Il-​Qaddejja taʼ Jehovah Għandhom Tama Vera

‘Ikun il-​fdal taʼ Ġakobb fil-​ġnus, fost kotra taʼ popli bħan-​nida li tiġi mill-​Mulej . . . li ma . . . jittamawx fil-​bnedmin.’​—Mikea 5:6 (5:​7, NW).

1. Iżrael spiritwali kif inhu sors rifreskanti għan-​nies?

JEHOVAH hu l-​Ħallieq il-​kbir tax-​xita u n-​nida. Hija frugħa li wieħed jittama fil-​bniedem biex jipprovdi n-​nida jew ix-​xita. Il-​profeta Mikea kiteb: “Ikun il-​fdal taʼ Ġakobb fil-​ġnus, fost kotra taʼ popli bħan-​nida li tiġi mill-​Mulej, bħall-​irxiex tax-​xita fuq il-​ħaxix, li ma jistennew xejn minn ħadd, lanqas ma jittamaw fil-​bnedmin.” (Mikea 5:6 [5:​7, NW]) Min huma dawk li jifformaw “il-​fdal taʼ Ġakobb” taʼ żmienna? Dawn huma l-​Iżraelin spiritwali, il-​fdal taʼ l-​“Iżrael taʼ Alla.” (Galatin 6:16) Għall-​“kotra taʼ popli” fuq l-​art, dawn huma bħal “nida [rifreskanti] li tiġi mill-​Mulej” u “rxiex tax-​xita fuq il-​ħaxix.” Iva, il-​Kristjani midlukin illum huma barka mingħand Alla għan-​nies. Bħala proklamaturi tas-​Saltna, Jehovah jużahom biex iwasslu l-​messaġġ tiegħu taʼ tama vera lin-​nies.

2. Għala għandna tama vera minkejja li qed ngħixu f’din id-​dinja mimlija inkwiet?

² M’għandux jissorprendina li din id-​dinja m’għandha l-​ebda tama vera. L-​instabilità politika, il-​kollass morali, il-​kriminalità, il-​kriżi ekonomika, it-​terroriżmu, il-​gwerer—dawn l-​affarijiet nistennewhom f’dinja maħkuma minn Satana x-​Xitan. (1 Ġwanni 5:19) Ħafna huma beżgħana dwar dak li jistaʼ jinqalaʼ fil-​futur. Madankollu, bħala dawk li jqimu lil Jehovah, aħna m’aħniex beżgħanin għax għandna tama ċerta għall-​futur. Din hi tama vera għaliex hija bbażata fuq il-​Kelma t’Alla. Aħna għandna fidi f’Jehovah u fil-​Kelma tiegħu għaliex dak li jgħid hu dejjem iseħħ.

3. (a) Jehovah għala kien se jieħu azzjoni kontra Iżrael u Ġuda? (b) Il-​kliem taʼ Mikea għala japplika għalina llum?

³ Il-​profezija taʼ Mikea, li hi mnebbħa minn Alla, issaħħaħna biex nimxu f’isem Jehovah u tagħtina bażi għal tama vera. Fit-​tmien seklu Q.E.K., meta pprofetizza Mikea, il-​poplu li kien daħal f’patt m’Alla kien maqsum f’żewġt iġnus​—Iżrael u Ġuda​—u t-​tnejn li huma kienu qegħdin jinjorawh il-​patt li kellhom m’Alla. Ir-​riżultat kien kollass morali, apostasija reliġjuża, u materjaliżmu sfrenat. Għaldaqstant, Jehovah wissa li kien se jieħu azzjoni kontrihom. M’għandniex xi ngħidu, it-​twissijiet t’Alla kienu mmirati lejn in-​nies taʼ żmien Mikea. Imma, is-​sitwazzjoni taʼ llum tant hi bħal dik taʼ żmien Mikea li kliemu japplika wkoll għal żmienna. Dan se jsir iktar ċar hekk kif nikkunsidraw xi punti ewlenin mis-​sebaʼ kapitli tal-​ktieb taʼ Mikea.

