April

Darba kellu relazzjoni tajba maʼ Ġeħova. Imma iktar tard, dan l-​anġlu, li kien ħliqa spirtu, ried lin-​nies iqimuh. Minflok ma rrifjuta malajr malajr din ix-​xewqa ħażina, hu ppermetta lil din ix-​xewqa tikber sakemm dineb. (Ġak. 1:14, 15) Ma nafux x’kien jismu fil-​bidu, imma aħna nafuh bħala Satana. Hu “ma żammx sħiħ fil-​verità.” Hu rribella kontra Ġeħova u sar “missier il-​gidba.” (Ġw. 8:44) Minn mindu rribella, Satana sar l-​akbar għadu taʼ Ġeħova u għadu tan-​nies kollha. Aħna nistgħu naraw kemm verament Satana hu ħażin billi naraw kif tiddeskrivih il-​Bibbja. Satana jfisser “Wieħed li jopponi,” u dan juri li hu anġlu mill-​agħar li jobgħod it-​tmexxija t’Alla u li l-​ħin kollu qed jiġġildilha bil-​qawwa kollha tiegħu. Dak li verament Satana jrid hu t-​tmiem tat-​tmexxija taʼ Ġeħova. w15 5/15 1:1, 2

Huwa minnu li meta nistudjaw il-​Bibbja, nitgħallmu dwar il-​bidliet li nistgħu nagħmlu biex naqdu lil Ġeħova aħjar. Imma nitgħallmu wkoll dwar l-​affarijiet li jagħmel bi mħabba u l-​personalità sabiħa li għandu, li jġegħluna nħobbuh iktar. U hekk kif l-​imħabba tagħna għalih tiżdied, l-​imħabba tiegħu għalina tiżdied ukoll, u b’hekk ir-​relazzjoni li għandna miegħu ssir saħansitra iktar b’saħħitha. Jekk irridu nersqu eqreb lejn Ġeħova, hu importanti li nistudjaw il-​Bibbja għar-​raġuni t-​tajba. Ġesù qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġw. 17:3) Nistgħu nitgħallmu ħafna affarijiet ġodda u interessanti meta naqraw il-​Bibbja, imma l-​iskop prinċipali tagħna għandu jkun li nieħdu għarfien dwar Ġeħova, jiġifieri li nsiru nafuh aħjar bħala Persuna. (Eżo. 33:13; Salm 25:4) Meta nsiru nafu lil Ġeħova tant li nagħmluh il-​Ħabib tal-​qalb tagħna, ma noqogħdux ninkwetaw jekk il-​Bibbja mhux dejjem tispjega għala hu aġixxa b’tali mod. w15 4/15 3:6-​8

Dan l-​aħħar, xi anzjani li kellhom suċċess f’li jħarrġu lil aħwa rġiel biex jagħmlu iktar fil-​kongregazzjoni ġew mitluba jgħidu kif jirnexxilhom jagħmlu dan. L-​anzjani kollha taw pariri simili avolja għandhom ċirkustanzi differenti ħafna. Dan x’jurina? Jurina li t-​taħriġ ibbażat fuq il-​Bibbja hu utli għall-​aħwa t’inqas esperjenza “kullimkien f’kull kongregazzjoni.” L-​ewwel, dak li jħarreġ għandu joħloq kundizzjonijiet tajbin. Dan għala hu importanti? Bħalma ġardinar ikollu bżonn iħejji l-​ħamrija qabel ma jiżraʼ ż-​żerriegħa, hekk ukoll anzjan għandu bżonn iħejji l-​qalb taʼ dak li qed jitħarreġ qabel ma jkun jistaʼ jgħallmu abbiltajiet ġodda. Allura kif jistaʼ anzjan joħloq kundizzjonijiet tajbin biex iħarreġ? Jistaʼ jsegwi l-​eżempju tal-​profeta Samwel meta kien qed jgħin lil Sawl biex imexxi lilI-​Iżrael.—1 Sam. 9:15-​27; 10:1. w15 4/15 1:11, 12

Ħafna mill-​affarijiet li din id-​dinja tippromwovi ma jaqblux mal-​livelli tal-​Bibbja. Naturalment, mhux kulma hemm fid-​dinja hu ħażin. Madankollu, aħna nistgħu nkunu ċerti li Satana se jibqaʼ juża d-​dinja tiegħu biex jieħu vantaġġ mix-​xewqat tagħna u jipprova jġegħelna nidinbu. Jew jipprova jġegħelna nħobbu d-​dinja u nittraskuraw il-​qima tagħna lil Ġeħova. (1 Ġw. 2:15, 16) Xi Kristjani tal-​bidu kienu jħobbu d-​dinja. Pereżempju, Pawlu kiteb: “Dema telaqni peress li ħabb din is-​sistema.” (2 Tim. 4:10) Il-​Bibbja ma tgħidx bl-​eżatt liema aspett taʼ din id-​dinja Dema kien iħobb, jiġifieri dak li ġiegħlu jabbanduna lil Pawlu. Jistaʼ jkun li Dema beda jħobb l-​affarijiet materjali iktar mis-​servizz tiegħu lil Ġeħova. Jekk dan kien minnu, Dema tilef l-​opportunità li jkollu privileġġi eċċitanti fis-​servizz t’Alla. Kien worth it? Le. Dema setaʼ jibqaʼ jkun t’għajnuna għal Pawlu. Id-​dinja qatt ma setgħet toffrilu xi ħaġa aħjar milli setaʼ Ġeħova!—Prov. 10:22. w15 5/15 2:10, 11

