Immira d-Daqqiet Tiegħek bl-Għaqal
1. L-1 Korintin 9:26 kif japplika għall-ministeru?
1 L-appostlu Pawlu kiteb: “M’iniex niġri b’mod inċert; m’iniex nimmira d-daqqiet tiegħi b’tali mod li nkun qed nagħti fl-arja.” (1 Kor. 9:26) Pawlu kien qed jirreferi għal kif iffoka fuq li jsus wara miri biex jaqdi lil Ġeħova aħjar. Madanakollu, il-prinċipju taʼ dan il-kliem japplika wkoll għall-ministeru. Irridu nimmiraw “id-daqqiet,” jew, l-isforzi tagħna bl-għaqal ħalli jinkiseb l-iktar ġid. Kif?
2. Kif nistgħu nimitaw lil Pawlu u lil evanġelizzaturi oħrajn fl-ewwel seklu f’li nagħżlu meta u fi xħin nippritkaw?
2 Morru Fejn Hemm in-Nies: Pawlu u evanġelizzaturi oħrajn fl-ewwel seklu ppritkaw fejn ħasbu li jkun hemm in-nies. (Atti 5:42; 16:13; 17:17) Għalhekk, jekk ħafna nies fit-territorju tagħna jkunu d-dar filgħaxija, dan jistaʼ jkun l-aħjar ħin biex immorru minn dar għal dar. Taf jekk ikunx hemm ħafna nies ħdejn il-venda tal-karozzi tal-linja kmieni filgħodu u tard waranofsinhar meta jkunu sejrin għax-xogħol jew lura d-dar? Meta jkun hemm l-iktar nies fl-inħawi tal-ħwienet? L-għoti taʼ xhieda fit-toroq jistaʼ jkun l-iktar produttiv f’dawn il-ħinijiet.
3. Kif nistgħu nimmiraw id-daqqiet tagħna bl-għaqal fil-mod kif naħdmu t-territorju?
3 Aħdem it-Territorju bl-Għaqal: Għandna noqogħdu attenti wkoll biex nimmiraw id-daqqiet tagħna bl-għaqal fil-mod kif naħdmu t-territorju. Pereżempju, minflok ma ħu jieħu grupp kbir ħafna fl-istess post, fejn se jkun hemm bżonn taʼ ħafna ħin u sforz biex il-grupp jinżamm organizzat u bieżel, jistaʼ jkun aħjar li jaqsam il-grupp. Bl-istess mod, meta nkunu qed naħdmu territorju rurali, se nkopru t-territorju iktar malajr u jkollna iktar opportunitajiet nitkellmu jekk ma nkunux gruppi kbar wisq. Nistgħu aħna nakkwistaw biċċa territorju personali ħdejn darna biex hekk niffrankaw il-ħin li kieku nużaw fl-ivvjaġġar?
4. X’se jgħinna nkunu “sajjieda tal-bnedmin” tajbin?
4 Ġesù xebbah l-evanġelizzaturi maʼ “sajjieda tal-bnedmin.” (Mk. 1:17) Il-mira taʼ sajjied mhijiex sempliċement li jistad imma li jaqbad il-ħut. Għalhekk, sajjieda li jaqbdu l-ħut imorru fil-post u fil-ħin li jaħsbu li jsibu l-ħut, u jibdew jistadu bla telf taʼ ħin. Iva, jimmiraw l-isforzi tagħhom bl-għaqal. Jalla nuru bżulija simili fil-ministeru tagħna.—Ebr. 6:11.