Żgħażagħ—Jehovah Mhux Se Jinsa Dak li Intom Għamiltu!

“Għax Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.”—Lhud 6:10.

1. Il-​kotba Bibliċi taʼ Lhud u Malakija kif juru li Jehovah japprezza s-​servizz tiegħek?

QATT għamilt xi ħaġa tajba għal xi ħabib u dan lanqas biss irringrazzjak? Kemm tweġġaʼ meta tkun ġeneruż maʼ xi ħadd u dan ma japprezzax, jew saħansitra agħar minn hekk, jinsa għalkollox xi tkun għamilt miegħu. Iżda, kemm hu differenti meta nagħtu servizz b’qalb sħiħa lil Jehovah! Il-​Bibbja tgħid: “Għax Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.” (Lhud 6:10) Aħseb daqsxejn xi jfisser dan. Jehovah saħansitra jaraha bħala li Hu wettaq xi ħaġa inġusta—dnub—li kieku kellu jinsa dak li għamilt u li għadek qed tagħmel fis-​servizz tiegħu. Kemm hu Alla li japprezza!—Malakija 3:10.

2. X’inhu li jagħmel is-​servizz li tagħti lil Jehovah wieħed verament speċjali?

² Int għandek opportunità speċjali biex tqim u taqdi lil dan Alla mimli gratitudni. Peress li hemm biss xi sitt miljun Xhud taʼ Jehovah meta tqabbilhom mas-​sitt biljun persuna li hawn fid-​dinja, il-​privileġġ li għandek huwa tabilħaqq wieħed rari. Barra minn hekk, il-​fatt li qed tismaʼ u twieġeb għall-​messaġġ taʼ l-​aħbar tajba juri li Jehovah jieħu interess persunali fik. Wara kollox, Ġesù qal: “Ħadd ma jistaʼ jiġi għandi jekk il-​Missier li bagħatni ma jiġbdux lejja.” (Ġwann 6:44) Iva, Jehovah jgħin lin-​nies b’mod individwali biex jieħdu vantaġġ mill-​benefiċċji tas-​sagrifiċċju taʼ Ġesù.

Apprezza l-​Privileġġ Grandjuż li Għandek

3. Ulied Koraħ kif esprimew l-​apprezzament għall-​privileġġ li jaqdu lil Jehovah?

³ Bħalma diġà ssemma fl-​artiklu taʼ qabel, int tinsab f’pożizzjoni unika biex tferraħ qalb Jehovah. (Proverbji 27:11) Din hi xi ħaġa li għandek dejjem tapprezza. F’wieħed mis-​Salmi ispirati tagħhom, ulied Koraħ esprimew l-​apprezzament għall-​privileġġ li jaqdu lil Jehovah. Fih naqraw: “Għax jum wieħed fit-​tempju tiegħek aħjar minn elf jum f’post ieħor; aħjar noqgħod fuq l-​għatba taʼ dar Alla tiegħi milli ngħammar fit-​tined tal-​ħżiena.”—Salm 84:11 (84:​10, NW).

4. (a) X’inhu li jistaʼ jġiegħel lil xi wħud iħarsu lejn il-​qima taʼ Jehovah bħala sikkatura? (b) Jehovah b’liema mod juri li hu ħerqan biex jinnota u jippremja lill-​qaddejja tiegħu?

⁴ Hekk tħossok int dwar il-​privileġġ li għandek li taqdi lil Missierek tas-​sema? Huwa minnu li kultant jidher qisu li l-​qima taʼ Jehovah qed tnaqqas il-​libertà tiegħek. Huwa veru wkoll li biex tgħix skond il-​prinċipji tal-​Bibbja jeħtieġ li tagħmel xi daqsxejn taʼ sagrifiċċju persunali. Iżda, fl-​aħħar mill-​aħħar dak kollu li Jehovah jitlob minnek huwa għall-​ġid tiegħek stess. (Salm 1:​1-3) Barra minn hekk, Jehovah jara l-​isforzi li tagħmel u juri l-​apprezzament tiegħu għal-​lealtà tiegħek. Tabilħaqq, bħalma kiteb Pawlu, Jehovah “jagħti l-​ħlas xieraq lil dawk li jfittxuh.” (Lhud 11:6) Jehovah qed ifittex l-​opportunitajiet biex jagħmel dan. Profeta ġust f’Iżrael tal-​qedem kiteb: “Għax għajnejh jiġru fuq l-​art kollha, isaħħaħ lil dawk li qalbhom marbuta fis-​sħiħ miegħu.”—2 Kronaki 16:9.

