Nikkultivaw il-Frott tal-Kontroll Fuqna Nfusna

“Il-​frott tal-​ispirtu hu mħabba, ferħ, paċi, sabar fit-​tul, qalb tajba, tjubija, fidi, ħlewwa, kontroll fuqek innifsek. Kontra dawn l-​affarijiet ma hemm ebda liġi.”−GALATIN 5:​22, 23.

1. Min huma li tawna l-​aqwa eżempji taʼ kontroll fuqhom infushom, bħalma jidher minn liema skritturi?

ALLA JEHOVAH u Ġesù Kristu tawna l-​aqwa eżempji taʼ kontroll fuqhom infushom. Mid-​diżubbidjenza tal-​bniedem fil-​ġnien taʼ Għeden ’il hawn, Jehovah baqaʼ jeżerċita din il-​kwalità. (Qabbel Isaija 42:14.) Disaʼ darbiet fl-​Iskrittura Ebrajka naqraw li hu “idum biex jirrabja.” (Eżodu 34:6) Dak jirrikjedi kontroll fuqu nnifsu. U ċertament li l-​Iben t’Alla eżerċita kontroll kbir fuqu nnifsu, għax “meta kien qed jiġi nsultat, ma marx jinsulta lura.” (1 Pietru 2:23) Iżda, Ġesù setaʼ talab lil Missieru tas-​sema għall-​appoġġ taʼ “iktar minn tnax-il leġjun taʼ anġli.”−Mattew 26:53.

2. Liema eżempji Skritturali mill-​aħjar għandna taʼ li bnedmin imperfetti eżerċitaw kontroll fuqhom infushom?

² Għandna wkoll xi eżempji Skritturali mill-​aħjar taʼ wħud imperfetti li eżerċitaw kontroll fuqhom infushom. Per eżempju, din il-​kwalità ġiet murija matul l-​inċident notevoli fil-​ħajja taʼ Ġużeppi, bin il-​patrijarka Ġakobb. X’kontroll eżerċita Ġużeppi fuqu nnifsu meta l-​mara taʼ Potifar ipprovat tisseduċih! (Ġenesi 39:7-9) Kien hemm ukoll l-​eżempju mill-​aħjar tal-​erbaʼ żgħażagħ Ebrej li eżerċitaw kontroll fuqhom infushom billi rrifjutaw li jieklu mill-​ħlewwiet tas-​sultan Babilonjan minħabba restrizzjonijiet fil-​Liġi Mosajka.—Danjel 1:8-17.

3. Min huma dawk li magħrufin għall-​imġieba mill-​aħjar tagħhom, bħalma jidher minn liema testimonjanza?

³ Għal eżempji moderni taʼ li wieħed jeżerċita kontroll fuqu nnifsu, nistgħu nħarsu lejn ix-​Xhieda taʼ Jehovah bħala grupp. Jixirqilhom it-​tifħir mogħti lilhom min-​New Catholic Encyclopedia—li huma “wieħed mill-​iktar gruppi fid-​dinja li jġibu ruħhom sewwa.” Għalliem tal-​università fil-​Filippini stqarr li “x-​Xhieda jipprattikaw reliġjożament dak li jitgħallmu mill-​Iskrittura.” Rigward il-​konvenzjoni tax-​Xhieda ġewwa Varsavja fl-​1989, ġurnalista Pollakk kiteb: “55,000 ruħ ma pejpux sigarett wieħed għal tlett ijiem! . . . Din il-​wirja taʼ dixxiplina superumana impressjonatni b’ammirazzjoni mħallat maʼ stagħġib kbir.”

