Għala Jużaw ir-Relikwi fil-Qima
NAPLI, l-Italja. Immaġinak qiegħed hemm fis-snin bikrin tas-seklu 18 tal-Era Komuni tagħna. Fil-katidral taʼ dik il-belt, il-filosfu Irlandiż George Berkeley jinsab wieqaf quddiem relikwa reliġjuża famuża. Hu jqis b’xettiċiżmu dak li jidher li hu d-demm likwidu taʼ “San Gennaro,” il-Kattoliku “san” Ġennaru.
Napli ftit li xejn inbidlet f’dan ir-rigward. Per eżempju, minkejja l-maltemp darba minnhom fi snin riċenti, il-knisja kienet imballata bin-nies, u milli jidher seħħ miraklu. Ir-relikwa u l-purċissjoni li tmexxiet minn arċisqof kardinal kienu milqugħin b’applaws kbir. Iva, dan kien wieħed mill-ħafna drabi fejn id-demm taʼ “San Gennaro” deher isir likwidu. Mirakli li jinvolvu lil din ir-relikwa reliġjuża ġew irrapportati li seħħu mis-seklu 14 ’il hawn.
Skond it-tradizzjoni Kattolika, relikwa (mil-Latin relinquere, li tfisser “li tħalli warajk”) hija oġġett imħolli minn xi bniedem li hu kkunsidrat bħala qaddis. Kif juri d-Dizionario Ecclesiastico, ir-relikwi huma “fis-sens strett tal-kelma, il-ġisem jew parti mill-ġisem u l-irmied tal-Qaddis, f’sens akbar l-oġġett li ġie f’kuntatt mal-ġisem tal-qaddis u li b’hekk huwa denju taʼ devozzjoni.”
Il-Kunsens Papali
Bla dubju, ħafna jittrattaw b’mod reverenzjali r-relikwi reliġjużi minħabba dawk li jidhru li huma mirakli assoċjati magħhom. Il-kunsens papali huwa evidentement fattur ieħor fil-popolarità tagħhom.
Minn tal-inqas erbaʼ papiet f’dawn l-aħħar 70 sena taw attenzjoni speċjali lir-relikwi. Perjodiku Kattoliku jirrivela li bħall-predeċessur tiegħu Piju XI, il-Papa Piju XII “żamm relikwi tal-qaddis taʼ Lisieux fuqu.” Pawlu VI “żamm sebaʼ tal-appostlu [Tumas] fuq l-iskrivanija fl-istudju tiegħu,” u Ġwanni Pawlu II “iżomm, fl-appartament tiegħu stess, biċċiet tal- . . . fdalijiet mortali” taʼ “San Beneditt” u “Sant’ Andrija.” −30 giorni, Marzu 1990, paġna 50.
Meta wieħed iqis kunsens papali bħal dan, m’huwiex sorprendenti li d-domanda għar-relikwi għad-devozzjoni kemm privata kif ukoll pubblika qed tiżdied. Imma d-devozzjoni lejn relikwi reliġjużi togħġbu lil Alla?
[Stampa f’paġna 3]
Relikwarju, kontenitur li fih jiġu ppriservati relikwi reliġjużi
[Sors]
Bil-kortesija taʼ The British Museum