It-Tip taʼ Sbuħija l-Iktar Importanti
IN-NIES jinġibdu lejn persuna li jqisuha attraenti. Imma x’inhu dak li tassew jagħmlek attraenti? Wara kollox, hemm limitu x’tistaʼ tagħmel bla periklu biex tbiddel il-karatteristiċi li tiret. Barra minn hekk, is-sbuħija fiżika tispiċċa maż-żmien peress li llum ħadd ma jistaʼ jaħrab l-effetti ħżiena tax-xjuħija u l-mard. Hemm xi tip taʼ sbuħija oħra li tistaʼ tinkiseb u li hi iktar importanti u dejjiema?
L-Importanza tas-Sbuħija minn Ġewwa
Il-Bibbja tiżgurana li l-Ħallieq tagħna, Alla Ġeħova, ipoġġi valur kbir fuq is-sbuħija minn ġewwa. Ikkunsidra xi eżempji.
Meta Ġeħova qal lill-profeta Samwel biex jagħżel sultan għal Iżrael minn fost it-tfal taʼ Ġesse, il-profeta nġibed lejn Elijab, għax kien raġel il-ġmiel tiegħu. “Hawn quddiem il-Mulej il-midluk tiegħu,” qal Samwel. Iżda Ġeħova qal lil Samwel: “Tħarisx lejn is-sura tiegħu, jew it-tul taʼ persuntu, għax jien diġà warrabtu. Għax il-Mulej ma jarax bħalma jara l-bniedem, dak biss li jidher fl-għajn, imma l-qalb.”—1 Samwel 16:6, 7.
Dak li ntgħażel biex ikun sultan kien David, iż-żgħir fost ħutu. Għalkemm kellu “għajnejh ħelwin” u kien “sabiħ fis-sura tiegħu,” David forsi ma kellux apparenza impressjonanti daqs kemm kellhom ħutu li kienu akbar minnu. Iżda, “minn dak in-nhar ’il quddiem niżel fuq David u ħakmu l-ispirtu tal-Mulej.” Għalkemm kien imperfett u għamel xi żbalji serji, hu ta prova li kien bniedem taʼ qalb tajba u nobbli, u qeda lil Alla fedelment sat-tmiem taʼ ħajtu. (1 Samwel 16:12, 13) Bla dubju, hu kien attraenti għal Alla primarjament minħabba s-sbuħija li kellu minn ġewwa.
Bħala kuntrast, ikkunsidra lil Absalom, wieħed minn ulied David. Hu kien bniedem li jimbottak minkejja l-apparenza fiżika sabiħa tiegħu. Il-Bibbja tgħid dwaru: “Ma kienx hemm f’Iżrael kollu raġel ieħor sabiħ xi tfaħħar daqs Absalom; minn qiegħ riġlejh sal-quċċata taʼ rasu ma kien fih ebda għajb.” (2 Samwel 14:25) Iżda l-ambizzjoni taʼ Absalom ġagħlitu jirribella kontra missieru stess u jisraqlu t-tron. Hu saħansitra stupra l-konkubini taʼ missieru. Minħabba f’hekk, Absalom ġab fuqu l-korla t’Alla u sofra mewta taʼ wġigħ.—2 Samwel 15:10-14; 16:13-22; 17:14; 18:9, 15.
Tħossok miġbud lejn Absalom? Żgur li le. Meta tqis kollox maʼ kollox, hu kien individwu li jimbottak. Is-sbuħija fiżika tiegħu li kienet tispikka ma kinitx tpatti għall-arroganza u ż-żlealtà tiegħu, u lanqas ma ħelsitu mir-rovina. Mill-banda l-oħra, il-Bibbja fiha ħafna eżempji taʼ nies għaqlin li kienu attraenti iżda li xejn ma jissemma dwar is-sbuħija fiżika tagħhom. Jidher ċar li l-iktar ħaġa importanti kienet is-sbuħija minn ġewwa.
L-Attrazzjoni tas-Sbuħija minn Ġewwa
Tistaʼ s-sbuħija minn ġewwa tattira lil oħrajn? Georgina, li ilha miżżewġa kważi għaxar snin, tgħid: “Matul is-snin, inġbidt lejn żewġi minħabba l-onestà u s-sinċerità tiegħu lejja. L-iktar ħaġa importanti f’ħajtu hi li jogħġob lil Alla. Dan għenu biex juri konsiderazzjoni u mħabba. Lili jikkalkulani meta jieħu d-deċiżjonijiet u jġagħalni nħossni apprezzata. Naf li tassew iħobbni.”
Danjel, li żżewweġ fl-1987, jgħid: “Jien lil marti naraha sabiħa. M’iniex miġbud lejha biss fiżikament iżda l-personalità tagħha ġġagħalni nħobbha saħansitra iktar. Dejjem taħseb f’ħaddieħor u tagħmel li tistaʼ biex tara lil kulħadd kuntent. Għandha kwalitajiet Kristjani imprezzabbli. Minħabba f’dan kien pjaċevoli għalija li nkun magħha.”
F’din id-dinja superfiċjali, hemm bżonn li naraw iktar mill-qoxra taʼ barra. Għandna bżonn nifhmu li hu diffiċli—jew impossibbli—li niksbu d-dehra “ideali,” u li din għandha valur limitat ħafna. Madankollu, hu possibbli niżviluppaw kwalitajiet mixtieqa li jikkontribwixxu għas-sbuħija minn ġewwa li hi s-sbuħija vera. Il-Bibbja tgħid: “Qarrieqa l-ħlewwa tal-mara, fiergħa sbuħitha; mara li tibżaʼ mill-Mulej taʼ min ifaħħarha.” B’kuntrast, l-Iskrittura twissi: “Bħal ħolqa tad-deheb fi mnieħer ħanżir, hi mara sabiħa imma bla għaqal.”—Proverbji 11:22; 31:30.
Il-Kelma t’Alla tgħinna napprezzaw il-“persuna minn ġewwa, fil-qalb, imżejna bi spirtu kwiet u ġwejjed li ma jitħassarx u li hu taʼ valur kbir f’għajnejn Alla.” (1 Pietru 3:4) Verament, din is-sbuħija minn ġewwa hi ferm iżjed importanti mis-sbuħija fiżika. U jistaʼ jasal għaliha kulħadd.
[Stampi f’paġna 8, 9]
Kwalitajiet tajbin jistgħu jsebbħuk ferm iżjed minn kwalunkwe tisbiħ fiżiku li tistaʼ tagħmel