Kif Ragħajja Kristjani Jaqdu Lilek

F’BOSTA pajjiżi huwa possibbli li tosserva kif ir-​ragħajja jieħdu ħsieb taʼ merħla. Huma jiggwidaw, jipproteġu, u jipprovdu għan-​ngħaġ. Dan huwa taʼ interess għal anzjani Kristjani, ladarba x-​xogħol tagħhom jinkludi attivitajiet pastorali. Tabilħaqq, hija r-​responsabbiltà tagħhom ‘li jirgħu l-​Knisja [“kongregazzjoni,” NW] taʼ Alla’ u ‘li jieħdu ħsieb tal-​merħla kollha.’—Atti 20:28.

Jekk int membru tal-​kongregazzjoni Kristjana, ir-​ragħajja spiritwali kif jistgħu jaqdu lilek? U kif għandek tirreaġixxi int għall-​isforzi tagħhom għan-​nom tiegħek? Il-​kongregazzjoni għala teħtieġ l-​għajnuna tagħhom?

Protezzjoni Kontra Xiex?

Fl-​antik iljuni u annimali salvaġġi oħrajn kienu taʼ periklu għall-​imrieħel u l-​priża tagħhom kienet tkun ngħaġ individwali. Ir-​ragħajja kellhom jipprovdu protezzjoni. (1 Samwel 17:34, 35) Iva, Satana x-​Xitan “qisu ljun igħajjat, idur u jfittex ’il min sa jiblaʼ.” (1 Pietru 5:8) Hu b’korla kbira jiggwerra mhux biss kontra l-​organizzazzjoni taʼ l-​art taʼ Jehovah bħala ħaġa sħiħa imma wkoll kontra kull qaddej individwali t’Alla. X’inhi l-​mira taʼ Satana? Hu jrid jiskuraġġixxi lin-​nies taʼ Jehovah u saħansitra jżommhom lura milli “jħarsu l-​preċetti taʼ Alla” u milli jwettqu “ix-​xhieda taʼ Ġesù.”—Apokalissi 12:17.

Jehovah akkuża lir-​ragħajja governattivi taʼ Israel tal-​qedem bi traskuraġni għaliex in-​ngħaġ tiegħu kienu saru “l-​ikel taʼ kull bhima selvaġġa.” (Eżekjel 34:8) Madankollu, l-​anzjani Kristjani minn qalbhom jixtiequ li jipproteġu lil dawk fil-​kongregazzjoni sabiex ħadd ma jintilef kaġun taʼ traskuraġni jew minħabba l-​influwenza taʼ Satana, tad-​dinja, jew taʼ “ilpup” apostati. (Atti 20:29, 30) Ir-​ragħajja kif jgħinu lill-​membri kollha tal-​merħla biex iżommu s-​sensi tagħhom u joqogħdu għassa? Mod wieħed huwa billi jagħtu taħditiet Skritturali ppreparati tajjeb minn fuq il-​pletform fis-​Sala tas-​Saltna. Mod ieħor huwa permezz taʼ konversazzjonijiet pożittivi u inkuraġġanti qabel u wara l-​laqgħat. Jerġaʼ mod effettiv ieħor huwa billi jżuru lin-​“ngħaġ” personalment fid-​djar. (Qabbel Salm 95:7.) Imma x’inhi żjara pastorali? Kif għandha ssir żjara bħal din? U lil min għandha ssirlu żjara?

X’Inhi Żjara Pastorali?

Żjara pastorali m’hijiex sempliċi żjara soċjali b’xi konversazzjoni dwar affarijiet taʼ ftit importanza. Wieħed anzjan osserva: “Il-​biċċa l-​kbira tal-​pubblikaturi verament jieħdu gost jaqraw xi skrittura jew jiddiskutu xi karattru Bibliku. M’għandniex xi ngħidu, l-​anzjan m’huwiex l-​uniku wieħed li jitkellem. Il-​pubblikatur tas-​Saltna li lilu qiegħda ssir iż-​żjara normalment jieħu gost jesprimi l-​ħsibijiet tiegħu dwar il-​Bibbja, u li jagħmel dan isaħħaħ il-​fidi tiegħu stess. L-​anzjan jistaʼ jieħu miegħu xi Torri Taʼ L-​Għassa, Watchtower jew Awake! sabiex jiddiskuti xi artiklu edifikanti. Forsi hija din id-​diskussjoni spiritwali li tiddistingwi żjara pastorali minn żjara soċjali.”

