Wara l-​Isplużjonijiet

MINN KITTIEB GĦAL STENBAĦ! FL-​EKWADOR

L-​20 taʼ Novembru, 2002, kien jum mill-​isbaħ fil-​belt taʼ Riobamba fl-​Ekwador. Sħab abjad ħafif kien jidher jittajjar f’sema kaħlani. Il-​vulkani miksijin bis-​silġ li jdawru l-​belt kienu joffru xena mill-​isbaħ għal fuq xi kartolina. Il-​124,000 ruħ li jgħixu hemm, xi wħud minnhom maʼ l-​2,700 metru ’l fuq fil-​Muntanji Andes, kienu għaddejjin bir-​rutina normali tagħhom, mingħajr ma immaġinaw kif din il-​kalma kienet se tisfratta f’daqqa waħda. F’kemm ili ngħidlek, fil-​kalma taʼ nofsinhar, seħħet splużjoni li ttarrxek! It-​twieqi u l-​art bdew jitriegħdu. Malajr malajr bdiet tifforma sħaba f’sura taʼ faqqiegħ b’theddida għall-​abitanti.

Għaxar minuti wara seħħet it-​tieni splużjoni, u magħha ħarġet f’daqqa pressjoni għolja li nfirxet u li kissret it-​twieqi u qalgħet il-​bibien minn posthom. L-​ewwel sħaba kienet insinifikanti ħdejn it-​tieni sħaba taʼ nar u duħħan li ħarġet tkaxkar kollox magħha. Wara dan komplew iseħħu serje taʼ splużjonijiet.

José, u martu Ana—it-​tnejn li huma Xhieda taʼ Jehovah—huma koppja li għandhom fuq is-​60 sena li jgħixu xi 400 metru ’l fuq minfejn seħħet l-​isplużjoni. Il-​qawwa taʼ l-​isplużjoni tefgħethom maʼ l-​art. Ana kienet wieqfa ħdejn il-​bieb taʼ barra meta dan inqalaʼ minn postu u spiċċa mkaħħal mal-​ħajt taʼ wara. Hekk kif il-​koppja mwerwra kienet qed tiġri lejn in-​naħa taʼ wara tad-​dar, is-​saqaf beda jaqaʼ fuqhom. Minn hawn u minn hemm irnexxielhom joħorġu fil-​bitħa ż-​żgħira taʼ wara, fejn ħaddnu lil xulxin u bdew jitolbu. B’ferħ, 15-il minuta wara wasal binhom bil-​karozza biex jiħodhom f’post ’il bogħod mill-​periklu.

Mhux kulħadd ħelisha ħafif. Wara l-​isplużjoni qam ħafna paniku. Folol taʼ nies bdew jaħarbu bil-​mixi. Fost l-​għajjat u t-​twerżiq, xi wħud żelqu u waqgħu fuq il-​ħġieġ imkisser li kien imxerred fuq il-​bankini. Il-​karozzi, it-​trakkijiet, u l-​karozzi tal-​linja saqu ’l barra mill-​belt b’veloċità qawwija, xi wħud saħansitra saqu fid-​direzzjoni żbaljata f’toroq one-way! Ħafna li ħarbu mill-​iskola jew minn fuq xogħolhom ma rnexxilhomx isiru jafu x’sar mill-​membri tal-​familja tagħhom sa 24 siegħa wara.

Xi kkaġuna dan il-​ġenn kollu? Post fejn jinħadmu l-​armamenti taħt l-​art f’bażi militari fil-​qrib ħa n-​nar u qabbad reazzjoni sħiħa taʼ murtali, granati li jintefgħu bl-​idejn, u tankijiet bil-​kanuni mimlijin bombi li splodew. Hekk kif komplew l-​isplużjonijiet, il-​vetturi tal-​pulizija ħabbru permezz tal-​loudspeakers li kulħadd kellu joħroġ sa ħmistax-il kilometru ’l barra mill-​belt.

