LIBRERIJA ONLAJN tat-Torri tal-Għassa
LIBRERIJA ONLAJN
tat-Torri tal-Għassa
Malti
@
  • ċ
  • ġ
  • ħ
  • ż
  • à
  • è
  • ò
  • ù
  • ʼ
  • BIBBJA
  • PUBBLIKAZZJONIJIET
  • LAGĦQAT
  • w99 10/1 pp. 3-4
  • Għala Daqshekk Ftit Żmien?

M'hawnx video għall-għażla li għamilt.

Jiddispjaċina, kien hemm problema biex jillowdja l-vidjow.

  • Għala Daqshekk Ftit Żmien?
  • It-Torri tal-Għassa Jħabbar is-Saltna taʼ Ġeħova—1999
  • Sottitli
  • Materjal Simili
  • Żmien bl-​Abbundanza
  • Inqas Ħin minn qatt Qabel
  • Mhux Aħna biss Għandna Ftit Żmien
  • Nużaw bil-​Għaqal iż-​Żmien li Għandna Issa
  • Jehovah Jgħallimna Ngħoddu Jiem Ħajjitna
    It-Torri tal-Għassa Jħabbar is-Saltna taʼ Ġeħova—2001
  • Iż-Żmien u l-Eternità—X’Nafu Tassew Dwarhom?
    It-Torri tal-Għassa Jħabbar is-Saltna taʼ Ġeħova—1999
  • Nimxu m’Alla—Bl-Eternità Quddiem Għajnejna
    It-Torri tal-Għassa Jħabbar is-Saltna taʼ Ġeħova—1998
  • Faħħru lis-Sultan taʼ L-Eternità!
    It-Torri tal-Għassa Jħabbar is-Saltna taʼ Ġeħova—1996
Ara Iżjed
It-Torri tal-Għassa Jħabbar is-Saltna taʼ Ġeħova—1999
w99 10/1 pp. 3-4

Għala Daqshekk Ftit Żmien?

IŻ-​ŻMIEN. Għandna mnejn insibuha diffiċli biex infissru bl-​eżatt din il-​kelma, imma li nafu żgur huwa li donnu qatt m’għandna żmien jew ħin biżżejjed. Nafu wkoll li ż-​żmien jgħaddi malajr u ma jistenna lil ħadd. Fil-​fatt, taʼ spiss ngħidu, “Il-​ħin itir.”

Minkejja dan, huwa evidenti li l-​poeta Ingliż Austin Dobson kien iktar eżatt meta qal dal-kliem fl-​1877: “Intom tgħidu li ż-​żmien jgħaddi u jmur? Kemm sejrin imqarrqin! Jaħasra, iż-​Żmien hawn jibqaʼ, huwa aħna li ngħaddu u mmorru.” Minn mindu miet fl-​1921, Dobson ilu li ħalliena għal kważi 80 sena; iż-​żmien baqaʼ għaddej.

Żmien bl-​Abbundanza

Dwar il-​Ħallieq taʼ l-​umanità, il-​Bibbja tgħidilna: “Qabel ma twieldu l-​iġbla u tnisslu l-​art u d-​dinja, minn dejjem għal dejjem int, ja Alla.” (Salm 90:2, Saydon) Jew kif tpoġġiha n-​New World Translation, “minn żmien indefinit għal żmien indefinit int Alla.” Mela ż-​żmien se jdum daqskemm se jdum Alla nnifsu​—għal dejjem!

B’kuntrast qawwi m’Alla, li għandu eternità taʼ żmien għad-​dispożizzjoni tiegħu, naqraw hekk dwar il-​bnedmin: “Jiemna kollha jgħibu minħabba qilltek, jintemmu bħal tnehida s-​snin taʼ ħajjitna. Żmien ħajjitna hu b’kollox sebgħin sena; l-​iżjed tmenin, jekk inkunu f’saħħitna; u l-​biċċa l-​kbira taħbit u niket; malajr jgħaddu, u aħna mmorru magħhom.”—Salm 90:9, 10.

