Studji Tal-​Bibbja Li Jipproduċu Dixxipli

¹ “X’qiegħed iżommni li ma nitgħammidx?” staqsa l-​ewnuku Etjopjan wara li Filippu ‘xandarlu l-​Evanġelju taʼ Ġesù.’ (Atti 8:​27-​39) Fil-​każ taʼ l-​ewnuku, hu diġà kellu devozzjoni lejn il-​kitbiet imnebbħa t’Alla, u wara li rċieva għajnuna spiritwali mingħand Filippu, kien lest li jsir dixxiplu. Imma mhux in-​nies kollha huma konvinti li għandhom bżonn jeżaminaw l-​Iskrittura għalihom infushom.

² Għall-​grazzja t’Alla, l-​organizzazzjoni taʼ Jehovah pprovdiet il-​brochure il-​ġdid, Ktieb Għan-​Nies Kollha, biex tinkuraġġixxi lin-​nies jeżaminaw il-​messaġġ tal-​Bibbja għal żmienna. L-​informazzjoni fil-​brochure għandha tappella lil nies sinċieri li forsi jkunu taʼ skola imma li ftit li xejn ikunu jafu dwar il-​Bibbja. Din l-​għodda mill-​aħjar hija maħsuba biex tqanqal lin-​nies ħalli jkunu jridu jeżaminaw il-​Bibbja.

³ Meta tibda studju tal-​Bibbja, ikun t’għajnuna li tirrevedi s-​suġġerimenti eċċellenti ppubblikati fl-​insert taʼ Il-​Ministeru Tas-​Saltna taʼ Ġunju 1996 dwar kif jistaʼ jiġi kondott studju produttiv fil-​ktieb Għarfien. Hekk kif ikun għaddej l-​istudju, ikkunsidra l-​progress li qiegħed jagħmel l-​istudent sabiex tkun tistaʼ tiddetermina liema aspetti għandhom bżonn iktar attenzjoni. Inkuraġġixxi lill-​istudent biex iħejji l-​lezzjonijiet tiegħu minn qabel, billi jfittex l-​iskritturi. Kummenti li jagħmel fi kliemu jistgħu jirriflettu l-​apprezzament mill-​qalb tiegħu għall-​verità. Dawk li jagħmlu progress mgħaġġel huma taʼ spiss dawk li jaqraw pubblikazzjonijiet oħrajn tas-​Soċjetà u li jattendu regolarment il-​laqgħat tal-​kongregazzjoni. Inkuraġġih biex jitkellem m’oħrajn b’mod informali dwar dak li qiegħed jitgħallem. Urih bil-​ħlewwa x’għandu bżonn jagħmel biex jimxi ’l quddiem spiritwalment. M’għandniex nikkonduċu studji għal żmien indefinit maʼ wħud indeċiżi. L-​istudenti għandhom jieħdu l-​inizjattiva biex jitgħallmu, jieħdu waqfa soda għall-​verità, u jimxu lejn id-​dedikazzjoni u l-​magħmudija.

⁴ F’xi familji, qed jiġi kondott iktar minn studju wieħed, peress li membri differenti tal-​familja jkollhom studji għalihom. Madankollu, li jkun hemm studju tal-​familja flimkien jistaʼ jkun ippreferut fil-​biċċa l-​kbira tal-​każijiet, peress li dan jgħin biex jgħaqqad lill-​familja spiritwalment.

⁵ Il-​kmand taʼ Ġesù huwa li mmorru nagħmlu dixxipli. (Matt. 28:19) Biex nagħmlu hekk, irridu nikkonduċu studji tal-​Bibbja li jgħin lill-​istudent jimxi ’l quddiem sal-​punt li jkun jistaʼ jistaqsi, “X’qiegħed iżommni li ma nitgħammidx?”