Qiegħda n-​Newtralità Ttellef l-​Imħabba Kristjana?

SABIEX tkun Kristjan jirrikjedi iktar milli sempliċement taqra l-​Bibbja, titlob, u tkanta għanjiet nhar taʼ Ħadd. Jirrikjedi li tagħmel affarijiet kemm għal Alla u kemm għall-​bnedmin. Il-​Bibbja tgħid: “Ma nħobbux bil-​kliem u t-​tpaċpiċ, imma bl-​għemil u bis-​sewwa.” (1 Ġwanni 3:18) Ġesù kellu interess ġenwin f’oħrajn, u l-​Kristjani jridu jimitaw lilu. L-​appostlu Pawlu ħeġġeġ lil sħabu fit-​twemmin biex dejjem ikollhom ħafna x’jagħmlu “fil-​ħidma tal-​Mulej.” (1 Korintin 15:58) Imma x’inhi din il-​ħidma, jew ix-​xogħol, tal-​Mulej? Ifisser dan li tipprova tbiddel il-​politika tal-​gvern għall-​benefiċċju tal-​foqra u l-​imgħakksin? Ġesù hekk għamel?

Għalkemm Ġesù ġie mħeġġeġ biex jindaħal fi kwistjonijiet politiċi jew iżomm maʼ xi naħa jew oħra, hu rrifjuta li jagħmel dan. Hu rrifjuta meta Satana offrielu l-​poter fuq is-​saltniet kollha tad-​dinja, irrifjuta li jidħol f’argument dwar il-​ħlas tat-​taxxa, u warrab meta n-​nies ipprovaw jagħmluh sultan. (Mattew 4:8-10; 22:17-21; Ġwanni 6:15) Imma n-​newtralità tiegħu ma waqqfitux milli jaħdem għall-​benefiċċju t’oħrajn.

Ġesù kkonċentra fuq dak li setaʼ jġib benefiċċji dejjiema għal oħrajn. Meta pprovda ikel għal ħamest elef ruħ u fejjaq il-​morda ġab serħan temporanju għal xi wħud, imma t-​tagħlim tiegħu pprovda barkiet dejjiema għall-​umanità kollha. Ġesù sar magħruf sempliċement bħala “l-​Għalliem,” u mhux bħala wieħed li jorganizza kampanji t’għajnuna. (Mattew 26:18, NW; Mark 5:35, NW; Ġwanni 11:28, NW) Hu qal: “Jien għalhekk twelidt, u għalhekk ġejt fid-​dinja, biex nixhed għall-​verità.”—Ġwanni 18:37.

Nippridkaw Xi Ħaġa Aħjar mill-​Politika

Il-​verità li għallem Ġesù ma kinitx teorija politika. Għall-​kuntrarju, kienet ċentrata fuq is-​Saltna li tagħha hu nnifsu kien se jkun is-​Sultan. (Luqa 4:43) Din is-​Saltna hija gvern fis-​smewwiet, u se tieħu post l-​amministrazzjonijiet umani kollha u ġġib paċi dejjiema għall-​umanità. (Isaija 9:5, 6 [9:6, 7, NW]; 11:9; Danjel 2:44) Għalhekk, hija l-​unika tama vera għall-​umanità. M’hijiex iktar turija taʼ mħabba li tiddikjara din it-​tama żgura għall-​futur minflok ma tinkuraġġixxi lin-​nies jafdaw fil-​bnedmin biex jipprovdu futur fiż-​żgur? Il-​Bibbja tgħid: “La tittamawx fil-​kbarat, għax il-​bniedem ma jsalvakomx. Malli toħroġ ruħu, lejn l-​art jerġaʼ jmur; jintemmu dakinhar ħsibijietu. Hieni min f’Alla taʼ Ġakobb isib l-​għajnuna tiegħu, min għandu t-​tama fil-​Mulej, Alla tiegħu.” (Salm 146:3-5) Għalhekk, minflok ma bagħat lid-​dixxipli tiegħu biex jippridkaw dwar mod aħjar kif jorganizzaw il-​gvernijiet, Ġesù għallimhom jippridkaw l-​aħbar tajba jew “l-​Evanġelju tas-​Saltna.”—Mattew 10:6, 7; 24:14.

Għalhekk, din hi “l-​ħidma tal-​Mulej” li predikaturi Kristjani huma kmandati jagħmlu. Minħabba li s-​sudditi tas-​Saltna t’Alla għandhom iħobbu lil xulxin, is-​Saltna se jirnexxilha telimina l-​faqar billi tqassam ir-​riżorsi taʼ l-​umanità b’mod bilanċjat. (Salm 72:8, 12, 13) Din hija aħbar tajba u żgur taʼ min jippridkaha.

Illum, ix-​Xhieda taʼ Jehovah huma organizzati għal din “il-​ħidma tal-​Mulej” f’235 pajjiż. Fi qbil mal-​kmand taʼ Ġesù, huma jirrispettaw il-​gvernijiet kollha. (Mattew 22:21) Imma huma jħarsu wkoll dan il-​kliem li ta lis-​segwaċi tiegħu: “M’intomx tad-​dinja, għax jien ħriġtkom mid-​dinja.”—Ġwanni 15:19.

