Żgħażagħ, Ftakru Issa fil-​Ħallieq Grandjuż Tagħkom

“Ftakar issa fil-​Ħallieq tiegħek f’jiem żgħożitek.” —EKK. 12:1, Karm Żammit.

1. Ġeħova kif juri l-​fiduċja fl-​aduraturi żgħażagħ tiegħu?

ĠEĦOVA jqis liż-​żgħażagħ Kristjani bħala prezzjużi u rifreskanti bħan-​nida. Tabilħaqq, hu bassar li fil-​jum li Ibnu jmexxi ‘l-​eżerċtu tiegħu,’ irġiel u nisa żgħażagħ se ‘joffru lilhom infushom minn rajhom’ fis-​servizz taʼ Kristu. (Salm 110:3, KŻ) Din il-​profezija kellha titwettaq fi żmien meta n-​nies in ġenerali ma jkollhomx il-​biżaʼ t’Alla, ikunu ossessjonati bihom infushom u bil-​flus, u jkunu diżubbidjenti. Madankollu, Ġeħova kien jaf li ż-​żgħażagħ li kienu se jqimuh kienu se jkunu differenti. X’fiduċja għandu Alla fikom aħwa żgħażagħ ġuvintur u tfajliet!

2. X’jinvolvi li tiftakar f’Ġeħova?

² Immaġina l-​ferħ li jħoss Alla meta jara żgħażagħ jiftakru fih bħala l-​Ħallieq Grandjuż tagħhom. (Ekk. 12:1, KŻ) Naturalment, li tiftakar f’Ġeħova jinvolvi iktar milli sempliċement taħseb dwaru. Dan ifisser li nieħdu azzjoni—nagħmlu dak li jogħġbu, inħallu l-​liġijiet u l-​prinċipji tiegħu jiggwidawna fil-​ħajja taʼ kuljum. Dan ifisser ukoll li nafdaw f’Ġeħova, għax nafu li hu konċernat bil-​kbir dwar il-​benesseri tagħna. (Salm 37:3; Is. 48:17, 18) Hekk tħossok int dwar il-​Ħallieq Grandjuż tiegħek?

“Ittama fil-​Mulej b’Qalbek Kollha”

3, 4. Ġesù kif wera fiduċja f’Ġeħova, u llum għala huwa importanti li tafda f’Ġeħova?

³ M’għandniex xi ngħidu, eżempju mill-​aqwa taʼ wieħed li kien jafda f’Alla kien Ġesù Kristu. Hu għex fi qbil mal-​kliem taʼ Proverbji 3:5, 6: “Ittama fil-​Mulej b’qalbek kollha, u tafdax fl-​għaqal tiegħek. Fih aħseb f’kull ma tagħmel, u hu jwittilek triqatek.” Ftit wara li tgħammed, Ġesù ġie avviċinat minn Satana u dan ipprova jħajru jaċċetta l-​glorja u l-​poter tad-​dinja. (Lq. 4:3-13) Ġesù ma tqarraqx. Hu kien jaf li “min jiċċekken u jibżaʼ mill-​Mulej, jieħu bi ħlasu” l-​veru “għana, ġieħ u ħajja.”—Prov. 22:4.

⁴ Id-​dinja taʼ llum hija mmexxija mir-​regħba u l-​egoiżmu. F’ambjent bħal dan, aħna għandna nkunu għaqlin u nsegwu l-​eżempju taʼ Ġesù. Żomm f’moħħok ukoll li Satana se jagħmel dak kollu li jistaʼ biex iħajjar lill-​qaddejja taʼ Ġeħova jitilqu mit-​triq id-​dejqa li twassal għall-​ħajja. Hu jrid jara lil kulħadd għaddej fit-​triq il-​wiesgħa li twassal għall-​qerda. Titqarraqx minnu! Minflok, kun determinat li tiftakar fil-​Ħallieq Grandjuż tiegħek. Afda fih kompletament u aqbad qabda soda “mal-​ħajja vera,” li hija kemm ċerta kif ukoll fil-​qrib.—1 Tim. 6:19.

Żgħażagħ, Kunu Għaqlin!

