Int Tistaʼ Tferraħ lil Alla

NISTGĦU aħna, fil-​fatt, neffettwaw il-​mod kif iħossu Alla? Jistaʼ Alla jifraħ? Dizzjunarju wieħed jagħti definizzjoni tal-​kelma “Alla” bħala “r-​realtà suprema jew aħħarija.” Xi ngħidu kieku din ir-​realtà meraviljuża kienet sempliċement xi forza? Nistgħu nistennew li forza impersonali tithenna? Ma tantx. Iżda, ikkunsidra dak li tgħid il-​Bibbja dwar Alla.

“Alla huwa spirtu,” qal Ġesù Kristu. (Ġwanni 4:24) Spirtu huwa forma taʼ ħajja li hi differenti mill-​bnedmin. Għalkemm l-​għajnejn umani ma jistgħux jarawh, spirtu għandu ġisem—“ġisem spiritwali.” (1 Korintin 15:44; Ġwanni 1:18) Meta titkellem dwar Alla, il-​Bibbja tuża saħansitra kliem figurattiv u tgħid li hu għandu l-​għajnejn, il-​widnejn, l-​idejn, eċċetra.a Alla għandu wkoll isem—Jaħweh, jew Jehovah. (Salm 83:19 [83:18, NW]) Għalhekk, l-​Alla tal-​Bibbja hu persuna spirtu. (Lhud 9:24, NW) Huwa “Alla ħaj u sultan taʼ dejjem.”—Ġeremija 10:10.

Bħala persuna ħajja u reali, Jehovah jistaʼ jaħseb u jaġixxi. Hu juri kwalitajiet u sentimenti, dak li jogħġbu u dak li ma jogħġbux. Fil-​fatt, il-​Bibbja fiha ħafna espressjonijiet li jirrivelaw liema affarijiet jogħġbuh jew ma jogħġbuhx. Filwaqt li l-​allat u l-​idoli magħmulin mill-​bniedem jirriflettu biss il-​karatteristiċi jew il-​kwalitajiet tal-​bnedmin li jivvintawhom, l-​Alla li Jistaʼ Kollox, Jehovah, huwa l-​Oriġinatur stess taʼ l-​emozzjonijiet li poġġa fil-​bnedmin.—Ġenesi 1:27; Isaija 44:7-11.

Bla dubju, Jehovah hu “Alla l-​hieni.” (1 Timotju 1:11, NW) Hu mhux biss jithenna bix-​xogħlijiet kreattivi tiegħu imma wkoll jieħu pjaċir iwettaq l-​iskop tiegħu. Permezz tal-​profeta Isaija, Jehovah jiddikjara: “Nagħmel kull ma rrid . . . Hekk tkellimt u hekk nagħmel; hekk iddeċidejt, u nagħmel hekk.” (Isaija 46:9-11) Is-​salmista kanta: “Jifraħ il-​Mulej bl-​għemejjel tiegħu!” (Salm 104:31) Imma Alla jerġaʼ għandu sors ieħor li jferrħu. Hu jgħid: “Kun għaref, ibni, u ferraħli qalbi.” (Proverbji 27:11) Aħseb ftit xi jfisser dan—aħna nistgħu nferrħu lil Alla!

Kif Nistgħu Nferrħu Qalb Alla

Ikkunsidra kif il-​patrijarka Noè ferraħ qalb Jehovah. Noè “sab ħniena quddiem il-​Mulej” għaliex “kien perfett fost in-​nies taʼ żmienu.” B’kuntrast qawwi man-​nies mill-​agħar taʼ dak iż-​żmien, il-​fidi u l-​ubbidjenza taʼ Noè tant għoġbu lil Alla li setaʼ jingħad li Noè “kien jimxi . . . maʼ Alla.” (Ġenesi 6:6, 8, 9, 22) “Kien minħabba fil-​fidi tiegħu li Noè . . . mimli b’biżaʼ qaddis bena arka biex isalva l-​familja tiegħu.” (Lhud 11:7) Jehovah kien kuntent b’Noè u bierek lilu u lill-​familja tiegħu billi żammhom ħajjin matul dak il-​perijodu mqalleb taʼ l-​istorja umana.