Nibżgħu minn Alla u Nobogħdu Dak li Hu Ħażin

4. Liema hi waħda mill-​akbar għajnuniet f’li neżerċitaw kontroll fuqna nfusna?

⁴ Waħda mill-​akbar għajnuniet biex nikkultivaw il-​kontroll fuqna nfusna hija l-​biżaʼ t’Alla, it-​tkexkix bnin taʼ li ma nogħġbux lil Missierna maħbub tas-​sema. L-​importanza għalina taʼ li jkollna biżaʼ reverenzjali minn Alla nistgħu narawha mill-​fatt li l-​Iskrittura ssemmih bosta drabi. Meta Abraham kien wasal biex joffri lil ibnu Iżakk, Alla qal: “Toħroġx lil idek kontra t-​tifel u tagħmillu xejn affattu, għax issa jien naf li int tibżaʼ minn Alla billi int ma żammejtx lura lil ibnek, l-​uniku wieħed tiegħek, minni.” (Ġenesi 22:12) L-​istress emozzjonali żgur li kien qawwi ħafna, u għalhekk żgur li kien jirrikjedi kontroll kbir ferm minn Abraham fuqu nnifsu biex jibqaʼ għaddej bil-​kmand t’Alla sal-​punt li jerfaʼ s-​sikkina tiegħu biex joqtol lill-​maħbub ibnu Iżakk. Iva, il-​biżaʼ t’Alla se tgħinna neżerċitaw kontroll fuqna nfusna.

5. Liema rwol għandha l-​mibgħeda għall-​ħażen fl-​eżerċitar tagħna taʼ kontroll fuqna nfusna?

⁵ Ħaġa li għandha x’taqsam mill-​qrib mal-​biżaʼ taʼ Jehovah hija li nobogħdu dak li hu ħażin. Naqraw fi Proverbji 8:13: “Il-​biżaʼ taʼ Jehovah tfisser li tobgħod il-​ħażen.” Imbagħad, li nobogħdu dak li hu ħażin igħinna f’li neżerċitaw kontroll fuqna nfusna. Darba wara l-​oħra, l-​Iskrittura tgħidilna biex nobogħdu—iva, nabborrixxu—dak li hu ħażin. (Salm 97:10; Amos 5:14, 15; Rumani 12:9) Dak li hu ħażin huwa spiss tant pjaċevoli, tant taʼ tentazzjoni, tant li jħajrek li sempliċement irridu nobogħduh biex insaħħu lilna nfusna kontra tiegħu. Il-​mibgħeda kollha bħal din għal dak li hu ħażin għandha l-​effett li ssaħħaħ id-​determinazzjoni tagħna li neżerċitaw kontroll fuqna nfusna u b’hekk isservi bħala protezzjoni għalina.

Il-​Kontroll Fuqna Nfusna, il-​Korsa tal-​Għerf

6. Għala hija l-​korsa tal-​għerf li negħlbu l-​inklinazzjonijiet egoistiċi tagħna billi nipprattikaw il-​kontroll fuqna nfusna?

⁶ Għajnuna kbira oħra f’li nipprattikaw il-​kontroll fuqna nfusna hija li napprezzaw il-​għerf taʼ li wieħed juri din il-​kwalità. Jehovah jitlobna biex neżerċitaw kontroll fuqna nfusna għall-​ġid tagħna stess. (Qabbel Isaija 48:​17, 18. ) Kelmtu fiha ħafna pariri li juru kemm hu għaqli li negħlbu l-​inklinazzjonijiet egoistiċi tagħna billi nipprattikaw il-​kontroll fuqna nfusna. Sempliċement ma nistgħux naħarbu mil-​liġijiet li ma jinbidlux t’Alla. Il-​Kelma Tiegħu tgħidilna: “Kulma bniedem qiegħed jiżraʼ, dan ukoll se jaħsad; għaliex dak li qiegħed jiżraʼ b’ħarsa għal ġismu se jaħsad il-​korruzzjoni minn ġismu, imma dak li qiegħed jiżraʼ b’ħarsa għall-​ispirtu se jaħsad il-​ħajja taʼ dejjem mill-​ispirtu.” (Galatin 6:7, 8) Eżempju ovvju hu dak tal-​ikel u x-​xorb. Ħafna nkwiet jirriżulta għaliex in-​nies jieklu jew jixorbu ż-​żejjed. Kull waqgħa bħal din għall-​egoiżmu ttellef lil dak li jkun minn rispett fih innifsu. Iktar minn hekk, individwu ma jistax jaqaʼ għall-​egoiżmu mingħajr ma wkoll jagħmel ħsara lir-​relazzjoni tiegħu m’oħrajn. L-​iktar ħaġa serja fuq kollox, in-​nuqqas taʼ kontroll fuqna nfusna jħassar ir-​relazzjoni tagħna maʼ Missierna tas-​sema.