Għala hi daqshekk qasira l-​ħajja llum, ladarba l-​Bibbja tgħallem ċar u tond li l-​iskop t’Alla għall-​bnedmin hu li dawn jgħixu għal dejjem? (Ġenesi 1:27, 28; Salm 37:29) Minflok ma jgawdu tul taʼ ħajja bla limitu kif kien l-​iskop t’Alla, il-​bnedmin għala għandhom medja, l-​iktar l-​iktar, taʼ inqas minn 30,000 ġurnata? Il-​bnedmin għala għandhom daqshekk ftit żmien? Min hu jew x’inhu responsabbli għal din il-​qagħda tal-​biki? Il-​Bibbja tipprovdi tweġibiet ċari u sodisfaċenti.a

Inqas Ħin minn qatt Qabel

L-​anzjani fl-​età jistgħu jivverifikaw kif f’dawn l-​aħħar għexur taʼ snin, il-​ħajja saret mgħaġġla iktar minn qatt qabel. Waħda ġurnalista, Dr. Sybille Fritsch, ħarġet il-​punt li matul dawn l-​aħħar 200 sena, il-​ġimgħa tax-​xogħol niżlet minn 80 għal 38 siegħa, “u madankollu xorta waħda ma waqafniex ingergru fuq kemm m’għandniex ħin.” Hi spjegat aħjar: “M’għandna ħin għal xejn; il-​ħin ifisser flus; niġġieldu għall-​ħin qisna qed niġġieldu għan-​nifs; ħajja mħabbta u mimlija ġiri.”

Invenzjonijiet ġodda fetħu opportunitajiet u possibbiltajiet li lanqas biss kienu joħolmu bihom in-​nies taʼ dari. Imma iktar ma wieħed ikollu l-​possibbiltà li jieħu sehem f’diversi attivitajiet, iktar iħossu mdejjaq meta jinduna kemm għandu ftit żmien biex jagħmilhom. Il-​lum il-​ġurnata, f’ħafna partijiet tad-​dinja, in-​nies jagħmlu kollox bil-​ħin, għaddejjin b’nifishom maqtugħ minn appuntament għal ieħor. Il-​missier irid jitlaq għax-​xogħol fis-​sebgħa taʼ fil-​għodu, l-​omm trid twassal it-​tfal l-​iskola sat-​tmienja u nofs taʼ fil-​għodu, in-​nannu għandu appuntament għand it-​tabib fl-​għaxra neqsin għoxrin taʼ fil-​għodu, u lkoll kemm aħna rridu nlestu għax għandna laqgħa importanti fis-​sebgħa u nofs taʼ fil-​għaxija. Fil-​ġirja biex inlaħħqu minn appuntament għal ieħor, bilkemm jibqaʼ ħin għal ftit mistrieħ. U tismagħna ngergru minħabba r-​rutina taʼ kuljum u minħabba l-​ġenn tal-​ħajja.

Mhux Aħna biss Għandna Ftit Żmien

L-​Avversarju t’Alla, Satana x-​Xitan, li l-​komplotti tiegħu wasslu biex inaqqsu ħesrem it-​tul tal-​ħajja taʼ l-​umanità, issa waqqaʼ l-​ġebla fuq siequ bl-​istess ħażen tiegħu. (Qabbel Galatin 6:7, 8.) Meta jitkellem fuq it-​twelid tas-​Saltna Messjanika fis-​sema, Apokalissi 12:12 jagħtina għalxiex nittamaw meta jgħidilna: “Għalhekk ifirħu, smewwiet, u intom li tgħammru fihom. Ħażin għalikom, art u baħar, għax fikom niżel id-​Demonju, b’korla kbira fuqu, għax jaf li żmien ftit baqagħlu.” Korsiv tagħna.