Ġesù fehem kif ħassewhom in-​nies meta kienu qed ibatu, avolja qatt ma kien fis-​sitwazzjoni tagħhom. Pereżempju, kien jaf li ħafna nies kellhom ħajja iebsa. Il-​mexxejja reliġjużi gidbulhom u vvintaw ħafna liġijiet li ma kinux ġejjin mingħand Alla. In-​nies kienu jibżgħu minn dawn il-​mexxejja. (Mt. 23:4; Mk. 7:1-​5; Ġw. 7:13) Għalkemm Ġesù qatt ma beżaʼ minnhom u qatt m’emmen il-​gideb tagħhom, xorta setaʼ jifhem kif ħassewhom in-​nies. Ġesù kien iħossu mweġġaʼ ħafna meta kien jara kemm kienu ttrattati ħażin. Kienu ġew mitluqin għal riħhom, “bħal nagħaġ mingħajr ragħaj.” (Mt. 9:36) Ġesù tgħallem minn Missieru kif iħobb lin-​nies u kif ikun “ħanin u grazzjuż.” Meta Ġesù ra n-​nies ibatu, għenhom għax kien iħobbhom. Kien eżatt bħal Missieru. Pereżempju, darba waħda, wara li Ġesù u l-​appostli tiegħu kienu vvjaġġaw distanza twila biex jippritkaw, kienu għajjenin u kellhom bżonn jistrieħu f’xi post għall-​kwiet. Imma Ġesù ra li kien hemm ħafna nies qed jistennewh. Fehem li kellhom bżonn l-​għajnuna tiegħu, u għalhekk għalkemm kien għajjien “beda jgħallimhom ħafna affarijiet.”—Mk. 6:30, 31, 34. w15 5/15 4:3, 4

L-​ewwel Iben imwieled t’Alla hu l-​aqwa eżempju tal-​għerf inkredibbli taʼ Ġeħova u hu kien il-​“ħaddiem tas-​sengħa” taʼ Missieru. Immaġina kemm Ġesù kien ferħan u sodisfatt hekk kif Missieru “ħejja s-​smewwiet” u “stabbilixxa s-​sisien taʼ l-​art”! Imma mill-​affarijiet kollha li ħalaq Missieru, Ġesù b’mod speċjali ‘kien jgħożż lil ulied il-​bnedmin.’ (Prov. 8:22-​31) Iva, hu ħabb lill-​bnedmin sa mill-​bidu nett. Iktar tard, Ġesù wera l-​lealtà u l-​imħabba tiegħu lejn Missieru u l-​imħabba profonda li għandu għall-​bnedmin kollha meta kien lest li jinżel mis-​smewwiet biex jgħix fuq l-​art bħala bniedem. Ġesù bi mħabba għamel dan ħalli jkun jistaʼ jagħti ħajtu bħala “fidwa għal ħafna.”—Mt. 20:28; Flp. 2:5-​8. w15 6/15 2:1, 2

Grat int għal dak li għamel għalik Ġeħova? Jekk iva, mela d-​dedikazzjoni u l-​magħmudija huma l-​aqwa passi li għandek tieħu. Id-​dedikazzjoni tiegħek hi wegħda lil Alla li se tagħmel ir-​rieda tiegħu għal dejjem. Għandek tibżaʼ tagħmel wegħda bħal din? Le! Ġeħova jrid dak li hu l-​aħjar għalik, u se jippremja lil dawk li jagħmlu r-​rieda tiegħu. (Ebr. 11:6) Meta tiddedika ħajtek lil Alla u titgħammed, ħajtek mhux se tmur għall-​agħar, anzi se tmur għall-​aħjar! Ġeħova jrid l-​aħjar għalik. Però, Satana hu egoist u jiġi jaqaʼ u jqum minnek. Ma jistaʼ jagħtik xejn tajjeb jekk timxi warajh. Kif jistaʼ jagħtik xi ħaġa li m’għandux? M’għandux aħbar tajba, u m’għandux tama, xejn affattu. w16.03 2:16, 18, 19

