Ħarsa Lejn id-Dinja
◼ “Tim t’astronomi, billi uża t-teleskopji Subaru u Keck f’Mauna Kea [il-Ħawajj], skopra ħjut taʼ galassji ġganteski bi tliet dimensjonijiet li biex tasal min-naħa għall-oħra tagħhom tieħu 200 miljun sena tad-dawl fl-ispazju.” Dawn il-ħjut jifformaw l-akbar struttura magħrufa li qatt ġiet skoperta.—SUBARU TELESCOPE WEB SITE, IL-ĠAPPUN.
◼ L-Uffiċċju taʼ l-Istatistika Nazzjonali tar-Renju Unit jirrapporta li “fis-sena 2006 kien hemm l-inqas numru taʼ żwiġijiet [fl-Ingilterra u f’Wales] għal dawn l-aħħar 110 snin. Iktar u iktar koppji qed jippreferu li jgħixu flimkien mingħajr ma jiżżewġu.”—THE GUARDIAN WEEKLY, IL-BRITANNJA.
◼ Skond il-Forum fuq il-Ħajja Reliġjuża u Pubblika, “44 fil-mija mill-adulti jew bidlu r-reliġjon tagħhom, jew bidlu milli ma jkollhom l-ebda reliġjon għal li jingħaqdu maʼ reliġjon partikulari, jew waqqfu kull konnessjoni m’organizzazzjoni reliġjuża speċifika.”—L-ISTATI UNITI TAʼ L-AMERIKA.
Kulleġġi u Sess Każwali
“Minbarra għal xi kulleġġi evanġeliċi . . . , ftit li xejn hemm differenza bejn kulleġġi u universitajiet pubbliċi, privati, u Kattoliċi f’dik li hi ‘kultura taʼ relazzjoni sesswali każwali’ li hi mifruxa fil-kampus—fejn l-istudenti jfittxu esperjenzi sesswali maʼ diversi wħud.” Hekk qalet Donna Freitas, teologessa Kattolika u professoressa assistenta fl-università, wara li għamlet riċerka dwar l-imġiba sesswali u r-reliġjon fil-kulleġġi taʼ l-Amerika. Skond in-National Catholic Reporter, Freitas qalet li n-nuqqas taʼ influwenza reliġjuża fil-livelli morali rigward l-imġiba sesswali mhux biss juri “l-qawwa tal-kultura tas-sess każwali fil-kulleġġi” imma juri wkoll “kemm huma dgħajfin it-tradizzjonijiet reliġjużi għaliex ma jistgħux iwaqqfuha.”
Ġenituri Mħallsin Biex Irabbu l-Bniet
Il-gvern Indjan qed joffri l-ekwivalenti taʼ kważi 2,000 ewro lil ġenituri foqra biex irabbu wlied bniet, jgħid rapport tal-BBC News. Il-familji se jirċievu premju taʼ flus kontanti malli titwieled tifla u diversi drabi hi u tikber sakemm ikollha l-età taʼ 18-il sena. Għalkemm l-għażla tas-sess tat-trabi u l-għażla t’abort saru kontra l-liġi mill-1994, dawn xorta għadhom komuni. Fil-fatt, huwa stmat li f’dawn l-aħħar 20 sena, l-abort ħa l-ħajja taʼ madwar 10 miljun fetus femminili u dan effettwa serjament il-bilanċ bejn is-subien u l-bniet f’xi nħawi. Skond ċensiment taʼ l-2001, fil-pajjiż kollu kien hemm 927 tifla għal kull 1,000 tifel taħt is-sitt snin u d-differenza kienet għadha qed tikber. Fi stat wieħed, twieldu 793 tifla għal kull 1,000 tifel li twieled.
Ir-Reazzjoni taʼ l-Għasafar għall-Istorbju
Xi għasafar jagħmlu sforz kbir biex jinstemgħu minħabba l-istorbju li jkun hemm fil-belt. Filwaqt li l-istorbju li jkun hemm fil-belt jistaʼ jdejjaq lill-bnedmin, din tistaʼ tkun kwistjoni taʼ “ħajja jew mewt” għall-għasafar, tgħid ir-rivista New Scientist, ladarba l-għasafar irġiel jgħannu biex “jattiraw sieħba u biex jistabbilixxu l-limiti fit-territorju tagħhom.” Minħabba li l-frekwenzi baxxi taʼ l-istorbju tal-belt huma ogħla, ċerti għasafar jagħmlu l-għana tagħhom jinstemaʼ iktar billi jgħannu bil-lejl meta jkun hemm inqas storbju jew billi jgħollu iktar il-volum tagħhom jew billi jgħannu fuq nota iktar għolja. Iktar minn hekk, m’humiex biss l-għasafar li jgħixu fil-bliet li jridu jadattaw ruħhom b’dan il-mod, tgħid ir-rivista. Dawk li jgħixu viċin “il-kaskati u l-kurrenti tax-xmajjar ukoll jgħannu bi frekwenzi iktar għoljin.”