Ifraħ bl-Art Nadifa li Ġejja!

KEMM nistgħu nkunu henjin li Jehovah, Alla taʼ ordni u ndafa, se jwettaq il-​għan oriġinali tiegħu li jdawwar l-​art f’ġenna globali! (Isaija 11:6-9) Hu jwiegħed: “Il-​kelma tiegħi li toħroġ minn fommi . . . mhix se terġaʼ lura għandi mingħajr riżultati, imma ċertament li se tagħmel dak li fih jien sibt il-​għaxqa.” “Huwa impossibbli għal Alla li jigdeb,” u għalhekk dan mhux kliem vojt.—Isaija 55:11; Ebrej 6:18.

Nistgħu nserrħu rasna li Jehovah se jindaħal għalina qabel ma l-​bnedmin ikunu waslu sal-​limitu, fejn kieku kienet tkun qerda ekoloġika totali!​—Rivelazzjoni 11:18.

Jehovah se jneħħi lil dawk li jħobbu jniġġsu u li ma jridux jindmu u lil dawk li b’mod ribelluż jinjoraw il-​prinċipji tiegħu taʼ ordni u ndafa. Ħadd ma hu se jiġi mogħti l-​permess li jipperikola lill-​Ġenna rrestawrata.—Proverbji 2:20-22.

Matul is-​Saltna t’Alla, taħt id-​direzzjoni taʼ Kristu Ġesù, il-​bnedmin se jiġu mgħallmin kif jeliminaw kwalunkwe kaġun li jkun baqaʼ taʼ tniġġis fiżiku. Imbagħad​—mhux issa—​ikun iż-​żmien meta l-​qaddejja kollha t’Alla se jkunu involuti b’mod attiv f’miżuri persunali u kollettivi li se jikkontribwixxu għal tindifa globali li qatt ma kien hawn bħalha.—Qabbel Eżekjel 39:8-16.

Dawk li jsalvaw mit-​tmiem tas-​sistema ħażina preżenti taʼ affarijiet se jappoġġaw lil dan il-​programm taʼ tindif fiżiku bl-​istess dedikazzjoni u entużjażmu li bih jieħdu sehem fil-​kampanja taʼ tindif spiritwali llum.—Salm 110:3.

Art imnaddfa trid tiġi, ippreċeduta mill-​akbar kampanja taʼ tindif taʼ kull żmien, imwettqa mis-​Saltna t’Alla. Kull traċċa taʼ tniġġis se tiġi mneħħija. Imkien ma ssib tħażżiż mal-​ħitan. Qatt iktar fliexken mormijin, laned, boroż tal-​plastik, karti taċ-​chewing gum u tal-​ħelu, gazzetti, u rivisti mormijin fuq xi xatt jew post pittoresk.

Ifraħ bl-​art nadifa li ġejja!

[Stampa f’paġna 6]

Se tieħu sehem int fit-​tindifa globali li ġejja?