5. (a) X’inhu wieħed mill-​aqwa modi li bih tistaʼ turi li qalbek hi sħiħa lejn Jehovah? (b) Għala tistaʼ ssibha diffiċli biex titkellem m’oħrajn dwar it-​twemmin tiegħek?

⁵ Wieħed mill-​aqwa modi kif tistaʼ turi lil Jehovah li qalbek hi sħiħa lejh hu billi titkellem dwaru m’oħrajn. Qatt ġietek l-​opportunità li titkellem maʼ xi wħud minn sħabek taʼ l-​iskola dwar it-​twemmin tiegħek? Għall-​ewwel, dan jistaʼ jidher iebes, u anki l-​ħsieb biss jistaʼ jbeżżgħek xi ftit. Imbagħad forsi tistaqsi, ‘U jekk jibdew jidħqu bija? Jew jekk jaħsbu li r-​reliġjon tiegħi hi stramba?’ Ġesù qal li mhux kulħadd kien se jismaʼ l-​messaġġ tas-​Saltna. (Ġwann 15:20) Madankollu, dan ma jfissirx li int se tiġi ridikolat u mwarrab għall-​bqija taʼ ħajtek. Pjuttost il-​kontra, għax ħafna Xhieda żgħażagħ sabu lil min jismagħhom u saħansitra kisbu rispett akbar mingħand sħabhom għaliex żammew sod mat-​twemmin tagħhom.

“Jehovah Se Jgħinek”

6, 7. (a) Waħda tfajla taʼ 17-il sena kif irnexxielha tagħti xiehda lil sħabha tal-​klassi? (b) X’tgħallimt mill-​esperjenza taʼ Jennifer?

⁶ Imma kif tistaʼ trabbi l-​kuraġġ biex titkellem dwar it-​twemmin tiegħek? Għax ma tagħmilhiex il-​mira tiegħek li tkun sinċier u dirett meta n-​nies jistaqsuk dwar ir-​reliġjon tiegħek? Ikkunsidra l-​esperjenza taʼ Jennifer li għandha 17-il sena. Hi tgħid: “Kont fil-​brejk taʼ l-​iskola. It-​tfajliet fuq l-​istess mejda tiegħi inzertaw kienu qed jiddiskutu r-​reliġjon, u waħda minnhom staqsietni lil liema reliġjon kont nappartjeni.” Stħat tweġibha Jennifer? Hi tammetti: “Iva, għax ma kontx naf kif se jirreaġixxu.” Allura, Jennifer x’għamlet? Hi tkompli: “Għedtilhom li jien waħda mix-​Xhieda taʼ Jehovah. Għall-​ewwel dehru sorpriżi. Milli jidher, kellhom l-​idea li x-​Xhieda taʼ Jehovah kienu nies strambi. Dan qanqalhom jagħmluli xi mistoqsijiet u rnexxieli niċċaralhom xi ideat żbaljati li kellhom. Anki wara dak il-​jum, kultant xi wħud mit-​tfajliet kienu jiġu fuqi u jistaqsuni xi ħaġa.”

⁷ Iddispjaċieha Jennifer talli ħadet l-​opportunità biex titkellem dwar it-​twemmin tagħha? Lanqas xejn! Hi tgħid: “Meta għadda l-​brejk ħassejtni kuntenta minħabba dak li ġara. Issa dawk it-​tfajliet jafu aħjar min huma verament ix-​Xhieda taʼ Jehovah.” Issa Jennifer tagħti dan il-​parir sempliċi: “Jekk issibha diffiċli biex tagħti xiehda lil sħabek tal-​klassi jew lill-​għalliema, għid talba malajr. Jehovah żgur jgħinek. Se tħossok kuntent talli tkun użajt sew l-​opportunità biex tagħti xiehda.”—1 Pietru 3:15.

8. (a) It-​talb kif għen lil Neħemija meta ffaċċja sitwazzjoni li ma kienx qed jistennieha? (b) Liema huma xi sitwazzjonijiet fl-​iskola meta jistaʼ jkollok bżonn tgħid talba qasira f’qalbek lil Jehovah?