Dak li Tirrivela Ħarsa Fuq Fuq

4. Mikea kapitlu 1 sa 3 liema informazzjoni jipprovdu?

⁴ Ejja nagħtu ħarsa fuq fuq lejn x’fih il-​ktieb taʼ Mikea. Fl-​ewwel kapitlu, Jehovah jikxef l-​irvell taʼ Iżrael u Ġuda. Minħabba l-​ħażen tagħhom, Iżrael se jinqered u l-​kastig taʼ Ġuda se jasal saħansitra sa bwieb il-​belt taʼ Ġerusalemm. It-​tieni kapitlu jirrivela kif in-​nies għonja u dawk li għandhom il-​poter qegħdin jgħakksu lid-​dgħajfin u lill-​imsejknin. Madankollu, hemm ukoll wegħda mingħand Alla. In-​nies t’Alla se jinġabru u se jkunu lkoll f’unità. It-​tielet kapitlu jirrapporta l-​istqarrijiet taʼ Jehovah kontra l-​mexxejja nazzjonali u l-​profeti delinkwenti. Il-​mexxejja qed jgħawġu l-​ġustizzja, u l-​profeti qed jgħidu l-​gideb. Minkejja dan, Mikea jingħata qawwa mill-​ispirtu qaddis biex jipproklama l-​ħaqq li se jagħmel Jehovah.

5. X’inhi l-​lezzjoni li nisiltu minn Mikea kapitli 4 u 5?

⁵ Kapitlu 4 jbassar li fil-​parti finali tal-​jiem, il-​ġnus kollha se jiġu lejn il-​muntanja elevata tad-​dar taʼ Jehovah sabiex jiġu istruwiti minnu. Qabel dan, in-​nies taʼ Ġuda se jiġu eżiljati lejn Babilonja, imma Jehovah se jeħlishom. Kapitlu 5 jirrivela li l-​Messija se jitwieled f’Betlehem taʼ Ġuda. Hu se jirgħa lill-​poplu tiegħu u se jeħlishom minn taħt idejn il-​ġnus oppressivi.

6, 7. Liema punti huma preżentati f’kapitli 6 u 7 tal-​profezija taʼ Mikea?

⁶ F’Mikea kapitlu 6 nsibu l-​akkużi taʼ Jehovah kontra l-​poplu tiegħu mniżżlin f’forma taʼ każ fil-​qorti. X’għamel biex ġagħalhom jirribellaw? Xejn. Fil-​fatt, dak li jeħtieġ minnhom huwa raġunevoli ħafna. Hu jrid li dawk li jqimuh jeżerċitaw il-​ġustizzja, u li jkunu qalbhom tajba u modesti hekk kif jimxu miegħu. Minflok m’għamlu hekk, Iżrael u Ġuda qabdu t-​triq taʼ l-​irvell u se jkollhom ibatu l-​konsegwenzi.

⁷ Fl-​aħħar kapitlu tal-​profezija tiegħu, Mikea jikkundanna l-​ħażen tan-​nies taʼ żmienu. Iżda, ma jaqtax qalbu, għax hu determinat li juri attitudni taʼ ‘stennija’ għal Jehovah. (Mikea 7:7) Il-​ktieb jikkonkludi b’espressjoni taʼ fiduċja li Jehovah se juri ħniena mal-​poplu Tiegħu. L-​istorja tixhed għall-​fatt li din it-​tama twettqet. Fis-​sena 537 Q.E.K., meta Jehovah kien iddixxiplina għalkollox lill-​poplu tiegħu, hu bi ħniena kbira reġġaʼ lil xi wħud li kien fadal lura lejn arthom.