Jekk trid ħbiberija mill-​qrib maʼ Ġeħova, trid tkun konvint li hu jismaʼ t-​talb. Aħseb dwar dan: Qabel ma Ġesù ġie fid-​dinja, ra li Ġeħova wieġeb it-​talb tal-​qaddejja umani Tiegħu. Meta kien fuq l-​art, Ġesù talab lil Missieru tas-​sema dwar ħsibijietu u s-​sentimenti tiegħu. Darba minnhom, saħansitra talab lejl sħiħ. (Lq. 6:12; 22:40-​46) Kien Ġesù se jagħmel hekk li kieku kien jaħseb li Ġeħova ma kienx qed jisimgħu verament? Ġesù lis-​segwaċi tiegħu ukoll għallimhom kif jitolbu lil Ġeħova. Kien se jagħmel hekk li kieku kien jaħseb li Ġeħova ma jismax it-​talb? B’mod ċar, Ġesù kien jaf li Ġeħova verament jismaʼ t-​talb. Aħna wkoll nistgħu nkunu ċerti li Ġeħova jismaʼ talbna.—Salm 65:2. w15 4/15 3:11, 13

Meta t-​tfal tiegħek jisimgħuk titlob, jistgħu jitgħallmu jistrieħu fuq Ġeħova. Fit-​talb tiegħek, titlobx lil Ġeħova biex jgħin biss lil uliedek, imma itolbu biex jgħin lilek ukoll. Ana, li tgħix il-​Brażil, tgħid: “Meta qamu l-​problemi, bħal meta n-​nanniet kienu morda, il-​ġenituri tiegħi kienu jitolbu lil Ġeħova għas-​saħħa ħalli jkampaw mas-​sitwazzjoni u għall-​għerf ħalli jieħdu deċiżjonijiet tajbin. Anki meta kellhom pressjoni kbira, ħallew il-​problemi tagħhom f’idejn Ġeħova. B’hekk, tgħallimt nistrieħ fuq Ġeħova.” Meta wliedek jisimgħuk titlob lil Ġeħova biex jagħtik il-​kuraġġ ħalli tagħti xhieda lil ġar jew biex issaqsi lill-​imgħallem tiegħek għal-​leave ħalli tkun tistaʼ tattendi l-​konvenzjoni, huma se jirrealizzaw li int tistrieħ fuq Ġeħova għall-​għajnuna u se jitgħallmu li għandhom jagħmlu l-​istess. w15 11/15 1:7, 8

Wieħed mill-​aħjar modi kif issaħħaħ l-​imħabba tiegħek għal Ġeħova hu billi taħseb bis-​serjetà dwar il-​fidwa, l-​akbar għotja li Alla ta lill-​bnedmin. (2 Kor. 5:14, 15; 1 Ġw. 4:9, 19) Meta tagħmel dan se tkun trid turi l-​gratitudni tiegħek għal din l-​għotja mill-​isbaħ. Il-​gratitudni tiegħek għall-​fidwa tistaʼ tiġi spjegata b’dan il-​mod: Immaġina li qed tegħreq u xi ħadd isalvak. Kieku int sempliċement tmur id-​dar, tixxotta lilek innifsek, u tinsa x’għamel dak l-​individwu għalik? Żgur li le! Int dejjem se tħossok grat lejn l-​individwu li salvalek ħajtek! B’mod simili, għandna nkunu grati ferm lejn Ġeħova u Ġesù għall-​fidwa. Minħabba l-​imħabba li għandhom għalina, aħna issa għandna t-​tama li ngħixu għal dejjem f’Ġenna fuq l-​art! w16.03 2:16, 17

Ġeħova kellu fiduċja sħiħa fl-​Iben uniġenitu tiegħu, li kien leali lejh fis-​sema għal żmien bla għadd. Fuq l-​art, minkejja l-​iktar provi diffiċli, Ġesù baqaʼ leali u appoġġa d-​dritt taʼ Ġeħova li jmexxi. Aħna għandna nkunu grati li permezz tal-​mewt tiegħu, Ġesù ħallas il-​prezz tal-​fidwa għax ta lin-​nies l-​opportunità li jgħixu għal dejjem fid-​dinja l-​ġdida t’Alla! L-​appostlu Ġwanni kiteb: “B’dan intweriet l-​imħabba t’Alla għalina, għax Alla bagħat lill-​Iben uniġenitu tiegħu fid-​dinja biex niksbu l-​ħajja permezz tiegħu. L-​imħabba qiegħda f’dan: li mhux aħna ħabbejna lil Alla, imma hu ħabbna u bagħat lil Ibnu bħala sagrifiċċju propizjatorju għal dnubietna.”—1 Ġw. 4:9, 10. w15 11/15 3:13, 14

