu Nixtieq nikkummenta dwar l-​artiklu “Iż-​Żgħażagħ Jistaqsu . . . Għala Ma Jħobbunix il-​Ġenituri Tiegħi?” (8 t’Ottubru, 2002) Wara li l-​ġenituri tiegħi ddivorzjaw, bdejt għaddejja minn dipressjoni serja. Xi drabi, kien jidher li ħadd ma setaʼ jgħinni. Għandi l-​aqwa omm u ħu li qatt ħadd jistaʼ jixtieq, imma xi drabi nħoss li biċċa minn qalbi hija nieqsa—il-​biċċa li missieri ħa minħabba li ma ħabbnix. Tlabt lil Jehovah biex jagħtini xi ħaġa li kienet se tgħinni. Dan hu dak li għamel dan l-​artiklu għalija. Għenni biex inħossni aħjar dwari nnifsi, u tgħallimt kif għandi nkampa. L-​iktar li messitli qalbi kienet l-​iskrittura taʼ Salm 27:10. Għenitni nagħraf li Jehovah iħobbni anki meta jkun jidher li ħadd ma qed jagħmel dan.

D. B., Stati Uniti

Telefons Ċellulari L-​artiklu “Iż-​Żgħażagħ Jistaqsu . . . Għandi Bżonnu t-​Telefon Ċellulari?” (8 taʼ Novembru, 2002) għenni ħafna. Qabel ma qrajt dan l-​artiklu, ma kontx inkun nistaʼ norqod qabel ma nwieġeb il-​messaġġi li kont nirċievi. Imma issa għentuni nara l-​vantaġġi u l-​iżvantaġġi taʼ dan l-​oġġett.

. A., Filippini

Jien kont nuża t-​telefon tiegħi biex inżomm kuntatt maʼ ġuvni permezz taʼ l-​E-mail. Konna nitkellmu dwar problemi persunali, u kont ferħana li stajt niftaħ qalbi maʼ xi ħadd. Maż-​żmien, hu waqaf jibgħatli l-​E-mails, u ħadt għalija. Iżda l-​artiklu għenni nara li meta jinżamm kuntatt bl-​E-mail, dan jistaʼ jkun forma taʼ namur. U naħseb li l-​ġuvni rrealizza dan ukoll. Issa nagħti l-​indirizz taʼ l-​E-mail tiegħi lil dawk l-​uħud biss li għandhom bżonn ikunu jafuh.

Y. M., Ġappun