X’tip taʼ nies huma x-​Xhieda taʼ Ġeħova?

Aħna organizzazzjoni internazzjonali li m’aħniex assoċjati maʼ gruppi reliġjużi oħra. Għalkemm il-​kwartieri ġenerali tagħna qegħdin fl-​Istati Uniti, il-​maġġoranza vasta tax-​Xhieda taʼ Ġeħova jgħixu f’pajjiżi oħra. Infatti, xi tmien miljuni minna jgħallmu l-​Bibbja lin-​nies f’iżjed minn 230 pajjiż. Nagħmlu dan b’reazzjoni għall-​kliem taʼ Ġesù: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha.”—Mattew 24:14.

Ngħixu fejn ngħixu, aħna nobdu l-​liġi b’mod kuxjenzjuż. Madankollu, nagħmlu ħilitna biex nibqgħu newtrali politikament. Dan hu għax nobdu kliem Ġesù biex il-​Kristjani ma jkunux “parti mid-​dinja.” B’hekk, ma niħdux sehem fi kwistjonijiet u attivitajiet politiċi u ma nappoġġawx il-​gwerer. (Ġwanni 15:19; 17:16) Infatti, matul it-​Tieni Gwerra Dinjija, ix-​Xhieda taʼ Ġeħova ġew mitfugħin il-​ħabs, ittorturati, u saħansitra agħar minn hekk minħabba li m’għamlux kompromess min-​newtralità tagħhom. Wieħed li kien isqof Ġermaniż kiteb: “Huma bi dritt jistgħu jistqarru li huma l-​unika għaqda kbira li minħabba l-​kuxjenza tagħhom oġġezzjonaw lit-​Tielet Reich.”

Minkejja dan, ma ninqatgħux għalina. Ġesù talab rigward is-​segwaċi tiegħu: “Ma nitolbokx biex toħroġhom mid-​dinja.” (Ġwanni 17:15) Għalhekk, tistaʼ tarana aħna u naħdmu, nixtru, u mmorru l-​iskola fil-​komunità lokali.