Kulħadd wiret id-​dnub u l-​mewt minn Adam, u allura ħadd ma jistaʼ jgħid, “M’għandix bżonn il-​fidwa.” Anki l-​iktar qaddej leali t’Alla għandu bżonn l-​għotja tal-​fidwa. Kull wieħed minna nħafirlu balla dejn! L-​imħabba u l-​ħniena taʼ Ġeħova, x’għandhom iqanqluna nagħmlu? Ġejt imweġġaʼ minn xi ħu? Issibha diffiċli biex taħfirlu? Għandna nimitaw lil Ġeħova, li ‘lest li jaħfer.’ (Neħ. 9:17; Salm 86:5) Jekk napprezzaw il-​ħniena kbira taʼ Ġeħova, aħna se nuru ħniena m’oħrajn u naħfrulhom mill-​qalb. Jekk ma nħobbux lil ħutna u ma naħfrulhomx, ma nistgħux nistennew li Ġeħova jħobbna u jaħfrilna. (Mt. 6:14, 15) Għalkemm meta naħfru ma nbiddlux il-​passat, aħna nistgħu nkunu ċerti li dan jistaʼ jbiddel il-​futur tagħna għall-​aħjar. w16.01 2:5, 15-​17

Ġesù qal il-​kliem t’hawn fuq biex jgħin lil Pietru u d-​dixxipli l-​oħra jimmaġinaw lilhom infushom imexxu maʼ Ġesù fis-​sema u jgħinu lill-​bnedmin ubbidjenti fuq l-​art biex isiru perfetti. Tgħallimna x’għen lill-​qaddejja taʼ Ġeħova jkollhom fidi b’saħħitha. Abel immaġina l-​wegħda taʼ Ġeħova dwar futur aħjar, u minħabba l-​fidi li kellu f’dik il-​wegħda, hu għoġob lil Ġeħova. Abraham immaġina ż-​żmien meta kienu se jitwettqu l-​wegħdi taʼ Ġeħova dwar in-​‘nisel,’ u għalhekk obda lil Ġeħova anke meta dan kien diffiċli ħafna. (Ġen. 3:15) Mosè ħares ’il quddiem għall-​premju li kien wiegħdu Ġeħova, u dan għenu jħobb lil Ġeħova u jkun leali. (Ebr. 11:26) Meta nimmaġinaw iż-​żmien meta Ġeħova se jagħmel dak kollu li wiegħed, il-​fidi u l-​imħabba tagħna għal Ġeħova wkoll jissaħħu. w15 5/15 3:17, 18

Individwu li jrid ikun Kristjan matur jimita l-​eżempju taʼ Ġesù u jkun irid jifhem il-​Bibbja kemm jistaʼ jkun. B’mod regulari dan ifittex fl-​Iskrittura għal veritajiet profondi, għax hu jaf li “l-​ikel solidu hu għan-​nies maturi.” (Ebr. 5:14) Kristjan matur irid ikollu “għarfien eżatt” tal-​Bibbja. (Efes. 4:13) Allura staqsi lilek innifsek: ‘Naqra jien il-​Bibbja kuljum? Għandi skeda għall-​istudju persunali? Nagħmel il-​qima bħala familja kull ġimgħa?’ Meta tistudja l-​Bibbja, fittex għal prinċipji li jistgħu jgħinuk tkun taf kif Ġeħova jaħseb u kif iħossu. Imbagħad uża dawn il-​prinċipji meta tiġi biex tieħu deċiżjonijiet. Dan se jgħinek tersaq saħansitra eqreb lejn Ġeħova. w15 9/15 1:5, 9, 10

Ġesù jifhem għalkollox kif taħdem in-​natura. Hu jaf kif juża u jikkontrolla l-​elementi kollha tan-​natura. Meta Ġesù kien fuq l-​art, wera li kellu l-​qawwa t’Alla billi kkontrolla l-​forzi tan-​natura. Ġib quddiem għajnejk dak li kien qed jiġri: Il-​mewġ kien qed iħabbat mad-​dgħajsa b’qawwa kbira u d-​dgħajsa kienet qed timtela bl-​ilma. Minkejja l-​ħoss kbir tal-​maltempata u l-​fatt li d-​dgħajsa kienet qed tiġi mitfugħa ’l hemm u ’l hawn, Ġesù baqaʼ rieqed għax kien għajjien mejjet. Imma d-​dixxipli kienu qed jibżgħu, u għalhekk qajmu lil Ġesù u qalu: “Se nintilfu!” (Mt. 8:25) Ġesù kif wieġeb? Qam u qal lir-​riħ u l-​baħar: “Iskot! Oqgħod kwiet!” (Mk. 4:39) Din il-​maltempata kbira waqfet, u “waqgħet kalma kbira.” X’eżempju tal-​għaġeb taʼ kif Ġesù għandu l-​qawwa biex jikkontrolla l-​forzi tan-​natura! w15 6/15 1:12-​14

