Intervent Divin—X’Nistgħu Nistennew?

FIT-​TMIEN seklu Q.E.K., is-​Sultan Ħeżekija taʼ Ġuda li kellu 39 sena sar jaf li kellu marda serja. Imnikket għall-​aħħar, Ħeżekija talab lil Alla bil-​ħrara biex ifejqu. Alla wieġbu permezz tal-​profeta tiegħu: “Jien smajt it-​talba tiegħek, rajt id-​dmugħ tiegħek. Arani, issa se ntawwal għomrok bi ħmistax-il sena oħra.”​—Isaija 38:​1-5.

Alla għala interviena f’din l-​okkażjoni partikulari? Sekli qabel, Alla kien wiegħed lis-​Sultan ġust David: “Il-​familja tiegħek u s-​saltna tiegħek jibqgħu sħaħ għal dejjem quddiemi. It-​tron tiegħek jibqaʼ sħiħ għal dejjem.” Alla rrivela wkoll li l-​Messija kellu jitwieled fil-​linja taʼ David. (2 Samwel 7:​16; Salm 89:21, 27-​30 [89:20, 26-29, NW]; Isaija 11:1) Meta Ħeżekija marad, kien għadu ma kellux iben. B’hekk, il-​linja rjali taʼ David kienet fil-​periklu li tispiċċa fix-​xejn. Intervent divin fil-​każ taʼ Ħeżekija serva għall-​iskop speċifiku li tiġi preservata l-​linja tad-​dixxendenza li kienet se twassal għall-​Messija.

Sabiex iwettaq il-​wegħdi tiegħu, Jehovah ġie mqanqal biex jintervieni għan-​nom tal-​poplu tiegħu f’diversi okkażjonijiet matul l-​era taʼ qabel il-​Kristjanità. F’konnessjoni mal-​ħelsien taʼ Iżrael mill-​jasar fl-​Eġittu, Mosè ddikjara: “Il-​Mulej għażilkom għax ħabbkom, u għax ried iżomm il-​ħalfa li ħalef lil missirijietkom; kien għalhekk li l-​Mulej, b’id qawwija, ħariġkom.”​—Dewteronomju 7:8.

Bl-istess mod, fl-​ewwel seklu intervent divin serva biex l-​iskopijiet t’Alla jimxu iktar ’il quddiem. Per eżempju, fit-​triq lejn Damasku, wieħed Lhudi jismu Sawl irċieva viżjoni mirakoluża sabiex twaqqfu milli jippersegwita lid-​dixxipli taʼ Kristu. Il-​konverżjoni taʼ dan ir-​raġel, li sar lappostlu Pawlu, kellha rwol vitali fit-​tixrid taʼ l-​aħbar tajba fost il-​ġnus.​—Atti 9:​1-​16; Rumani 11:13.

Kienu l-​Interventi Jsiru Spiss?

Kien intervent divin xi ħaġa li ssir spiss jew darba kultant? L-​Iskrittura turi ċar li din żgur ma kinitx xi ħaġa li kienet issir spiss. Għalkemm Alla ħeles lit-​tliet Ebrej żgħażagħ mill-​mewt ġo forn tan-​nar u lill-​profeta Danjel mill-​ħofra taʼ l-​iljuni, hu ma ħax azzjoni biex isalva lil profeti oħra mill-​mewt. (2 Kronaki 24:20, 21; Danjel 3:​21-​23, 91-94 [3: ​21-​27, NW]; 6:17-23 [6: 16-22, NW]; Lhud 11:37) Pietru nħeles mirakolożament mill-​ħabs fejn kien tefgħu Erodi Agrippa I. Madankollu, dan l-​istess re kkaġuna l-​mewt taʼ l-​appostlu Ġakbu, u Alla ma interviniex biex iwaqqaf dan id-​delitt. (Atti 12:​1-​11) Waqt li Alla ta lill-​appostli l-​qawwa li jfejqu l-​morda u saħansitra jqajmu l-​mejtin, hu ma neħħiex ix-​‘xewka fil-​ġisem’ li tant kienet taʼ wġigħ għall-​appostlu Pawlu u li setgħet kienet marda fiżika.​—2 Korintin 12:​7-9; Atti 9:​32-​41; 1 Korintin 12:28.

