Il-​Bijoetika u l-​Kirurġija Mingħajr Demm

FI SNIN riċenti rajna progress li ma kienx hawn bħalu fil-​qasam tal-​mediċina. Madankollu, fil-​waqt li solvew problemi mediċi, xi avvanzi ħolqu oħrajn etiċi.

It-tobba jridu jaħsbu fuq dilemmi bħal: Għandu trattament mediku aggressiv xi kultant jiġi abbandunat sabiex pazjent ikun jistaʼ jmut b’dinjità? Għandu tabib jinjora d-​deċiżjoni taʼ pazjent jekk iħoss li dan ikun fl-​aħjar interessi tal-​pazjent? Il-​kura tas-​saħħa kif għandha tiġi mqassma b’mod ġust meta trattament li jiswa l-​flus ma jkunx disponibbli għal kulħadd?

Kwistjonijiet komplessi bħal dawn ġabu lenti fuq id-​dixxiplina medika msejħa bijoetika. Din l-​ispeċjalità hija mmirata biex tgħin lil tobba u xjenzati jittrattaw maʼ implikazzjonijiet etiċi taʼ riċerki bijoloġiċi u avvanzi mediċi. Ladarba ħafna mid-​deċiżjonijiet l-​iżjed diffiċli jqumu fi sptarijiet, ħafna sptarijiet stabbilew kumitati bijoetiċi. Is-​soltu l-​membri tal-​kumitat​—inklużi tobba u avukati—​jattendu seminars fuq il-​bijoetika, fejn problemi etiċi fil-​mediċina jiġu analizzati.

Xi mistoqsijiet imqajmin taʼ spiss f’seminars bħal dawn huma: Sa liema punt għandhom it-​tobba jirrispettaw it-​twemmin tax-​Xhieda taʼ Jehovah li, primarjament għal raġunijiet reliġjużi, jirrifjutaw li jaċċettaw trasfużjonijiet tad-​demm? Għandu tabib jagħti trasfużjoni lil pazjent kontra r-​rieda tal-​pazjent jekk din tidher medikament “taʼ min jirrikmandaha”? Ikun dan etiku li jagħmel hekk mingħajr l-​għarfien tal-​pazjent, bħal li kieku ‘dak li l-​pazjent ma jafx mhux se jagħmillu ħsara’?

Sabiex jittrattaw kwistjonijiet bħal dawn b’mod xieraq, it-​tobba għandhom bżonn fehma oġġettiva tal-​punt di vista tax-​Xhieda. Min-​naħa tagħhom, ix-​Xhieda taʼ Jehovah huma ħerqanin li jispjegaw il-​pożizzjoni tagħhom lit-​tobba, billi jirrealizzaw li fehma reċiproka tistaʼ sservi biex tevita konfront.

L-​Imħuħ Jiltaqgħu

Il-​Professur Diego Gracia, awtorità prominenti fil-​bijoetika fi Spanja, ried li l-​klassi tiegħu jkollha djalogu bħal dan. “Huwa xieraq li intom [ix-Xhieda taʼ Jehovah] tingħataw opportunità biex tesprimu t-​tħassib tagħkom . . . meta wieħed iqis id-​diffikultajiet li kellkom f’konnessjoni mat-​trasfużjonijiet tad-​demm,” qal il-​professur.

B’hekk, fil-​5 taʼ Ġunju, 1996, tliet rappreżentanti tax-​Xhieda taʼ Jehovah kienu mistednin fil-​Complutense University f’Madrid, ġewwa Spanja, biex jispjegaw il-​ħarsa tagħhom. Xi 40 tabib u professjonisti oħrajn kienu preżenti.

Wara li x-​Xhieda għamlu preżentazzjoni qasira, is-​sessjoni nfetħet għall-​mistoqsijiet. Dawk kollha preżenti qablu li pazjent adult għandu jkollu d-​dritt li jirrifjuta xi trattament mediku partikulari. Il-​klassi qablet ukoll li trasfużjoni m’għandha qatt tiġi amministrata mingħajr il-​kunsens informat tal-​pazjent. Madankollu, xi aspetti tal-​waqfa tax-​Xhieda kkonċernawhom.

Mistoqsija waħda kienet fuq il-​flus. Xi kultant kirurġija mingħajr l-​użu tad-​demm tinvolvi apparat speċjali, bħalma huma l-​kirurġija bil-​laser, kif ukoll pilloli li jqumu l-​flus, bħall-​erythropoietin, użata biex tistimula l-​produzzjoni taċ-​ċelloli ħomor tad-​demm. Tabib minnhom staqsa jekk billi jirrifjutaw għażla li ma tqumx daqshekk flus (demm omologu), ix-​Xhieda jistgħux jippretendu li s-​servizzi pubbliċi tas-​saħħa jagħtuhom privileġġi speċjali.