Wara li Ġesù għallem it-​talba mudell, hu għallimna biex ma niffokawx fuq affarijiet materjali. Hu qal li jekk Ġeħova jieħu ħsieb il-​fjuri salvaġġi, “kemm iktar ilibbes lilkom, intom taʼ fidi żgħira?” Imbagħad, hu rripeta: “Qatt tkunu ansjużi dwar l-​għada.” (Mt. 6:30-​34) M’hemmx għalfejn ninkwetaw dwar il-​bżonnijiet li se jkollna fil-​futur. Minflok, għandna nkunu kuntenti bil-​bżonnijiet bażiċi taʼ kuljum. Pereżempju, nistgħu nitolbu biex ikollna fejn noqogħdu, impjieg ħalli nieħdu ħsieb il-​familja tagħna, u l-​għerf ħalli nieħdu deċiżjonijiet tajba dwar saħħitna. Imma hemm xi ħaġa saħansitra iktar importanti li għandna bżonn nitolbu għaliha. “Il-​bniedem mhux bil-​ħobż biss jgħix, imma wkoll b’kull kelma li toħroġ minn fomm Ġeħova.” (Mt. 4:4) Allura, irridu nitolbu biex Ġeħova jkompli jgħallimna u jagħtina dak li għandna bżonn biex nibqgħu qrib tiegħu. w15 6/15 5:4, 7, 8

Ibqaʼ itlob lil Ġeħova biex jgħinek tiċħad l-​immoralità u tagħmel dak li hu tajjeb anke meta jkun diffiċli. Qabel ma tgħallimna dwar Ġeħova, jistaʼ jkun li konna nieħdu pjaċir nagħmlu affarijiet li hu ma jiħux pjaċir bihom, u jistaʼ jkun li għadna qed niġġieldu kontra dawn ix-​xewqat ħżiena. Imma Ġeħova jistaʼ jgħinna ninbidlu u nagħmlu dak li jogħġbu. Pereżempju, wara li s-​Sultan David kellu relazzjoni sesswali maʼ Bat-​seba, hu nidem u talab bil-​ħrara lil Ġeħova biex jagħtih “qalb pura,” jew nadifa, u biex jgħinu jkun ubbidjenti. (Salm 51:10, 12) Għalhekk, jekk fil-​passat kellna xewqat immorali b’saħħithom u għadna qed niġġieldu kontrihom, Ġeħova jistaʼ jgħinna jkollna xewqa saħansitra iktar b’saħħitha biex nobduh u nagħmlu dak li hu tajjeb. Jistaʼ jgħinna wkoll nikkontrollaw il-​ħsibijiet imperfetti tagħna.—Salm 119:133. w15 6/15 3:5, 6

Uħud imdaħħlin fiż-​żmien fostna jiftakru meta l-​kongregazzjonijiet kellhom qaddej tal-​kongregazzjoni minflok ġemgħa tal-​anzjani, meta l-​pajjiżi kellhom qaddej tal-​fergħa minflok Kumitat tal-​Fergħa, jew meta l-​president tal-​Watch Tower Society kien jagħti d-​direzzjoni minflok il-​Ġemgħa li Tiggverna tax-​Xhieda taʼ Ġeħova. Avolja dawn l-​aħwa kollha kellhom assistenti leali, xorta waħda individwu wieħed bażikament kien responsabbli biex jieħu d-​deċiżjonijiet fil-​kongregazzjonijiet, fl-​uffiċċji tal-​fergħa, jew fil-​kwartieri ġenerali. Wara l-​1970, saru aġġustamenti sabiex gruppi t’anzjani jkollhom ir-​responsabbiltà li jieħdu d-​deċiżjonijiet minflok individwu wieħed. Dawn l-​aġġustamenti kienu bbażati fuq fehma aħjar tal-​Iskrittura. Minflok ma jkun hemm individwu wieħed li jieħu d-​deċiżjonijiet kollha, l-​organizzazzjoni tibbenefika mill-​kwalitajiet tajbin tal-​anzjani kollha, li huma “rġiel bħala għotjiet” mingħand Ġeħova.—Efes. 4:8. w15 7/15 1:14, 15

Bħala l-​qaddejja taʼ Ġeħova, aħna newtrali u ma ninvolvux ruħna fi kwistjonijiet li jifirdu n-​nies, bħal kwistjonijiet taʼ nazzjonalità, razza, jew kultura. Għala? Għax inħobbu lil Ġeħova, leali lejh, u nobduh. (1 Ġw. 5:3) Ngħixu fejn ngħixu jew ġejjin minn fejn ġejjin, aħna nimxu mal-​livelli t’Alla. Il-​lealtà lejn Ġeħova u s-​Saltna tiegħu hi iktar importanti minn kwalunkwe ħaġ’oħra. (Mt. 6:33) Għalhekk nistgħu ngħidu li ‘m’aħniex parti mid-​dinja.’ (Ġw. 17:11, 15,16; Is. 2:4) Ħafna nies fid-​dinja llum huma leali lejn il-​pajjiż, it-​tribù, il-​kultura, jew saħansitra t-​team tal-​isports tagħhom. B’dispjaċir, dan irriżulta f’li ħafna minnhom jikkompetu maʼ xulxin, jobogħdu lil xulxin, u kultant joqtlu lil dawk li ma jżommux magħhom. Kapaċi tibqaʼ newtrali, jew tiġbed lejn naħa jew oħra? w15 7/15 3:1, 2