Skond il-​kronoloġija Biblika li hi taʼ min joqgħod fuqha u skond it-​twettiq tal-​profezija Biblika, aħna issa qed ngħixu fit-​tmiem taʼ dak il-​‘ftit żmien.’ Kemm hu taʼ ferħ li nafu li ż-​żmien li Satana baqagħlu ħieles dalwaqt wasal biex jispiċċalu għalkollox! Ladarba jitwarrab min-​nofs, il-​bnedmin ubbidjenti se jiġu restawrati għall-​perfezzjoni, u jkunu jistgħu jiksbu l-​ħajja taʼ dejjem li Jehovah ried li jkollhom fil-​bidu. (Apokalissi 21:1-4) In-​nuqqas taʼ ħin m’huwiex se jkun iktar problema.

Tistaʼ timmaġina x’se jkun ifisser li jkollok ħajja taʼ dejjem​—li tgħix għal dejjem? Qatt iktar m’int se tkun imdejjaq b’affarijiet li ma sibtx il-​ħin biex tagħmilhom. Jekk teħtieġ iktar żmien, hemm għada, jew il-​ġimgħa d-​dieħla, jew is-​sena d-​dieħla​—fil-​fatt, hemm eternità vasta mifruxa quddiemek!

Nużaw bil-​Għaqal iż-​Żmien li Għandna Issa

Billi jaf li ż-​żmien li baqagħlu biex jinfluwenza lill-​bnedmin huwa limitat, Satana jipprova jżomm lin-​nies tant biżlin li ma jibqgħalhom ebda ħin biex jagħtu widen għall-​aħbar tajba tas-​Saltna stabbilita t’Alla. Għalhekk aħna nagħmlu tajjeb jekk nagħtu kas il-​parir divin: “Qisu sewwa kif iġġibu ruħkom, mhux bħal nies bla dehen, iżda bħal nies għorrief, li jgħożżu ż-​żmien [‘jixtru ż-​żmien opportun,’ NW], għaliex ħżiena huma l-​jiem. Għalhekk tkunux bla għaqal, imma fittxu x’inhi r-​rieda tal-​Mulej.”—Efesin 5:15-17.

Kemm huwa vitali li nużaw il-​ħin tagħna bil-​għaqal għal dawk l-​affarijiet l-​iktar importanti minflok ma naħluh niġru wara affarijiet bla siwi li ma jġibu l-​ebda benefiċċju dejjiemi! Għandna nikkultivaw l-​istess attitudni li kellu Mosè meta talab minn qiegħ qalbu lil Jehovah b’dan il-​kliem: “Għallimna ngħoddu jiem ħajjitna, sabiex aħna nimxu bil-​għaqal.”—Salm 90:12.

Veru, fid-​dinja tal-​lum kulħadd jinsab imħabbat. Minkejja dan, ix-​Xhieda taʼ Jehovah iħeġġuk mill-​fond taʼ qalbhom biex tqattaʼ ftit mill-​ħin prezzjuż tiegħek titgħallem dwar il-​ħtiġijiet t’Alla sabiex tikseb il-​ħajja taʼ dejjem taħt it-​tmexxija tas-​Saltna tiegħu. Billi tqattaʼ siegħa fil-​ġimgħa tistudja l-​Bibbja sistematikament, ‘tfittex x’inhi r-​rieda t’Alla,’ int tkun tistaʼ tesperjenza personalment it-​twettiq taʼ dan il-​kliem: “Tbiegħed mill-​ħażen u agħmel it-​tajjeb, biex tibqaʼ tgħammar għal dejjem. Il-​ġusti jirtu l-​art, u jgħammru fiha għal dejjem.”—Salm 37:27, 29.

[Nota taʼ taħt]

a Ara l-​ktieb Għarfien Li Jwassal Għall-​Ħajja Taʼ Dejjem, kapitlu 6, pubblikat mill-​Watchtower Bible and Tract Society of New York, Inc.

    Pubblikazzjonijiet bil-Malti (1990-2025)
    Oħroġ
    Illoggja
    • Malti
    • Ixxerja
    • Preferenzi
    • Copyright © 2025 Watch Tower Bible and Tract Society of Pennsylvania
    • Kundizzjonijiet għall-Użu
    • Privacy Policy
    • Privacy Settings
    • JW.ORG
    • Illoggja
    Ixxerja