Xi wħud li qabel kienu jippridkaw il-​politika nbidlu wara li għamlu studju bir-​reqqa tal-​Bibbja. Politikant Taljan li kien membru taʼ l-​Azzjoni Kattolika, organizzazzjoni kontrollata mill-​knisja, qal: “Jien bdejt nieħu sehem fil-​politika għax ħassejt li individwu għandu jikkontribwixxi b’mod attiv għall-​iżvilupp politiku u soċjali tas-​soċjetà.” Wara li rriżenja minn sindku taʼ belt sabiex jippriedka s-​Saltna t’Alla bħala wieħed mix-​Xhieda taʼ Jehovah, hu spjega għala l-​isforzi taʼ nies sinċieri fil-​politika jfallu. “Id-​dinja hi dik li hi, mhux għax nies deċenti ma pprovawx itejbu l-​kundizzjonijiet soċjali, imma, pjuttost, għax l-​isforzi sinċieri tal-​ftit ġew megħlubin mill-​ħażen tal-​ħafna.”

Minkejja li l-​Kristjani veri ma jinvolvux ruħhom fil-​politika sabiex jippridkaw l-​unika tama vera għall-​umanità, dan ma jżommhomx milli jgħinu lil oħrajn b’modi prattiċi. Il-​Kristjani jgħinu lin-​nies isiru sudditi tas-​Saltna t’Alla u dawn min-​naħa tagħhom jitgħallmu jbiddlu attitudnijiet distruttivi, jirrispettaw l-​awtoritajiet, itejbu l-​ħajja tal-​familja, u jkollhom ħarsa bilanċjata tal-​ġid materjali. Saħansitra iktar importanti, ix-​Xhieda taʼ Jehovah jgħinu lin-​nies igawdu relazzjoni intima m’Alla.

Il-predikaturi tas-​Saltna t’Alla jagħmlu l-​ġid lis-​soċjetà li jgħixu fiha. Imma iktar minn dan, huma jidderieġu lin-​nies biex ipoġġu l-​fiduċja tagħhom fi gvern li huwa veru u li se jġib paċi dejjiema għal dawk kollha li jħobbu lil Alla. Bħala riżultat tan-​newtralità tagħhom, dawn il-​Kristjani huma ħielsa biex jipprovdu l-​iktar għajnuna dejjiema u prattika li tistaʼ tinkiseb illum.

[Kaxxa/Stampa f’paġna 7]

Minn Politikant għal Xandâr tas-​Saltna t’Alla

Meta kien tifel, Átila tgħallem it-​teoloġija tal-​liberazzjoni mill-​kappillan tiegħu f’Belém, il-​Brażil. Hu kien jieħu pjaċir jismaʼ li l-​umanità eventwalment se tinħeles mill-​moħqrija u ngħaqad maʼ komunità attivista, fejn tgħallem jorganizza marċi taʼ protesta u kampanji taʼ diżubbidjenza ċivili.

Imma Átila kien jieħu pjaċir ukoll jgħallem lit-​tfal f’din il-​komunità minn ktieb li xi ħadd kien tah, Listening to the Great Teacher.a Dan il-​ktieb kien jitkellem dwar kondotta tajba u ubbidjenza lejn l-​awtoritajiet. Dan ġiegħel lil Átila jaħseb għala dawk li jappoġġaw it-​teoloġija tal-​liberazzjoni ma jsegwux il-​livelli morali għoljin taʼ Ġesù u għala xi wħud jinsewhom lin-​nies maħqurin meta jieħdu l-​poter. Hu ma baqax jipparteċipa f’attivitajiet tal-​komunità. Iktar tard, ix-​Xhieda taʼ Jehovah ħabbtulu l-​bieb u tkellmu miegħu dwar is-​Saltna t’Alla. Ma damx ma beda jistudja l-​Bibbja u jitgħallem dwar ir-​rimedju veru għall-​moħqrija taʼ l-​umanità.

Meta kien qed jistudja l-​Bibbja, Átila attenda seminar Kattoliku fuq il-​fidi u l-​politika. “Dawn huma żewġ modi taʼ kif tħares lejn l-​istess sitwazzjoni,” spjegaw dawk li kienu qed jgħallmu. Attenda wkoll laqgħa fis-​Sala tas-​Saltna. X’differenza! Per eżempju, ma kien hemm ħadd ipejjep, jixrob l-​alkoħol, jew jgħid ċajt oxxen. Hu ddeċieda li jingħaqad magħhom fix-​xogħol taʼ l-​ippridkar, u wara ftit taż-​żmien tgħammed. Issa jistaʼ jara għala t-​teoloġija tal-​liberazzjoni mhix is-​soluzzjoni vera għall-​problemi tal-​foqra.

[Nota taʼ taħt]

[Stampi f’paġna 6]

In-​newtralità taʼ ministri Kristjani ma żżommhomx milli jgħinu lil oħrajn