5. Kif tħossok dwar il-​futur taʼ din id-​dinja?

⁵ Żgħażagħ li jiftakru fil-​Ħallieq Grandjuż tagħhom huma iktar għaqlin minn uħud taʼ l-​istess età. (Aqra Salm 119:99, 100.) Peress li għandhom il-​ħarsa t’Alla, huma konxji bis-​sħiħ dwar kemm huma verament koroh il-​prospetti tad-​dinja. Avolja għadkom fil-​fjur taʼ ħajjitkom, intom iż-​żgħażagħ bla dubju rajtu li l-​biżaʼ u l-​ansjetà żdiedu. Jekk għadkom l-​iskola, x’aktarx li smajtu dwar iż-​żjieda fit-​tinġis, fis-​sħana globali, fit-​tqaċċit tas-​siġar, u problemi simili. In-​nies huma verament konċernati dwar dan, imma x-​Xhieda taʼ Ġeħova biss jistgħu jifhmu bis-​sħiħ li dan kollu huwa parti mis-​sinjal li jindika t-​tmiem tad-​dinja taʼ Satana.—Riv. 11:18.

6. Xi żgħażagħ kif ġew imqarrqin?

⁶ B’dispjaċir, xi qaddejja żgħażagħ t’Alla ma baqgħux attenti u għalqu għajnejhom għall-​fatt li din id-​dinja fadlilha biss żmien qasir. (2 Pt. 3:3, 4) Oħrajn ġew imħajrin jagħmlu xi dnub serju permezz tas-​sħubija ħażina u l-​pornografija. (Prov. 13:20) Kemm tkun xi ħaġa taʼ niket li titlef il-​favur t’Alla issa li qegħdin daqshekk viċin lejn l-​aħħar! Minflok, tgħallem minn dak li ġralhom l-​Iżraelin fis-​sena 1473 Q.E.K. meta kienu kkampjati fil-​Wita taʼ Mowab, u kienu fuq l-​għatba taʼ l-​Art Imwiegħda. X’ġara hemmhekk?

Ċedew fl-​Aħħar Ftit

7, 8. (a) Satana liema strateġija uża fil-​Wita taʼ Mowab? (b) Satana liema strateġija qed juża llum?

⁷ Lura f’dak iż-​żmien, Satana bla dubju ma riedx iħalli lill-​Iżraelin jieħdu l-​wirt imwiegħed lilhom. Wara li ma rnexxilux iġiegħel lill-​profeta Bagħlam jisħithom, Satana uża strateġija iktar sottili; hu pprova ma jħallihomx jiġu mberkin minn Ġeħova. In-​nisa seduċenti taʼ Mowab intużaw biex iqarrqu bihom, u din id-​darba x-​Xitan kellu suċċess mhux ħażin. In-​nies bdew ikollhom relazzjonijiet immorali mal-​bniet taʼ Mowab u bdew jagħtu qima lill-​Bagħal taʼ Pegħor! Għalkemm il-​wirt prezzjuż tagħhom, l-​Art Imwiegħda, kien verament viċin, xi 24,000 Iżraeli tilfu ħajjithom. Xi traġedja!—Num. 25:1-3, 9.

⁸ Illum, aħna qed noqorbu b’ritmu mgħaġġel lejn art imwiegħda ħafna aħjar—is-​sistema l-​ġdida. Bħalma jagħmel is-​soltu, Satana qiegħed għal darb’oħra juża l-​immoralità sesswali biex iwaqqaʼ lin-​nies t’Alla. Il-​livelli morali tad-​dinja tant qabdu t-​triq għan-​niżla li l-​fornikazzjoni hija kunsidrata bħala normali u l-​omosesswalità hija meqjusa bħala sempliċi għażla persunali. Oħt Kristjana qalet, “Fid-​dar u fis-​Sala tas-​Saltna biss uliedi jitgħallmu li l-​omosesswalità u s-​sess barra ż-​żwieġ huma ħżiena f’għajnejn Alla.”

9. X’jistaʼ jiġri matul “il-​fjur taż-​żgħożija,” u kif jistgħu ż-​żgħażagħ ikampaw maʼ dan?

⁹ Iż-​żgħażagħ li jiftakru fil-​Ħallieq Grandjuż tagħhom jafu li l-​intimità sesswali hija rigal mingħand Alla u li hija konnessa mal-​ħajja u t-​tnissil tagħha. Għalhekk, huma jafu li r-​relazzjonijiet sesswali għandhom jitgawdew bil-​mod kif idderieġa Alla—fl-​arranġament taż-​żwieġ. (Ebr. 13:4) Madankollu, matul “il-​fjur taż-​żgħożija”—iż-​żmien meta x-​xewqat sesswali jsiru qawwijin u jistgħu jħawdu lil dak li jkun—jistaʼ jkun taʼ sfida li tibqaʼ safi. (1 Kor. 7:36) X’tistaʼ tagħmel meta jiġuk ħsibijiet mhux xierqa? Itlob bil-​ħerqa lil Ġeħova għall-​għajnuna biex tiffoka fuq affarijiet nodfa. Ġeħova dejjem se jismaʼ lil dawk li jmorru għandu b’talb sinċier. (Aqra Luqa 11:9-13.) Konversazzjoni li tibni tistaʼ tgħinek ukoll tirranġa l-​ħsibijiet tiegħek.