Alla ma interviniex biex iwaqqaf mewġa taʼ persekuzzjoni li saret kontra d-​dixxipli taʼ Kristu mill-​Imperatur Ruman Neruni. Il-​Kristjani ġew torturati, maħruqin ħajjin, u mitfugħin lill-​annimali. Madankollu, din l-​oppożizzjoni ma ħasditx lill-​Kristjani tal-​bidu, u żgur li ma dgħajfitx il-​fidi tagħhom fl-​eżistenza t’Alla. Wara kollox, Ġesù kien wissa lid-​dixxipli tiegħu li huma kienu se jinġiebu quddiem il-​qrati u li kellhom ikunu lesti jsofru u jmutu għall-​fidi tagħhom.​—Mattew ​10:17-​22.

Sewwasew bħalma għamel fil-​passat, illum Alla żgur kapaċi jeħles lill-​qaddejja tiegħu minn sitwazzjonijiet perikolużi, u dawk li jħossu li bbenefikaw mill-​protezzjoni tiegħu m’għandhomx jiġu kritikati. Madankollu, hu diffiċli li tikkonkludi jekk Alla interviniex jew le f’dawn il-​każi. Diversi qaddejja leali taʼ Jehovah weġġgħu fi splużjoni f’Toulouse, u eluf taʼ Kristjani leali mietu f’kampijiet Nazisti u Komunisti jew inkella minħabba ċirkustanzi traġiċi oħra li fihom Alla ma interviniex. Alla għala ma jinterviniex dejjem għan-​nom taʼ dawk kollha li għandhom l-​approvazzjoni tiegħu?​—Danjel 3:​17, 18.

“Iż-​Żmien u ċ-​Ċirkustanzi”

Meta jseħħ xi diżastru, kulħadd jistaʼ jintlaqat, u l-​lealtà lejn Alla m’hijiex neċessarjament fattur li jeffettwa r-​riżultat. Waqt lisplużjoni f’Toulouse, Alain u Liliane salvaw, imma 30 persuna mietu, u mijiet ġew imweġġgħin, avolja ma kienx it-​tort tagħhom. Fuq skala akbar, għaxriet t’eluf taʼ nies huma vittmi tal-​kriminalità, is-​sewqan bl-​addoċċ, jew il-​gwerer, u Alla ma jistax jinżamm responsabbli għal dak li jiġrilhom. Il-​Bibbja tfakkarna li “ż-​żmien u ċ-​ċirkustanzi” jiġu fuqna lkoll.​—Koħèlet 9:​11.

Iżjed minn hekk, il-​bnedmin huma suġġetti għall-​mard, ix-​xjuħija, u l-​mewt. Anki xi wħud li saħansitra ħasbu li Alla salvalhom ħajjithom mirakolożament jew li qalu li tahom fejqan mhux mistenni mill-​marda tagħhom, ġew eventwalment wiċċ imbwiċċ mal-​mewt. It-​tneħħija tal-​mard u l-​mewt u l-​‘ixxottar taʼ kull demgħa’ minn għajnejn il-​bnedmin għadhom fil-​futur.​—Apokalissi 21:​1-4.

Biex dan iseħħ, jeħtieġ li ssir xi ħaġa bil-​wisq iktar estensiva u drastika minn intervent darba kultant. Il-​Bibbja titkellem dwar ġrajja msejħa “l-​Jum il-​kbir tal-​Mulej.” (Sofonija 1:​14) Matul dan l-​intervent fuq skala kbira, Alla se jneħħi kull tip taʼ ħażen. L-​umanità se tingħata l-​opportunità li tgħix għal dejjem f’kundizzjonijiet perfetti, li fihom “ma jitfakkarx iżjed l-​imgħoddi, [u] f’moħħ ħadd aktar ma jiġi.” (Isaija 65:17) Anki l-​mejtin se jiġu rxoxtati, u b’hekk se jiġri l-​kuntrarju taʼ dak li bla ebda dubju hu l-​akbar traġedja taʼ l-​umanità. (Ġwanni 5:​28, 29) Imbagħad, Alla fl-​imħabba infinita u t-​tjubija tiegħu jkun solva l-​problemi kollha tal-​bnedmin darba għal dejjem.

