Il-​Ħarsa tal-​Bibbja

Għandhom il-​Kristjani jieħdu sehem fiċ-​ċelebrazzjonijiet taʼ l-​ewwel tas-​sena?

“LEJLIET l-​Ewwel tas-​Sena wara nofsinhar ikun hemm kwiet iktar mis-​soltu,” jgħid Fernando, tabib fil-​Brażil. “Imbagħad, għall-​ħabta tal-​ħdax taʼ bil-​lejl jibdew ġejjin—ruxxmata pazjenti, min b’daqqiet taʼ sikkina, min bi ġrieħi taʼ xi tir, żgħażagħ feruti f’inċidenti tat-​traffiku, u nisa msawtin. Il-​kaġun huwa kważi dejjem l-​alkoħol.”

Meta nikkunsidraw dan, m’aħniex se niħduha b’sorpriża li ġurnal Brażiljan wieħed irrefera għall-​ewwel ġurnata tas-​sena bħala ġurnata li fiha kulħadd iħossu mdardar u rasu tuġgħu. Aġenzija taʼ l-​aħbarijiet Ewropea tgħid li “l-​Ewwel tas-​Sena hi għall-​edonisti,” u tkompli tgħid li “hija round ieħor fil-​ġlieda eterna tal-​bniedem maʼ l-​alkoħol.”

Veru, mhux kulħadd jiċċelebra l-​Ewwel tas-​Sena billi jixrob iżżejjed u jikkommetti atti taʼ vjolenza. Fil-​fatt, ħafna għandhom memorji sbieħ taʼ din l-​okkażjoni. “Meta konna tfal, konna nistennewha bil-​ħerqa l-​Ewwel tas-​Sena,” jgħid Fernando, li ġie kwotat qabel. “Dejjem kien ikun hemm ħafna logħob, ikel, u xorb. F’nofs il-​lejl konna ngħannqu, inbusu, u nawguraw lil xulxin ‘is-​Sena t-​Tajba!’”

B’mod simili, ħafna llum iħossu li huma jieħdu sehem fiċ-​ċelebrazzjonijiet taʼ l-​Ewwel tas-​Sena mingħajr ma jaqbżu l-​limiti. Xorta waħda, il-​Kristjani jagħmlu tajjeb li jeżaminaw l-​oriġini u t-​tifsir taʼ din iċ-​ċelebrazzjoni hekk popolari. Huma ċ-​ċelebrazzjonijiet taʼ l-​Ewwel tas-​Sena fi qbil mat-​tagħlim Bibliku?

Fatti mill-​Passat

Iċ-​ċelebrazzjonijiet taʼ l-​Ewwel tas-​Sena m’humiex xi ħaġa ġdida. Iskrizzjonijiet antiki jindikaw li dawn kienu jsiru f’Babilonja sa mit-​tielet millennju Q.E.K. Iċ-​ċelebrazzjoni, li kienet tinżamm għal nofs Marzu, kienet importanti ħafna. Skond The World Book Encyclopedia, dak iż-​żmien l-​alla Marduk kien jiddeċiedi d-​destin tal-​pajjiż għal dik is-​sena. Iċ-​ċelebrazzjoni taʼ l-​ewwel tas-​sena f’Babilonja kienet iddum ħdax-il ġurnata u kienet tinkludi sagrifiċċji, purċissjonijiet, u riti tal-​fertilità.

Għal xi żmien, ir-​Rumani wkoll kienu jibdew is-​sena tagħhom fix-​xahar taʼ Marzu. Imma fis-​sena 46 Q.E.K., l-​Imperatur Ġulju Ċesari ħareġ digriet li s-​sena għandha tibda fl-​ewwel taʼ Jannar. Din il-​ġurnata kienet diġà dedikata lil Ġanu (jew Janus), l-​alla taʼ kull bidu, u issa kienet se timmarka wkoll l-​ewwel ġurnata tas-​sena Rumana. Id-​data nbidlet imma l-​atmosfera taʼ xalar baqgħet xorta waħda. Is-​Cyclopedia taʼ McClintock u Strong issostni li fl-​ewwel taʼ Jannar, in-​nies kienu jingħataw għax-​xalar eċċessiv u kull xorta taʼ superstizzjonijiet pagani.