⁸ Innota li Jennifer tissuġġerixxi li ‘tgħid talba malajr’ lil Jehovah meta tiġik l-​opportunità biex tagħti xiehda dwar it-​twemmin tiegħek. Dan hu eżatt dak li għamel Neħemija, il-​kuppier tas-​Sultan Persjan Artasersi, meta ġie f’sitwazzjoni li ma kienx qed jistennieha. Neħemija kien jidher inkwetat għax kien ġie informat dwar is-​sitwazzjoni diffiċli tal-​Lhud u kien sar jaf li l-​ħajt u l-​bibien taʼ Ġerusalemm kienu ħerba. Is-​sultan innota li Neħemija kien jidher inkwetat, allura staqsieh x’kien ġralu. Qabel ma wieġbu Neħemija talab għall-​gwida. Imbagħad, bil-​kuraġġ kollu talab il-​permess biex imur lura Ġerusalemm u jgħin fil-​bini mill-​ġdid tal-​belt imġarrfa. Artasersi aċċetta t-​talba taʼ Neħemija. (Neħemija 2:​1-8) X’titgħallem minn dan? Jekk tħossok tistħi meta tiġik l-​opportunità biex tagħti xiehda dwar it-​twemmin tiegħek, toqgħodx lura milli tgħid talba f’qalbek. Pietru kiteb: “Ixħtu [fuq Jehovah] l-​ħsibijiet kollha tagħkom għax hu jaħseb fikom.”—1 Pietru 5:7; Salm 55:23 (55:​22, NW).

‘Lest biex Tagħti Tweġiba’

9. Leah, li għandha 13-il sena, kif irnexxielha tqassam 23 kopja tal-​ktieb Iż-​Żgħażagħ Jistaqsu?

⁹ Ikkunsidra esperjenza oħra. Leah, li għandha 13-il sena, kienet qed taqra l-​ktieb Iż-​Żgħażagħ Jistaqsu—Tweġibiet Prattiċi għall-​Mistoqsijiet Tagħhoma waqt il-​brejk taʼ l-​iskola. Hi tgħid: “It-​tfal l-​oħra bdew iħarsu lejja, u f’daqqa waħda warajja nġemgħu grupp sħiħ taʼ tfal biex jaraw x’qed naqra. Bdew jistaqsuni fuqiex kien il-​ktieb.” Sakemm wasalna biex immorru d-​dar, erbaʼ tfajliet staqsew lil Leah biex iġġibilhom kopja tal-​ktieb Iż-​Żgħażagħ Jistaqsu. Dawn it-​tfajliet ma damux ma wrew il-​ktieb lil xi tfajliet oħra, u dawn ukoll riedu kopja. Fil-​ġimgħat li segwew, Leah ħalliet 23 kopja tal-​ktieb Iż-​Żgħażagħ Jistaqsu maʼ sħabha tal-​klassi u l-​ħbieb tagħhom. Sabitha faċli Leah biex titkellem meta l-​oħrajn staqsewha dwar il-​ktieb li kienet qed taqra? Ma tantx! Hi tammetti: “Għall-​ewwel stħajt. Madankollu, tlabt, u kont naf li Jehovah kien miegħi.”

10, 11. Tfajla żagħżugħa minn Iżrael kif irnexxielha tgħin lill-​kap taʼ l-​armata Sirjana biex isir jaf lil Jehovah, u liema bidliet għamel wara li sar jafu?

¹⁰ L-​esperjenza taʼ Leah għandha mnejn tfakkrek f’sitwazzjoni simili għal dik li ffaċċjat tfajla żagħżugħa minn Iżrael li ttieħdet bħala lsira lejn is-​Sirja. Nagħman, kap taʼ l-​armata Sirjana, kellu l-​ġdiem. Wisq probabbli kienet martu li bdiet il-​konversazzjoni li qanqlet lit-​tfajla żgħira biex titkellem dwar it-​twemmin tagħha. Hi qalet: “M’hux li kien sidi quddiem il-​profeta li hemm f’Samarija! Għax kien ineħħilu l-​ġdiem li għandu!”—2 Slaten 5:​1-3.

