X’Tiftakar?

Ħadt gost taqra l-​ħarġiet reċenti tat-​Torri taʼ l-​Għassa? Mela, ara jekk tistax twieġeb dawn il-​mistoqsijiet li ġejjin:

• Għala jistaʼ l-​ewwel dnub—id-​diżubbidjenza taʼ Adam—jitqabbel maʼ marda ereditarja?

Huwa bħal marda minħabba li Adam għadda d-​dnub lin-​nisel tiegħu. Għalhekk aħna writna d-​difett tad-​dnub, l-​istess bħalma xi tfal jirtu marda mill-​ġenituri tagħhom.—8/15, paġna 5.

• X’inhuma xi affarijiet li bażikament jikkaġunaw iż-​żjieda fil-​vjolenza llum?

Satana qed jipprova jifred lin-​nies minn Ġeħova billi jiżrgħalhom f’qalbhom spirtu taʼ vjolenza, kemm jekk b’films, mużika, u logħob tal-​kompjuter li jinkuraġġixxi lil dak li jkun qed jilgħab biex iwettaq brutalità u qtil. Il-​vjolenza fuq il-​mezzi tax-​xandir ikkontribwiet għal ħafna għemejjel vjolenti.—9/1, paġna 29.

• Min kien Ponzju Pilatu?

Hu kien Ruman taʼ livell inqas taʼ nobbiltà li probabbli xi darba kien fil-​militar. L-​Imperatur Ruman Tiberju ħatar lil Pilatu bħala gvernatur tal-​provinċja tal-​Lhudija fis-​sena 26 E.K. Fil-​ġuri taʼ Ġesù, Pilatu semaʼ l-​akkużi li għamlu l-​mexxejja Lhud. Biex jogħġob lill-​folla, hu approva l-​esekuzzjoni taʼ Ġesù.—9/15, paġni 10-12.

• X’inhu s-​“sinjal” imsemmi f’Mattew 24:3?

Dan is-​sinjal hu magħmul minn diversi fatturi li flimkien jingħaqdu f’marka, jew sinjal, sħiħa li tidentifika. Dan is-​sinjal jinkludi gwerer, ġuħ, mard li jittieħed, u terremoti, u jippermetti li s-​segwaċi taʼ Ġesù jagħrfu l-​“preżenza” tiegħu kif ukoll “tmiem is-​sistema.”—10/1, paġni 4-5.

• X’kienet id-​Dijaspora, u lil liema nħawi kienet tinvolvi?

It-​terminu japplika għal-​Lhud li kienu jgħixu barra l-​Palestina. Fl-​ewwel seklu, iċ-​ċentri prinċipali tal-​Lhud kienu fis-​Sirja, l-​Asja Minuri, Babilonja, u l-​Eġittu, u kien hemm komunitajiet iżgħar fil-​parti Ewropea taʼ l-​Imperu Ruman.—10/15, paġna 12.

• Jistaʼ Kristjan iżomm kuxjenza tajba jekk jaċċetta impjieg li fih ikollu jġorr arma?

Jekk għandekx tieħu sehem f’xogħol sekulari li jeħtieġ li ġġorr arma tan-​nar jew arma oħra hi deċiżjoni persunali. Però, f’impjieg li jinġarru l-​armi hemm iċ-​ċans li dak li jkun isir ħati tad-​demm jekk ikollu juża l-​arma tiegħu jew jistaʼ jkun f’periklu li jweġġaʼ jew imut minn xi attakk jew vindikazzjoni. Kristjan li jġorr arma bħal din ma jkunx jikkwalifika għal privileġġi speċjali fil-​kongregazzjoni. (1 Timotju 3:​3, 10)—11/1, paġna 31.

• Ladarba l-​kelma “Armageddon” ġejja mill-​espressjoni “Muntanja taʼ Megiddu,” ifisser dan li l-​battalja t’Armageddon se tiġi miġġielda ħdejn muntanja fil-​Lvant Nofsani?

Le. Ma teżistix Muntanja taʼ Megiddu, imma hemm biss għolja ’l fuq mill-​pjanura tal-​wied fil-​qrib f’Iżrael. Dan il-​post ma jesax “is-​slaten taʼ l-​art u l-​armati tagħhom” kollha. Il-​gwerra l-​kbira t’Alla se tkun miġġielda mad-​dinja kollha, u se ttemm il-​gwerer kollha. (Rivelazzjoni 16:​14, 16; 19:19; Salm 46:​9, 10 [46:​8, 9, NW])—12/1, paġni 4-7.