8. Int kif tiġbor fil-​qosor dak li hemm fil-​ktieb taʼ Mikea?

⁸ X’informazzjoni mill-​aqwa jirrivela Jehovah permezz taʼ Mikea! Dan il-​ktieb imnebbaħ jipprovdi eżempji taʼ twissija dwar kif Alla jaġixxi maʼ dawk li jgħidu li jaqduh imma juru nuqqas taʼ fedeltà. Ibassar ġrajjiet li qed iseħħu llum il-​ġurnata. U jagħti l-​parir t’Alla rigward kif għandna nġibu ruħna matul dawn iż-​żminijiet diffiċli sabiex nissodaw it-​tama tagħna.

Il-​Mulej Sovran Jehovah Jitkellem

9. Skond Mikea 1:​2, Jehovah x’kien se jagħmel?

⁹ Ejja issa neżaminaw il-​ktieb taʼ Mikea iktar fid-​dettall. F’Mikea kapitlu 1:2 naqraw: “Isimgħu, popli kollha, agħti widen, art u kull ma fik: Sidi l-​Mulej ikun xhud kontrikom, is-​Sid mit-​tempju mqaddes tiegħu!” Kieku kont tgħix fi żmien Mikea, dan il-​kliem żgur li kien iġagħlek twaqqaf widnejk biex tismaʼ. Tabilħaqq, iġagħlek tassew tismaʼ għaliex Jehovah qed jitkellem mit-​tempju mqaddes tiegħu u qed jindirizza mhux biss lil Iżrael u lil Ġuda imma lin-​nies kullimkien. Fi żmien Mikea, in-​nies kienu ilhom wisq jinjorawh lill-​Mulej Sovran Jehovah. Dan dalwaqt kellu jinbidel. Jehovah kien determinat li jieħu azzjoni deċiżiva.

10. Il-​kliem taʼ Mikea 1:2 għala huwa importanti għalina?

¹⁰ L-​istess jgħodd għal żmienna. Apokalissi 14:​18-20 juri li Jehovah reġaʼ qiegħed jikkomunika mit-​tempju mqaddes tiegħu. Hu dalwaqt se jieħu azzjoni deċiżiva, u ġrajjiet deċiżivi dalwaqt sejrin jheżżu mill-​ġdid lill-​umanità. Din id-​darba, l-​hekk imsejħa “dielja taʼ l-​art” kollha ħażen se tiġi mitfugħa fil-​magħsar il-​kbir tal-​korla taʼ Jehovah, biex teqred għalkollox id-​dinja taʼ Satana.

11. Xi jfisser il-​kliem taʼ Mikea 1:​3, 4?

¹¹ Ismaʼ x’se jagħmel Jehovah. Mikea 1:​3, 4 jgħid: “Għax, ara, il-​Mulej ħiereġ mill-​għamara tiegħu, se jinżel u jirfes fuq l-​għoljiet taʼ l-​art; il-​muntanji jdubu taħtu, u l-​widien jinħallu, bħax-​xemaʼ quddiem in-​nar, bħall-​ilma mitluq għan-​niżla.” Sejjer Jehovah jitlaq minn postu fis-​sema u letteralment jirfes fuq l-​għoljiet u l-​pjanuri taʼ l-​Art Imwiegħda? Le. M’għandux għalfejn. Hu sempliċement se jdawwar l-​attenzjoni tiegħu lejn l-​art sabiex isseħħ ir-​rieda tiegħu. Iktar minn hekk, m’hijiex l-​art letterali, imma l-​abitanti tagħha li se jsofru l-​affarijiet li ġew deskritti. Meta Jehovah jaġixxi, ir-​riżultat se jkun diżastruż għal min mhux leali—bħallikieku l-​muntanji jkunu dabu bħax-​xemaʼ u l-​pjanuri nqasmu min-​nofs b’terremot.

12, 13. Fi qbil mat-​2 Pietru 3:​10-12, x’inhu dak li jagħmel it-​tama tagħna ċerta?