Agħżel il-​Miri Tiegħek bil-​Għaqal!

10. Liema ħsieb negattiv li jistaʼ jkollna f’moħħna rridu nevitaw, u liema mistoqsijiet nistgħu nistaqsu lilna nfusna?

¹⁰ Raġuni waħda għala ħafna żgħażagħ fid-​dinja huma bla kontroll u jgħixu għall-​pjaċiri tal-​laħam hija li huma m’għandhomx ‘min iwissihom’—m’għandhom l-​ebda gwida divina jew tama ċerta għall-​futur. (Prov. 29:18) Huma bħall-​Iżraelin taʼ żmien Isaija li ma baqgħux isegwu l-​gwida t’Alla u li kienu jgħixu ‘għall-​għors u t-​tbaħrid, għall-​ikel tal-​laħam u x-​xorb taʼ l-​inbid.’ (Is. 22:13) Minflok ma tgħir għal nies bħal dawn, għala ma tirriflettix fuq it-​tama prezzjuża li għandu Ġeħova għall-​uħud leali tiegħu? Jekk int qaddej żagħżugħ t’Alla, tħares int b’ħerqa lejn id-​dinja l-​ġdida? Tagħmel int kull sforz possibbli biex ‘tgħix sewwa b’moħħ f’loku waqt li tistenna t-​tama hienja’ li Ġeħova poġġa quddiemek? (Titu 2:12, 13) It-​tweġiba tiegħek se tinfluwenza l-​miri u l-​prijoritajiet li tpoġġi quddiemek.

11. Il-​Kristjani żgħażagħ li għadhom l-​iskola għala għandhom jaħdmu iebes?

¹¹ Id-​dinja trid liż-​żgħażagħ ipoġġu l-​prijoritajiet prinċipali tagħhom fuq miri sekulari. Naturalment, dawk minnkom li għadkom l-​iskola tridu taħdmu iebes biex tiksbu edukazzjoni bażika u tajba. Wara kollox, il-​mira tagħkom m’hijiex biss li ssibu xogħol adattat imma wkoll li tkunu t’għajnuna għall-​kongregazzjoni u predikaturi tas-​Saltna produttivi. Sabiex tilħqu din il-​mira, tridu tkunu lesti li tikkomunikaw sew, taħsbu b’mod loġiku, u tirraġunaw bil-​kalma u b’rispett m’oħrajn. Madankollu, iż-​żgħażagħ li jistudjaw il-​Bibbja u jistinkaw biex japplikaw il-​prinċipji tagħha f’ħajjithom jiksbu l-​aqwa edukazzjoni li hawn u jpoġġu pedament tajjeb għall-​futur dejjiemi taʼ suċċess.—Aqra Salm 1:1-3.a

12. Il-​familji Kristjani liema eżempju jagħmlu tajjeb li jimitaw?

¹² F’Iżrael, l-​edukazzjoni tat-​tfal mill-​ġenituri tagħhom kienet tingħata importanza kbira. Din l-​edukazzjoni kopriet kważi kull aspett tal-​ħajja, speċjalment l-​affarijiet spiritwali. (Dt. 6:6, 7) Għalhekk, l-​Iżraelin żgħażagħ, li semgħu mill-​ġenituri tagħhom u minn oħrajn akbar fl-​età li kienu jibżgħu minn Alla, kisbu l-​għarfien kif ukoll l-​għaqal, id-​dehen, u l-​abbiltà li jifhmu u li jaħsbu—kwalitajiet li m’humiex komuni imma li jiġu provduti mill-​edukazzjoni divina. (Prov. 1:2-4; 2:1-5, 11-15) Familji Kristjani llum għandhom jagħtu attenzjoni bħal din għall-​edukazzjoni.

Ismaʼ minn Dawk li Jħobbuk

13. Ħafna żgħażagħ liema tip taʼ pariri jirċievu, u għala għandhom joqogħdu attenti?