F’kemm ili ngħidlek, Riobamba spiċċat vojta. Eluf taʼ ċittadini lokali mlew it-​triq prinċipali ’l barra mill-​belt, imgeddsin fl-​arja kiesħa tal-​lejl—ħafna minnhom mingħajr kowtijiet jew ġkieket. Wara bosta sigħat l-​isplużjonijiet bdew jonqsu. Minħabba l-​kesħa qawwija, ir-​residenti bdew mexjin lura lejn il-​belt b’attenzjoni kbira. L-​għada fil-​għodu, fid-​dawl tal-​jum, ħafna skoprew li kienet saret ħsara kbira lit-​twieqi, il-​bibien, il-​bjut, is-​soqfa, u l-​ħitan taʼ djarhom. Familja waħda sabet biċċiet taʼ ħġieġ forma taʼ stalletti f’nofs is-​saqqu tal-​kamra tas-​sodda. Oħrajn sabu l-​frak taʼ l-​isplużjoni ġewwa u barra darhom.

Għall-ewwel ġew rapportati minn taʼ l-​inqas 7 mejta, 538 feruti, u 18,000 dar bil-​ħsara. Mid-​950 Xhud taʼ Jehovah fl-​inħawi, ħadd ma miet, għalkemm tnejn kellhom jiġu kkurati minħabba feriti gravi li sofrew.

Għajnuna għall-​Vittmi

L-​għada fil-​għodu wara li seħħew l-​isplużjonijiet, anzjani fil-​kongregazzjonijiet lokali tax-​Xhieda taʼ Jehovah bdew iżuru lil ħuthom il-​Kristjani biex jaraw kellhomx bżonn xi ħaġa. Iktar tard dakinhar, ministru li jivvjaġġa tax-​Xhieda taʼ Jehovah iltaqaʼ maʼ l-​anzjani tat-​13-il kongregazzjoni lokali taʼ ġewwa u barra l-​belt biex jieħdu ħsieb il-​ħsara li saret. Hu ħeġġeġ lill-​anzjani biex jieħdu ħsieb il-​bżonnijiet emozzjonali u spiritwali taʼ dawk li salvaw. Kemm kien vitali li jattendu l-​laqgħat Kristjani f’dawn iċ-​ċirkustanzi diffiċli! (Lhud 10:​24, 25) Għalhekk, il-​kongregazzjonijiet lokali għamlu l-​laqgħat regulari tagħhom l-​għada fil-​għaxija wara d-​diżastru.

Il-Ħamis u l-​Ġimgħa sar rapport dettaljat dwar il-​ħsara fid-​djar tax-​Xhieda u ntbagħat lill-​uffiċċju tal-​fergħa lokali tax-​Xhieda taʼ Jehovah f’Guayaquil. Ir-​rapport enfasizza l-​bżonn urġenti li jitwaħħlu l-​mijiet taʼ twieqi mkissrin sabiex ir-​residenti jkunu protetti mill-​kesħa. Wara biss ftit sigħat, l-​uffiċċju tal-​fergħa kien diġà xtara rombli kbar tal-​plastik trasparenti, rukkelli tat-​tejp, u msiemer tas-​siment biex jagħmlu tiswijiet temporanji.

Trakk mimli bl-​affarijiet wasal is-​Sibt fil-​għodu fid-​disgħa. Gruppi taʼ Xhieda rġiel u nisa kienu diġà bdew jaħdmu, jgħinu lil sħabhom ix-​Xhieda jnaddfu l-​ħġieġ imkisser f’darhom sabiex jibda jitwaħħal il-​plastik. Waħda mis-​Swali tas-​Saltna lokali saret iċ-​ċentru minfejn jitqassam ix-​xogħol. Saru xi marki maʼ l-​art sabiex ikunu jistgħu jkejlu l-​plastik. Bil-​kejl li kisbu l-​membri tal-​gruppi li jagħtu l-​għajnuna, inqatgħu biċċiet addattati tal-​plastik skond id-​daqs u mbagħad ittieħdu għand il-​gruppi li kienu qed jistennew biex iwaħħluhom.

José, li semmejna iktar kmieni, qal: “Meta wasalna d-​dar l-​għada wara nofsinhar li saret l-​isplużjoni, l-​aħwa kienu diġà jinsabu hemm ineħħu t-​terrapien. Is-​Sibt, il-​ġâr tiegħi ġie għandi u qalli kemm saritli biċċa xogħol tajba meta waħħluli l-​plastik mad-​dar, u hu staqsieni, ‘Xi kemm infaqt?’” Kif baqaʼ skantat il-​ġâr meta sar jaf li għamluli kollox bla ħlas!