Ġeħova hu Alla nadif u qaddis. Hu Alla t’ordni. Huwa għalhekk li għandna nżommu s-​Sala tas-​Saltna tagħna nadifa u f’ordni. (1 Kor. 14:33) Sabiex inkunu nodfa u qaddisin bħal Ġeħova, mhux biss irridu nżommu l-​qima tagħna, il-​ħsibijiet tagħna, u l-​azzjonijiet tagħna nodfa, imma rridu nżommu wkoll ġisimna nadif. (Riv. 19:8) Meta nżommu s-​Sala tas-​Saltna tagħna nadifa u f’ordni, inkunu kburin biex nistiednu lin-​nies għal-​laqgħat tagħna. U n-​nies se jinnotaw li aħna verament inpoġġu fil-​prattika dak li nippritkaw dwar dinja ġdida nadifa. Huma se jaraw li nqimu Alla qaddis u nadif li se jagħmel din l-​art ġenna sabiħa. (Is. 6:1-​3; Riv. 11:18) Ngħixu fejn ngħixu, għandna nżommu s-​Sala tas-​Saltna nadifa u f’ordni. Huwa l-​post fejn inqimu lil Ġeħova.—Dt. 23:14. w15 7/15 4:13-​15

Meta s-​segwaċi taʼ Ġesù fehmu li kien beda jsaltan fl-​1914, irrealizzaw li t-​tmiem jistaʼ jiġi fi kwalunkwe żmien. Allura ppreparaw għalih billi taw spinta lix-​xogħol tal-​ippritkar. Ġesù qal li jistaʼ jkun li jiġi iktar tard, “x’ħin jidden is-​serduq jew kmieni fil-​għodu.” Li kieku kellu jiġri dan, is-​segwaċi tiegħu x’kien se jkollhom jagħmlu? Ġesù qal: “Ibqgħu għassa.” Għalhekk, anke jekk inħossu li ilna żmien twil nistennew, dan ma jfissirx li t-​tmiem baqagħlu ħafna biex jiġi jew li se nilħqu mmutu qabel ma jiġi. Immaġina li int fid-​dinja l-​ġdida. Il-​ġrajjiet kollha li kienu ġew ipprofetizzati dwar l-​agħar jiem seħħew eżatt bħalma kien qal Ġeħova. Int tafda f’Ġeħova iktar minn qatt qabel, u int saħansitra iktar ċert li se jagħmel l-​affarijiet l-​oħra kollha li wiegħed. (Ġoż. 23:14) Kemm int grat li Ġeħova għażel l-​aħjar ħin biex iġib it-​tmiem u li wissa lin-​nies tiegħu biex jibqgħu jistennew!—Atti 1:7; 1 Pt. 4:7. w15 8/15 2:10, 11, 14

Bħala divertiment, ħafna nies illum jaraw jew jagħmlu affarijiet li huma vjolenti jew immorali jew inkella jagħmlu affarijiet li għandhom x’jaqsmu mal-​maġija u d-​demoniżmu. Pereżempju, l-​Internet, programmi tat-​televixin, films, kotba, u rivisti spiss jagħmlu l-​vjolenza u l-​immoralità jidhru li huma aċċettabbli. U mġiba li qabel kienet tixxokkja lin-​nies tant saret aċċettabbli li issa f’xi postijiet saret legali. Imma dan ma jfissirx li Ġeħova japprova mġiba bħal din. (Rum. 1:28-​32) Fl-​ewwel seklu, in-​nies ukoll raw affarijiet li kienu vjolenti u immorali. Imma dan ma kienx minnu fil-​każ tas-​segwaċi taʼ Ġesù, għax dawn għexu fi qbil mal-​livelli t’Alla. Dan ‘ħawwad’ lin-​nies taʼ madwarhom. X’kien ir-​riżultat? In-​nies għaddew biż-​żmien lill-​Kristjani u ppersegwitawhom.—1 Pt. 4:4. w15 8/15 4:2, 3

Kristjan matur jagħmel kulma jistaʼ biex il-​kongregazzjoni tibqaʼ magħquda. (Efes. 4:1-​6, 15) Bħala Kristjani, il-​mira tagħna hi li nkunu ‘magħqudin flimkien b’mod armonjuż,’ jiġifieri, li naħdmu flimkien f’unità. Biex ikollna dan it-​tip taʼ unità, Kristjan irid ikun umli. Għalhekk, anke meta jiġi effettwat mill-​imperfezzjonijiet t’oħrajn, Kristjan matur jaħdem iebes biex iżomm l-​unità tal-​kongregazzjoni b’saħħitha. Għalhekk, staqsi lilek innifsek: ‘Kif nirreaġixxi jien meta ħu jew oħt tagħmel żball? Kif inħossni meta xi ħadd iweġġagħni? Għandi ħabta ma nibqax inkellimha t-​tali persuna? Jew nipprova nirranġa r-​relazzjoni?’ Kristjan matur irid jegħleb il-​problema u mhux ikun problema għal ħaddieħor. Hija l-​mira tiegħek li tagħmel l-​istess ħaġa? w15 9/15 1:12, 13