Anzjan ieħor taʼ l-​esperjenza kkummenta: “Qabel iż-​żjara, l-​anzjan iqattaʼ ftit tal-​ħin jaħseb dwar x’għandu bżonn il-​pubblikatur li jkun se jżur. X’jistaʼ jkun edifikanti għall-​pubblikatur? Tifħir sinċier huwa parti essenzjali taż-​żjarat pastorali, għaliex dan isaħħaħ lil dak li jkun biex jissaporti.” Iva, żjara pastorali hija iktar minn sempliċi żjara taʼ ħbiberija li kwalunkwe wieħed mill-​kongregazzjoni jistaʼ jagħmel.

Ragħaj Għala Jżurek?

Meta anzjan iżur xi dar, hu jkun ippreparat biex jinkuraġġixxi lil kredenti sħabu u jgħinhom biex ikunu sodi fil-​fidi. (Rumani 1:11) Mela meta anzjan jew tnejn jixtiequ jżuruk, int kif tirreaġixxi? Qal wieħed indokratur li jivvjaġġa: “Jekk iż-​żjajjar pastorali jsiru biss meta xi ħaġa tmur żmerċ, l-​ewwel reazzjoni meta tiġi proposta ż-​żjara għandha mnejn tkun, ‘Għamilt xi ħaġa ħażina?’” Ragħajja spiritwali kollhom imħabba jimitaw lil Jehovah, li ħa ħsieb tas-​salmista u dejjem ‘ħeja lil ruħu,’ speċjalment fi żminijiet taʼ hemm u taʼ bżonn speċjali.—Salm 23:1-4, KŻ.

L-oġġettiv taʼ żjara pastorali huwa ‘biex tibni, mhux biex tħott.’ (2 Korintin 13:10) Inkuraġġanti tabilħaqq, huwa l-​kliem t’apprezzament għas-​sabar, għaż-​żelu, u għax-​xogħol leali taʼ dak li lilu ssir iż-​żjara. Wieħed anzjan osserva: “Fuq żjara pastorali, m’huwiex tajjeb li wieħed jagħti l-​impressjoni li jkun mar bl-​intenzjoni li jiskopri u jiddiskuti l-​problemi. M’għandniex xi ngħidu, il-​pubblikatur innifsu għandu mnejn ikun irid jitkellem dwar xi diffikultà partikulari. U jekk nagħġa qiegħda zzappap jew tiżola lilha nfisha mill-​bqija tal-​merħla, l-​anzjan jeħtieġ li jagħmel xi ħaġa biex jgħin.”

Ragħajja Kristjani bla dubju se jieħdu ħsieb speċjali taʼ xi wħud li huma bħal dawk deskritti b’dan il-​kliem: “Jiena [Jehovah] nfittex il-​mitlufa, inreġġaʼ lura l-​imxerrda, ninfaxxa l-​ġrieħi tal-​miġruħa u nqawwi l-​marida.” (Eżekjel 34:16) Iva, in-​ngħaġ għandhom mnejn ikunu jeħtieġu li jiġu mfittxijin, imreġġgħin lura, infaxxati, jew imsaħħin. Ir-​ragħajja taʼ Israel ittraskuraw dawn ir-​responsabbiltajiet. Li jitwettaq xogħol bħal dan jirrikjedi li ragħaj jersaq qrib taʼ ċerta nagħġa u jaqdi l-​bżonnijiet tagħha. Bażikament, din għandha tkun karatteristika li tiddistingwi taʼ kull żjara pastorali llum.

Ngħaġ F’Saħħithom Jeħtieġu Attenzjoni

Għandna aħna nikkonkludu li r-​ragħajja spiritwali taʼ llum m’għandhomx għalfejn juru attenzjoni partikulari għan-​ngħaġ f’saħħithom? Sewwa, meta nagħġa litterali jiġrilha xi ħaġa, ikun ferm eħfef li tiġi mgħejjuna jekk din ikollha fiduċja fir-​ragħaj. Ktieb wieħed taʼ referenza josserva li “n-​ngħaġ di natura jżommu ’l bogħod mill-​bnedmin, u li wieħed jikseb il-​fiduċja tagħhom m’huwiex dejjem faċli.” Fost affarijiet oħrajn, l-​istess ktieb jissuġġerixxi din il-​gwida bażika biex wieħed jirbaħ il-​fiduċja tan-​ngħaġ: “Kellem lin-​ngħaġ regolarment. Huma jidraw il-​leħen, u dan jassigurahom. Żur lin-​ngħaġ fil-​mergħa spiss.”​—Alles für das Schaf. Handbuch für die artgerechte Haltung (Kulma hemm bżonn għan-​Ngħaġ. Ktieb Taʼ Referenza Dwar Kif Trabbihom Sewwa).