Kif Alla Jintervieni Llum

Madankollu, dan ma jfissirx li Alla sadanittant qiegħed sempliċement josserva bla ma jimpurtah waqt li l-​ħolqien qed isofri. Illum, Alla qed jestendi l-​opportunità lill-​bnedmin kollha, hu liema hu l-​isfond etniku jew soċjali tagħhom, biex isiru jafuh u jiżviluppaw relazzjoni persunali miegħu. (1 Timotju 2:​3, 4) Ġesù ddeskriva dan il-​proċess b’dan il-​kliem: “Ħadd ma jistaʼ jiġi għandi jekk il-​Missier li bagħatni ma jiġbdux lejja.” (Ġwanni 6:​44) Alla jiġbed lejh lil nies taʼ qalb onesta permezz tal-​messaġġ tas-​Saltna mxandar madwar id-​dinja mill-​qaddejja tiegħu.

Iktar minn hekk, Alla jinfluwenza direttament il-​ħajjiet taʼ dawk li huma lesti li jiġu mmexxijin minnu. Permezz taʼ l-​ispirtu qaddis tiegħu, Alla qed ‘jiftaħ qlubhom’ biex jifhmu r-​rieda tiegħu u biex iwettqu dak li hu jirrikjedi minnhom. (Atti 16:14) Iva, billi jipprovdi l-​opportunità li nsiru nafu lilu, ilKelma tiegħu, u l-​iskopijiet tiegħu, Alla qed jagħti prova taʼ l-​interess kollu mħabba li għandu f’kull wieħed u waħda minna.​—Ġwanni 17:3.

Finalment, Alla jgħin lill-​qaddejja tiegħu llum, mhux billi jeħlishom mirakolożament, imma billi jagħtihom l-​ispirtu qaddis u “l-​qawwa iktar min-​normal” biex ikampaw maʼ kwalunkwe sitwazzjoni li jistgħu jiffaċċjaw. (2 Korintin 4:7, NW) L-​appostlu Pawlu kiteb: “Għal kollox niflaħ bis-​saħħa taʼ dak [Alla Jehovah] li jqawwini.”​—Filippin 4:​13.

Aħna b’hekk għandna għalfejn inkunu grati lejn Alla kuljum għall-​ħajja u għat-​tama li hu jestendi lilna biex nistgħu ngħixu għal dejjem f’dinja ħielsa mis-​sofferenza. Is-​salmista staqsa: “Xi nrodd lill-​Mulej għall-​ġid kollu li għamel miegħi? Ngħolli l-​kalċi tas-​salvazzjoni, u isem il-​Mulej insejjaħ.” (Salm 116:12, 13) Jekk taqra din ir-​rivista regolarment, tkun tistaʼ tifhem dak li Alla għamel, li qed jagħmel issa, u li għad irid jagħmel, u dan jistaʼ jġiblek ferħ issa u tama soda għall-​futur.​—1 Timotju 4:8.

[Kumment f’paġna 6]

“Ma jitfakkarx iżjed l-​imgħoddi, f’moħħ ħadd aktar ma jiġi.” —Isaija 65:17

[Stampi f’paġna 5]

Fi żminijiet Bibliċi, Jehovah ma waqqafx it-​tħaġġir taʼ Żakkarija . . .

lanqas il-​massakru tat-​tfal innoċenti minn Erodi

[Stampa f’paġna 7]

Qrib hu ż-​żmien meta s-​sofferenza mhux se tkun iktar; anki l-​mejtin se jerġgħu jgħixu