Għandna Inkarigu
1 Ġesù kkmanda lis-segwaċi tiegħu biex ‘jagħmlu dixxipli min-nies tal-ġnus kollha.’ (Matt. 28:19) F’232 pajjiż u gruppi taʼ gżejjer madwar l-art, ’il fuq minn ħames miljuni li jfaħħru lil Alla Jehovah jipprovdu testimonjanza ħajja għat-twettiq tal-kmand taʼ Ġesù. Imma xi ngħidu għalina personalment? Nieħdu aħna bis-serjetà l-inkarigu taʼ li nippridkaw?
2 Obbligu Morali: Inkarigu huwa “kmand biex wieħed jagħmel atti ordnati minn xi ħadd.” Aħna ninsabu ordnati minn Kristu biex nippridkaw. (Atti 10:42) L-appostlu Pawlu rrealizza li dan tafaʼ fuqu bżonn, jew obbligu morali, li jiddikjara l-aħbar tajba. (1 Kor. 9:16) Biex nagħtu eżempju: Immaġina li int wieħed mill-ekwipaġġ fuq vapur li qiegħed jegħreq. Il-kaptan jordnalek biex twissi lill-passiġġieri u tidderiġihom lejn id-dgħajjes taʼ salvataġġ. Se tinjora int dak il-kmand u tikkonċentra biss biex issalva lilek innifsek? Dażgur li le. Oħrajn jiddependu minnek. Il-ħajjiet tagħhom huma fil-periklu. Int obbligat moralment li twettaq l-inkarigu tiegħek biex tgħinhom.
3 Aħna ġejna inkarigati b’mod divin biex nagħtu twissija. Jehovah dalwaqt se jġib tmiem għal din is-sistema mill-agħar t’affarijiet kollha kemm hi. Miljuni taʼ ħajjiet jinsabu fin-nofs. Ikun sew jekk aħna ninjoraw il-periklu li jiffaċċjaw oħrajn u nkunu kkonċernati biss f’li nsalvaw lilna nfusna? Dażgur li le. Aħna obbligati moralment li ngħinu f’li nsalvaw il-ħajjiet t’oħrajn.—1 Tim. 4:16.
4 Eżempji Leali Li Wieħed Għandu Jsegwi: Il-profeta Eżekjel ħass ir-responsabbiltà li jagħti messaġġ taʼ twissija lill-Israeliti żleali. Jehovah wissieh b’enfasi bil-konsegwenzi jekk hu kien se jonqos milli jwettaq l-inkarigu tiegħu: “Meta ngħid lil xi ħadd mill-agħar, ‘Int żgur se tmut,’ u int attwalment ma twissihx . . . , billi hu mill-agħar, fl-iżball tiegħu hu se jmut, imma demmu se nitolbu lura minn idek stess.” (Eżek. 3:18) Eżekjel wettaq bil-lealtà l-inkarigu tiegħu saħansitra taħt oppożizzjoni ħarxa. Għalhekk, hu setaʼ jifraħ meta l-ġudizzji taʼ Jehovah ġew imwettqin.
5 Sekli wara, l-appostlu Pawlu kiteb dwar ir-responsabbiltà tiegħu li jippriedka. Hu ddikjara: “Jien nadif mid-demm tal-bnedmin kollha, għax jien ma żammejtx lura milli ngħidilkom il-parir kollu t’Alla.” Pawlu ppriedka pubblikament u minn dar għal dar għaliex irrealizza li jekk jonqos li jagħmel hekk hu setaʼ jkun ħati taʼ demm quddiem Alla.—Atti 20:20, 26, 27.
6 Għandna aħna ż-żelu t’Eżekjel? Inħossuna mġagħlin li nippridkaw bħalma ħassu Pawlu? L-inkarigu tagħna huwa l-istess bħalma kien tagħhom. Irridu nkomplu nwettqu r-responsabbiltà tagħna li nwissu lil oħrajn, minkejja l-apatija, l-indifferenza, jew l-oppożizzjoni tagħhom. Eluf oħrajn għad jistgħu jwieġbu għall-messaġġ tas-Saltna u jiddikjaraw: “Aħna se mmorru magħkom, għax smajna li Alla qiegħed magħkom.” (Żakk. 8:23) Jalla l-imħabba tagħna lejn Alla u lejn għajrna tqanqalna biex ma naqtgħux qalbna. Għandna inkarigu biex nippridkaw!