Kuntatt persunali huwa għalhekk neċessarju jekk relazzjoni taʼ fiduċja se teżisti bejn ir-ragħaj u n-​ngħaġ. L-​istess japplika fil-​kongregazzjoni Kristjana. Anzjan innota: “Li fil-​kongregazzjoni tkun magħruf bħala anzjan li regolarment iżur lin-​ngħaġ jagħmilha iktar faċli biex iżżur lil xi ħadd li għandu l-​problemi.” Għalhekk, ragħajja spiritwali m’għandhomx jipprovaw jitimgħu u jagħtu attenzjoni esklussivament fis-​Sala tas-​Saltna. Sakemm jippermettu ċ-​ċirkostanzi, l-​anzjani għandhom isiru jafu lin-​ngħaġ billi jagħmlu żjajjar pastorali fi djarhom. Wieħed Kristjan jiftakar li meta kien għadu kif inħatar anzjan, l-​indokratur li jippresiedi ċempillu u talbu biex iżur u jfarraġ lil wieħed ħu li kien għadu kif tilef lil bintu f’inċident ikrah tat-​traffiku. L-​anzjan jammetti: “Kemm ħassejtni ddispjaċut, minħabba li qatt ma kont żort lil dan il-​ħu qabel u lanqas biss kont naf fejn kien joqgħod! Ħadt ir-​ruħ x’ħin anzjan matur offra li jiġi miegħi.” Iva, l-​anzjani jgħinu lil xulxin fuq żjajjar pastorali.

F’li jipprepara għal u jagħmel ċerti żjajjar pastorali, anzjan jistaʼ jiġi akkumpanjat minn qaddej ministerjali li qiegħed jirsisti għax-​“xogħol sabiħ” taʼ indokratur. (1 Timotju 3:1, 13) Kemm japprezza qaddej ministerjali li jara kif anzjan jaqdi lin-​ngħaġ fuq żjajjar pastorali! Anzjani u qaddejja ministerjali b’hekk isiru iktar qrib taʼ kulħadd fil-​kongregazzjoni, billi jsaħħu r-​rabtiet taʼ l-​imħabba u l-​unità Kristjani.—Kolossin 3:14.

Ippjana Ħin Għal Żjajjar Pastorali

Meta ġemgħa waħda t’anzjani ħalliet iż-​żjajjar pastorali għall-​inizjattiva taʼ dawk li jikkonduċu l-​Istudju tal-​Ktieb tal-​Kongregazzjoni, il-​pubblikaturi kollha f’xi gruppi saritilhom żjara fi żmien sitt xhur, fil-​waqt li ħadd ma saritlu żjara fi gruppi oħrajn. Dan qanqal lil wieħed anzjan biex jgħid: “Jidher li xi anzjani jieħdu l-​inizjattiva u jagħmlu ħafna xogħol pastorali, imma oħrajn għandhom bżonn l-​inkuraġġiment taʼ sħabhom l-​anzjani biex jagħmluh dan.” Għalhekk xi ġemgħat t’anzjani jagħmlu arranġamenti biex il-​pubblikaturi kollha ssirilhom żjara minn ragħajja f’perijodu definit taʼ żmien.

M’għandniex xi ngħidu, anzjan jew kwalunkwe pubblikatur ieħor jistaʼ jagħmel żjara lil xi ħadd fil-​kongregazzjoni mingħajr ma jistenna li jsiru arranġamenti speċjali. Qabel ma jagħmel żjara pastorali, wieħed anzjan iċempel u jgħid, “Jien inżur familja waħda kull xahar. Nistaʼ nagħmlilkom żjara taʼ xi siegħa jew ftit iktar xi darba x-​xahar id-​dieħel? Meta jkun konvenjenti għalikom?”

