Il-​Greċja Tappoġġa d-​Drittijiet Reliġjużi

GĦALL-​EWWEL DARBA s-​sena l-​oħra, il-​gvern Grieg ta lix-​Xhieda taʼ Jehovah permess biex jużaw waħda mill-​aqwa faċilitajiet taʼ l-​isports li għandu għal konvenzjoni kbira. Din hija l-​Olympic Sportshall, kumpless għal-​logħob taʼ ġewwa li jesaʼ madwar 20,000 ruħ. Din l-​arena bl-​arja kundizzjonata hija parti mill-​kumpless li se jintuża għal-​Logħob Olimpiku taʼ l-​2004 f’Ateni.

Taʼ min jinnota li fl-​1963 u fl-​1988, ix-​Xhieda kienu għamlu arranġamenti biex jużaw faċilitajiet li jintużaw għall-​isport f’Ateni għall-​konvenzjonijiet tagħhom. Madankollu, fiż-​żewġ okkażjonijiet, l-​awtoritajiet ċedew għat-​theddid tal-​Knisja Ortodossa Griega u ma ħallewx lix-​Xhieda jużaw dawn il-​faċilitajiet.

Riżultat Differenti

Fi Frar taʼ l-​2001, ix-​Xhieda applikaw biex jużaw l-​Olympic Sportshall—wieħed mill-​ftit kumplessi għal-​logħob taʼ ġewwa li hu kbir biżżejjed biex jesaʼ lil kulħadd. Però tħassbu dwar jekk l-​istorja tal-​passat kinitx se tirrepeti ruħha. Bħalma kienu qegħdin jaħsbu li se jiġri, l-​ewwel deċiżjoni kienet negattiva.

Għalhekk, immedjatament, ġew kuntattjati uffiċjali mlaħħqin li għandhom reputazzjoni li jimxu kif suppost u li m’humiex preġudikati. Tgħid dawn kienu se jagħtu kas id-​drittijiet kostituzzjonali għall-​qima u l-​assembleat paċifiċi? Din id-​darba, kienu se jirreżistuha l-​pressjoni reliġjuża? Iva rreżistewha, u deċiżjoni ġdida ttieħdet minflok il-​waħda negattiva taʼ qabel. Dan fetaħ it-​triq għax-​Xhieda biex ikunu jistgħu jippjanaw il-​konvenzjoni fl-​Isportshall mis-​27 sad-​29 taʼ Lulju, 2001.

Fl-istess ħin, l-​awtoritajiet taw permess lix-​Xhieda biex jużaw faċilità oħra għall-​isports taʼ ġewwa kontrollata mill-​gvern, il-​Palais de Sport f’Tessalonika.

Il-​Pressjoni Ħarxa Tisfaxxa fix-​Xejn

Hekk kif l-​ewwel jum tal-​konvenzjoni f’Ateni beda joqrob, kien għad hemm xi mistoqsijiet inkwetanti bħal: L-​awtoritajiet se jżommuha d-​deċiżjoni li ħadu minkejja l-​pressjoni mill-​kleru Ortodoss? U se jkunu jistgħu x-​Xhieda jieħdu pjaċir bil-​laqgħa tagħhom mingħajr indħil minn nies li jinjoraw il-​liġi?

Il-Knisja Ortodossa ma nsietx it-​tattiċi antiki tagħha biex tara kif se jirnexxilha tfixkel il-​konvenzjoni. Stazzjonijiet televiżivi kixfu li l-​kleru ried li l-​konvenzjoni ma tissemma bl-​ebda mod. Però, fl-​aħħar mill-​aħħar l-​isforzi tal-​knisja sfaxxaw fix-​xejn.

Ironikament, il-​Knisja Ortodossa akkużat lix-​Xhieda li r-​reliġjon tagħhom iżżomm kollox mistur. Imma fil-​fatt kienet il-​knisja li pprovat taħbi mill-​pubbliku dak li kien qed jiġri fl-​Isportshall. B’ferħ, uħud kuraġġużi li jirrapportaw minn fuq il-​mezzi tax-​xandir ma ċedewx għall-​pressjoni tal-​kleru. Huma taw rapporti onesti u dettaljati dwar il-​konvenzjoni.

