Bijoteknologu jispjega t-​twemmin tiegħu

X’qajjimlek l-​interess fl-​oriġini u l-​iskop tal-​ħajja?

Missieri kien Kattoliku u ommi kienet Protestanta. Minkejja dan, ma qisuhiex importanti r-​reliġjon. Imma jien, matul żgħożiti ħsibt dwar it-​tifsir tal-​ħajja u qrajt ħafna kotba dwar il-​Buddiżmu, il-​Ħinduiżmu, u l-​Iżlam. Saħansitra tlabt lil Alla jurini l-​verità.

Sas-​snin 70, il-​qasam tal-​bijoloġija molekulari għamel żviluppi ġmielhom, u ħsibt dwar jekk forsi jistax jirrivela kif bdiet il-​ħajja. Il-​mekkaniżmi fiċ-​ċelluli ħajjin affaxxinawni, u għalhekk għażilt li nistudja l-​bijoteknoloġija. Barra minn hekk, ħafna mill-​għalliema tiegħi qalu li l-​ħajja evolviet bi proċessi naturali, u jien emminthom.

Għala ħadt interess fil-​Bibbja?

Kienu ġew għandna tnejn mix-​Xhieda taʼ Ġeħova. Għalkemm kienu dħulin, ħadthom bil-​herra u għedtilhom li ma kontx interessat. Marti semgħetni. “Ma kontx qalbek tajba, Hans Kristian,” qaltli. “Int dejjem kont interessat fl-​iskop tal-​ħajja.” Kellha raġun, u ddispjaċieni. Għalhekk, ġrejt biex nilħaq lil dawk ix-​Xhieda. Matul il-​konversazzjoni tagħna, għedtilhom li ridt inkun naf jekk il-​Bibbja taqbilx max-​xjenza.

Kif wiġbuk għal dan?

Urewni x’tgħid il-​Bibbja dwar is-​Sors tal-​enerġija li tidher fl-​univers. L-​iskrittura li qrawli tgħid: “Erfgħu għajnejkom fl-​għoli u araw. Min ħalaqhom dawn l-​affarijiet? . . . Minħabba l-​abbundanza t’enerġija attiva, billi għandu wkoll qawwa enerġetika, lanqas waħda minnhom m’hi nieqsa.”a Din l-​istqarrija affaxxinatni. Kien jidher raġunevoli wkoll li Sors intelliġenti t’enerġija biss setaʼ jkun responsabbli għall-​ordni li hemm fl-​univers.

Inbidlet il-​ħarsa tiegħek tal-​evoluzzjoni?

Gradwalment irrealizzajt li d-​diversi teoriji tal-​evoluzzjoni ma kellhomx provi xjentifiċi konkreti. Infatti, bażikament dawn huma stejjer ivvintati biex jispjegaw kif id-​disinji rimarkevoli li jinsabu f’affarijiet ħajjin, bħal pereżempju s-​sistema tal-​immunità, setgħu oriġinaw bi proċess bla ħsieb. Iktar ma studjajt is-​sistema tal-​immunità, iktar irrealizzajt kemm hi kumplessa u effettiva. B’hekk, ir-​riċerka tiegħi wasslitni biex nikkonkludi li l-​ħajja hija prodott taʼ Ħallieq intelliġenti.

Tistaʼ tagħtina xi evidenza taʼ disinn?

Is-​sistema tal-​immunità hi fil-​fatt ġabra taʼ strutturi u mekkaniżmi tal-​għaġeb iddisinjati biex jiddefenduna minn varjetà kbira t’affarijiet, inkluż il-​mikrobi u l-​virus. Dawn il-​mekkaniżmi, min-​naħa tagħhom, jistgħu jinġabru f’żewġ gruppi taʼ sistemi li jikkumplimentaw lil xulxin. L-​ewwel waħda, f’temp taʼ sigħat tattakka mikrobi li jkunu daħlu fil-​ġisem. It-​tieni waħda tieħu diversi ġranet biex tirreaġixxi imma tattakka l-​invażuri bħal vleġġa mmirata sew. It-​tieni sistema għandha wkoll memorja tajba, biex jekk invażur speċifiku jerġaʼ jiġi snin wara, dan l-​għadu se jintlaqaʼ b’respons veloċi. Is-​sistema kollha tant taħdem tajjeb li spiss lanqas biss tirrealizza li għadek kif ġejt infettat u effettivament protett. Impressjonanti wkoll hu l-​mod kif is-​sistema tal-​immunità tagħraf id-​differenza bejn sustanzi barranin u l-​mijiet taʼ tipi taʼ ċelluli li ġisimna hu magħmul minnhom.

Għidilna naqra, x’jiġri meta mikrobu jidħol f’ġisimna?

Il-​mikrobi jidħlu inkiss inkiss mal-​ikel, minn imnifsejna, mill-​ġenitali, jew minn xi qatgħa fil-​ġilda. Meta s-​sistema tal-​immunità tinduna bihom, tagħti bidu għal serje konsekuttiva taʼ reazzjonijiet li jinvolvu bosta proteini li huma ddisinjati biex jagħmlu xogħol partikulari. Kull parti minn din is-​serje tattiva lil taʼ warajha biex iżżid il-​kontrattakk. Dan il-​proċess jgħaġġbek.

Nistgħu ngħidu, allura, li l-​għarfien tiegħek tax-​xjenza saħħaħlek il-​fidi tiegħek f’Alla?

Dażgur! Il-​qawwa u s-​sofistikazzjoni tas-​sistema tal-​immunità tagħna jagħtu evidenza taʼ Ħallieq t’għerf u taʼ mħabba. Nistaʼ nżid li x-​xjenza saħħitli wkoll il-​fidi tiegħi fil-​Bibbja. Pereżempju, Proverbji 17:22 jgħidilna li “qalb ferriħija tajba biex tfejjaq.” Xi riċerkaturi skoprew li l-​istat mentali tagħna jistaʼ jinfluwenza s-​sistema tal-​immunità tagħna. L-​istress, pereżempju, jistaʼ jdgħajjef ir-​reazzjoni tas-​sistema tal-​immunità.

Ħafna min-​nies li taf ma jemmnux f’Alla. Għala?

Ir-​raġunijiet ivarjaw. Uħud sempliċement jaċċettaw dak li ġew mgħallmin, bħalma kont nagħmel jien. Forsi jassumu li hemm provi xjentifiċi għat-​teorija tal-​evoluzzjoni. Oħrajn ma tantx jaħsbu dwar kif bdiet il-​ħajja. X’ħasra! Naħseb li għandhom jistaqsu iktar mistoqsijiet.

Għala sirt Xhud taʼ Ġeħova?

Inġbidt mill-​ospitalità tagħhom u l-​fidi tagħhom fil-​wegħda tal-​Ħallieq għal futur aħjar.b U dik il-​fidi hi bbażata fuq riċerka u raġunar sod, mhux ħrejjef jew spekulazzjoni.c