Ngħinu Lil Familji Biex Jassiguraw Futur Dejjiemi

¹ “Ir-​regħba ġġib is-​saħħa,” qal negozjant lil klassi li ggradwat f’kulleġġ, fil-​waqt li kompla jgħid: “Tistaʼ tkun rgħib u xorta tħossok kuntent bik innifsek.” Dan huwa mod tipiku taʼ kif id-​dinja ġġib ’il quddiem l-​interess fik innifsek bħala l-​mod kif tassigura l-​futur tiegħek. B’kuntrast qawwi, Ġesù għallem li Kristjan irid “jiċħad lilu nnifsu . . . għax x’se jiswa għal bniedem jekk jikseb id-​dinja kollha kemm hi imma jitlef ruħu?” (Matt. 16:​24-26) Biex jassigura futur dejjiemi, wieħed irid jiffoka ħajtu kollha fuq li jagħmel ir-​rieda t’Alla​—l-​iktar mira importanti għall-​familji llum. (Salm 143:10; 1 Tim. 4:8) Dan il-​messaġġ insibuh fl-​aħħar kapitlu tal-​ktieb ­Is-Sigriet Taʼ L-​Hena Fil-​Familja. Dan il-​ktieb ġdid jgħin lin-​nies jaraw x’jiswa l-​iktar fil-​ħajja u kif jistgħu jaġixxu b’mod li jkun taʼ benefiċċju għall-​familji tagħhom. Hekk kif inkomplu nippridkaw l-​aħbar tajba maʼ kullimkien, x’nistgħu ngħidu biex ninkuraġġixxu lil dawk li niltaqgħu magħhom sabiex jaqraw il-​ktieb L-​Hena Fil-​Familja? Hawn huma xi ftit suġġerimenti:

² Kemm fuq il-​bieb u kemm fit-​triq, tistaʼ tuża l-​fuljett “Gawdi L-​Ħajja Tal-​Familja” biex tibda konversazzjonijiet. Tistaʼ tistaqsi:

◼ “Bl-​anzjetajiet kollha li l-​ħajja moderna ġġib fuqna, tħoss int li huwa possibbli li wieħed ikollu ħajja tal-​familja verament hienja? [Ħalli ħin għal tweġiba.] Dan il-​fuljett jiżgurana li dan hu possibbli. Tixtieq taqrah?” Jekk jiġi aċċettat, tistaʼ tkompli billi tgħid: “Peress li tinteressa ruħek f’dan is-​suġġett, forsi tieħu pjaċir ukoll b’dan il-​ktieb li jipprovdi pariri fid-​dettall fuq kif wieħed jistaʼ jsib hena fiċ-​ċirku tal-​familja.” Uri l-​werrej fil-​ktieb L-​Hena Fil-​Familja. Semmi xi titli taʼ kapitli li jolqtu l-​għajn. Mur f’paġna 10, u aqra mill-​aħħar sentenza taʼ paragrafu 17 sat-​tmiem taʼ paragrafu 18. Offri l-​ktieb, u semmi l-​arranġament tad-​donazzjoni kulmeta tqum l-​okkażjoni. Spjega li għandek iktar x’turih, u staqsih meta tistaʼ terġaʼ żżuru.

³ Tistaʼ tkompli l-​ewwel konversazzjoni li kellek dwar ħajja tal-​familja hienja billi tgħid:

◼ “Nixtieq nurik xi ħaġa fil-​ktieb li tajtek li naħseb li se tapprezzaha. L-​aħħar kapitlu jiffoka fuq il-​veru sigriet taʼ l-​hena fil-​familja. [Aqra paragrafu 2 f’paġna 183.] Innota li ċ-​ċavetta hi li naħdmu flimkien f’li nagħmlu r-​rieda t’Alla. Aħna nirrikmandaw li l-​familji jistudjaw il-​Bibbja flimkien biex jitgħallmu x’inhi r-​rieda t’Alla u kif japplikawha fid-​dar. Qegħdin noffru kors b’xejn taʼ studju mill-​Bibbja li jieħu biss ftit xhur biex jitlesta. Jekk tippermettili, nistaʼ nurik kif isir.” Irritorna bil-​brochure Alla X’Jirrikjedi Minna? jew il-​ktieb Għarfien, skond liema jkun l-​iktar addattat.

