Neliminaw Għalkollox it-Tniġġis mill-Qalb u mill-Moħħ

JEHOVAH ma tax lill-​bnedmin xenqa għall-​ħmieġ u d-​diżordni. Il-​pjaneta darhom kienet iddisinnjata biex tkun ġenna taʼ ndafa, ordni, u ġmiel. Alla ma kellux il-​għan li kellha tiddeġenera f’miżbla tant kerha.—Ġenesi 2:8, 9.

Madankollu, wara li l-​bnedmin irrifjutaw gwida divina, huma bdew jibnu l-​kwalità tagħhom stess taʼ ordni dinjija. Mingħajr il-​benefiċċju taʼ għerf divin u mingħajr esperjenza, huma kellhom bil-​fors jitgħallmu mill-​iżballji tagħhom. L-​istorja sekulari tikkonferma l-​verità tal-​Bibbja li l-​bnedmin ma jistgħux jaħkmu lilhom infushom b’suċċess; għal eluf taʼ snin “raġel iddomina lil raġel bi ħsara għalih.” (Ekkleżjasti 8:9; Ġeremija 10:23) Il-​problema moderna tat-​tniġġis, fil-​forom kollha tiegħu, hija konsegwenza tal-​ħakma ħażina mill-​bniedem.

Jadottaw il-​Ħarsa t’Alla

Nies li jixtiequ jogħġbu lil Alla jaħdmu iebes biex jobdu l-​livelli taʼ ndafa tal-​Ħallieq. B’hekk, ix-​Xhieda taʼ Jehovah ġew iffaċċjati bi problema meta konvenzjoni internazzjonali kienet ippjanata biex tinżamm fi Praga, fiċ-​Ċekożlovakkja, f’nofs l-​1991.a Madwar 75,000 persuna kellhom jattendu, folla li l-​Istadju taʼ Strahov kien jesagħha bil-​kumdità. Imma l-​istadju kien ilu ma jintuża ħames snin. Kien fi stat abbandunat, vittma kerha taʼ l-​elementi. Xi 1,500 Xhieda taʼ Jehovah qattgħu ’l fuq minn 65,000 siegħa jirrinovawh u jiżbgħuh mill-​ġdid. Sal-​ħin tal-​konvenzjoni din il-​kampanja taʼ tindif ġabet l-​Istadju post xieraq li fih setgħet tingħata qima lill-​veru Alla, Jehovah.

X’inhu li jqanqal lix-​Xhieda taʼ Jehovah biex ikunu differenti, waqt li d-​dinja inġenerali turi ftit li xejn apprezzament għall-​indafa u l-​ordni? L-​apprezzament għall-​parir tal-​Bibbja li l-​Kristjani għandhom jeliminaw għalkollox traċċi negattivi, bħalma huma l-​egoiżmu, in-​nuqqas taʼ konsiderazzjoni, ir-​regħba, u n-​nuqqas taʼ mħabba. “Inżgħu l-​personalità l-​qadima bil-​prattiċi tagħha,” tgħid il-​Bibbja. Ibdilha “bil-​personalità l-​ġdida, li permezz tal-​għarfien eżatt qiegħda tiġġedded skond ix-​xbiha taʼ Dak li ħalaqha.” Personalità kkaratterizzata mill-​imħabba għall-​indafa, l-​ordni, u l-​ġmiel ma tħalli ebda post għal tendenzi li jniġġsu.—Kolossin 3:9, 10; 2 Korintin 7:1; Filippin 4:8; Titus 2:14.

Il-personalità l-​ġdida tinħtieġ li l-​Kristjani jkunu konxji dwar it-​tniġġis, u ma jniġġsux minn jeddhom jew jinjoraw b’mod diżubbidjenti liġijiet kontra t-​tniġġis li joħorġu l-​gvernijiet. Dan igħinhom biex jevitaw li jadottaw l-​attitudni għażżiena, egoista, u ħalja li twassal għat-​tfigħ taʼ ħmieġ maʼ kullimkien. Billi jġibu ’l quddiem ir-​rispett għall-​propjetà taʼ ħaddieħor, jiġi eskluż li jħażżu fuq il-​ħitan bħala espressjoni, għall-​gost, jew bħala forma alternattiva għall-​arti. Dan jinħtieġ li djar, karozzi, ħwejjeġ, u l-​persuni iridu jinżammu nodfa.—Qabbel Ġakbu 1:21.

Jekk in-​nies ma jridux jilbsu l-​personalità l-​ġdida, jistaʼ Alla jingħata t-​tort talli hu jżommhom milli jidħlu fil-​Ġenna tiegħu li ġejja? Ma tantx. Kwalunkwe wieħed li għad għandu tendenzi li jniġġsu moħbijin f’qalbu jew f’moħħu ikun taʼ theddida għall-​ġmiel irrestawrat taʼ ġenna tal-​pjaneta Art, u jnikket lil dawk li jkunu qed jipprovaw iżommuha. Id-​deċiżjoni t’Alla li ‘jġib f’rovina lil dawk li qegħdin jirrovinaw l-​art’ hija kemm twajba kif ukoll taʼ mħabba.—Rivelazzjoni 11:18; 21:8.

Parteċipazzjoni Attiva?

Ifisser dan, madankollu, li l-​Kristjani jinħtieġu li jkunu minn taʼ quddiem f’li jieħdu miżuri taʼ kontra t-​tniġġis jew taʼ tindif?