Sas-Sibt fil-​għaxija, xi 200 volontiera mill-​kongregazzjonijiet lokali kienu għalqu t-​twieqi taʼ 91 dar tax-​Xhieda. Ħafna li m’humiex Xhieda bbenefikaw ukoll. Gazzetta lokali ppubblikat ritratt taʼ dar li ħadmu fuqha x-​Xhieda, u nnotat li waħda biss minn dawk li joqogħdu fid-​dar kienet Xhud taʼ Jehovah.

Provdut Appoġġ Emozzjonali

M’għandniex xi ngħidu, in-​nies kienu mnikktin ħafna minħabba l-​isplużjonijiet. Biex jipprovdu l-​faraġ lix-​Xhieda lokali, tħejjiet laqgħa speċjali nhar it-​Tnejn, 25 taʼ Novembru, fil-​5 taʼ fil-​għaxija. Intbagħtu rappreżentanti mill-​uffiċċju tal-​fergħa lokali biex jikkonduċu din il-​laqgħa. Peress li d-​dawl elettriku ma kienx disponibbli, il-​laqgħa ma setgħetx issir iktar tard fil-​għaxija. Peress li l-​ħin tal-​laqgħa kien jidher li jistaʼ jkun inkonvenjenti, kien mistenni li jattendu għadd medju taʼ xi 600 ruħ. Madankollu, is-​Sala taʼ l-​Assemblea taʼ Riobamba mtliet b’folla taʼ 1,421 ruħ, inkluż xi wħud li ma kinux Xhieda! Skrittura prinċipali li ġiet kunsidrata fil-​programm kienet Salm 4:8: “Nimtedd u norqod minnufih fis-​sliem, għax int waħdek, Mulej, fis-​sod tqegħedni.” Dawk kollha preżenti wrew l-​apprezzament kbir tagħhom għal dan il-​programm spiritwali kollu faraġ.

Mijiet taʼ kopji taʼ l-​artiklu intitolat “Natural Disasters​—Helping Your Child to Cope” (Diżastri Naturali—Għin lil Uliedek Ikampaw) li ħareġ fl-​Awake! (22 taʼ Ġunju, 1996) tqassmu lill-​ġenituri f’għeluq il-​programm. Wieħed mill-​paragrafi fl-​artiklu jgħid:

“L-​Aġenzija li Tieħu Ħsieb lEmerġenza Federali fl-​Istati Uniti (FEMA) tinnota li eżatt wara xi diżastru, it-​tfal ġeneralment jibżgħu (1) li se jispiċċaw waħedhom, (2) li se jittieħdu ’l bogħod mill-​familja, (3) li l-​ġrajja se terġaʼ sseħħ, u (4) li xi ħadd se jweġġaʼ jew jinqatel.” Skond dak li qal dan l-​artiklu, il-​ġenituri ġew inkuraġġiti biex:

1. Jipprovaw iżommu l-​familja flimkien.

2. Jieħdu l-​ħin biex jispjegaw is-​sitwazzjoni bil-​kalma.

3. Jinkuraġġixxu lit-​tfal biex jitkellmu.

4. Jinkludu lit-​tfal fl-​attivitajiet biex jitneħħa t-​terrapien.

Il-​kopji żejda taʼ dan l-​artiklu fl-​Awake! tqassmu lill-​ġirien u lill-​istudenti tal-​Bibbja.

Tliet ġimgħat wara l-​isplużjoni, inxtara l-​materjal biex isiru tiswijiet iktar permanenti, inkluż it-​twaħħil taʼ twieqi ġodda, soqfa, u bjut. Wara tliet ġimgħat, dawn il-​proġetti kienu tlestew, flimkien mat-​tiswijiet f’żewġ Swali tas-​Saltna. Kien hemm ħafna li esprimew il-​gratitudni tagħhom għal dan il-​provvediment kollu mħabba.

Iseħħu diversi tipi taʼ diżastri f’dan iż-​żmien taʼ “l-​aħħar.” (2 Timotju 3:​1-5) Madankollu, l-​appoġġ li x-​Xhieda taʼ Jehovah jagħtu lil xulxin u lill-​ġirien tagħhom jixhed kemm hi qawwija l-​Kristjanità vera. José kellu raġun meta qal: “L-​organizzazzjoni taʼ Jehovah ma ddumx biex tgħinna meta niġu fil-​bżonn.”

[Stampi f’paġna 23]

Xi 200 volontiera offrew ruħhom biex inaddfu. Ittieħed il-​qjies u nqatgħu twieqi ġodda li mbagħad twaħħlu. Il-​bjut ġew mibdula