7. X’inhi waħda mit-​temi ewlenin tal-​ktieb tal-​Proverbji, bħalma juru liema testi Bibliċi?

⁷ Għalhekk, irridu nibqgħu ngħidu lilna nfusna li l-​egoiżmu jaħdem kontra tagħna stess. Tema li tispikka fil-​ktieb tal-​Proverbji, li jisħaq fuq id-​dixxiplina tagħna nfusna, hi li l-​egoiżmu ma jħallix qliegħ u hemm il-​għerf f’li wieħed jeżerċita kontroll fuqu nnifsu. (Proverbji 14:29; 16:32) U ħalli jiġi nnotat li d-​dixxiplina tagħna nfusna tinvolvi ferm iktar minn li sempliċement nevitaw dak li hu ħażin. Id-​dixxiplina tagħna nfusna, jew il-​kontroll fuqna nfusna, hu meħtieġ ukoll biex nagħmlu dak li hu sewwa, li jistaʼ jkun diffiċli għaliex dan imur kontra t-​tendenzi midinbin tagħna.

8. Liema esperjenza turi l-​għerf taʼ li wieħed jeżerċita kontroll fuqu nnifsu?

⁸ Jagħti stampa tal-​għerf f’li wieħed jeżerċita kontroll fuqu nnifsu hemm il-​każ taʼ wieħed mix-​Xhieda taʼ Jehovah li kien fi kju f’bank meta wieħed raġel qabżu. Għalkemm ix-​Xhud iddejjaq xi ftit, hu eżerċita kontroll fuqu nnifsu. Dak in-​nhar stess kellu jara perit biex iġib firma għal xi pjanti taʼ Sala tas-​Saltna. U min sab li kien dan il-​perit? Ħeqq, sewwa sew dak ir-​raġel li kien qabeż il-​kju fil-​bank! Mhux talli l-​perit kien dħuli ħafna anzi talab ħlas mix-​Xhud taʼ inqas minn għaxra fil-​mija taʼ kemm jitlob is-​soltu. Kemm kien ferħan ix-​Xhud li kien eżerċita kontroll fuqu nnifsu iktar kmieni dak in-​nhar, billi ma ħalliex lilu nnifsu jkun ipprovokat!

9. Liema hi l-​korsa tal-​għerf meta niltaqgħu maʼ reazzjonijiet ħorox fil-​ministeru?

⁹ Darba wara l-​oħra meta mmorru minn dar għal dar nippridkaw l-​aħbar tajba tas-​Saltna t’Alla jew noqogħdu f’xi kantuniera biex nipprovaw ninteressaw lil min ikun għaddej fil-​messaġġ tagħna, niltaqgħu maʼ kliem aħrax. X’inhi l-​korsa tal-​għerf? Din l-​istqarrija għarfa nsibuha fi Proverbji 15:1: “Tweġiba, meta hi ħelwa, iddawwar lil hinn id-​dagħdigħa.” Fi kliem ieħor, jinħtieġ li neżerċitaw kontroll fuqna nfusna. U mhux ix-​Xhieda taʼ Jehovah biss sabu li dan huwa minnu imma oħrajn ukoll. Il-​valur li jfejjaq tal-​kontroll fuqek innifsek qed jiġi apprezzat dejjem iktar mill-​professjoni medika.

L-​Imħabba Bla Egoiżmu Tgħin

10, 11. L-​imħabba għala hi għajnuna reali f’li neżerċitaw kontroll fuqna nfusna?

¹⁰ Id-​deskrizzjoni tal-​imħabba minn Pawlu fl-​1 Korintin 13:4-8 turi li l-​qawwa tagħha tistaʼ tgħinna f’li neżerċitaw kontroll fuqna nfusna.“L-​imħabba tistabar fit-​tul.” Li tissaporti fit-​tul jirrikjedi kontroll fuqek innifsek.“L-​imħabba ma tgħirx, hi ma tiftaħarx, ma tintefaħx.” Il-​kwalità tal-​imħabba tgħinna nikkontrollaw il-​ħsibijiet u l-​emozzjonijiet tagħna, biex negħlbu kull tendenza taʼ li ngħiru, li niftaħru, jew li nintefħu. L-​imħabba tqanqalna li nkunu sewwa sew l-​oppost, billi tagħmilna umlin, imbaxxijin fil-​moħħ, bħalma kien Ġesù.—Mattew 11:28-30.