Il-​patrijarka Abraham ukoll kien konxju sew tas-​sentimenti taʼ Jehovah. L-​għarfien intimu tiegħu dwar il-​mod kif jaħsibha Alla kien jidher ċar meta Jehovah informah li Sodoma u Gomorra kienu se jinqerdu minħabba t-​taħsir morali tagħhom. Abraham kien jafu biżżejjed lil Jehovah biex jikkonkludi li Alla ma kienx jgħaddilu minn moħħu li joqtol lill-​bniedem ġust mal-​ħażin. (Ġenesi 18:17-33) Snin wara, b’ubbidjenza lejn id-​direzzjoni t’Alla, Abraham kważi ‘offra ’l Iżakk,’ għax “fehem li Alla kellu s-​setgħa saħansitra li jqajjem mill-​mewt.” (Lhud 11:17-19; Ġenesi 22:1-18) Abraham tant kien sensittiv għas-​sentimenti t’Alla u tant wera fidi qawwija u ubbidjenza li ġie “msejjaħ ħabib taʼ Alla.”—Ġakbu 2:23.

Raġel ieħor li għamel ħiltu kollha biex iferraħ qalb Alla kien is-​Sultan David taʼ Iżrael tal-​qedem. Jehovah qal dwaru: “Sibt lil David, bin Ġesse, raġel skond qalbi, li jagħmel dak kollu li rrid jien.” (Atti 13:22) Qabel ma kkonfronta lill-​iġgant Gulija, David poġġa l-​fiduċja sħiħa tiegħu f’Alla u qal lis-​Sultan Sawl l-​Iżraeli: “Il-​Mulej, li ħelisni minn ħalq l-​iljun u l-​ors, jeħlisni minn id dan il-​Filisti.” Jehovah bierek il-​fiduċja li David kellu Fih, u bis-​saħħa t’hekk David setaʼ joqtol lil Gulija. (1 Samwel 17:37, 45-54) David ma riedx biss l-​aġir tiegħu imma wkoll ‘kliem fommu u ħsieb qalbu li jkunu milqugħa quddiem il-​Mulej.’—Salm 19:15 (19:14, NW).

Xi ngħidu għalina? Kif nistgħu nogħġbuh lil Jehovah? Iktar ma nkunu sensittivi għas-​sentimenti t’Alla, iktar se nsiru konxji taʼ dak li nistgħu nagħmlu biex inferrħu qalb Alla. Għalhekk, meta naqraw il-​Bibbja jkun essenzjali li nagħmlu sforz biex nitgħallmu dwar is-​sentimenti t’Alla sabiex ‘nagħrfu sewwa rrieda taʼ Alla bl-​għerf kollu u ddehen spiritwali. Hekk inkunu nistgħu ngħixu sewwa kif jixraq lill-​Mulej u nogħġbuh f’kollox.’ (Kolossin 1:9, 10) Mill-​banda l-​oħra, l-​għarfien jgħinna nibnu l-​fidi tagħna. Dan hu vitali għaliex “mingħajr il-​fidi ma jistax ikun li wieħed jogħġob lil Alla.” (Lhud 11:6) Iva, billi nagħmlu kull sforz biex nibnu fidi qawwija u billi nġibu ħajjitna fi qbil mar-​rieda taʼ Jehovah, nistgħu nferrħulu qalbu. Fl-​istess waqt, irridu noqogħdu attenti li ma nweġġgħulux qalbu lil Jehovah.

La Tweġġax lil Alla

Eżempju taʼ kif tistaʼ tweġġaʼ s-​sentimenti taʼ Jehovah jinsab fir-​rakkont dwar jiem Noè. F’dak iż-​żmien, “l-​art . . . imtliet bil-​vjolenza. U Alla ħares lejn l-​art, u ra li kienet imħassra, għax kull ħliqa ħajja kienet għawwġet triqtha fuq l-​art.” Kif ħassu Alla meta ħares lejn it-​taħsir morali u l-​vjolenza? “Il-​Mulej sogħob bih li kien għamel il-​bniedem fl-​art,” tgħid il-​Bibbja, “u sewwed qalbu.” (Ġenesi 6:5, 6, 11, 12) Alla ddispjaċieh għaliex il-​kondotta tal-​bnedmin tant kienet saret ħażina li kellu jbiddel l-​attitudni tiegħu lejn il-​ġenerazzjoni mill-​agħar taʼ qabel id-​Dilluvju. Minħabba d-​dispjaċir tiegħu għall-​ħażen tagħhom, Alla bidel l-​attitudni tiegħu taʼ Ħallieq tal-​bnedmin għal dik taʼ wieħed li jeqridhom.