¹² Il-​kliem profetiku taʼ Mikea 1:​3, 4 forsi jfakkrek fi profezija mnebbħa oħra li tbassar ġrajjiet diżastrużi għall-​art. Bħalma nsibu fit-​2 Pietru 3:​10, l-​appostlu Pietru kiteb: “Jasal, tabilħaqq, jum il-​Mulej bħal ħalliel; jintemmu mbagħad is-​smewwiet bi ħsejjes kbar, jinħallu bin-​nar l-​elementi tad-​dinja, u l-​art b’kull ma fiha [‘tinkixef,’ Saydon].” L-​istess bħall-​profezija taʼ Mikea, il-​kliem taʼ Pietru ma japplikax għas-​smewwiet u l-​art letterali. Dan jirreferi għal tribulazzjoni kbira li ġejja fuq din id-​dinja li tiċħad lil Alla.

¹³ Minkejja dan id-​diżastru li ġej, il-​Kristjani jistgħu jkunu fiduċjużi dwar il-​futur, sewwasew bħalma kien Mikea. Kif? Billi jsegwu l-​parir li nsibu fil-​versi li jmiss fl-​ittra taʼ Pietru. L-​appostlu jgħid: “Ladarba hekk kollox għandu jintemm, araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom, waqt li tistennew b’ħerqa kbira l-​miġja tal-​Jum taʼ Alla.” (2 Pietru 3:​11, 12) It-​tama tagħna għall-​futur se tkun ċerta jekk irrawmu qalb ubbidjenti u naraw li l-​imġiba tagħna tkun qaddisa u l-​ħajja tagħna tkun mimlija b’għemejjel taʼ devozzjoni lejn Alla. Sabiex it-​tama tkun ċerta, aħna rridu niftakru wkoll li l-​jum taʼ Jehovah se jiġi bla dubju taʼ xejn.

14. Iżrael u Ġuda għala kien ħaqqhom jiġu kastigati?

¹⁴ Jehovah jispjega għala l-​poplu tiegħu tal-​qedem kien ħaqqu jiġi kastigat. Mikea 1:5 jistqarr: “Dan kollu minħabba d-​dnub taʼ Ġakobb, u minħabba l-​ħtija taʼ dar Iżrael. X’inhu d-​dnub taʼ Ġakobb? M’hux Samarija? U x’inhi l-​ħtija [“il-​postijiet għoljin taʼ l-​idolatrija,” Karm Żammit] taʼ dar Ġuda? M’hux Ġerusalemm?” Iżrael u Ġuda jafu l-​eżistenza tagħhom lil Jehovah. Madankollu, dawn irribellaw kontrih, u l-​irvell tagħhom jilħaq sal-​qalba tal-​bliet kapitali rispettivi tagħhom, is-​Samarija u Ġerusalemm.

Il-​Prattiċi Ħżiena Jiżdiedu

15, 16. In-​nies taʼ żmien Mikea kienu ħatja taʼ liema għemejjel mill-​agħar?

¹⁵ Eżempju taʼ kemm kienu ħżiena n-​nies taʼ żmien Mikea nsibuh deskritt b’ċarezza kbira f’Mikea 2:​1, 2: “Ħażin għalihom dawk li jfasslu l-​ħsara, dawk li jsawwru d-​deni fuq soddithom! U jagħmluh mas-​sebħ fil-​għodu, għax idejhom għandhom is-​setgħa. Jekk jitlebilbu għall-​għelieqi, jisirquhom; jekk għad-​djar, jaħtfuhom; jagħmlu l-​vjolenza fuq raġel u daru, fuq is-​sid u ġidu.”

¹⁶ Nies kollhom regħba jibqgħu mqajmin bil-​lejl jhewdnu kif se jaħtfu l-​għelieqi u d-​djar tal-​ġirien tagħhom. Fil-​għodu, jgħaġġlu biex iwettqu dak li jkunu paspru f’moħħhom. Ma kinux iwettqu għemejjel mill-​agħar bħal dawn kieku ftakru fil-​patt li kellhom maʼ Jehovah. Il-​Liġi Mosajka fiha provvedimenti biex tipproteġi lill-​fqir. Skond din il-​Liġi, l-​ebda familja ma kellha titlef il-​wirt tagħha b’mod permanenti. Madankollu, dawk l-​individwi rgħiba ma jħabblux rashom. Huma jinjoraw il-​kliem taʼ Levitiku 19:​18, li jgħid: “Ħobb lil għajrek bħalek innifsek.”

