Għala Dorka Kienet Maħbuba

AĦNA kollha rridu lil min iħobbna. Int tħossok hekk?—a Il-​Bibbja tgħidilna dwar Dorka, mara li ħafna nies ħabbewha ħafna.

Dorka għexet f’Ġaffa, belt ħdejn il-​Baħar Mediterran. Ġerusalemm kienet xi 55 kilometru biss ’il ġewwa minn Ġaffa. Dorka kienet waħda mid-​dixxipli tal-​bidu taʼ Ġesù.

Għala, taħseb int, kienet tant maħbuba Dorka?— Il-​Bibbja tgħid li hi għamlet ħafna xogħol tajjeb u tat ħafna rigali sbieħ. Milli jidher għamlet ilbiesi sbieħ għar-​romol, jiġifieri, nisa li r-​raġel tagħhom kien miet. Kienet ukoll tkellmet maʼ ħafna dwar l-​Alla l-​veru, Ġeħova, bħalma kien għamel Ġesù.

Taf liema ħaġa ħażina tiġri lil Dorka issa?— Hi timrad serjament u tmut. Il-​ħbieb tagħha huma kollha mdejqin. Għalhekk huma jibagħtu xi nies fil-​post fejn qed joqgħod l-​appostlu Pietru, xi 15-​il kilometru ’l bogħod. Dawn in-​nies jitolbuh jiġi malajr. Meta jasal Pietru, hu jitlaʼ fuq fejn qiegħda Dorka. In-​nisa kollha qegħdin jibku, u juruh l-​ilbiesi li Dorka kienet għamlitilhom.

Pietru mbagħad jgħid lil kulħadd jitlaq mill-​kamra. Pietru u xi appostli oħra kienu għamlu mirakli qabel, imma ħadd minnhom ma kien qajjem lil xi persuna mill-​mewt. X’taħseb li jagħmel Pietru issa?—

Pietru jinżel għarkopptejh maġenb il-​ġisem mejjet u jitlob lil Ġeħova. Imbagħad jgħid lil Dorka biex tqum. U Dorka hekk tagħmel! Pietru jagħtiha idu u jgħinha tqum. Hu mbagħad isejjaħ lir-​romol u lill-​oħrajn u jurihielhom. Tistaʼ timmaġina x’ferħ għandhom ilkoll kemm huma?—

Ejja naħsbu issa dwar x’tistaʼ titgħallem minn din l-​istorja dwar l-​irxoxt taʼ Dorka. Ħaġa li nitgħallmu hi li jekk tgħin lil oħrajn, ħafna minnhom iħobbuk lura. Imma, iktar importanti minn hekk, Alla jiftakrek u jħobbok. Hu qatt mhu se jinsa l-​affarijiet tajbin li tagħmel għal ħaddieħor. U hu se jippremjak b’ħajja eterna u ferħana fid-​dinja ġdida u taʼ tjieba tiegħu.

Aqra fil-​Bibbja tiegħek

Atti 9:36-​43

Rivelazzjoni 21:3-​5

[Nota taʼ taħt]