“Ibni Lin-Nies Taʼ Darek”
1 Kulħadd jaf li, f’kull kultura madwar id-dinja, il-ħajja tal-familja qiegħda titfarrak. Id-dinja taʼ Satana tinsab mgħarrqa fil-qerq u fl-immoralità. (1 Ġwann 5:19) Dan jenfasizzalna l-urġenza li ‘nibnu lin-nies taʼ darna’ u li ngħallmu lil oħrajn kif jistgħu huma jagħmlu l-istess għal tagħhom.—Prov. 24:3, 27.
2 Il-Prinċipji Tal-Bibbja Huma Taʼ Protezzjoni: Is-sigriet tal-veru hena fil-familja jinsab fl-applikar tal-prinċipji tal-Bibbja. Dawn il-veritajiet qawwijin huma taʼ ġid għal kull membru tad-dar fl-aspetti kollha tal-ħajja. Dik il-familja li tapplikahom se tkun hienja u se tgawdi l-paċi li tiġi minn Alla.—Qabbel Isaija 32:17, 18.
3 Il-prinċipji li jistgħu jgħinuna nibnu lin-nies taʼ darna huma mniżżlin b’mod konċiż fil-ktieb il-ġdid, Is-Sigriet Taʼ L-Hena Fil-Familja. Kull kapitlu jagħlaq b’kaxxa utli taʼ tagħlim li tenfasizza l-prinċipji li l-membri tal-familja għandhom bżonn jiftakru. Il-biċċa l-kbira taʼ dawn il-kaxxi jibdew bil-mistoqsija, “Dawn il-prinċipji tal-Bibbja kif jistgħu jgħinu . . . ?” Din tiġbed l-attenzjoni lejn il-ħsibijiet t’Alla sabiex insiru naħsbu kif jaħsibha hu dwar is-suġġett li jkun qiegħed jiġi diskuss.—Isa. 48:17.
4 Sir midħla tal-ktieb. Tgħallem sib il-prinċipji li jistgħu jkunu t’għajnuna meta jqumu diversi problemi. Il-ktieb jiddiskuti kwistjonijiet bħal dawn: wieħed x’għandu jfittex meta jikkunsidra lil xi sieħeb jew sieħba prospettiva fiż-żwieġ (kapitlu 2), liema ċwievet vitali jiftħu l-bieb għal hena dejjiemi fiż-żwieġ (kapitlu 3), kif il-ġenituri jistgħu jrabbu liż-żgħażagħ tagħhom biex ikunu adulti responsabbli u li jibżgħu minn Alla (kapitlu 6), kif wieħed jipproteġi lill-familja minn influwenzi distruttivi (kapitlu 8), prinċipji li jgħinu lil familji b’ġenitur wieħed jirnexxu (kapitlu 9), għajnuna spiritwali għal familji effettwati mill-alkoħoliżmu u mill-vjolenza (kapitlu 12), x’għandu jsir meta ż-żwieġ ikun wasal fi stat kritiku (kapitlu 13), x’nistgħu nagħmlu biex nonoraw lil ġenituri anzjani (kapitlu 15), u kif wieħed jistaʼ jassigura futur dejjiemi għall-familja tiegħu (kapitlu 16).
5 Agħmlu Użu Sħiħ Mill-Ktieb Il-Ġdid: Jekk għadkom m’għamiltux hekk, għala ma tistudjawx il-ktieb L-Hena Fil-Familja flimkien bħala familja? Ukoll, kulmeta l-familja tagħkom tiffaċċja xi problemi jew sfidi ġodda, irrevedu l-kapitli fil-ktieb li jittrattaw dwarhom, u ikkunsidraw bit-talb kif tistgħu tapplikaw il-parir. Flimkien maʼ dan, matul Marzu, kunu ġenerużi f’li twarrbu ħin għall-ministeru taʼ l-għalqa sabiex tkunu tistgħu tistinkaw biex tħallu l-ktieb Is-Sigriet Taʼ L-Hena Fil-Familja f’idejn kemm jistaʼ jkun nies.
6 Il-familji li jipprattikaw id-devozzjoni lejn Alla se jkunu msaħħin u magħqudin spiritwalment u se jkunu mħejjijin tajjeb biex ikampaw maʼ l-attakki taʼ Satana. (1 Tim. 4:7, 8; 1 Piet. 5:8, 9) Kemm aħna grati li għandna tagħlim divin mingħand l-Oriġinatur tal-familja!