“L-​Għerf Jintwera li Hu Sewwa Minn Għemilu”

1. Xi wħud kif iħarsu lejn ix-​xogħol tagħna?

¹ Kultant nistgħu niffaċċjaw reazzjoni negattiva minn xi inkwilini li jifhmuna ħażin jew li ġew informati ħażin dwar ix-​Xhieda taʼ Ġeħova. Forsi l-​ħarsa tagħhom ġiet influwenzata minn rapporti preġudikati fil-​mezzi tax-​xandir. F’xi postijiet saħansitra tawna t-​tikketta taʼ “setta perikoluża.” Kif għandna nirreaġixxu meta niffaċċjaw kritika bħal din?

2. X’se jgħinna nevitaw li niġu skuraġġiti meta niffaċċjaw il-​kritika?

² Żomm Attitudni Pożittiva: Ġesù u qaddejja oħrajn taʼ Ġeħova fl-​ewwel seklu spiss ġew mifhumin ħażin u malafamati. (Atti 28:22) Però, ma ħallewx il-​kritika ġġegħelhom iħossuhom imbarazzati dwar il-​ministeru tagħhom. Ġesù qal: “L-​għerf jintwera li hu sewwa minn għemilu.” (Mt. 11:18, 19) Hu kompla jagħmel ir-​rieda taʼ Missieru biż-​żelu, fiduċjuż li l-​valur tal-​aħbar tajba kien se jidher ċar għal dawk li kienu qed ifittxu l-​verità. Nistgħu nevitaw l-​iskuraġġiment billi niftakru li l-​Iben t’Alla nnifsu ġie trattat b’mod simili.

3. Ir-​rapporti negattivi u l-​oppożizzjoni għala m’għandhomx jissorprenduna?

³ Ġesù indika li d-​dinja kienet se tobgħod lis-​segwaċi tiegħu sewwasew bħalma kienet tobgħod lilu. (Ġw. 15:18-​20) Għalhekk, ir-​rapporti negattivi u l-​oppożizzjoni tal-​lum m’għandhomx jissorprenduna. Fil-​fatt, għandna nistennew li dawn l-​affarijiet isiru iktar komuni iktar ma nidħlu fl-​aħħar jiem u iktar ma tiħrax ir-​rabja taʼ Satana. (Riv. 12:12) Aħna nistgħu nifirħu b’dan għax jurina li d-​dinja taʼ Satana dalwaqt se tinqered.

4. Jekk niffaċċjaw reazzjoni negattiva għall-​aħbar tajba, kif għandna nwieġbu?

⁴ Wieġeb b’Qalb Tajba: Meta niffaċċjaw reazzjoni negattiva, dejjem għandna nwieġbu b’qalb tajba u ħlewwa. (Prov. 15:1; Kol. 4:5, 6) Jekk is-​sitwazzjoni tippermetti, forsi nkunu nistgħu nispjegaw lil inkwilin sinċier li hemm ħafna informazzjoni żbaljata dwar ix-​Xhieda taʼ Ġeħova jew forsi nistaqsuh għala jħossu kif iħossu. It-​tweġiba tagħna bil-​ħlewwa tistaʼ ġġiegħlu jiddubita jekk dak li semaʼ dwar ix-​Xhieda taʼ Ġeħova huwiex minnu u forsi jismaʼ meta jerġaʼ jżuru xi Xhud. Madankollu, jekk l-​inkwilin ikun irrabjat ħafna, forsi jkun aħjar li sempliċement nitilqu bl-​edukazzjoni kollha. Nistgħu nkunu ċerti li minkejja kif iħarsu lejna oħrajn, Ġeħova japprezza l-​ministeru tagħna.—Is. 52:7.