Kaxxa għall-Mistoqsija
◼ X’inhuma l-vantaġġi meta nattendu l-kongregazzjoni li tieħu ħsieb it-territorju li ngħixu fih?
Permezz taʼ l-arranġament tal-kongregazzjoni, nirċievu inkuraġġiment li ‘jħajjarna għall-imħabba u għall-għemil tajjeb.’ (Lhud 10:24, 25) Permezz tal-kongregazzjoni nitgħallmu l-verità u niġu mgħammrin biex inwettqu l-inkarigu tagħna li nagħmlu dixxipli. (Mt. 28:19, 20) Barra minn hekk, niġu msaħħin biex nissaportu l-provi fedelment u nsibu indokraturi kollhom imħabba li qegħdin hemm biex jgħinuna inkampaw mal-pressjonijiet u l-ansjetajiet li dejjem jiżdiedu. B’mod ċar, il-kongregazzjoni hija vitali biex nibqgħu ħajjin spiritwalment. Madankollu, hemm xi vantaġġi meta nattendu l-kongregazzjoni li tieħu ħsieb it-territorju li ngħixu fih?
Iċ-ċirkustanzi individwali jvarjaw, u fatturi bħalma huma x-xogħol sekulari, sieħeb jew sieħba li mhix taʼ l-istess twemmin, u t-trasport jistgħu jeffettwaw id-deċiżjoni finali taʼ l-individwu f’din il-ħaġa. Madankollu, meta persuna tassoċja mal-kongregazzjoni li tieħu ħsieb it-territorju li tgħix fih, żgur li se jkun hemm vantaġġi, kemm spiritwali u kemm oħrajn. F’każ taʼ xi emerġenza, l-anzjani għandhom mnejn ikunu jistgħu jikkuntattjaw lill-pubblikaturi kollha iktar malajr. Kaxxi għall-Mistoqsija li ħarġu fil-passat enfasizzaw numru taʼ vantaġġi oħrajn.—Mejju 1991, Marzu 1976, u Jannar 1967.
Ġeneralment, huwa iktar konvenjenti li nattendu l-laqgħat fil-qrib, biex b’hekk inkunu nistgħu naslu kmieni biżżejjed ħalli nitkellmu m’oħrajn, nieħdu ħsieb l-affarijiet neċessarji, u nieħdu sehem fl-għanja u t-talba. Meta wħud ġodda interessati jkunu jgħixu fl-inħawi tagħna, ġeneralment inkunu f’pożizzjoni aħjar biex nikkuntattjawhom, nikkonduċu studji tal-Bibbja magħhom, u nidderiġuhom lejn il-laqgħat li huma l-iktar konvenjenti għalihom.
Aħna fiduċjużi li l-kapijiet tal-familja se jikkunsidraw din il-ħaġa bit-talb, billi jiżnu l-fatturi kollha involuti biex jiddeterminaw x’inhu l-aħjar għas-saħħa spiritwali u fiżika tal-familja tagħhom.—1 Tim. 5:8.