Ġesù kien konvint li l-​Bibbja hi l-​Kelma t’Alla u li tagħtina l-​aqwa pariri. Biex nimitaw lil Ġesù, irridu naqraw il-​Bibbja kuljum, nistudjawha, u nimmeditaw fuq il-​lezzjonijiet li nitgħallmu minnha. Ukoll, irridu nfittxu għat-​tweġibiet tal-​mistoqsijiet li jaf ikollna. Pereżempju, temmen int b’mod sod li qed ngħixu fl-​aħħar jiem? Saħħaħ il-​fiduċja tiegħek li t-​tmiem hu fil-​qrib billi tistudja profeziji tal-​Bibbja li juru b’mod ċar u tond li qed ngħixu fl-​aħħar jiem. Tixtieq issaħħaħ il-​fidi tiegħek fil-​wegħdi t’Alla għall-​futur? Mela studja l-​profeziji tal-​Bibbja li diġà twettqu. Tassew temmen li l-​Bibbja hi prattika llum il-​ġurnata? Int tistaʼ taqra dwar aħwa rġiel u nisa li biddlu ħajjithom għall-​aħjar grazzi għall-​għajnuna tal-​Bibbja. (1 Tess. 2:13) Tistaʼ wkoll timita lil Ġesù billi timmedita fuq il-​wegħdi mill-​isbaħ taʼ Ġeħova. (Ebr. 12:2) Qis dawn il-​wegħdi bħala wegħdi li Alla għamel miegħek persunalment, u mhux biss wegħdi li għamel man-​nies inġenerali. w15 9/15 3:16, 17

Aħna nuru l-​imħabba tagħna għal Alla billi nużaw dak kollu li għandna biex nonorawh. Pereżempju, nistgħu nagħtu kontribuzzjonijiet biex nappoġġaw ix-​xogħol tas-​Saltna fil-​kongregazzjoni tagħna stess u madwar id-​dinja kollha. Kemm jekk għandna ħafna u kemm jekk għandna ftit materjalment, ilkoll nistgħu nużaw dak li għandna biex nesprimu mħabbitna għal Ġeħova. (2 Kor. 8:12) Imma hemm modi oħra kif nistgħu nuru lil Ġeħova li nħobbuh. Ġesù għallimna biex nibqgħu nfittxu l-​ewwel is-​Saltna u biex ma nkunux ansjużi dwar x’se nieklu jew x’se nilbsu. Missierna jwiegħed li se jagħtina dak li għandna bżonn. (Mt. 6:31-​33) Aħna nafdaw f’Ġeħova u nafu li se jżomm il-​wegħda tiegħu. Wara kollox, meta tassew tħobb lil xi ħadd, tafdah. Infatti, iktar ma nafdaw f’Ġeħova, iktar se nuruh li nħobbuh. (Salm 143:8) Għalhekk, għandna mnejn nistaqsu lilna nfusna: ‘Il-​pjanijiet tiegħi u l-​mod kif nuża l-​ħin u l-​enerġija tiegħi juru li tassew inħobb lil Ġeħova? Nafda jien li kuljum Ġeħova se jieħu ħsieb il-​bżonnijiet tiegħi?’ w15 9/15 5:7, 8

Qatt saqsejt lilek innifsek, ‘Ġeħova se jkun irid isalvani matul it-​tribulazzjoni l-​kbira?’ Ħtieġa importanti ħafna hi li nsaħħu l-​fidi tagħna. L-​appostlu Pietru tkellem dwar fidi li “tgħaddi mill-​provi.” (1 Pt. 1:7) It-​tribulazzjoni l-​kbira tinsab fil-​qrib ferm, u aħna rridu nkunu “t-​tip [ta’ nies] li għandna l-​fidi biex inżommu ruħna ħajja.” (Ebr. 10:39) Għalhekk, għandna naħdmu iebes biex insaħħu l-​fidi tagħna. Irridu nkunu fost dawk li se jiġu premjati meta jiġi rrivelat Ġesù Kristu, is-​Sultan tagħna. Għaldaqstant, bħal dak ir-​raġel li talab bil-​ħeġġa lil Ġesù għal iktar fidi, aħna wkoll nistgħu ngħidu: “Għinni fejn neħtieġ il-​fidi!” (Mk. 9:24) Jew, bħall-​appostli, forsi ngħidu wkoll: “Agħtina iktar fidi.”—Lq. 17:5. w15 10/15 2:1, 2