¹¹ Minħabba l-​qlubija taʼ din it-​tfajla żagħżugħa, Nagħman sar jaf li “ma hemmx Alla ieħor fid-​dinja kollha, ħlief f’Iżrael.” Hu saħansitra qatagħha li “m’huwiex se jagħmel iżjed sagrifiċċji tal-​ħruq u offerti lil allat oħra, jekk mhux lill-​Mulej.” (2 Slaten 5:​15, 17) Jehovah żgur li bierek il-​kuraġġ taʼ dik it-​tfajla. Hu jistaʼ u se jagħmel l-​istess maż-​żgħażagħ taʼ llum. Leah rat kemm dan huwa minnu. Maż-​żmien, xi wħud minn sħabha taʼ l-​iskola marru fuqha u qalulha li l-​ktieb Iż-​Żgħażagħ Jistaqsu kien qed jgħinhom fil-​mod kif jaġixxu. Leah tgħid: “Ħassejtni kuntenta għax kont naf li qed ngħin lil oħrajn jitgħallmu iktar dwar Jehovah u fl-​istess ħin qed ngħinhom jibdlu ħajjithom.”

12. Kif tistaʼ tissaħħaħ biex tiddefendi t-​twemmin tiegħek?

¹² Int jistaʼ jkollok esperjenzi bħal dawk taʼ Jennifer u Leah. Segwi l-​parir taʼ Pietru, li kiteb li bħala Kristjan għandek ‘tkun dejjem lest biex tagħti tweġiba lil kull min jitolbok il-​għala tat-​tama li għandek; imma twieġeb bil-​ħlewwa u bir-​rispett.’ (1 Pietru 3:​15, 16a) Kif tistaʼ tagħmel dan? Imita l-​ħajja tal-​Kristjani taʼ l-​ewwel seklu li talbu lil Jehovah biex jgħinhom jippridkaw “bil-​kuraġġ kollu.” (Atti 4:29) Imbagħad kun kuraġġuż u tkellem m’oħrajn dwar it-​twemmin tiegħek. Għandek mnejn tibqaʼ skantat bir-​riżultati. Iktar minn hekk, se tferraħ qalb Jehovah.

Vidjos u Proġetti Speċjali

13. Xi żgħażagħ ħadu vantaġġ minn liema opportunitajiet biex jagħtu xiehda? (Ara l-​kaxxi f’paġni 20 u 21.)

¹³ Ħafna żgħażagħ spjegaw it-​twemmin tagħhom lil sħabhom taʼ l-​iskola jew lill-​għalliema billi użaw il-​vidjos. Xi drabi, il-​proġetti taʼ l-​iskola fetħulhom ukoll l-​opportunità biex iġibu tifħir lil Jehovah. Per eżempju, żewġ subien taʼ 15-il sena, it-​tnejn li huma Xhieda taʼ Jehovah, ġew inkarigati jiktbu rapport dwar waħda mir-​reliġjonijiet tad-​dinja bħala parti mil-​lezzjoni taʼ l-​istorja tad-​dinja. Huma ngħaqdu bħala tim biex jiktbu r-​rapport tagħhom dwar ix-​Xhieda taʼ Jehovah u bħala sors għall-​informazzjoni tagħhom użaw il-​ktieb Jehovah’s Witnesses​—Proclaimers of God’s Kingdom.b Barra minn hekk, kellhom jippreżentaw rapport orali taʼ ħames minuti. Wara dan, l-​għalliem u l-​istudenti tant kellhom mistoqsijiet li ż-​żewġ subien kellhom jibqgħu quddiem il-​klassi għal 20 minuta oħra. Diversi ġimgħat wara, sħabhom tal-​klassi kienu għadhom qed jistaqsu dwar ix-​Xhieda taʼ Jehovah!

14, 15. (a) Il-​biżaʼ mill-​bniedem għala huwa taʼ xkiel? (b) Għala għandek tħossok kunfidenti meta titkellem dwar it-​twemmin tiegħek m’oħrajn?

¹⁴ Bħalma juru l-​esperjenzi li għadna kif rajna, int jistaʼ jkollok barkiet kbar meta titkellem dwar it-​twemmin u l-​konvinzjonijiet tiegħek bħala wieħed mix-​Xhieda taʼ Jehovah. Tħallix il-​biżaʼ mill-​bniedem iċaħħdek mill-​privileġġ u l-​ferħ li jiġi milli tgħin lil oħrajn isiru jafu lil Jehovah. Il-​Bibbja tistqarr: “Min jibżaʼ mill-​bniedem jaqaʼ fi xkiel; imma min jittama fil-​Mulej ikun fil-​kenn.”—Proverbji 29:25.

