L-Infern Jaħraq?
“F’XI PUNT fis-sittinijiet, l-Infern sparixxa.” Hekk qal l-awtur Ingliż David Lodge fil-ktieb tiegħu Souls and Bodies, u l-kliem tiegħu jirrifletti l-ħsieb taʼ ħafna Kattoliċi u Protestanti matul is-snin li segwew it-tieni gwerra dinjija. Għal xi żmien, hafna mill-knejjes ewlenin infushom naqqsu l-enfasi minn fuq id-duttrina uffiċċjali tagħhom taʼ nfern tan-nar fl-isforzi tagħhom biex jaddattaw għall-mudelli taʼ ħsieb modern.
L-ideja taʼ kastig wara l-mewt kienet b’mod speċjali mhix aċċettabbli għan-nies għaliex l-ideja tad-dnub innifsu kienet saret imċajpra fl-imħuħ tagħhom. Meta ġie intervistat fl-1984, il-Kardinal Ratzinger taʼ Ruma qal: “Iċ-ċivilizzazzjoni tagħna . . . tiffoka f’li toħloq ċirkustanzi u skużi f’attentat biex tneħħi s-sens taʼ ħtija, taʼ dnub ’il bogħod min-nies . . . , dik l-istess realtà li magħha t-twemmin fl-infern u Purgatorju hu assoċjat.”
Huwa possibbli llum li temmen fir-realtà tad-dnub mingħajr ma taċċetta d-duttrina taʼ kastig wara l-mewt fil-purgatorju u fl-infern? Ktieb riċenti, Abrégé de la foi catholique (Ġabra fil-qosor tat-Twemmin Kattoliku), b’introduzzjoni mill-Kardinal Franċiż Decourtray, poġġa l-mistoqsija b’mod dirett: “Hemm bżonn temmen bl-infern?” It-tweġiba: “Mhux possibbli li taħrab il-kwistjoni tal-biżaʼ tal-infern.” Ix-xogħol Vatican Council II—More Post-conciliar Documents (1982) jikkwota “Il-Credo tal-Poplu t’Alla” bħala li jgħid: “Aħna nemmnu . . . [li] dawk li wieġbu għall-imħabba u l-ħniena t’Alla se jmorru fil-ħajja eterna. Dawk li rrifjutawhom sat-tmiem se jingħataw għan-nar li qatt ma jintefa.”
Għalhekk, minkejja l-isforzi teoloġiċi kollha biex jagħtu prova kontra dan, in-nar tal-infern għadu bil-wisq parti mid-domma uffiċċjali Kattolika. Madankollu A New Dictionary of Christian Theology (1983) jitkellem dwar il-“mistħija” u l-“iskandlu” li d-duttrina taʼ ndannazzjoni eterna tikkaġuna lil ħafna membri tal-knejjes tal-Kristjaneżmu llum. Huma jsibuha diffiċli li jqabblu din id-domma mal-ideja taʼ Alla taʼ mħabba. Huma jistaqsu: ‘Huwa infern jaħraq verament duttrina Kristjana u Biblika?’
[Stampa f’paġna 3]
Il-katidral taʼ Bourges, Franza