¹¹ Pawlu jkompli jgħid li l-​imħabba “ma ġġibx ruħha b’mod indiċenti.” Biex taġixxi b’mod diċenti f’kull ħin ukoll jirrikjedi kontroll fuqek innifsek. Il-​kwalità tal-​imħabba żżommna ’l bogħod mir-​regħba, minn li ‘nfittxu biss l-​interessi tagħna nfusna.’ L-​imħabba “ma ssirx provokata.” Kemm hu faċli li ssir ipprovokat minħabba x’igħidu jew jagħmlu oħrajn! Imma l-​imħabba se tgħinna neżerċitaw kontroll fuqna nfusna u ma ngħidux jew nagħmlu affarijiet li wara jiddispjaċina minnhom. L-​imħabba “ma żżommx kont tal-​ħsara.” In-​natura umana hija inklinata li żżomm fil-​komma jew li tistmerr. Imma l-​imħabba se tgħinna nwarrbu ħsibijiet bħal dawn minn moħħna. L-​imħabba “ma tifraħx bin-​nuqqas taʼ tjieba.” Jirrikjedi kontroll fuqna nfusna biex ma niħdux pjaċir b’dak li mhux taʼ tjieba, bħalma hi l-​pornografija u xi serje televiżivi degradanti bħas-​soap operas. L-​imħabba wkoll “tiflaħ kollox” u “tissaporti kollox.” Jirrikjedi kontroll fuqna nfusna biex inġerrħu xi affarijiet, biex nissaportu affarijiet taʼ prova jew taʼ piż u ma nħalluhomx jiskuraġġuna, iġagħluna nirritaljaw b’xi mod, jew jinklinawna biex nieqfu milli naqdu lil Jehovah.

12. Liema hu mod wieħed biex nuru l-​apprezzament tagħna għal dak kollu li Alla Jehovah u Ġesù Kristu għamlu għalina?

¹² Jekk verament inħobbu lil Missierna tas-​sema u napprezzaw il-​kwalitajiet tal-​għaġeb tiegħu u dak kollu li għamel għalina, se nkunu rridu nogħġbuh billi neżerċitaw kontroll fuqna nfusna f’kull ħin. Ukoll, jekk verament inħobbu lill-​Mulej u s-​Sid tagħna, Ġesù Kristu, u napprezzaw dak kollu li hu għamel għalina, se nagħtu kas il-​kmand tiegħu biex ‘nerfgħu z-​zkuk tat-​tortura tagħna u nsegwuh kontinwament.’ (Mark 8:34) Dak ċertament jirrikjedi li neżerċitaw kontroll fuqna nfusna. L-​imħabba lejn ħutna rġiel u nisa Kristjani wkoll se żżommna milli nweġġgħuhom billi nieħdu xi korsa egoista.

Il-​Fidi u l-​Umiltà bħala Għajnuniet

13. Il-​fidi għala tistaʼ tgħinna biex neżerċitaw kontroll fuqna nfusna?

¹³ Għajnuna kbira oħra f’li neżerċitaw kontroll fuqna nfusna hija l-​fidi f’Alla u fil-​wegħdiet tiegħu. Il-​fidi se tgħinna biex nafdaw f’Jehovah u nistennew iż-​żmien xieraq tiegħu biex jiddritta l-​affarijiet. L-​appostlu Pawlu jagħmel l-​istess punt meta jgħid f’​Rumani 12:19: “Tivvendikawx erwieħkom, maħbubin, . . . għax hu miktub: ‘Il-​vendetta hi tiegħi; jien se nħallas lura, igħid Jehovah.’” F’dan ir-​rigward, l-​umiltà wkoll tistaʼ tgħinna. Jekk aħna umlin, m’aħniex se nieħdu għalina malajr minħabba xi offiża immaġinata jew reali. M’aħniex se nieħdu bil-​għaġġla l-​liġi f’idejna, biex ingħidu hekk, imma se neżerċitaw kontroll fuqna nfusna u nkunu lesti li nistennew lil Jehovah.—Qabbel Salm 37:​1, 8.

14. Liema esperjenza turi li kontroll fuqhom infushom jistaʼ jinkiseb saħansitra minn dawk li huma neqsin ferm minnu?

¹⁴ Li aħna nistgħu nitgħallmu neżerċitaw kontroll fuqna nfusna jidher ċar b’qawwa kbira minn esperjenza taʼ wieħed raġel li kellu tempra vjolenti. Dan tant kienu jitilgħulu li meta l-​pulizija marru għandu minħabba storbju li hu u missieru kienu qegħdin jagħmlu, hu ta xebgħa lil tliet pulizija qabel ma l-​oħrajn irnexxielhom jegħlbuh! Maż-​żmien, madankollu, ġie f’kuntatt max-​Xhieda taʼ Jehovah u tgħallem jeżerċita kontroll fuqu nnifsu, waħda mill-​frottiet tal-​ispirtu t’Alla. (Galatin 5:22, 23) Illum, 30 sena wara, dan ir-​raġel għadu jaqdi fedelment lil Jehovah.