Anki llum għadna nsibu riti superstizzjużi fiċ-​ċelebrazzjonijiet taʼ l-​Ewwel tas-​Sena. Per eżempju, f’xi nħawi fl-​Amerika t’Isfel, ħafna joqogħdu bil-​wieqfa fuq sieq waħda, il-​leminija, meta tkun se taqleb is-​sena l-​ġdida. Oħrajn idoqqu l-​ħornijiet u jfaqqgħu t-​trikkitrakki. Skond drawwa Ċeka, lejliet l-​Ewwel tas-​Sena huwa ż-​żmien li jieklu s-​soppa taʼ l-​għads, filwaqt li skond tradizzjoni Slovakka n-​nies iridu jpoġġu l-​flus jew il-​qxur tal-​ħut taħt it-​tvalja. Dawn ir-​ritwali, intenzjonati biex ibiegħdu l-​isfortuna u jassiguraw il-​prosperità, sempliċement iżommu ħaj it-​twemmin antik li l-​bidu tas-​sena hu żmien li fih jiġi deċiż id-​destin.

Il-​Ħarsa tal-​Bibbja

Il-​Bibbja twissi lill-​Kristjani biex ‘jgħixu kif jixraq, mhux bl-​ikel żejjed u s-​sokor.’a (Rumani 13:12-14; Galatin 5:19-21; 1 Pietru 4:3) Ladarba fiċ-​ċelebrazzjonijiet taʼ l-​Ewwel tas-​Sena taʼ spiss ikun hemm dawk l-​istess abbużi li l-​Bibbja tikkundanna, il-​Kristjani ma jiħdux sehem fihom. Dan ma jfissirx li l-​Kristjani huma mċaħħdin milli jieħdu pjaċir. Għall-​kuntrarju, huma jafu li l-​Bibbja kemm-il darba tgħid lill-​adoraturi taʼ dak Alla veru biex jifirħu​—u dan tgħidu għal diversi raġunijiet. (Dewteronomju 26:10, 11; Salm 32:11; Proverbji 5:15-19; Koħèlet 3:22; 11:9) Il-​Bibbja tirrikonoxxi wkoll li l-​ikel u x-​xorb huma assoċjati mal-​ferħ.—Salm 104:15; Koħèlet 9:7a.

Però, bħalma rajna, iċ-​ċelebrazzjonijiet taʼ l-​Ewwel tas-​Sena joriġinaw minn drawwiet pagani. Il-​qima falza hija maħmuġa u mistmerra f’għajnejn Alla Jehovah, u l-​Kristjani jwarrbu prattiċi li għandhom din l-​oriġini. (Dewteronomju 18:9-12; Eżekjel 22:3, 4) L-​appostlu Pawlu kiteb: “X’għandhom x’jaqsmu bejniethom il-​ġustizzja u l-​ħażen? X’xirka hemm bejn id-​dawl u d-​dlam? Xi ftehim hemm bejn Kristu u Beljar?” Mhux taʼ b’xejn li l-​appostlu Pawlu żied: “La tmissux l-​imniġġes.”—2 Korintin 6:14-17.

Il-Kristjani jirrealizzaw ukoll li l-​fatt li jieħdu sehem f’riti superstizzjużi ma jiggarantilhomx l-​hena u l-​prosperità. Dan hu speċjalment minħabba li l-​parteċipazzjoni f’ċelebrazzjonijiet bħal dawn tistaʼ tirriżulta fid-​diżapprovazzjoni t’Alla. (Koħèlet 9:11; Isaija 65:11, 12, Karm Żammit) Barra minn hekk, il-​Bibbja twissi lill-​Kristjani biex ikunu moderati u juru l-​kontroll fil-​kondotta tagħhom. (1 Timotju 3:2, 11) Jidher ċar li ma jkunx xieraq għal wieħed li jgħid li jimxi fuq it-​tagħlim taʼ Kristu u mbagħad jieħu sehem f’ċelebrazzjoni li hija mimlija bi drawwiet eċċessivi.

Għalkemm iċ-​ċelebrazzjonijiet taʼ l-​Ewwel tas-​Sena jistgħu jidhru sbieħ u jħajruna, il-​Bibbja tgħidilna biex ‘ma mmissux l-​imniġġes’ u biex “nitnaddfu minn kull tidnis tal-​ġisem u [“taʼ l-​ispirtu,” KŻ].” Lil dawk li jobdu, Jehovah jagħtihom din il-​garanzija li tqanqal il-​qalb: “Jien nilqagħkom; u nkun għalikom missier u intom tkunu għalija wlied, subien u bniet.” (2 Korintin 6:17b–7:1, korsiv tagħna.) Iva, hu jwiegħed barkiet eterni u prosperità lil dawk kollha li jibqgħu leali lejh.—Salm 37:18, 28; Apokalissi 21:3, 4, 7.

[Nota taʼ taħt]