⁴ Meta titkellem maʼ sħabek fl-​iskola jew maʼ żgħażagħ fit-​territorju, għandu mnejn ikollok reazzjoni għal din il-​mistoqsija:

◼ “Kemm huwa importanti għall-​ġenituri u għal uliedhom li jżommu miftuħin il-​linji taʼ komunikazzjoni taʼ bejniethom? [Ħalli ħin għal tweġiba.] Innota x’jgħid dan il-​ktieb taʼ referenza fuq il-​ħajja tal-​familja dwar is-​suġġett taʼ ‘Komunikazzjoni Onesta u Bil-​Miftuħ.’ [Aqra paragrafu 4 kollu u l-​ewwel sentenza taʼ paragrafu 5 f’paġna 65 tal-​ktieb L-​Hena Fil-​Familja.] Il-​paragrafi li jmiss jipprovdu suġġerimenti prattiċi fuq kif wieħed jistaʼ jtejjeb il-​komunikazzjoni ġewwa l-​familja. Dan il-​ktieb jismu Is-​Sigriet Taʼ L-​Hena Fil-​Familja. Jekk tixtieq tarah u twegħedni li taqrah, tistaʼ żżomm din il-​kopja.” Spjega li se terġaʼ tgħaddi biex tara x’jaħseb fuq dak li jkun qara.

⁵ Tistaʼ tkompli tibni fuq l-​ewwel konversazzjoni tiegħek maʼ xi żagħżugħ fuq il-​komunikazzjoni bejn il-​ġenituri u t-​tfal billi tgħid hekk:

◼ “Apprezzajt l-​interess li wrejt fl-​importanza taʼ li jkollok komunikazzjoni tajba ġewwa l-​familja tiegħek. X’tgħid int li huwa l-​iktar suġġett importanti li l-​ġenituri u t-​tfal għandhom jiddiskutu?” Agħti ċans għal tweġiba. Imbagħad mur f’paġna 68 tal-​ktieb L-​Hena Fil-​Familja, u aqra t-​tweġiba li tinsab fl-​ewwel nofs taʼ paragrafu 11. “Li wieħed ikollu studju tal-​Bibbja kull ġimgħa huwa mod eċċellenti biex jikseb għarfien dwar Alla.” Ippreżenta l-​brochure Alla X’Jirrikjedi Minna? Spjega li s-​16-il lezzjoni tiegħu jipprovdu ħarsa bażika tal-​messaġġ tal-​Bibbja. Aqra l-​introduzzjoni f’paġna 2, u mbagħad offrilu li tibda l-​istudju billi tiddiskutu flimkien l-​ewwel lezzjoni.

⁶ Jekk tiltaqaʼ maʼ xi ġenitur fix-​xogħol minn dar għal dar, jew forsi f’xi ġnien jew f’post fejn jilagħbu t-​tfal, tistaʼ tqajjem l-​interess billi tgħid:

◼ “Żgur li taqbel miegħi li llum huwa veru taʼ sfida li trabbi t-​tfal. X’taħseb int li hi dik il-​ħaġa li tistaʼ tipproteġi lill-​familja tiegħek minn influwenzi ħżiena? [Ħalli ħin għal tweġiba.] Hawn insibu parir siewi li jien apprezzajtu.” Irrakkonta t-​tixbieha f’paragrafu 1 u aqra paragrafu 2 f’paġna 90 tal-​ktieb L-​Hena Fil-​Familja. Spjega kif dan jagħti direzzjoni bilanċjata li tirnexxi f’li tipproteġi lill-​familji minn influwenzi distruttivi. Offri li tħallilu kopja, u agħmel lilek innifsek disponibbli biex twieġeb xi mistoqsijiet li jqumu.

⁷ Fit-​tieni żjara tiegħek maʼ ġenitur li aċċetta l-​ktieb “L-​Hena Fil-​Familja,” tistaʼ tkompli l-​konversazzjoni b’dan il-​mod:

◼ “Meta ltqajna l-​ewwel darba, stajt nara li int jimpurtak b’mod ġenwin minn uliedek u li tixtieq tagħmel dak kollu li tistaʼ biex tipproteġihom minn influwenzi ħżiena. Forsi għadek ma qrajthiex din il-​biċċa, imma fil-​ktieb li ħallejtlek hemm osservazzjoni importanti ħafna li għandek taraha. [Aqra paragrafu 19 f’paġna 59.] Li niżviluppaw relazzjoni m’Alla jirrikjedi li nsiru nafuh permezz taʼ dak li hemm miktub fil-​Kelma tiegħu, il-​Bibbja. Tixtieq li nurik kif aħna nistudjaw il-​Bibbja bħala familja?”

⁸ Uħud fid-​dinja li jagħtu l-​pariri ma jistgħux juru lill-​familji l-​mogħdija għall-​hena u żgur li jħalluhom diżappuntati. Ejjew inqassmu kemm jistaʼ jkun il-​ktieb L-​Hena Fil-​Familja sabiex in-​nies maʼ kullimkien jistgħu jiġu mgħejjunin mill-​Kelma t’Alla biex jassiguraw futur dejjiemi.​—1 Tim. 6:​19.