Dalwaqt M’Hemmx Iktar Mard jew Mewt!

ĦADD ma jieħu gost ikun marid, u l-​bnedmin lanqas ma jridu li jmutu.Professur tas-​soċjoloġija medika jinsisti: “It-​tfittxija għal ħajja itwal tidher li hi kważi universali matul l-​istorja u fil-​biċċa l-​kbira tas-​soċjetajiet. Hija relatata mal-​ġirja bażika biex wieħed jippreserva lilu nnifsu . . . Ponce de Leon huwa l-​iktar wieħed famuż minn lista sħiħa taʼ rġiel li qattgħu ħajjithom ifittxu ħajja itwal. Il-​maġġoranza tax-​xjenza medika hija ddedikata biex tippriserva ħajja itwal billi tikkumbatti l-​mard u l-​mewt.”

Il-mewt tant toffendi n-​natura ġewwinija tagħna li meta tmiss lill-​ħbieb u membri tal-​familja, aħna kważi b’mod naturali nippruvaw inrattbu l-​impatt tagħha. Il-​ktieb Funeral Customs the World Over josserva: “M’hemm ebda grupp, primittiv kemm hu primittiv b’mod estrem jew ċivilizzat min-​naħa l-​oħra, li meta jiġi mħolli liberu u bil-​mezzi tiegħu ma jiħux ħsieb l-​iġsma tal-​membri tiegħu b’ċerimonja.... Jissodisfa xewqat profondi u universali. Jekk jiġu mwettqin jidhru ‘tajbin,’ u jekk ma jiġux imwettqin, partikolarment għal dawk li jkunu konnessi mal-​familja, jew emozzjonalment, jew għaliex għexu flimkien, jew kellhom esperjenza komuni jew xi rabtiet oħra, jidhru ‘ħżiena,’ nuqqas mhux naturali, kwistjoni li għandha tingħata apoloġija għaliha jew xi ħaġa taʼ misthija.... [Il-bniedem] huwa maħluq li jidfen il-​mejtin tiegħu b’ċerimonja.”

L-​Oriġini tal-​Mard u l-​Mewt

L-​idea li l-​mard u l-​mewt xi darba se jiġu eliminati b’hekk għandha appell qawwi, imma hemm xi bażi għal twemmin bħal dan? Tabilħaqq li hemm, u huwa kemm raġonevoli, taʼ min joqgħod fuqu, u infallibbli. Huwa l-​Kelma mnebbħa tal-​Ħallieq tagħna—Il-​Bibbja Mqaddsa.

Dak il-​ktieb jispjega ċar u tond l-​oriġini tal-​miżerja umana. Jgħidilna kif l-​ewwel bniedem, Adam, ġie maħluq minn Alla u mqiegħed fi ġnien ġenna bħala daru li kien jinsab xi mkien fil-​Lvant Nofsani. Adam ġie maħluq perfett; il-​mard u l-​mewt ma kienx jaf bihom. Hu malajr ġie msieħeb minn mara perfetta daqsu, u flimkien huma gawdew il-​prospett taʼ ħajja taʼ dejjem fuq l-​art.—Ġenesi 2:15-17, 21-24.

Dan l-​istat ideali ma damx wisq. Għala? Minħabba li Adam b’mod egoist għażel mod taʼ ħajja indipendenti minn Alla. Ir-​riżultat kien xogħol iebes, uġigħ, mard, u eventwalment il-​mewt. (Ġenesi 3:17-19) In-​nisel tiegħu wiret ix-​xorta taʼ ħajja mdejqa li Adam kien għażel. Rumani 5:12 jispjega: “Permezz taʼ bniedem wieħed id-​dnub daħal fid-​dinja u l-​mewt permezz tad-​dnub, u b’hekk il-​mewt infirxet fuq il-​bnedmin kollha għaliex kollha kienu dinbu.” Rumani 8:22 iżid: “Aħna nafu li l-​ħolqien kollu jibqaʼ jitniegħed flimkien u jkun fl-​uġigħ flimkien stissa.”

Fuq l-​Art jew fis-​Sema?

Minkejja dan, il-​Bibbja tiżżgurana li Alla dalwaqt se jirrestawra lill-​umanità ubbidjenti għall-​kundizzjoni ferrihija li tilfu Adam u Eva. Igħid Rivelazzjoni 21:3, 4: “Alla nnifsu se jkun magħhom. U se jimsaħ kull demgħa minn għajnejhom, u l-​mewt ma tkunx iżjed, u la l-​għali u la l-​biki u lanqas l-​uġigħ ma jkunu iżjed. L-​affarijiet taʼ qabel għaddew.” Profeta tal-​qedem bl-​istess mod ra bil-​quddiem iż-​żmien meta “ebda wieħed li joqgħod hemm ma se jgħid: ‘Jien marid.”ˈ—Isaija 33:24.