17. X’jistaʼ jiġri meta dawk li jgħidu li qed jaqdu lil Alla jpoġġu l-​affarijiet materjali l-​ewwel f’ħajjithom?

¹⁷ Dan juri x’jistaʼ jiġri meta nies li jgħidu li jaqdu ’l Alla jinsew il-​miri spiritwali u jibdew ifittxu l-​ewwel l-​affarijiet materjali. Pawlu wissa lill-​Kristjani taʼ żmienu: “Dawk li jridu jistagħnu jaqgħu fit-​tiġrib u fix-​xibka u f’ħafna xewqat bla sens u taʼ ħsara li jitfgħu lill-​bnedmin fil-​qerda u t-​telfien.” (1 Timotju 6:9) Meta l-​qligħ tal-​flus isir il-​mira prinċipali fil-​ħajja taʼ individwu, hu jkun fil-​fatt qed iqim alla falz—il-​Flus, jew ir-​Rikkezzi. Dan l-​alla falz ma joffri ebda tama ċerta għall-​futur.—Mattew 6:24.

18. X’kien se jiġrilhom dawk li kienu materjalisti fi żmien Mikea?

¹⁸ Ħafna nies fi żmien Mikea jitgħallmu bid-​dnewwa kemm hija ħaġa taʼ frugħa li jistrieħu fuq affarijiet materjali. Skond Mikea 2:​4, Jehovah jgħid: “Dakinhar tiġu f’ilsien in-​nies, jgħannulkom għanja tal-​biki u jgħidulkom: ‘Aħna misruqin serqa għall-​aħħar: sehem il-​poplu tiegħu qiegħed jitqies bil-​ħbula, m’hemm ħadd biex iroddulu lura; ir-​rabaʼ tagħna sar sehem min seraqna.’” Iva, dawk li serqu d-​djar u l-​għelieqi se jitilfu l-​wirt tal-​familja tagħhom stess. Se jinġarru lejn art barranija, u ġidhom se jsir il-​priża taʼ ‘min seraqhom,’ jiġifieri taʼ nies mill-​ġnus. Kull tama għal futur taʼ prosperità se tiġi fix-​xejn.

19, 20. Xi ġralhom il-​Lhud li fdaw f’Jehovah?

¹⁹ Madankollu, it-​tama taʼ dawk li jafdaw f’Jehovah m’hijiex se tkun taʼ diżappunt. Jehovah iżomm fedelment il-​pattijiet li għamel m’Abraham u maʼ David, u għandu ħniena minn dawk li, bħal Mikea, iħobbuh u jitnikktu għall-​fatt li n-​nies taʼ pajjiżhom tbiegħdu minn Alla. Minħabba nies retti bħal dawn, se jkun hemm tiġdid fiż-​żmien xieraq t’Alla.

²⁰ Dan jiġri fis-​sena 537 Q.E.K., wara li Babilonja taqaʼ u meta fdal mil-​Lhud imur lura lejn pajjiżu. F’dak iż-​żmien, il-​kliem taʼ Mikea 2:12 għandu l-​ewwel twettiq tiegħu. Jehovah jgħid: “Niġbrok, Ġakobb, kollok kemm int, niġbor il-​fdal taʼ Iżrael, nqegħedhom flimkien bħal nagħaġ f’maqjel, bħal merħla f’nofs taʼ mergħa, geġwiġija taʼ nies, bla ma jibżgħu minn ħadd.” Kemm jaf iħobb Jehovah! Wara li jiddixxiplina lill-​poplu tiegħu, hu jippermetti li fdal imur lura u jaqdih fl-​art li hu ta lil missirijiethom.