Il-​Kontroll Fuqna Nfusna Ġewwa l-​Familja

15, 16. (a) X’se jgħin lil raġel miżżewweġ biex jeżerċita kontroll fuqu nnifsu? (b) Il-​kontroll fuqna nfusna hu b’mod speċjali meħtieġ f’liema sitwazzjoni, bħalma naraw minn liema esperjenza? (ċ) Mara miżżewġa għala teħtieġ il-​kontroll fuqha nfisha?

¹⁵ Il-​kontroll fuqna nfusna huwa ċertament meħtieġ ġewwa l-​familja. Biex raġel iħobb lil martu bħalma jħobb lilu nnifsu jirrikjedi li hu jeżerċita ħafna kontroll fuq il-​ħsibijiet, il-​kliem, u l-​azzjonijiet tiegħu. (Efesin 5:28, 29) Iva, jirrikjedi kontroll fuqhom infushom għall-​irġiel miżżewġin biex jagħtu kas il-​kliem tal-​appostlu Pietru fl-​1 Pietru 3:7: “Intom l-​irġiel miżżewġin, komplu għammru bl-​istess manjiera magħhom skond il-​għarfien.” B’mod speċjali meta martu hi waħda li ma temminx ir-​raġel li jemmen għandu bżonn li jeżerċita kontroll fuqu nnifsu.

¹⁶ Biex nagħtu eżempju: Kien hemm anzjan li kellu martu li ma temminx u li kienu jitilgħula malajr. Iżda, hu eżerċita kontroll fuqu nnifsu, u dan tant kien taʼ ġid għalih li t-​tabib tiegħu qallu: “John, int jew min-​natura għandek ħafna u ħafna paċenzja jew inkella għandek reliġjon qawwija ferm.” Aħna tabilħaqq li għandna reliġjon qawwija ferm, għax “Alla tana mhux spirtu taʼ ġjufija, imma dak taʼ qawwa u taʼ mħabba u taʼ moħħ f’loku,” li jagħmilna kapaċi neżerċitaw kontroll fuqna nfusna. (2 Timotew 1:7) Ukoll, jirrikjedi kontroll fuqha nfisha għal mara li tkun sottomessa, speċjalment meta żewġha jkun wieħed li ma jemminx.—1 Pietru 3:1-4.

17. Il-​kontroll fuqna nfusna għala hu importanti fir-​relazzjoni taʼ bejn il-​ġenituri u l-​ulied?

¹⁷ Il-​kontroll fuqna nfusna huwa meħtieġ ukoll fir-​relazzjoni taʼ bejn il-​ġenituri u l-​ulied. Biex ikollhom ulied li jikkontrollaw lilhom infushom, il-​ġenituri stess iridu l-​ewwel ikunu taʼ eżempju tajjeb. U meta t-​tfal jinħtieġu d-​dixxiplina taʼ xi xorta jew oħra, din għandha dejjem tiġi amministrata bil-​kalma u bl-​imħabba, li jirrikjedi kontroll fuqhom infushom. (Efesin 6:4; Kolossin 3:21) Imbagħad ukoll, biex l-​ulied juru li verament iħobbu lill-​ġenituri tagħhom iridu jobduhom, u biex tobdi ċertament li jirrikjedi kontroll fuqek innifsek.—Efesin 6:1-3; qabbel 1 Ġwann 5:3.

Nagħmlu Użu mill-​Għajnuna li Alla Jipprovdi

18-20. Liema tliet provvedimenti spiritwali rridu nieħdu vantaġġ minnhom sabiex nikkultivaw il-​kwalitajiet li se jgħinuna neżerċitaw kontroll fuqna nfusna?

