Ippjana bil-Quddiem!
1 L-organizzazzjoni taʼ Jehovah tipprovdi programm regulari t’attivitajiet teokratiċi mfasslin biex jissodisfaw il-bżonnijiet spiritwali tagħna. L-apprezzament iqanqalna biex nieħdu vantaġġ sħiħ mill-arranġamenti kollha, bħaż-żjajjar taʼ l-indokratur li jivvjaġġa, l-assembleat u l-konvenzjonijiet, u attivitajiet speċjali oħrajn ippjanati lokalment. (Mt. 5:3) Madankollu, xi wħud ma jibbenefikawx minn dawn il-provvedimenti spiritwali minħabba xi impennji oħrajn li jkollhom. X’jistaʼ jsir biex nevitaw dan? Kif nistgħu nkunu ċerti li attivitajiet mhux teokratiċi ma joħonqux “l-aħjar” affarijiet?—Flp. 1:10.
2 Ippjanar Għaqli Huwa Essenzjali: Proverbji 21:5 jwissi: “Min hu bil-għaqal jaħsibha tajjeb u jirnexxilu; imma min jgħaġġel jiġi fil-bżonn.” Biex ‘nirnexxu’ spiritwalment, għandna bżonn nippjanaw bil-quddiem bil-għaqal, billi nżommu f’moħħna l-attivitajiet teokratiċi li jkun sar arranġament għalihom. Għandna nippjanaw l-attivitajiet persunali tagħna għal żmien meta dawn ma jtellfuniex milli nkunu preżenti biex naħsdu barkiet spiritwali. Jekk bl-għaġla kollha nippjanaw biex nagħmlu xi affarijiet li aħna personalment irridu nagħmlu, mingħajr ma nqisu l-avvenimenti teokratiċi li jkunu ġejjin, x’aktarx li se nbatu minn “bżonn” spiritwali.
3 Tonqosx li Tibbenefika! Ilkoll kemm aħna nagħmlu pjanijiet għall-futur, inkluż għal xi vaganzi, vjaġġi tax-xogħol, żjajjar mal-qraba, eċċetra. Qabel ma tintrabat jew tiffinalizza l-pjanijiet tiegħek, ikkonsulta l-iskeda t’attivitajiet spiritwali li jkunu ġejjin. Jekk issib li ġej l-indokratur tas-circuit jew li xi assemblea hija ppjanata fl-istess żmien li forsi mhux se tkun hawn, agħmel sforz bis-serjetà biex tirranġa mill-ġdid l-affarijiet tiegħek sabiex tkun tistaʼ tipparteċipa. Aħna niġu informati minn ħafna qabel dwar avvenimenti ewlenin li jkunu ppjanati għall-futur. L-anzjani fil-kongregazzjoni tiegħek jistgħu jgħidulek x’ikun ġie ppjanat lokalment.
4 Billi naħsbu minn qabel għal li ġej u nippjanaw bil-quddiem għall-affarijiet iktar importanti, se nkunu “mimlijin bil-frott tal-ġustizzja . . . għall-glorja u l-foħrija taʼ Alla.”—Flp. 1:11.