Il-Qarrejja Tagħna Jistaqsu
Is-Saltna t’Alla f’Qalbek Qiegħda?
Ħafna llum jemmnu li t-tweġiba għal din il-mistoqsija hija iva. Per eżempju, The Catholic Encyclopedia tistqarr: “Is-saltna t’Alla tfisser . . . li Alla jkun qed jaħkem fi qlubna.” Din l-idea hija tagħlim komuni tal-kleru. Veru li l-Bibbja tgħallem li s-Saltna t’Alla qiegħda fil-qlub tal-bnedmin?
Xi wħud jaħsbu li kien Ġesù nnifsu li ħareġ l-ewwel darba bl-idea li s-Saltna t’Alla qiegħda fil-qlub tal-bnedmin. Huwa minnu li Ġesù qal: “Ara! Is-saltna t’Alla qiegħda f’nofskom.” (Luqa 17:21) Xi traduzzjonijiet hawnhekk jgħidu: “Is-saltna t’Alla hi ġo fikom.” Hija din traduzzjoni eżatta taʼ l-espressjoni li qal Ġesù? Tassew li ried ifisser li s-Saltna t’Alla tinsab fil-qlub tal-bnedmin?
L-ewwel, ikkunsidra x’inhi l-qalb tal-bniedem. Meta l-Bibbja tirreferi għaliha, il-qalb figurattiva tfisser il-persuna ġewwinija, is-sors tal-ħsibijiet, l-attitudnijiet, u s-sentimenti taʼ persuna. L-idea li xi ħaġa sublimi bħalma hi s-Saltna t’Alla tkun fil-qalb tal-bniedem—b’tali mod li, per eżempju, tistaʼ tbiddel lin-nies u tagħtihom qalb nobbli—forsi ddoqqlok għal widnejk, imma hija raġunevoli?
Il-Bibbja tgħidilna: “Qalb il-bniedem kollha qerq u mħassra.” (Ġeremija 17:9) Ġesù nnifsu qal: “Minn ġewwa, mill-qalb tal-bnedmin, joħroġ irraġunar li jagħmel ħafna ħsara: żína, serq, qtil, adulterji, xenqiet b’għira, atti mill-agħar.” (Marku 7:20-22) Ikkunsidra: Il-miżerja li naraw fid-dinja llum mhux mill-qlub midinbin tal-bnedmin oriġinat? Għalhekk, kif tistaʼ s-Saltna perfetta t’Alla tiġi minn sors bħal dan? Fil-fatt, daqskemm ix-xewk ma jistax jipproduċi t-tin daqshekk ieħor qalb il-bniedem ma tistax tipproduċi s-Saltna t’Alla.—Mattew 7:16.
It-tieni, ikkunsidra l-udjenza li kien qed jindirizza Ġesù meta qal il-kliem li nsibu f’Luqa 17:21. Il-vers taʼ qabel jgħid: “Meta l-Fariżej staqsewh meta kienet ġejja s-saltna t’Alla, hu wieġeb u qalilhom.” (Luqa 17:20) Il-Fariżej kienu l-għedewwa taʼ Ġesù. Ġesù stqarr li dawk l-ipokriti ma kinux se jidħlu fis-Saltna t’Alla. (Mattew 23:13) Issa jekk il-Fariżej ma kinux se jidħlu fis-Saltna t’Alla, tistaʼ din is-Saltna tkun fi qlubhom? Impossibbli! Mela, Ġesù x’ried ifisser?
F’xi traduzzjonijiet tal-Bibbja li ġew tradotti b’ċerta reqqa, dan il-kliem taʼ Ġesù ġie tradott fi kliem simili għal dak li nsibu fit-Traduzzjoni tad-Dinja l-Ġdida taʼ l-Iskrittura Griega Kristjana. Xi wħud jgħidu li s-Saltna qiegħda “fostkom” jew “f’nofskom.” Is-Saltna t’Alla kif kienet fost dawk in-nies f’dak iż-żmien, inkluż il-Fariżej? Sewwa, Ġesù kien il-wieħed li Alla Ġeħova ħatar biex ikun is-Sultan taʼ dik is-Saltna. Bħala s-Sultan-Nominat, Ġesù kien qiegħed f’nofs dawk in-nies. Hu għallem dwar is-Saltna t’Alla u saħansitra għamel il-mirakli, u b’hekk tahom dehra bil-quddiem taʼ dak li kellha twettaq is-Saltna. Mela, fil-veru sens tal-kelma, is-Saltna kienet f’nofshom.
Jidher ċar li fl-Iskrittura m’hemm xejn li jappoġġa l-idea li s-Saltna t’Alla qiegħda fil-qlub tal-bnedmin. Pjuttost, din fil-fatt hi gvern, wieħed li se jġib bidliet drammatiċi fuq l-art, sewwasew bħalma bassru l-profeti.—Isaija 9:5, 6 [9:6, 7, NW]; Danjel 2:44.