¹⁵ Ftakar li, bħala żagħżugħ Kristjan int għandek xi ħaġa li sħabek għandhom bżonnha ħafna—l-​aħjar mod taʼ ħajja issa u l-​wegħda taʼ ħajja taʼ dejjem fil-​futur. (1 Timotju 4:8) Taʼ min jinnota li fl-​Istati Uniti—fejn ħafna għandhom mnejn jaħsbu li n-​nies b’mod ġenerali huma birdin jew ma jinteressahomx mir-​reliġjon—stħarriġ li sar wera li mill-​inqas nofs iż-​żgħażagħ jieħdu r-​reliġjon b’serjetà kbira, u wieħed minn kull tlieta jgħid li t-​twemmin reliġjuż huwa “l-​iktar influwenza importanti” f’ħajtu. Wisq probabbli, is-​sitwazzjoni hija simili f’ħafna partijiet oħra tad-​dinja. Allura, x’aktarx li sħabek taʼ l-​iskola se jieħdu gost jisimgħu dak li għandek x’tgħidilhom dwar il-​Bibbja.

Ersaq Lejn Jehovah f’Żgħożitek

16. Biex togħġob lil Jehovah xi trid tagħmel minbarra li titkellem dwaru m’oħrajn?

¹⁶ M’għandniex xi ngħidu, biex tferraħ qalb Jehovah trid tagħmel iktar milli sempliċement titkellem dwaru. Trid tara wkoll li l-​imġiba tiegħek tkun fi qbil mal-​livelli tiegħu. L-​appostlu Ġwanni kiteb: “Għax din hi l-​imħabba taʼ Alla, li nżommu l-​kmandamenti tiegħu; u l-​kmandamenti tiegħu m’humiex tqal.” (1 Ġwann 5:3) Int se tara kemm dan huwa minnu jekk tersaq qrib taʼ Jehovah. Kif tistaʼ tagħmel dan?

17. Kif tistaʼ tersaq qrib taʼ Jehovah?

¹⁷ Warrab il-​ħin biex taqra l-​Bibbja u l-​pubblikazzjonijiet ibbażati fuqha. Iktar ma titgħallem dwar Jehovah, iktar se ssibha faċli biex tobdih u titkellem dwaru m’oħrajn. Ġesù qal: “Il-​bniedem tajjeb mit-​teżor tajjeb taʼ qalbu joħroġ it-​tajjeb, u l-​bniedem ħażin mit-​teżor ħażin tiegħu joħroġ il-​ħażin, għax mill-​abbundanza tal-​qalb jitkellem il-​fomm.” (Luqa 6:45) Għalhekk, imla qalbek b’affarijiet tajbin. Għax ma tagħmilx xi miri għalik innifsek? Forsi tistaʼ tipprepara aħjar għal-​laqgħat tal-​kongregazzjoni tal-​ġimgħa d-​dieħla. Imbagħad tistaʼ tagħmilha mira li tikkumenta fil-​qosor iżda minn qalbek. M’għandniex xi ngħidu, huwa vitali wkoll li tipprattika dak li titgħallem.—Filippin 4:9.

18. Anki jekk ikollok tbati minħabba xi oppożizzjoni, dwar xiex għandek tkun fiduċjuż?

¹⁸ Il-​barkiet li jiġu milli taqdi lil Jehovah iddum tgawdihom—tabilħaqq, se tgawdihom għal dejjem. Huwa minnu li kultant tistaʼ tgħaddi minn xi persekuzzjoni jew twaqqigħ għaċ-​ċajt għaliex int wieħed mix-​Xhieda taʼ Jehovah. Iżda aħseb f’Mosè. Il-​Bibbja tgħid li hu “ħares ’il quddiem lejn il-​ħlas.” (Lhud 11:​24-26) Int ukoll tistaʼ tkun fiduċjuż li Jehovah se jippremja l-​isforzi li tagħmel biex titgħallem u titkellem dwaru. Tabilħaqq, hu qatt m’hu se ‘jinsa dak li int għamilt u l-​imħabba li wrejt lejn ismu.’—Lhud 6:10.