¹⁸ Biex nikbru fil-​biżaʼ t’Alla, fl-​imħabba mingħajr egoiżmu, fil-​fidi, fil-​mibgħeda għal dak li hu ħażin, u fil-​kontroll fuqna nfusna, irridu nieħdu vantaġġ mill-​għajnuna kollha li Alla Jehovah ipprovda. Ejjew nikkunsidraw tliet provvedimenti spiritwali li jistgħu jgħinuna neżerċitaw kontroll fuqna nfusna. L-​ewwelnett, hemm il-​privileġġ prezzjuż tat-​talb. Qatt ma rridu nkunu mħabbtin wisq biex nitolbu. Iva, għandna jkollna x-​xewqa li ‘nitolbu bla ma naqtgħu,’ li ‘nipperseveraw fit-​talb.’ (1 Tessalonkin 5:17; Rumani 12:12) Ejjew nagħmlu l-​ikkultivar tal-​kontroll fuqna nfusna xi ħaġa li nitolbu dwarha. Imma meta nonqsu li neżerċitaw kontroll fuqna nfusna, ejjew bil-​mistħija nitolbu bil-​ħniena lil Missierna tas-​sema għal maħfra.

¹⁹ Aspett ieħor taʼ assistenza f’li nuru kontroll fuqna nfusna huwa li niksbu l-​għajnuna li tiġi meta nkunu mitmugħin mill-​Kelma t’Alla u l-​letteratura li tgħinna nifhmu u napplikaw l-​Iskrittura. Huwa tant faċli li nittraskuraw din il-​parti tas-​servizz sagru tagħna! Irridu neżerċitaw kontroll fuqna nfusna u nibqgħu ngħidu lilna nfusna li ma hemm ebda materjal għall-​qari iktar importanti mill-​Bibbja u dak ipprovdut mill-​“irsir fidil u diskret,” u b’hekk irridu nagħtuh priorità. (Mattew 24:45-47) Sewwa ntqal li l-​ħajja qatt ma hi din u dik imma din jew dik. Aħna verament irġiel u nisa spiritwali? Jekk aħna konxji tal-​bżonn spiritwali tagħna, se neżerċitaw il-​kontroll meħtieġ fuqna nfusna biex nitfu t-​TV u nħejju għal-​laqgħat tagħna jew naqraw It-​Torri tal-​Għassa li jkun għadu kif wasal.

²⁰ It-​tielet, hemm il-​kwistjoni taʼ li nistmaw sewwa l-​laqgħat tal-​kongregazzjoni tagħna u l-​assembleat u l-​konvenzjonijiet. Huma dawn il-​laqgħat kollha assolutament importanti li nattenduhom? Niġu aħna ppreparati biex nieħdu sehem u mbagħad nagħmlu hekk skond l-​opportunità li jkollna? Skond l-​importanza li nagħtu aħna lil-​laqgħat, daqshekk se niġu msaħħin fid-​determinazzjoni tagħna li neżerċitaw kontroll fuqna nfusna taħt kull ċirkostanza.

21. Liema huma xi premji li nistgħu ngawdu talli nikkultivaw il-​frotta tal-​ispirtu taʼ kontroll fuqna nfusna?

²¹ Liema premji nistgħu nistennew talli naħdmu iebes biex neżerċitaw kontroll fuqna nfusna f’kull ħin? L-​ewwelnett, m’aħniex se naħsdu l-​frott morr tal-​egoiżmu. Se jkollna rispett lejna nfusna u kuxjenza nadifa. Se niskansaw lilna nfusna minn tant inkwiet u se nibqgħu fit-​triq tal-​ħajja. Iktar minn hekk, se nkunu nistgħu nagħmlu l-​iktar ġid possibbli lil oħrajn. Fuq kollox, se nkunu qed nagħtu kas il-​parir taʼ Proverbji 27:11: “Kun għaref, ibni, u agħmel lil qalbi ferħana, biex inkun nistaʼ nagħti risposta lil dak li qiegħed jinbixni.” U dak hu l-​akbar premju li qatt jistaʼ jkollna—il-​privileġġ li nferrħu lill-​qalb tal-​Missier maħbub tagħna fis-​sema, Jehovah!

Tiftakar?

◻ Il-​biżaʼ t’Alla kif igħinna neżerċitaw kontroll fuqna nfusna?

◻ L-​imħabba kif tgħinna neżerċitaw kontroll fuqna nfusna?

◻ Il-​kontroll fuqna nfusna kif igħin fir-​relazzjonijiet tal-​familja?◻ Liema provvedimenti rridu nagħmlu użu tajjeb minnhom jekk se nikkultivaw il-​kontroll fuqna nfusna?