L-​appostlu Pawlu ffoka fuq “dak li hu iktar importanti.” Hu ħadem iebes ħafna biex jipprietka u jivvjaġġa f’ħafna postijiet, inkluż is-​Sirja, l-​Asja Minuri, il-​Maċedonja, u l-​Lhudija. Pawlu qal: “Waqt li ninsa l-​affarijiet taʼ warajja u niġġebbed biex nilħaq l-​affarijiet li hemm quddiemi, qed niġri lejn il-​mira għall-​premju.” (Flp. 1:10; 3:8, 13, 14) Pawlu ma kienx miżżewweġ, u dan għenu biex ‘jaqdi lill-​Mulej il-​ħin kollu u mingħajr distrazzjoni.’ (1 Kor. 7:32-​35) Bħal Pawlu, xi qaddejja taʼ Ġeħova llum jagħżlu li ma jiżżewġux ħalli jkunu jistgħu jagħmlu iktar fis-​servizz taʼ Ġeħova. (Mt. 19:11, 12) Nies mhux miżżewġa spiss ikollhom inqas responsabbiltajiet tal-​familja min-​nies miżżewġa. Iżda kemm jekk aħna miżżewġin u kemm jekk le, ilkoll nistgħu ‘nneħħu kull piż’ li jistaʼ jaljenana milli naqdu lil Ġeħova. Għandu mnejn ikollna bżonn innaqqsu mid-​drawwiet tagħna li jiħdulna l-​ħin u nagħmlu miri li jgħinuna nżidu fil-​ħin li nqattgħu fis-​servizz t’Alla. w15 10/15 3:15, 16

Il-​Bibbja tgħid: “Jien naf, O Ġeħova, li triq il-​bniedem m’hijiex f’idejh. Lanqas min jimxi ma jistaʼ jidderieġi l-​passi tiegħu.” (Ġer. 10:23) L-​istorja wriet biċ-​ċar li dan il-​kliem hu minnu. Ġeħova ma ħalaqx lin-​nies bl-​abbiltà jew bid-​dritt li jmexxu lilhom infushom mingħajr id-​direzzjoni tiegħu. Minħabba li Ġeħova ħalla l-​ħażen ikompli għal ċertu żmien, hu ta prova wkoll li t-​tmexxija tiegħu biss hi tajba. Fil-​futur, Alla se jeqred il-​ħażen kollu. Wara dan, jekk xi ħadd jiddubita l-​mod kif Alla jmexxi bi mħabba, Ġeħova se jaġixxi mill-​ewwel. Hu jistaʼ juża l-​istorja tal-​umanità bħala prova li ribelli bħal dawn għandhom jitneħħew minnufih. Qatt mhu se jerġaʼ jkun hawn il-​ħażen. w15 11/15 3:5, 6

Ġesù kien iħobb jitkellem dwar is-​Saltna t’Alla. Waqt li Ġesù kien fuq l-​art, tkellem iktar dwar is-​Saltna minn kwalunkwe ħaġ’oħra. Hu semma s-​Saltna iktar minn 100 darba matul il-​ministeru tiegħu. Is-​Saltna kienet verament importanti għal Ġesù. (Mt. 12:34) Ftit wara l-​irxoxt tiegħu, Ġesù ltaqaʼ maʼ grupp taʼ iktar minn 500. (1 Kor. 15:6) Forsi dan ġara meta Ġesù ta l-​kmand biex jippritkaw lin-​“nies tal-​ġnus kollha.” Dax-​xogħol ma kienx se jkun faċli. Hu qalilhom li l-​ippritkar kellu jdum għal żmien twil, “sal-​konklużjoni tas-​sistema.” Meta tipprietka l-​aħbar tajba llum, tkun qed tgħin biex titwettaq din il-​profezija. (Mt. 28:19, 20) Ġeħova tana “kull ħaġa tajba” biex jgħinna nippritkaw. w15 11/15 5:1-​3

L-​isem t’Alla hu rrappreżentat minn erbaʼ ittri Ebrajċi li jissejħu t-​Tetragrammaton. Aħna nistgħu nsibu t-​Tetragrammaton f’ħafna manuskritti Ebrajċi antiki, bħar-​Rombli tal-​Baħar il-​Mejjet. Nistgħu nsibu dan ukoll f’xi kopji tas-​Settanta Griega. Dawn il-​kopji ilhom li saru, fil-​fatt saru 200 sena QK u damu jinkitbu sa 100 sena WK. Ħafna nies jibqgħu impressjonati meta jaraw kemm l-​isem t’Alla jidher spiss f’manuskritti antiki. B’mod ċar, l-​isem t’Alla għandu jkun fil-​Bibbja. Però, ħafna tradutturi ma jużawx l-​isem t’Alla. Fl-​1952 ġiet ippubblikata r-​reviżjoni tal-​American Standard Version. L-​edizzjoni tal-​1901 użat l-​isem t’Alla, imma r-​reviżjoni tal-​1952 m’użatux. Għala? It-​tradutturi tagħha ħassew li “xejn mhu xieraq” li jintuża l-​isem t’Alla. Ħafna tradutturi li ttraduċew kemm bl-​Ingliż u kemm b’lingwi oħra, għamlu l-​istess. w15 12/15 2:3-​5