Ktieb Għalik?

“Il-​kotba joktru bla heda,” stqarr Salamun xi 3,000 sena ilu. (Koħèlet 12:12) Dik l-​osservazzjoni għadha tapplika llum daqs kemm kienet qabel. Barra mill-​klassiċi tas-​soltu, eluf taʼ kotba ġodda jiġu stampati kull sena. B’daqshekk kotba biex tagħżel minnhom, għala għandek taqra l-​Bibbja?

ĦAFNA nies jaqraw il-​kotba jew biex jirrikreaw ruħhom jew biex ikunu informati, jew forsi għaż-​żewġ raġunijiet. L-​istess jistaʼ jingħad għall-​qari tal-​Bibbja. Din tistaʼ tipprovdi qari inkuraġġanti, u saħansitra divertenti. Imma l-​Bibbja hija iktar minn hekk. Hija sors uniku t’għarfien.​—Koħèlet 12:​9, 10.

Il-Bibbja twieġeb mistoqsijiet li l-​bnedmin ilhom żmien jaħsbu dwarhom​—mistoqsijiet dwar l-​imgħoddi tagħna, il-​preżent tagħna, u l-​ġejjieni tagħna. Ħafna jistaqsu: Minn fejn ġejna? X’inhu l-​iskop tal-​ħajja? Kif nistgħu niksbu hena fil-​ħajja? Dejjem se jkun hemm il-​ħajja fuq l-​art? X’hemm maħżun fil-​ġejjieni għalina?

Il-forza kollettiva taʼ l-​evidenza kollha ppreżentata hawnhekk tistabbilixxi b’mod ċar li l-​Bibbja hija preċiża u awtentika. Aħna diġà kkunsidrajna kif il-​pariri prattiċi tagħha jistgħu jgħinuna ngħixu ħajjiet bi skop u henjin illum. Ladarba t-​tweġibiet tagħha dwar il-​preżent huma sodisfaċenti, ċertament li t-​tweġibiet tagħha dwar l-​imgħoddi u l-​profeziji tagħha dwar il-​ġejjieni jistħoqqilhom attenzjoni bir-​reqqa.

Kif Tikseb L-​Aqwa Benefiċċju

Ħafna nies bdew jaqraw il-​Bibbja biex imbagħad waqfu meta sabu li partijiet minnha kienu diffiċli biex jifhmuhom. Jekk dik kienet l-​esperjenza tiegħek, hemm xi affarijiet li jistgħu jkunu t’għajnuna.

Agħżel traduzzjoni taʼ min jorbot fuqha b’lingwaġġ modern. Xi nies jibdew billi jaqraw ir-​rakkonti tal-​Vanġeli dwar il-​ħajja taʼ Ġesù, li t-​tagħlim kollu għerf tiegħu, bħal dak misjub fil-​Priedka taʼ fuq il-​Muntanja, jirrifletti kemm kien konxju bis-​sħiħ dwar in-​natura umana u jurina kif nistgħu ntejbu l-​mod taʼ kif ngħixu ħajjitna.​—Ara Mattew kapitli 5 sa 7.

Barra milli taqra l-​Bibbja minn tarf sa tarf, metodu taʼ studju skond xi suġġetti partikulari jistaʼ jkun informattiv ġmielu. Dan jinvolvi li wieħed janalizza dak li tgħid il-​Bibbja dwar xi suġġett partikulari. Għandek mnejn tissorprendi ruħek meta ssir taf dak li l-​Bibbja tgħid fir-​realtà dwar suġġetti bħalma huma r-​ruħ, is-​sema, l-​art, il-​ħajja, u l-​mewt, kif ukoll is-​Saltna t’Alla​—x’inhi u x’se twettaq.a Ix-​Xhieda taʼ Jehovah għandhom programm taʼ studju tal-​Bibbja bbażat fuq suġġetti partikulari u li huwa pprovdut bla ħlas. Int tistaʼ titkixxef dwar dan billi tikteb lill-​pubblikaturi, billi tuża l-​indirizz li japplika għalik imniżżel f’paġna 2.

Wara li eżaminaw l-​evidenza, ħafna nies ikkonkludew li l-​Bibbja ġejja minn Alla, li lilu l-​Iskrittura tidentifika bħala “Jaħweh [“Jehovah,” NW].” (Salm 83:19 [83:18, NW]) Għandek mnejn m’intix konvint li l-​Bibbja għandha oriġini divina. Imma għala ma teżaminahiex għalik innifsek? Aħna fiduċjużi li wara proċess taʼ tagħlim, meditazzjoni, u forsi li tesperjenza l-​valur prattiku taʼ l-​għerf bla tarf tagħha għalik innifsek, int se tibda tħoss li l-​Bibbja hija tabilħaqq ktieb għan-​nies kollha, u iżjed minn hekk​—ktieb għalik.

[Nota taʼ taħt]