Tistaʼ timmaġina dinja mingħajr sptarijiet, kmamar mortwarji, u oqbra? Tistaʼ timmaġinak tkompli tgħix għal snin u snin, ħieles saħansitra mit-​theddida tat-​tbatija u l-​mewt? Iva, l-​wegħda t’Alla tqanqal emozzjonijiet profondi ġo fina lkoll. Iżda, kif nistgħu nkunu żguri li dan il-​prospett tal-​għaġeb huwa għal pjaneta Art tagħna—mhux għas-​sema? Innota l-​kuntest tal-​iskritturi li semmejna qabel. L-​ewwel versi taʼ Rivelazzjoni kapitlu 21 jitkellem dwar “sema ġdid u art ġdida.” L-​istqarrija ċara hija magħmula li Alla se jkun mal-​umanità u li huma se jkunu l-​poplu tiegħu. Il-​wegħda fil-​ktieb taʼ Isaija li ħadd ma se jkun marid hija segwita b’referenza għan-​“nies li qed igħammru fl-​art,” li ġew “maħfurin għall-​iżball tagħhom.”

Mela dawn il-​wegħdi inkuraġganti jirreferu għall-​ħajja fuq l-​art! U huma jaqblu mat-​talba taʼ Ġesù lil Missieru: “Ħa tintgħamel ir-​rieda tiegħek, kif fis-​sema, ukoll fuq l-​art.”—Mattew 6:10.

Għala Dalwaqt?

Ix-​Xhieda taʼ Jehovah għenu lil miljuni biex jirrealizzaw li dawn il-​wegħdiet se jiġu mwettqin fil-​futur qarib. Fuq liema bażi, iżda, huma jħossuhom tant żguri dwar dan? Fuq il-​bażi taʼ evidenza li ma tistax tmeriha li aħna qegħdin ingħixu fl-​“aħħar jiem” tas-​sistema, jew arranġament, preżenti taʼ affarijiet fuq l-​art. (2 Timotew 3:1-5) Id-​dixxipli taʼ Ġesù staqsew għal sinjal dwar meta kellha tkun il-​konklużjoni taʼ din is-​sistema taʼ affarijiet. Bi tweġiba Ġesù bassar fid-​dettal il-​ġrajjiet tad-​dinja li dejjem jiżdiedu li seħħew mindu faqqgħet l-​ewwel gwerra dinjija fl-​1914.a Imbagħad hu żied: “Meta taraw dawn l-​affarijiet kollha, kunu afu li hu qrib wara l-​bieb. Verament ingħidilkom li din il-​ġenerazzjoni bl-​ebda mod ma se tgħaddi sakemm dawn l-​affarijiet kollha jseħħu.” Mela xi wħud minn tal-​generazzjoni li kienet tgħix fl-​1914 se jkunu ħajjin biex jaraw it-​tmiem tas-​sistema dinjija preżenti.—Mattew 24:33, 34.

F’dak iż-​żmien Alla Jehovah se jinkariga lill-​Ibnu, Kristu Ġesù, biex joħroġ u jeqred il-​kaġuni kollha taʼ sofferenzi u miżerji minn fuq wiċċ din il-​ġmiel taʼ pjaneta Art. Il-​Bibbja titkellem dwar l-​eliminazzjoni tal-​ħażen bħala l-​“gwerra tal-​jum il-​kbir t’Alla li Jistaʼ Kollox” f’Armageddon.—Rivelazzjoni 16:14, 16.

Numru kbir taʼ bnedmin li għandhom il-​biżaʼ t’Alla se jsalvaw minn dan l-​iżvilupp li jqanqal biżaʼ u jgħixu biex jaraw ir-​renju paċifiku taʼ Kristu Ġesù jibda. (Rivelazzjoni 7:9, 14; 20:4) Għalkemm il-​ħakma tiegħu se tkun mis-​sema, ir-​riżultati taʼ benefiċċju tagħha se jiġu gawduti minn dawk kollha li jgħixu fuq l-​art—kemm dawk li salvaw mill-​gwerra taʼ Armageddon u kemm il-​miljuni taʼ miljuni li se j igu mqaj min ftit ftit mill-​imwiet. Il-​wegħda mbagħad se ssir realtà: “Hu [Kristu] jrid jaħkem bħala sultan sakemm Alla jkun qiegħed l-​egħdewwa kollha taħt saqajh. Bħala l-​aħħar għadu, il-​mewt trid tinġieb fix-​xejn.”−1 Korintin 15:25, 26.

Aħna b’hekk b’mod kunfidenti nesklamaw: “Dalwaqt ma jkunx hawn iktar mard jew mewt!” Din mhix xi ħolma, lanqas ma hi xewqa fiergħa. Hija l-​wegħda żgura taʼ Alla Jehovah, “li ma jistax jigdeb.” Sejjer int tpoġġi l-​fiduċja tiegħek f’din it-​tama? Tistaʼ tkun taʼ ġid għalik għal dejjem!—Titus 1:2.

[Nota taʼ taħt]