Il-Komunikazzjoni li Twassal għall-Ħajja
MILL-ĦLEJJAQ kollha li hawn fuq l-art, il-bnedmin huma l-uniċi li m’humiex kuntenti li sempliċement jikkomunikaw bejniethom. Huma x’inhuma n-nazzjonalità, il-qagħda soċjali, is-sess, jew il-livell taʼ l-edukazzjoni tagħhom, il-bnedmin urew xewqa ġewwinija li jikkomunikaw maʼ l-ogħla individwu li jeżisti, jiġifieri m’Alla.
Hija din sempliċi superstizzjoni bla sens? Dażgur li le! Bħalma semmejna fl-artiklu taʼ qabel, Alla ħalaq lill-bnedmin fuq xbieha tiegħu. Hu ħalaqna bi bżonn li nifhmu affarijiet spiritwali. Din tinkludi x-xewqa li nikkomunikaw miegħu bħala Missierna tas-sema. (Ġenesi 1:27; Mattew 5:3) Fil-fatt, Alla tant jagħti importanza lill-komunikazzjoni miegħu li l-Bibbja tirreferi għalih bħala l-Wieħed li ‘jismaʼ talbna.’—Salm 65:3 (65:2, NW).
X’unur għandna li nistgħu nitolbu lil Dak li jistaʼ kollox! Ħafna nies kienu jqisuh bħala privileġġ li kieku kellhom jitkellmu fil-privat maʼ xi ħadd taʼ grad għoli, bħal xi president jew prim ministru. Madankollu, Alla Jehovah hu l-ogħla persunaġġ fl-univers! U lanqas għandna bżonn nagħmlu appuntament biex inkellmuh. Nistgħu nitolbu f’kull ħin u kullimkien. Nistgħu anki nkellmu lil Alla bil-kwiet f’qalbna. (1 Samwel 1:12-15) Però, Jehovah jistenna li aħna nkunu sinċieri u li nisimgħu minnu u nobduh. (Mikea 6:8; Mattew 6:5-13) Wara kollox, il-komunikazzjoni tajba għandha tiġi miż-żewġ naħat, mhux hekk?
Int Tismaʼ lil Alla?
Dak li jkun kif jismaʼ lil Alla? L-ewwelnett billi jaqra u japplika t-tagħlim li nsibu fil-Kelma miktuba tiegħu, il-Bibbja Mqaddsa. (2 Timotju 3:16; 2 Pietru 1:20, 21) Ġesù qal: “Il-bniedem . . . jgħix . . . b’kull kelma li toħroġ minn fomm Alla.” (Mattew 4:4) Tismaʼ int lil Alla billi taqra u tapplika l-Kelma miktuba tiegħu?
Dawk li jikkomunikaw maʼ Jehovah b’mod regulari jiksbu l-favur tiegħu u jgawdu “s-sliem taʼ Alla, sliem li jgħaddi kull ma l-moħħ jistaʼ jifhem.” (Filippin 4:6, 7; Proverbji 1:33) Ukoll, għandhom il-prospett taʼ ħajja taʼ dejjem f’ġenna taʼ l-art, ħielsa għalkollox mill-ansjetà u t-tbatija li niffaċċjaw illum. (Salm 37:29; Ġwanni 17:3) Xi premjijiet meraviljużi hemm lesti għalina jekk nużaw bl-aħjar mod il-miraklu tal-komunikazzjoni intelliġenti!
[Stampa f’paġna 10]
Il-komunikazzjoni m’Alla tinvolvi l-qari tal-Bibbja u t-talb