Jehovah ħassu mnikket ukoll meta l-​poplu tiegħu stess, il-​ġens taʼ Iżrael tal-​qedem, b’mod persistenti injora s-​sentimenti tiegħu u d-​direzzjoni kollha mħabba tiegħu. Is-​salmista beka: “Kemm-il darba qamu kontrieh fid-​deżert, kemm-il darba nikktuh fl-​art niexfa! Kienu jerġgħu jġarrbu lil Alla, u jħeġġu l-​korla tal-​Qaddis taʼ Iżrael.” Madankollu, “hu kien iħenn u jaħfrilhom il-​ħtija, ma kienx jasal biex jeqridhom; ħafna drabi kien iżomm il-​korla, ma kienx jixgħel qilltu kollha.” (Salm 78:38-41) Avolja l-​Iżraelin ribellużi kien ħaqqhom isofru l-​konsegwenzi taʼ dnubiethom stess, il-​Bibbja tgħidilna li “fid-​dwejjaq tagħhom kollha [Alla] kien imnikket.”—Isaija 63:9, Karm Żammit.

Minkejja l-​evidenza abbundanti tas-​sentimenti teneri t’Alla għalihom, in-​nies taʼ Iżrael “kienu jiddieħku bil-​mibgħutin tiegħu, imaqdru kliemu, u jkasbru l-​profeti tiegħu, sa ma saħnet il-​korla tal-​Mulej għall-​poplu tiegħu, hekk li ma setgħux jeħilsuha aktar.” (2 Kronaki 36:16) Fl-​aħħar mill-​aħħar, bir-​ribelljoni tagħhom imfassla fuq il-​kburija huma tant “nikktu l-​ispirtu qaddis tiegħu” li tilfu l-​favur taʼ Jehovah. (Isaija 63:10) X’kien ir-​riżultat? Alla b’ġustizzja neħħa l-​protezzjoni tiegħu minn fuqhom, u ġarrbu diżastru meta l-​Babiloniżi rebħu lil Ġuda u qerdu lil Ġerusalemm. (2 Kronaki 36:17-21) Kemm hu taʼ swied il-​qalb meta n-​nies jagħżlu li jgħixu ħajja midinba, u b’hekk joffendu u jnikktu lill-​Ħallieq tagħhom!

Il-Bibbja ma tħallilna l-​ebda dubju li l-​kondotta inġusta tweġġgħu ħafna lil Alla. (Salm 78:40) Affarijiet li joffendu lil Alla—u li saħansitra huma mistmerrin minnu—jinkludu l-​kburija, il-​gideb, il-​qtil, il-​prattika tal-​maġija, it-​tbassir, il-​qima lill-​antenati, il-​morali laxki, l-​omosesswalità, linfedeltà fiż-​żwieġ, l-​inċest, u l-​moħqrija talfoqra.—Levitiku 18:9-29; 19:29; Dewteronomju 18:9-12; Proverbji 6:16-19; Ġeremija 7:5-7; Malakija 2:14-16.

Jehovah kif iħossu dwar l-​idolatrija? Eżodu 20:4, 5 jgħid: “La tagħmilx għalik suriet minquxa u ebda xbieha taʼ ebda ħaġa li hemm fl-​għoli tas-​sema, jew isfel fl-​art, jew fil-​baħar taħt l-​art. La tmilx quddiemhom: La tadurahomx.” Għala? Għaliex idolu hu xi ħaġa ‘mistkerrha mill-​Mulej.’ (Dewteronomju 7:25, 26) L-​appostlu Ġwanni wissa: “Uliedi, ħarsu rwieħkom mill-​idoli.” (1 Ġwanni 5:21) U l-​appostlu Pawlu kiteb: “Għeżież tiegħi, aħarbu l-​allat foloz.”—1 Korintin 10:14.

Fittex l-​Approvazzjoni t’Alla

Alla ‘hu ħaġa waħda man-​nies retti.’ Hu “jitgħaxxaq b’dawk li triqthom dritta.” (Proverbji 3:32, KŻ; 11:20) Għall-​kuntrarju, dawk li jibqgħu joffendu lil Alla billi b’ras iebsa jinjoraw jew jisfidaw is-​sentimenti ġusti tiegħu dalwaqt se jbatu l-​konsegwenzi għax ma jkunux għoġbuh. (2 Tessalonikin 1:6-10) Tabilħaqq, hu dalwaqt se jtemm il-​ħażen kollu li tant jiddomina llum.—Salm 37:9-11; Sofonija 2:2, 3.

Madankollu, il-​Bibbja tagħmilha ċara ferm li Jehovah “ma jridx li xi ħadd jintilef, imma li kulħadd jersaq għall-​indiema.” (2 Pietru 3:9) Hu jippreferi ħafna iktar li juri l-​affezzjoni tiegħu lejn in-​nies sewwa li jħobbuh milli jesprimi d-​dispjaċir tiegħu lejn dawk li jagħżlu li ma jirriformawx ruħhom. Jehovah ‘ma jitgħaxxaqx b’mewt il-​midneb, imma bir-​reġgħa lura tiegħu minn triqtu biex jgħix.’—Eżekjel 33:11.