Il-​Barkiet Taʼ Żjajjar Pastorali

Hekk kif il-​pressjonijiet minn din is-​sistema mill-​agħar ikomplu jiżdiedu, żjajjar inkuraġġanti mingħand ragħajja komprensivi jsiru iktar u iktar taʼ benefiċċju. Meta dawk kollha fil-​merħla jiġu mogħtijin inkuraġġiment u għajnuna permezz taʼ żjajjar pastorali, kull nagħġa tħossha protetta u fis-​sigurtà.

Rigward kongregazzjoni li fiha l-​pubblikaturi kollha tas-​Saltna saritilhom żjara regolarment mir-​ragħajja, ġie rrapportat: “Il-​pubblikaturi saru pożittivi ferm dwar iż-​żjajjar pastorali. Kienet ħaġa komuni li pubblikatur javviċina lil xi wieħed mill-​anzjani biex jistaqsih meta kien se jagħmillu żjara oħra, billi l-​pubblikatur kien ħa gost bid-​diskussjoni edifikanti matul iż-​żjara taʼ qabel. Żjajjar pastorali kienu fattur wieħed li għen biex jitjieb l-​ispirtu tal-​kongregazzjoni.” Rapporti oħrajn jindikaw li meta ragħajja b’imħabba jamministraw b’dan il-​mod, il-​kongregazzjoni tistaʼ tikber fl-​imħabba, fl-​unità, u fil-​kordjalità. X’barka!

Ir-ragħajja Kristjani jżuru biex itejbu l-​benesseri spiritwali tan-​ngħaġ. L-​anzjani jridu jinkuraġġixxu u jsaħħu l-​kredenti sħabhom. Jekk titfaċċa problema serja li teħtieġ parir matul żjara, għandu mnejn ikun aħjar li jsiru arranġamenti għal diskussjoni f’ħin ieħor, speċjalment jekk l-​anzjan ikun akkumpanjat minn qaddej ministerjali. Hu x’inhu l-​każ, talba biex tikkonkludi ż-​żjara pastorali tkun xierqa.

Hemm xi ragħaj spiritwali li jrid iżur id-​dar tiegħek fil-​futur qarib? Jekk inhu hekk, kun f’antiċipazzjoni hienja għall-​inkuraġġiment li hemm jistenniek. Hu ġej biex jaqdik u biex isaħħek fid-​determinazzjoni biex tibqaʼ fit-​triq li twassal għall-​ħajja taʼ dejjem.—Mattew 7:13, 14. (w96 3/15)

[Kaxxa f’paġna 20]

Suġġerimenti Għal Żjajjar Pastorali

◻ Agħmel appuntament: Ġeneralment ikun tajjeb li jsir appuntament. Jekk l-​anzjan jippjana biex jittratta xi problema serja, ikun xieraq li jinforma lill-​pubblikatur dwar dan minn qabel.

◻ Preparazzjoni: Ikkunsidra l-​personalità u s-​sitwazzjoni taʼ dak li jkun. Offri tifħir mill-​qalb. Agħmilha l-​mira tiegħek li tagħti ‘don spiritwali’ inkuraġġanti li jsaħħaħ il-​fidi.—Rumani 1:11, 12.

◻ Lil min għandek tieħu miegħek: Anzjan ieħor jew qaddej ministerjali kkwalifikat.

◻ Matul iż-​żjara: L-​anzjan għandu jkun rilassat, kollu mħabba, pożittiv, u flessibbli. Staqsi dwar il-​familja, il-​benesseri tagħha, u affarijiet bħal dawn. Agħti widen bir-​reqqa. Jekk titfaċċa problema serja, għandu mnejn ikun aħjar li tirranġa għal żjara pastorali speċjali.

◻ It-​tul taż-​żjara: Żomm il-​ħin li tkunu qbiltu fuqu, u itlaq waqt li dak li żort għadu kuntent biż-​żjara.

◻ Konklużjoni taż-​żjara: Talba hija xierqa u verament apprezzata.—Filippin 4:6, 7.

[Stampa f’paġna 18]

Ragħajja Kristjani jipprovdu protezzjoni spiritwali

[Stampi f’paġna 20]

Żjajjar pastorali jipprovdu opportunitajiet mill-​aħjar għall-​inkuraġġiment spiritwali