¹³ Iż-​żgħażagħ jingħataw pariri mingħand kull tip taʼ nies—inkluż uħud li jiggwidawhom fl-​iskola u li normalment jagħtu pariri lill-​istudenti dwar kif jistgħu jkollhom suċċess fid-​dinja sekulari. Jekk jogħġobkom, waqt li tikkunsidraw pariri bħal dawn, itolbu lil Alla għall-​gwida mill-​Kelma tiegħu u mill-​ikel spiritwali provdut mill-​klassi taʼ l-​ilsir leali u għaqli. Mill-​istudju li tagħmlu mill-​Bibbja, intom tafu li ż-​żgħażagħ u l-​uħud bla esperjenza huma waħda mill-​miri prinċipali taʼ Satana. Per eżempju, fil-​ġnien taʼ l-​Għeden, Eva li ma kellhiex esperjenza semgħet minn Satana, stranġier li ma wera l-​ebda mħabba lejha. Kemm kien ikun hemm riżultat differenti li kieku semgħet minn Ġeħova, il-​wieħed li wera l-​imħabba tiegħu lejha b’ħafna modi!—Ġen. 3:1-6.

14. Għala għandna nisimgħu kemm minn Ġeħova kif ukoll minn ġenituri li jemmnu?

¹⁴ Il-​Ħallieq Grandjuż tagħkom iħobb lilkom ukoll, u dan jagħmlu b’motiv li huwa assolutament pur. Hu jridkom tkunu ferħanin għal dejjem, mhux għalissa biss! Għalhekk, b’tenerezza taʼ ġenitur li jħobb, hu jgħid lilkom u lil dawk kollha li jqimuh: “Din hi t-​triq; għaddi minnha.” (Is. 30:21) Jekk għandek ġenituri li jemmnu u li verament iħobbu lil Ġeħova, int għandek barka oħra. B’rispett, ismaʼ l-​pariri tagħhom meta tiġi biex tagħmel il-​prijoritajiet u l-​miri tiegħek. (Prov. 1:8, 9) Wara kollox, huma jixtiquk tikseb il-​ħajja, xi ħaġa li hija bil-​wisq iktar prezzjuża mill-​għana jew il-​prestiġju li toffri din id-​dinja.—Mt. 16:26.

15, 16. (a) X’fiduċja jistaʼ jkollna f’Ġeħova? (b) X’lezzjoni importanti nitgħallmu mill-​esperjenza taʼ Bàruk?

¹⁵ Dawk li jiftakru fil-​Ħallieq Grandjuż tagħhom iżommu ħajjithom sempliċi, fiduċjużi li Ġeħova “żgur” ma jitlaqhomx u “żgur” ma jabbandunahomx. (Aqra Ebrej 13:5.) Peress li din l-​attitudni tajba hija differenti minn dak li taħseb id-​dinja, aħna rridu noqogħdu attenti li ma nħallux l-​ispirtu tad-​dinja jinfluwenzana. (Efes. 2:2) F’dan ir-​rigward, ikkunsidra l-​eżempju taʼ Bàruk, is-​segretarju taʼ Ġeremija, li għex fl-​aħħar jiem diffiċli taʼ Ġerusalemm li wasslu għall-​qerda tagħha fis-​sena 607 Q.E.K.

¹⁶ Jistaʼ jkun li Bàruk ried li jkollu ħajja aħjar materjalment għalih innifsu. Ġeħova nnotah dan u bil-​ħlewwa wissa lil Bàruk biex ma jfittixx “ħwejjeġ kbar” għalih innifsu. Bàruk wera li kien umli u għaqli, għaliex hu semaʼ minn Ġeħova u salva mill-​qerda taʼ Ġerusalemm. (Ġer. 45:2-5) Mill-​banda l-​oħra, in-​nies taʼ żmien Bàruk li kisbu “ħwejjeġ kbar” materjalment, billi poġġew lil Ġeħova fil-​ġenb, ma damux ma tilfu kollox u spiċċaw f’idejn il-​Kaldin (il-Babiloniżi). Ħafna tilfu ħajjithom ukoll. (2 Kron. 36:15-18) L-​esperjenza taʼ Bàruk tgħinna naraw li relazzjoni tajba m’Alla hija ħafna iktar importanti mill-​għana u l-​prominenza f’din id-​dinja.

