Qiegħed Int Timmaniġġa L-​Kelma T’Alla Sewwa?

¹ Ġesù Kristu kien l-​aqwa għalliem li qatt għex fuq l-​art. Hu tkellem b’mod li kien jilħaq il-​qlub tan-​nies, iqanqal l-​emozzjonijiet tagħhom, u jimmotivahom biex jipprattikaw xogħlijiet tajbin. (Matt. 7:​28, 29) Kien dejjem juża l-​Kelma t’Alla bħala l-​bażi għat-​tagħlim tiegħu. (Luqa 24:​44, 45) Hu ta l-​kredtu lil Alla Jehovah taʼ dak kollu li kien jaf u li kien kapaċi jgħallem. (Ġwn. 7:​16) Ġesù ħalla eżempju eċċellenti għas-​segwaċi tiegħu billi mmaniġġa l-​Kelma t’Alla sewwa.​—2 Tim. 2:​15.

² L-​appostlu Pawlu wkoll serva t’eżempju mill-​aqwa billi mmaniġġa b’mod effettiv il-​Kelma t’Alla. Hu għamel iktar milli sempliċement qara l-​Iskrittura lil oħrajn; hu spjega u rraġuna fuq dak li qara, billi ppreżenta evidenza mill-​Kelma t’Alla li Ġesù kien il-​Kristu. (Atti 17:​2-4) Bl-​istess mod, id-​dixxiplu elokwenti Apollo kien “midħla sewwa taʼ l-​Iskrittura,” u mmaniġġaha sewwa waqt li għamel preżentazzjoni qawwija tal-​verità.​—Atti 18:​24, 28.

³ Kun Għalliem Tal-​Kelma T’Alla: Proklamaturi tas-​Saltna fiż-​żmien modern gawdew suċċess eċċellenti hekk kif għallmu lil nies taʼ qalb onesta billi rreferew għall-​Bibbja u rraġunaw fuqha. F’każ minnhom, wieħed ħu rnexxielu juża Eżekjel 18:4 flimkien maʼ skritturi relatati biex jirraġuna maʼ kappillan u tlieta min-​nies tal-​parroċċa tiegħu fuq x’se jiġri mill-​ħżiena u mit-​tajbin. Bħala riżultat, xi membri tal-​knisja bdew jistudjaw, u wieħed minnhom eventwalment aċċetta l-​verità. F’każ ieħor, waħda oħt ġiet mitluba tispjega għala x-​Xhieda taʼ Jehovah ma jiċċelebrawx il-​Milied u għeluq is-​snin lir-​raġel taʼ waħda li kienet turi interess imma li żewġha kien jopponilha. Hekk kif qrat it-​tweġibiet Skritturali direttament mill-​ktieb Reasoning, ir-​raġel esprima l-​qbil tiegħu. Martu tant ferħet għax hu aċċetta li qalet: “Se nibdew nattendu l-​laqgħat tagħkom.” U r-​raġel qabel magħha!

⁴ Uża L-​Għajnuna Li Hija Disponibbli: Il-​Ministeru Tas-​Saltna u l-​programm tal-​Laqgħa tas-​Servizz joffru direzzjoni mill-​aħjar biex jgħinuna nimmaniġġaw il-​Kelma t’Alla. Ħafna pubblikaturi esprimew l-​apprezzament għall-​varjetà taʼ preżentazzjonijiet issuġġeriti li jiġu ppubblikati u murijin għall-​benefiċċju tagħna u li wrew li huma f’waqthom u effettivi. Il-​ktieb Reasoning From the Scriptures fih abbundanza taʼ ideat fuq kif wieħed jistaʼ jelabora fuq iktar minn 70 suġġett prinċipali li jissemmew fil-​Kelma t’Alla. Il-​ktieb Għarfien Li Jwassal Għall-​Ħajja Taʼ Dejjem jipprovdi ġabra fil-​qosor tat-​tagħlim fundamentali kollu li hemm fil-​Bibbja li wħud ġodda għandhom bżonn jifhmu. L-​istudji 24 u 25 tal-​ktieb Theo­cratic Ministry School Guidebook juruna kif għalliema tas-​sengħa jintroduċu, jaqraw, u japplikaw l-​iskritturi kif suppost. Għandna nagħmlu użu tajjeb minn din l-​għajnuna kollha li għandna għad-​dispożizzjoni tagħna.

⁵ Meta nimmaniġġaw il-​Kelma t’Alla sewwa, insibu li “hija ħajja u teżerċita qawwa u . . . kapaċi tagħraf il-​ħsibijiet u l-​intenzjonijiet tal-​qalb” taʼ dawk li lilhom aħna nippridkaw. (Ebr. 4:​12) Is-​suċċess li ngawdu permezz tagħha se jqanqalna biex nitkellmu l-​verità b’iktar qlubija minn qatt qabel!​—Atti 4:​31.