Fil-waqt li rrikonoxxa li l-​flus huma neċessarjament fattur li t-​tobba jridu jikkunsidraw, rappreżentant tax-​Xhieda rrefera għal studji ppubblikati li janalizzaw in-​nefqa taʼ wara l-​kwinti tat-​trasfużjonijiet taʼ demm omologu. Dawn jinkludu n-​nefqa għall-​kura taʼ komplikazzjonijiet relatati mat-​trasfużjonijiet, kif ukoll it-​telf taʼ flus li jirriżulta minn komplikazzjonijiet bħal dawn. Hu kkwota studju komprensiv mill-​Istati Uniti li indika li pinta medja taʼ demm, għalkemm inizjalment tqum biss $250, attwalment ipproduċiet spejjeż taʼ iktar minn $1,300​—iktar minn ħames darbiet is-​somma oriġinali. B’hekk, hu wera li, meta jiġu kkunsidrati l-​fatturi kollha, kirurġija mingħajr demm hija ekonomika. Barra minn hekk, ħafna mill-​hekk imsejjaħ infiq żejjed taʼ kirurġija mingħajr demm huwa apparat li jistaʼ jerġaʼ jintuża.

Mistoqsija oħra li tippreokkupa lil diversi tobba hija relatata mal-​pressjoni minn dawk fil-​kongregazzjoni. X’jiġri, huma staqsew, jekk Xhud iċedi u jaċċetta trasfużjoni taʼ demm? Jiġi maqtugħ mill-​komunità tax-​Xhieda?

Ir-rispons ikun jiddependi fuq is-​sitwazzjoni attwali, għaliex li wieħed ma jobdix il-​liġi t’Alla hija ċertament kwistjoni serja, waħda li l-​anzjani tal-​kongregazzjoni jkunu jridu jeżaminaw. Ix-​Xhieda jkunu jridu jgħinu lil kwalunkwe individwu li jkun għadda minn esperjenza trawmatika taʼ kirurġija li tipperikola l-​ħajja u li jkun aċċetta trasfużjoni. Xhud bħal dan żgur li se jħossu mdejjaq ferm u se jkun imħasseb dwar ir-​relazzjoni tiegħu m’Alla. Individwu bħal dan għandu mnejn ikollu bżonn l-​għajnuna u lil min jifhmu. Ladarba l-​pedament tal-​Kristjanità hija l-​imħabba, l-​anzjani jkunu jridu, bħal fil-​każi ġudizzjarji kollha, li jtaffu s-​sodizza bil-​ħniena.—Mattew 9:12, 13; Ġwann 7:24.

“Ma taħsbux li dalwaqt se terġgħu tbiddlu l-​waqfa etika tagħkom?” staqsa professur fil-​bijoetika, li ġie mill-​Istati Uniti. “Reliġjonijiet oħrajn hekk għamlu fi snin riċenti.”

Lil dan qalulu li l-​waqfa tax-​Xhieda rigward il-​qdusija tad-​demm hija twemmin dottrinali iktar milli xi opinjoni etika suġġetta għal li tiġi riveduta perjodikament. Il-​kmand ċar Bibliku ma jagħti lok għal ebda kompromess. (Atti 15:28, 29) Li jikser liġi divina bħal din ikun inaċċettabbli għal Xhud daqs li jaċċetta l-​idolatrija jew il-​fornikazzjoni.

Ix-Xhieda taʼ Jehovah japprezzaw ferm il-​volontà taʼ tobba​—bħal dawk preżenti għas-​seminar tal-​bijoetika f’Madrid—​li jirrispettaw id-​deċiżjoni tagħhom li jfittxu trattament alternattiv li jaqbel mal-​konvinzjonijiet tagħhom ibbażati fuq il-​Bibbja. Bla dubju, il-​bijoetika se jkollha rwol importanti f’li ttejjeb ir-​relazzjonijiet bejn tobba u pazjenti u f’li tippromwovi rispett akbar għax-​xewqat tal-​pazjent.

Bħalma ġie rrapportat li qal tabib famuż Spanjol, it-​tobba jridu jiftakru dejjem li huma “jaħdmu bi strumenti imperfetti u b’mezzi fallibbli.” Għalhekk għandhom bżonn il-​“konvinzjoni li l-​imħabba għandha dejjem testendi speċjalment fejn hemm nuqqas t’għarfien.” (w97 2/15)