Mistoqsijiet mill-​Qarrejja

F’liema sens Koħèlet sab biss ‘raġel f’elf, iżda mara fost in-​nisa ma sabx waħda’?—Koħèlet 7:​28.

Biex nifhmu sew dan il-​kliem ispirat, hemm bżonn li l-​ewwel nifhmu kif Alla jqis lin-​nisa. Il-​Bibbja tirreferi għall-​armla Rut, mart bin Nagħomi, bħala “mara sewwa.” (Rut 3:​11) Skond Proverbji 31:10 mara taʼ ħila “tiswa ħafna aktar mill-​ġawhar.” Allura, x’ried ifisser is-​Sultan Salamun taʼ Iżrael tal-​qedem meta qal: “Raġel f’elf sibtu, iżda mara . . . ma sibtx waħda”?

Il-kuntest juri li n-​nisa fi żmien Salamun b’mod ġenerali kellhom livelli morali baxxi. (Koħèlet 7:26) Dan jistaʼ jkun riżultat taʼ l-​influwenza tan-​nisa barranin li kienu jipprattikaw il-​qima taʼ Bagħal. Anki s-​Sultan Salamun ċeda għall-​pressjoni li kellu mill-​ħafna nisa barranin tiegħu. Il-​Bibbja tgħid li hu “kellu sebaʼ mitt mara prinċipessi u tliet mija konkubini. U dawn in-​nisa tiegħu ħassrulu qalbu” biex jadura allat foloz. (1 Slaten 11:​1-4) Il-​livelli morali taʼ l-​irġiel ukoll ma kinux sewwa—raġel wieħed minn elf kien rari, kważi ma ssibux. Salamun ikkonkluda: “Ara dan biss sibt: li Alla għamel il-​bniedem dritt, iżda huma jfittxu tagħwiġ bla għadd.” (Koħèlet 7:​29) Din hi konklużjoni dwar l-​umanità​—ir-​raġel bħala li jirrappreżenta r-​razza umana, mhux ir-​raġel meta jiġi mqabbel maʼ mara. Għaldaqstant, il-​kliem misjub f’Koħèlet 7:28 għandu jitqies bħala kumment dwar il-​kundizzjoni morali ġenerali tan-​nies taʼ żmien Salamun.

Però, hemm possibbiltà oħra għat-​tifsira taʼ dan il-​vers. Dan jistaʼ wkoll ikun profetiku, għax qatt ma kien li mara obdiet perfettament lil Ġeħova. Iżda raġel li għamel dan kien hemm​—Ġesù Kristu.​—Rumani 5:​15-​17.

[Stampa f’paġna 31]

“Raġel f’elf”