Xebh li Jispikka fi Żmienna

21. Il-​kundizzjonijiet taʼ żmienna kif inhuma bħal dawk taʼ żmien Mikea?

²¹ Waqt li konna qegħdin nikkunsidraw l-​ewwel żewġ kapitli taʼ Mikea, ma laqtekx il-​fatt kemm l-​affarijiet illum huma simili? Bħal fi żmien Mikea, ħafna nies illum jgħidu li jaqdu ’l Alla. Madankollu, bħal Ġuda u Iżrael, huma jinsabu maqsumin u anki gwerer iġġieldu bejniethom. Ħafna nies għonja fil-​Kristjaneżmu ħaqru lill-​foqra. Iktar ma jgħaddi ż-​żmien, il-​mexxejja reliġjużi iktar qed jagħlqu għajnejhom għal ċerti prattiċi li l-​Bibbja tikkundannahom b’mod ċar. Mhux taʼ b’xejn li l-​Kristjaneżmu dalwaqt se jiġi fi tmiemu flimkien mal-​bqija taʼ “Babilonja l-​Kbira,” l-​imperu dinji taʼ reliġjon falza! (Apokalissi 18:​1-5) Iżda, l-​istess bħalma ġara fi żmien Mikea, Jehovah se jkollu qaddejja leali li se jibqgħu fuq l-​art.

22. Liema żewġ gruppi poġġew it-​tama tagħhom fis-​Saltna t’Alla?

²² Fl-​1919, il-​Kristjani midlukin leali nqatgħu għalkollox mill-​Kristjaneżmu u bdew jipproklamaw l-​aħbar tajba tas-​Saltna lill-​ġnus kollha. (Mattew 24:14) L-​ewwel m’għamlu kien li bdew ifittxu lil min kien għad fadal minn Iżrael spiritwali. Imbagħad, bdew jinġabru n-​“nagħaġ oħra,” u ż-​żewġ gruppi saru “merħla waħda, ragħaj wieħed.” (Ġwanni 10:16) Għalkemm issa qegħdin jaqdu ’l Alla f’234 pajjiż, dawn l-​aduraturi leali taʼ Jehovah kollha saru verament ħaġa waħda “flimkien.” S’issa, il-​maqjel fih “geġwiġija taʼ nies,” irġiel, nisa u tfal. It-​tama tagħhom ma jpoġġuhiex f’din is-​sistema dinjija, imma fis-​Saltna t’Alla, li dalwaqt se terġaʼ ġġib Ġenna fuq l-​art.

23. Għala int konvint li t-​tama tiegħek hija żgura?

²³ Dwar l-​aduraturi leali taʼ Jehovah, l-​aħħar vers taʼ Mikea kapitlu 2 jgħid: “Jgħaddi s-​sultan tagħhom quddiemhom, il-​Mulej fir-​ras tagħhom.” Tara int lilek innifsek f’dik il-​purċissjoni trijonfanti, miexi wara s-​Sultan tiegħek, Ġesù Kristu, u b’Jehovah innifsu fuq quddiem? Jekk inhu hekk, tistaʼ tkun konvint li r-​rebħa hija ċerta u t-​tama tiegħek żgura. Dan se jsir saħansitra iktar evidenti hekk kif nikkunsidraw iktar punti ewlenin mill-​profezija taʼ Mikea.

Int Kif Twieġeb?

• Fi żmien Mikea, Jehovah għala ddeċieda li jieħu azzjoni kontra Ġuda u Iżrael?

• X’jistaʼ jiġri meta dawk li jgħidu li jaqdu lil Alla jpoġġu l-​interessi materjali l-​ewwel f’ħajjithom?

• Wara li kkunsidrajna Mikea kapitli 1 u 2, għala tħossok konvint li t-​tama tiegħek hija żgura?

[Stampa f’paġna 9]

Il-​profezija taʼ Mikea tistaʼ ssaħħaħna spiritwalment

[Stampi f’paġna 10]

Bħall-​fdal Lhudi fis-​sena 537 Q.E.K., l-​Iżraelin spiritwali u sħabhom jappoġġaw il-​qima vera