L-​Interess li Jintwera Llum fil-“Qaddisin”

“Tiftakar meta suppost li konna xbajna nisimgħu dwar l-​eroj? Milli jidher dan m’effettwax lill-​4.2 miljun Amerikan li raw il-​funeral taʼ Madre Tereża fit-​13 taʼ Sett. Minn meta mietet fil-​5 taʼ Sett., in-​nies ibbombardjaw il-​Vatikan b’talbiet ħalli tiġi dikjarata qaddisa b’mod uffiċjali. Ftit huma dawk li jiddubitaw li dan għad iseħħ.”— Sun-sentinel, l-​Istati Uniti, 3 t’ottubru, 1997.

ĦAFNA huma dawk li jikkunsidraw ix-​xogħol umanitarju u karitattiv tal-​missjunarja Kattolika Madre Tereża bħala x-​xempju tal-​qdusija. Persunaġġi erojċi jeżistu fost reliġjonijiet oħrajn. Madankollu, huwa probabbli li l-​ebda wieħed minnhom m’hu magħruf b’mod uffiċjali bħalma huma dawk li jiġu dikjarati qaddisin mill-​Knisja Kattolika Rumana.

Il-Papa Ġwanni Pawlu t-​II ddikjara qaddisin lil iktar minn 450 individwu kemm ilu jaħkem bħala papa, iktar minn kemm ġew dikjarati qaddisin mill-​papiet l-​oħra kollha flimkien li ħakmu fis-​seklu 20.a Għala hawn daqshekk devozzjoni dejjiema lejn il-​“qaddisin,” li ħafna minnhom lanqas biss huma magħrufin mill-​Kattoliċi in ġenerali?

Lawrence Cunningham, teologu mill-​Università taʼ Notre Dame, jispjega: “Lin-​nies tinteressahom ferm l-​idea taʼ qdusija fid-​dinja. Il-​qaddisin juru l-​possibbiltà taʼ ħajja erojka, anki llum.” Barra minn hekk, hemm min isostni li l-​“qaddisin” għandhom l-​abbiltà speċjali li jersqu lejn Alla, u dan jagħmilhom medjaturi effettivi għall-​ħajjin. Meta jinstabu xi relikwi jew partijiet tal-​ġisem taʼ “qaddis,” dawn jiġu meqjuma għaliex hemm min jemmen li minnhom toħroġ xi qawwa.

Il-​Katekiżmu tal-​Konċilju taʼ Trento, pubblikat fis-​seklu 16 biex terġaʼ tiġi affermata d-​domma Kattolika, iddikjara: “Aħna ġustifikati meta nikkonkludu li l-​fatt li nonoraw lill-​qaddisin li jinsabu ‘reqdin fil-​Mulej,’ li nsejħulhom biex jidħlu għalina, u li nqimu lir-​relikwi u l-​irmied qaddis tagħhom, mhux talli ma nkunux qed innaqqsu, iżda talli nżidu b’mod konsiderevoli l-​glorja t’Alla, skond kemm it-​tama tal-​Kristjan tingħata l-​ħajja u tissaħħaħ, u hu nnifsu jitqanqal biex jimita l-​virtujiet tagħhom.” (The Catechism of the Council of Trent, 1905) Il-​Kristjani veri żgur li jridu jgħixu ħajja virtuża, jersqu lejn Alla b’mod xieraq, u jirċievu l-​għajnuna divina. (Ġakbu 4:​7, 8) Għalhekk, skond il-​Kelma t’Alla, min huma dawk li jikkwalifikaw bħala qaddisin ġenwini? U liema rwol għandhom?

[Nota taʼ taħt]