[Noti taʼ taħt]

Tiftakar Int?

• Għala tistaʼ tkun ċert li s-​servizz tiegħek huwa taʼ valur għal Jehovah?

• Xi wħud b’liema modi rnexxielhom jagħtu xiehda fl-​iskola?

• Kif tistaʼ tissaħħaħ biex tagħti xiehda lil sħabek tal-​klassi?

• Kif tistaʼ tersaq qrib taʼ Jehovah?

[Kaxxa/Stampi f’paġna 20]

Anki ċ-​Ċkejknin Ifaħħru lil Jehovah!

Anki t-​tfal irnexxielhom jagħtu xiehda fl-​iskola. Ikkunsidra dawn l-​esperjenzi.

It-​tfal tal-​klassi tal-​ħames sena li kienet fiha Amber, li għandha għaxar snin, kienu qed jaqraw ktieb dwar l-​attakk tan-​Nazi fuq il-​Lhud fit-​Tieni Gwerra Dinjija. Amber iddeċidiet li ġġib il-​vidjo Purple Triangles lill-​għalliema tagħha. L-​għalliema baqgħet skantata meta saret taf li x-​Xhieda taʼ Jehovah ukoll ġew persegwitati taħt ir-​reġim tan-​Nazi. L-​għalliema wriet il-​vidjo lill-​klassi kollha.

Fl-​età taʼ tmien snin, Alexa kitbet ittra lill-​klassi tagħha li fiha spjegatilhom għala ma setgħetx tieħu sehem fiċ-​ċelebrazzjonijiet tal-​Milied. L-​għalliema tagħha tant baqgħet impressjonata li qalet lil Alexa biex taqra l-​ittra lill-​klassi tagħha kollha u lil żewġ klassijiet oħra wkoll! Fil-​konklużjoni hi qalet: “Jien ġejt mgħallma nirrispetta lil dawk li għandhom twemmin differenti minn tiegħi, u nirringrazzjakom talli tirrispettaw id-​deċiżjoni tiegħi li ma niċċelebrax il-​Milied.”

Ftit wara li beda l-​ewwel sena tiegħu fl-​iskola, Eric ħa miegħu Il-​Ktieb Tiegħi taʼ Stejjer mill-​Bibbja u talab il-​permess biex jurih lil sħabu tal-​klassi. L-​għalliema tiegħu qaltlu: “Għandi suġġeriment aqwa. Għax ma taqrax storja lill-​klassi?” Eric hekk għamel. Wara dan, hu stieden lil dawk kollha li riedu kopja tal-​ktieb biex jgħollu idhom. Kien hemm tmintax li għollew idhom inkluż l-​għalliema tiegħu! Eric issa jħoss li għandu t-​territorju speċjali tiegħu fejn jagħti xiehda.

Whitney, li għandha disaʼ snin, tapprezza ħafna l-​browxer Jehovah’s Witnesses and Education.c Hi tgħid: “Is-​soltu, hija ommi li kull sena tagħti l-​browxer lill-​għalliema tiegħi, iżda din is-​sena tajtulhom jien. Bl-​għajnuna taʼ dan il-​browxer, l-​għalliema tiegħi nnominatni bħala ‘l-​istudenta tal-​ġimgħa.’”

[Nota taʼ taħt]

[Kaxxa/Stampi f’paġna 21]

Xi Sitwazzjonijiet li Użaw Xi Wħud biex Jitkellmu dwar it-​Twemmin Tagħhom

Meta jingħataw l-​inkarigu biex jagħmlu rapport jew proġett taʼ l-​iskola, xi wħud għażlu suġġett li bih setgħu jagħtu xiehda

Għadd taʼ żgħażagħ taw lill-​għalliem tagħhom vidjo jew pubblikazzjoni li għandha x’taqsam mas-​suġġett li jkun qed jiġi diskuss fil-​klassi

Xi żgħażagħ li kienu qed jaqraw il-​Bibbja jew xi pubblikazzjoni bbażata fuq il-​Bibbja matul il-​brejk ġew avviċinati minn żgħażagħ oħra li staqsewhom xi mistoqsijiet

[Stampa f’paġna 18]

Uħud taʼ l-​esperjenza jistgħu jgħinu biex iħarrġu liż-​żgħażagħ ħalli jaqdu lil Jehovah