Għalhekk, ħadd m’għandu għalfejn isir il-​mira tar-​rabja taʼ Jehovah. “Il-​Mulej jaf jagħder, u hu ħanin bil-​bosta.” (Ġakbu 5:11) B’fiduċja sħiħa fis-​sentimenti t’Alla, int tistaʼ ‘tixħet fuqu l-​ħsibijiet kollha tiegħek għax hu jaħseb fik.’ (1 Pietru 5:7) Kun assigurat li dawk li jferrħu qalb Alla għandhom il-​prospett meraviljuż li jgawdu l-​approvazzjoni u l-​ħbiberija tiegħu. Għaldaqstant, issa huwa iktar urġenti minn qatt qabel illi ‘tfittex li tagħraf dak li jogħġob lill-​Mulej.’—Efesin 5:10.

Kemm hi ħaġa meraviljuża li Alla bil-​qalb tajba mhix mistħoqqa tiegħu rrivela l-​kwalitajiet u s-​sentimenti glorjużi tiegħu! U int tistaʼ tferraħlu qalbu. Jekk tixtieq tagħmel hekk, inħeġġuk tikkuntattja lix-​Xhieda taʼ Jehovah fl-​inħawi tiegħek. Dawn huma henjin li juruk x’sabu li hu prattiku u possibbli fl-​istinkar tagħhom biex jogħġbu lil Alla.

[Nota taʼ taħt]

[Kaxxa f’paġna 7]

Il-​Bibbja Għala Tiddeskrivi lil Alla b’Termini Umani?

Ladarba “Alla huwa spirtu,” ma nistgħux narawh bl-​għajnejn fiżiċi tagħna. (Ġwanni 4:24) Għalhekk, il-​Bibbja tuża kliem figurattiv, bħas-​similitudnijiet, il-​metafori, u l-​antropomorfiżmi biex tgħinna nifhmu s-​setgħa, il-​maestà, u l-​attivitajiet t’Alla. L-​antropomorfiżmu (Grieg, “forma taʼ bniedem”) huwa li wieħed jattribwixxi karatteristiċi umani lil xi ħadd li m’huwiex bniedem. Mela avolja ma nafux kif jidher il-​ġisem spirtu t’Alla, il-​Bibbja titkellem dwar Alla bħala li għandu l-​għajnejn, il-​widnejn, l-​idejn, id-​dirgħajn, is-​swabaʼ, is-​saqajn, u qalb.—Ġenesi 8:21; Eżodu 3:20; 31:18; Ġob 40:9; Salm 18:10 (18:9, NW); 34:16 (34:15, NW).

Dan il-​lingwaġġ deskrittiv ma jfissirx li l-​ġisem spirtu t’Alla għandu l-​istess tip taʼ membri li għandhom l-​iġsma umani. L-​antropomorfiżmi ma jridux jittieħdu letteralment. Dawn sempliċement jgħinu lill-​bnedmin ikollhom fehma aħjar dwar Alla. Mingħajr dan il-​kliem figurattiv, ikun diffiċli, jekk mhux impossibbli, li sempliċi bnedmin jifhmu kwalunkwe deskrizzjoni dwar Alla. Madankollu, dan ma jfissirx li l-​personalità t’Alla Jehovah ġiet ivvintata mill-​bnedmin. Il-​Bibbja tispjega b’mod ċar li l-​bniedem inħalaq fuq ix-​xbieha t’Alla—mhux Alla fuq ix-​xbieha tal-​bniedem. (Ġenesi 1:27) Peress li l-​kittieba tal-​Bibbja kienu ‘mnebbħin minn Alla,’ id-​deskrizzjoni tagħhom dwar il-​personalità t’Alla hi fir-​realtà d-​deskrizzjoni tiegħu stess dwar il-​kwalitajiet persunali tiegħu—l-​istess kwalitajiet li hu poġġa b’diversi gradi fil-​ħolqien uman tiegħu. (2 Timotju 3:16, 17) Minflok m’huma l-​kwalitajiet tal-​bniedem f’Alla, huma tassew il-​kwalitajiet t’Alla fil-​bniedem.

[Stampa f’paġna 4]

Noè sab favur f’għajnejn Alla

[Stampa f’paġna 5]

Abraham kien sensittiv għas-​sentimenti t’Alla

[Stampa f’paġna 6]

David poġġa l-​fiduċja sħiħa tiegħu f’Jehovah

[Stampa f’paġna 7]

Hekk kif taqra l-​Bibbja, tistaʼ titgħallem kif tferraħ lil Alla

[Sors tal-​Istampa f’paġna 4]

Courtesy of Anglo-Australian Observatory, photograph by David Malin