L-​Irwol Vitali tal-​Missirijiet

“NUMRU li dejjem jiżdied taʼ rġiel żgħażagħ jixtiequ jieħdu sehem attiv fl-​irwol taʼ li jrabbu lit-​tfal tagħhom. Tnejn u tmenin fil-​mija taʼ l-​irġiel li għandhom bejn il-​21 u d-​39 sena għażlu li jkollhom skeda tax-​xogħol li tippermettilhom iktar ħin mal-​familji tagħhom,” tgħid il-​gazzetta Kanadiża Toronto Star rigward studju reċenti li sar fl-​Università taʼ Harvard. Skond dan l-​istudju, li fih ġew mistħarrġin 1,008 irġiel u nisa Amerikani taʼ bejn il-​21 u l-​65 sena u fuqhom, 71 fil-​mija mill-​irġiel żgħażagħ qalu li “lesti jaqilgħu inqas paga biex iqattgħu iktar ħin mal-​familji tagħhom.”

Għala ħafna missirijiet jixtiequ jqattgħu iktar ħin maʼ wliedhom? David Blankenhorn, wieħed mill-​fundaturi taʼ l-​Inizjattiva Nazzjonali tal-​Missirijiet li tħeġġeġ lill-​missirijiet biex ikunu responsabbli u dedikati, qal li fi stħarriġ li sar fl-​1994, minn 1,600 raġel Amerikan, 50 fil-​mija qalu li missirijiethom ma kinux preżenti emozzjonalment fit-​trobbija tagħhom. Ħafna mill-​missirijiet illum ma jridux jaraw dan jirrepeti ruħu.

Missirijiet li jinvolvu ruħhom b’mod attiv mat-​tfal tagħhom jistgħu jkunu taʼ influwenza tajba. Billi jirreferi għal riċerka pubblikata mid-​Dipartiment tas-​Servizzi Umani u tas-​Saħħa taʼ l-​Istati Uniti, The Toronto Star qalet li meta l-​missirijiet jieklu maʼ wliedhom, joħorġu magħhom, u jgħinuhom jagħmlu l-​ħowmwerk, dan se jgħin lit-​tfal u lill-​adolexxenti biex ikollhom inqas problemi fl-​imġiba, ikunu jistgħu jassoċjaw aħjar maʼ oħrajn, u jaħdmu iktar iebes fl-​iskola.

Dan li għadu kif issemma jiġbed l-​attenzjoni lejn arranġament li bih trabbi lit-​tfal, li għadu prattiku llum daqs kemm kien iktar minn tlett elef sena ilu meta nkiteb. L-​Oriġinatur tal-​familja għallem b’mod speċifiku lill-​missirijiet biex ikunu involuti b’mod attiv fit-​trobbija taʼ wliedhom. (Efesin 3:​14, 15; 6:4) Il-​missirijiet ngħataw il-​parir biex inaqqxu fi qlub uliedhom imħabba lejn Alla u biex jitkellmu magħhom dwar ir-​regolamenti u l-​kmandamenti tiegħu. Alla qalilhom biex jagħmlu dan ‘meta jkunu f’darhom, u meta jkunu mexjin fit-​triq, u meta jimteddu, u meta jqumu.’—Dewteronomju 6:7.

Ir-responsabbiltà taʼ li tkun ġenitur għandha tinqasam. Il-​Bibbja twissi lit-​tfal: “Ismaʼ . . . kliem missierek, u twarrabx tagħlim ommok.” (Proverbji 1:​8, korsiv tagħna.) L-​irwol tal-​missier huwa vitali. Dan jinkludi li jagħti appoġġ u rispett lil omm it-​tfal u jieħu sehem fix-​xogħlijiet involuti fit-​trobbija tagħhom. Jinkludi wkoll li jqattaʼ ħin jitkellem maʼ wliedu u jaqralhom. Dan jimla bżonn emozzjonali li huwa tant vitali għat-​tfal.

Bla dubju taʼ xejn, il-​Bibbja hija l-​iktar sors taʼ min joqgħod fuqu taʼ pariri u prinċipji tajbin għal familja stabbli. Missier li jipprovdi b’mod attiv il-​bżonnijiet spiritwali, emozzjonali, u materjali tal-​familja tiegħu jkun qed iwettaq ir-​responsabbiltà tiegħu mogħtija minn Alla.