Iktar minn hekk, eluf taʼ delegati taw sehemhom biex jinformaw lill-​pubbliku dwar il-​konvenzjoni u biex jitkellmu magħhom dwar it-​twemmin tagħhom. Minn kulfejn għaddew, id-​delegati kienu jiġu identifikati mill-​badges sofor tal-​konvenzjoni. Ħafna nies li ma kinux Xhieda taʼ Jehovah wieġbu għall-​istedina biex jattendu għall-​konvenzjoni, u b’hekk fl-​aħħar jum, l-​attendenza fl-​Isportshall telgħet għal 15,760 ruħ. Meta tgħodd l-​attendenza tal-​konvenzjonijiet għall-​aħħar żewġ Sibtijiet u Ħdud taʼ Lulju fil-​Palais de Sport f’Tessalonika, din telgħet għal 13,173 ruħ.

Osservaturi Impressjonaw Ruħhom

Meta grupp taʼ 2,604 volontieri—kollha Xhieda taʼ Jehovah—invadew l-​Isportshall, inaddfu, jiżbgħu, u jippreparaw għall-​konvenzjoni, il-​maniġers tal-​post qalu: “Ġejna naraw b’għajnejna stess xi ħaġa li qatt ma rajnieha tiġri qabel.” Persuna oħra qalet: “Imisskom tużaw din il-​faċilità kull sena biex idduruha waħda sew kull darba.”

Andreas Vardakis, id-​direttur taʼ l-​affarijiet pubbliċi fl-​Isportshall, impressjona ruħu. “Intom sebbaħtu din il-​faċilità,” hu qal. “Aħna għandna nies biżżejjed biex jieħdu ħsieb dan il-​post. Imma kienet il-​parteċipazzjoni tagħkom li għamlet din il-​konvenzjoni waħda taʼ suċċess.”

Waqt il-​konvenzjoni, uffiċjal tal-​pulizija, wara li rrealizza li ma kienx hemm għalfejn jintbagħtu nies biex jikkontrollaw din il-​folla paċifika qal: “Qatt ma rajt daqshekk ordni u mġiba tajba!”

Punti Prinċipali tal-​Konvenzjoni

Fit-​taħdita taʼ l-​għeluq tal-​konvenzjoni, sar avviż li l-​Ministeru Grieg għall-​Edukazzjoni u Reliġjonijiet Nazzjonali qies lix-​Xhieda taʼ Jehovah bħala “reliġjon rikonoxxuta.” Iktar minn hekk, il-​Ministeru rrikonoxxa uffiċjalment il-​kwartieri nazzjonali li għandhom ix-​Xhieda taʼ Jehovah f’Ateni. Parti mid-​dokument tal-​gvern kien jgħid:

“L-​amministrazzjoni tqis lix-​Xhieda Kristjani taʼ Jehovah bħala reliġjon rikonoxxuta . . . bil-​benefiċċji legali kollha li din iġġib magħha. L-​artiklu tal-​Kostituzzjoni li ssemma qabel jipproteġi l-​libertà tal-​qima, il-​mod u l-​mezzi taʼ kif tiġi prattikata, u l-​għażla għall-​mod taʼ kif tiġi amministrata u organizzata kull laqgħa reliġjuża jew tal-​knisja. B’mod ċar, din il-​protezzjoni testendi għall-​bini u l-​faċilitajiet f’Marousi [l-uffiċċju tal-​fergħa tax-​Xhieda taʼ Jehovah bħala] post sagru u konsagrat, dedikat għall-​qima t’Alla. Faċilitajiet bħal dawn huma msejħin Betel, jiġifieri, ‘Dar t’Alla.’”

Ix-Xhieda taʼ Jehovah, u kull min hu favur il-​libertà reliġjuża, huma grati għal dawn l-​iżviluppi. Huma jisperaw li b’riżultat taʼ dan, in-​nies ikunu jistgħu jgħixu ħajja Kristjana li tkun “kalma u kwieta bid-​devozzjoni sħiħa lejn Alla u bis-​serjetà.”—1 Timotju 2:​1, 2, NW.

[Stampi f’paġna 16]

Ix-​Xhieda jinġabru fl-​Olympic Sportshall

[Sors]

Harry Bilios