Imita l-​Aqwa Eżempji

17. Għala Ġesù, Pawlu, u Timotju huma eżempji eċċellenti għall-​qaddejja taʼ Ġeħova llum?

¹⁷ Sabiex tgħinna fit-​triq li twassal għall-​ħajja, il-​Kelma t’Alla tipprovdilna ħafna eżempji mill-​aqwa biex nimitawhom. Per eżempju, fost il-​bnedmin kollha li qatt għexu, Ġesù kien l-​iktar wieħed imżejjen b’talenti. Madankollu, hu ffoka fuq dak li setaʼ jgħin lin-​nies għal dejjem—“l-​aħbar tajba tas-​saltna.” (Lq. 4:43) Sabiex jagħti lil Ġeħova l-​aqwa tiegħu, l-​appostlu Pawlu abbanduna karriera taʼ suċċess u uża l-​ħin u l-​enerġija tiegħu biex jippriedka l-​aħbar tajba. Timotju, “iben ġenwin fil-​fidi,” imita l-​eżempju tajjeb taʼ Pawlu. (1 Tim. 1:2) Iddispjaċiehom Ġesù, Pawlu, u Timotju li għexu ħajjithom b’dan il-​mod? Ċertament li le! Fil-​fatt, Pawlu qal li hu kien iqis dak li kellha x’toffri d-​dinja bħala “qabda skart” meta mqabbel mal-​privileġġ tas-​servizz lil Alla.—Flp. 3:8-11.

18. X’bidliet kbar kellu jagħmel wieħed ħu, u għala ma ddispjaċiehx?

¹⁸ Ħafna żgħażagħ Kristjani llum jimitaw il-​fidi taʼ Ġesù, Pawlu, u Timotju. Per eżempju, wieħed żagħżugħ Kristjan li kellu impjieg bi ħlas tajjeb ħafna kiteb: “Peress li ngħix skond il-​prinċipji Bibliċi, ma domtx ma bdejt ningħata l-​promozzjonijiet fuq ix-​xogħol. Minkejja l-​benefiċċji finanzjarji, ħassejtni li kont qed niġri wara r-​riħ. Meta tkellimt maʼ dawk li kienu responsabbli mill-​kumpanija u esprimejt ix-​xewqa tiegħi li nirsisti għall-​ministeru full-time, huma malajr malajr offrewli għażliet finanzjarji ġenerużi bit-​tama li nibqaʼ magħhom. Imma kont determinat. Ħafna nies ma setgħux jifhmu l-​għala tlaqt karriera li trendi biex naqdi fis-​servizz full-time. It-​tweġiba tiegħi hi li jien verament irrid ngħix fi qbil mad-​dedikazzjoni tiegħi lil Alla. Minħabba li issa ħajti hija ffokata fuq l-​affarijiet spiritwali, għandi ċertu ferħ u kuntentizza li l-​ebda ammont taʼ flus jew prestiġju ma jistaʼ jagħtini.”

19. Iż-​żgħażagħ liema għażliet huma inkuraġġiti jagħmlu?

¹⁹ Madwar id-​dinja, eluf taʼ żgħażagħ għamlu għażliet għaqlin simili. Allura, żgħażagħ, meta taħsbu dwar il-​futur tagħkom, żommu l-​jum taʼ Ġeħova sew f’moħħkom. (2 Pt. 3:11, 12) Tgħirux għal dawk li qed igawdu l-​aħjar taʼ din id-​dinja. Minflok, isimgħu minn dawk li verament iħobbukom. L-​aħjar investiment ċert li tistgħu tagħmlu huwa li taħżnu “teżori fis-​sema” u dan hu l-​uniku investiment li għandu benefiċċji dejjiema. (Mt. 6:19, 20; aqra l-​1 Ġwanni 2:15-17.) Iva, ftakru fil-​Ħallieq Grandjuż tagħkom. Intom u tagħmlu dan, Ġeħova se jberikkom.

[Nota taʼ taħt]

Tistaʼ Tiftakar?

• Kif nuru li aħna nafdaw f’Alla?

• Liema hija l-​aqwa edukazzjoni?

• X’lezzjonijiet nistgħu nitgħallmu minn Bàruk?

• Liema eżempji eċċellenti nistgħu nimitaw, u għala?

[Stampi f’paġna 13]

Ġeħova jipprovdi l-​aqwa edukazzjoni

[Stampa f’paġna 15]

Bàruk semaʼ minn Ġeħova u salva mill-​qerda taʼ Ġerusalemm. X’tistaʼ titgħallem minn dan l-​eżempju?