Lest Int Biex Tagħti Xhieda Informali?

1. Liema eżempju juri li l-​għoti taʼ xhieda informali jistaʼ jkun effettiv?

¹ Ix-​Xhieda informali tistaʼ tkun effettiva ħafna. Il-​Bibbja fiha ħafna eżempji taʼ xhieda informali b’riżultati tajbin. (Ġw. 4:7-15) X’nistgħu nagħmlu biex nippreparaw ħalli nagħtu xhieda b’dan il-​mod?

2. L-​ilbies u d-​dehra tagħna kif jistgħu jgħinuna nkunu lesti biex nagħtu xhieda?

² L-​Ilbies u d-​Dehra: Jekk dejjem nagħtu attenzjoni xierqa lill-​ilbies u d-​dehra tagħna se nkunu iktar liberi biex naqsmu l-​fidi tagħna m’oħrajn. (1 Tim. 2:9, 10) Jekk ma nħossuniex komdi dwar id-​dehra tagħna, wisq probabbli se nżommu lura milli nagħtu xhieda. Mill-​banda l-​oħra, id-​dehra pulita u nadifa tagħna fiha nfisha tistaʼ tqajjem il-​kurżità. Pereżempju, waqt li kienu qed jivvjaġġaw, koppja taʼ Xhieda lebsin pulit kienu bil-​qiegħda ħdejn raġel Musulman. Minħabba li nnota d-​dehra tagħhom, ir-​raġel staqsiehom jekk kinux Kristjani. Dan wassal għal diskussjoni minn fuq il-​Bibbja li damet tliet sigħat.

3. Kif bdejt konversazzjoni billi segwejt l-​eżempju taʼ Ġesù?

³ Meta Tibda Konversazzjonijiet: Meta Ġesù ltaqaʼ mal-​mara Samaritana ħdejn l-​għajn taʼ Ġakobb, hu beda l-​konversazzjoni billi sempliċement talabha tagħtih x’jixrob. B’mod simili, forsi nkunu nistgħu nibdew konversazzjoni billi nagħmlu stqarrija fil-​qosor jew billi nistaqsu mistoqsija sempliċi. Għalkemm kultant forsi noqogħdu lura, jekk nistrieħu fuq l-​għajnuna taʼ Ġeħova, aħna nistgħu ‘nagħmlu l-​qalb’ biex nibdew konversazzjoni.—1 Tess. 2:2.

4. Kif nistgħu nħejju ruħna biex nagħtu xhieda informali?

⁴ Kif Toħloq l-​Opportunitajiet: Ħafna pubblikaturi sabu modi kif jagħtu xhieda informali. Eżamina ċ-​ċirkustanzi tiegħek, u aħseb dwar in-​nies li x’aktarx tiltaqaʼ magħhom matul il-​ġurnata. Ġorr miegħek letteratura adattata u Bibbja żgħira. Tgħallem osserva, u ħu interess fin-​nies taʼ madwarek. Meta tkun ħsibt dwar opportunitajiet li jistgħu jiġuk matul il-​jum, x’aktarx li se tkun lest biex tagħti xhieda tajba.—Flp. 1:12-14; 1 Pt. 3:15.

5. Għala għandna nippjanaw biex nagħtu xhieda informali?

⁵ Għandna żewġ raġunijiet tajbin biex nieħdu vantaġġ minn opportunitajiet biex nagħtu xhieda informali—imħabba għal Alla u għall-​proxxmu. (Mt. 22:37-39) Meta nqisu l-​urġenza tax-​xogħol tal-​ippritkar, jeħtieġ li nippjanaw biex nagħtu xhieda informali. Għandna nkunu lesti biex nieħdu vantaġġ minn kull opportunità adattata ħalli naqsmu l-​aħbar tajba tas-​Saltna m’oħrajn sakemm għad fadal iż-​żmien.—Rum. 10:13, 14; 2 Tim. 4:2.