It-tniġġis huwa b’mod ċar ħażin għas-​saħħa u għal protezzjoni pubblika. Jehovah huwa kkonċernat b’mod xieraq dwar kwistjonijiet bħal dawn, kif nistgħu naraw mil-​liġijiet li huwa ta lill-​Iżraeliti. (Eżodu 21:28-34; Dewteronomju 22:8; 23:12-14) Imma fl-​ebda żmien hu ma dderiġihom biex ixandru lill-​popli oħra dwar kwistjonijiet taʼ protezzjoni pubblika; lanqas lill-​Kristjani tal-​ewwel seklu ma qatt intqalilhom biex jagħmlu hekk.

Illum, kwistjonijiet dwar l-​ambjent faċilment jistgħu jsiru kwistjonijiet politiċi. Fil-​fatt, xi partiti politiċi ġew iffurmati speċifikament bil-​għan li jsolvu l-​problemi tal-​ambjent. Kristjan li jħalli lilu nnifsu jiġi mmanuvrat lejn linji politiċi m’huwiex iktar newtrali politikament. Ġesù poġġa għad-​dixxipli tiegħu l-​prinċipju: “Ma huma ebda parti mid-​dinja, sewwa sew bħalma jien ma jien ebda parti mid-​dinja.” Kristjan li jinjora din il-​ħtieġa ikun fil-​periklu li jsir allineat mal-​“ħakkiema taʼ din is-​sistema taʼ affarijiet, li jridu jiġu fix-​xejn.”—Ġwann 17:16; 1 Korintin 2:6.

Ġesù ma pprovax isolvi l-​problemi soċjali kollha taʼ żmienu; lanqas ma qal lid-​dixxipli tiegħu biex jagħmlu dan. Il-​kmand li tahom kien: “Morru għalhekk u agħmlu dixxipli min-​nies tal-​ġnus kollha, billi tgħammduhom . . . , billi tgħallmuhom josservaw l-​affarijiet kollha li kkmandajtkom.” Hu ma kkmandahomx dwar affarijiet tal-​ambjent.—Mattew 28:19, 20.

Billi spjega x’kellu jkollu l-​prijorità fil-​ħajja taʼ Kristjan, Kristu qal: “Ibqgħu, allura, fittxu l-​ewwel is-​saltna u t-​tjieba tiegħu.” (Mattew 6:33) Meta Jehovah, permezz tas-​Saltna Messjanika, jinforza l-​prinċipji tiegħu taʼ tjieba fuq skala globali, problemi tal-​ambjent se jiġu solvuti b’mod permanenti u għas-​sodisfazzjon taʼ kulħadd.

B’hekk, ix-​Xhieda taʼ Jehovah jieħdu pożizzjoni bbilanċjata. Fi qbil maʼ Rumani 13:1-7, huwa obligatorju li huma b’mod kuxjenzjuż jobdu l-​liġijiet governattivi li jirregolaw l-​ambjent. ­Iktar minn hekk, l-​imħabba li jrid Alla għall-​proxxmu tqanqalhom biex juru rispett għall-​propjetà taʼ ħaddieħor—pubblika jew privata—billi ma jisfigurawhiex u billi ma jarmux skart bl-​addoċċ. Imma b’mod ċar m’humiex ikkman­dati biex jieħdu t-​tmexxija f’miżuri dinjin taʼ ­tindif. Huma bix-​xieraq ipoġġu l-​ippridkar tal-​messaġġ tas-​Saltna t’Alla l-​ewwel, billi jirrealizzaw li dan hu l-​mod li bih jagħmlu l-​iktar ġid dejjiemi.

Tindifa Spiritwali

L-​Iżraeliti tal-​qedem kienu mwissijin b’mod ripetut dwar il-​konsegwenzi jekk huma jniġġsu l-​art billi jxerrdu d-​demm, billi jadottaw mod taʼ ħajja immorali, jew billi juru nuqqas taʼ rispett għal affarijiet sagri. (Numri 35:33; Ġeremija 3:1, 2; Malakija 1:7, 8) B’mod sinjifikanti, huma kienu kkundannati għal dan it-​tniġġis spiritwali, mhux għat-​tniġġis fiżiku li setgħu kienu ħatja tiegħu ukoll.b

Huwa, għalhekk, it-​tniġġis jew nuqqas taʼ ndafa spiritwali li Kristjan illum primarjament jistinka biex jevita. Dan jagħmlu billi jilbes “[i]l-personalità l-​ġdida,” u jelimina għalkollox it-​tendenzi taʼ tniġġis mill-​qalb u l-​moħħ. ’Il fuq minn erbaʼ miljun Xhieda taʼ Jehovah qegħdin jibbenefikaw minn din it-​tindifa spiritwali, billi jiksbu għalihom indafa reliġjuża u morali, kif ukoll indafa fiżika taʼ min jinnotaha.—Efesin 4:22-24.

Illum huwa l-​waqt għal kampanja taʼ tindif spiritwali. Kampanja fiżika taʼ tindif mad-​dinja kollha se ssegwi fiż-​żmien xieraq u se ssalva lil darna milli ssir miżbla globali billi tagħtiha ambjent meħlus mit-​tniġġis kif jixirqilha.—Ekkleżjasti 3:1.

[Noti taʼ taħt]