Il-Familja Kristjana Tpoġġi Affarijiet Spiritwali l-Ewwel

“Ilkoll kemm intom huma kunu taʼ moħħ wieħed, billi turu li tinġiebu, billi jkollkom affezzjoni taʼ l-​aħwa, tagħdru b’mod teneru, umlin fil-​moħħ.”—1 PIETRU 3:8.

1. Liema għażla għandna lkoll, u l-​għażla tagħna kif tistaʼ teffettwa l-​futur tagħna?

KEMM japplika tajjeb it-​test t’hawn fuq fl-​eqdem istituzzjoni ta bniedem​—il-​familja! U kemm hu importanti li l-​ġenituri jieħdu t-​tmexxija f’dan ir-​rigward! Il-​kwalitajiet pożittivi u negattivi tagħhom normalment se jidhru f’uliedhom. Madankollu, l-​element tal-​għażla jibqaʼ f’idejn kull membru taʼ familja. Bħala Kristjani, nistgħu nagħżlu li nkunu persuni spiritwali jew persuni tal-​laħam. Nistgħu nagħżlu jekk nogħġbux lil Alla jew le. Dik l-​għażla tistaʼ tirriżulta jew f’barka, ħajja taʼ dejjem u paċi​—jew f’saħta, mewt perpetwa.—Ġenesi 4:​1, 2; Rumani 8:​5-8; Galatin 5:​19-23.

2. (a) Pietru kif wera t-​tħassib tiegħu għall-​familja? (b) X’inhi l-​ispiritwalità? (Ara nota taʼ taħt.)

² Il-​kliem taʼ l-​appostlu fl-​1 Pietru kapitlu 3, vers 8, segwa immedjatament wara parir mill-​aħjar li hu kien ta lin-​nisa u lill-​irġiel miżżewġin. Pietru kien verament interessat fl-​istat tajjeb taʼ familji Kristjani. Hu kien jaf li spiritwalità b’saħħitha hi l-​muftieħ għal familja magħquda li turi affezzjoni u mogħdrija. B’hekk, hu implika fil-​vers 7 li jekk il-​parir tiegħu lill-​irġiel miżżewġin jiġi injorat, ir-​riżultat se jkun ħajt spiritwali bejn ir-​raġel miżżewweġ u Jehovah.a It-​talb tar-​raġel miżżewweġ jistaʼ jiġi mfixkel jekk hu jittraskura l-​bżonnijiet taʼ martu jew jiskuraġġiha bin-​nuqqas taʼ qalb tajba.

Kristu—Eżempju Perfett taʼ Spiritwalità

3. Pawlu kif enfasizza l-​eżempju taʼ Kristu għal irġiel miżżewġin?

³ L-​ispiritwalità taʼ familja tiddependi minn eżempju tajjeb. Meta r-​raġel miżżewweġ huwa Kristjan prattikanti, jieħu t-​tmexxija f’li juri kwalitajiet spiritwali. Jekk ir-​raġel ma jemminx, l-​omm normalment tipprova ġġorr dik ir-​responsabbiltà. Fiż-​żewġ każi, Ġesù Kristu jipprovdi l-​mudell perfett biex jiġi segwit. Il-​kondotta tiegħu, kliemu, u l-​ħsieb tiegħu kienu dejjem li jibnu u li jirriffreskaw. Darba wara l-​oħra, l-​appostlu Pawlu jidderiġi lill-​qarrej lejn il-​mudell taʼ mħabba taʼ Kristu. Per eżempju, hu jistqarr: “Raġel hu l-​kap taʼ martu bħalma Kristu wkoll hu l-​kap tal-​kongregazzjoni, billi hu salvatur taʼ dan il-​ġisem. Irġiel miżżewġin, komplu ħobbu lin-​nisa tagħkom, sewwa sew bħalma l-​Kristu wkoll ħabb lill-​kongregazzjoni u ta lilu nnifsu għaliha.”—Efesin 5:​23, 25, 29; Mattew 11:​28-30; Kolossin 3:19.

4. Ġesù liema eżempju taʼ spiritwalità stabbilixxa?

⁴ Ġesù kien l-​eżempju li jispikka taʼ l-​ispiritwalità u taʼ l-​istat taʼ kap murijin b’imħabba, b’qalb tajba, u b’mogħdrija. Hu kien jissagrifika lilu nnifsu, mhux ipaxxi lilu nnifsu. Hu dejjem igglorifika lil Missieru u rrispettah bħala kap fuqu. Hu segwa l-​gwida taʼ Missieru, biex b’hekk setaʼ jgħid: “Ma nistaʼ nagħmel anqas ħaġa waħda minn rajja; sewwa sew kif nismaʼ, niġġudika; u l-​ġudizzju li jien nagħti hu taʼ tjieba, għaliex jien infittex, mhux ir-​rieda tiegħi stess, imma r-​rieda tiegħu li bagħatni.” “Ma nagħmel xejn minn rajja; imma sewwa sew bħalma l-​Missier għallem lili jien nitkellem dawn l-​affarijiet.”—Ġwann 5:30; 8:28; 1 Korintin 11:3.

5. F’li jipprovdi għas-​segwaċi tiegħu, Ġesù liema eżempju stabbilixxa għal irġiel miżżewġin?

⁵ Dan xi jfisser għall-​irġiel miżżewġin? Ifisser li l-​mudell li għandhom isegwu f’kollox hu Kristu, li dejjem issottometta lilu nnifsu lejn Missieru. Per eżempju, kif Jehovah ipprovda ikel għall-​forom ħajjin kollha fuq l-​art, hekk Ġesù pprovda ikel għas-​segwaċi tiegħu. Hu ma ttraskurax il-​bżonnijiet materjali bażiċi tagħhom. Il-​mirakli tiegħu meta tema l-​5,000 raġel u l-​4,000 huma prova taʼ l-​affezzjoni u tal-​mogħdrija tiegħu u tas-​sens taʼ responsabbiltà tiegħu. (Mark 6:​35-44; 8:​1-9) Bl-​istess mod illum, kapijiet responsabbli taʼ familji jieħdu ħsieb tal-​bżonnijiet fiżiċi taʼ dawk taʼ darhom. Imma tieqaf ir-​responsabbiltà tagħhom hemm?—1 Timotew 5:8.

6. Liema bżonnijiet importanti tal-​familja rridu nieħdu ħsieb? (b) Irġiel miżżewġin u missirijiet kif jistgħu juru li jifhmu?

⁶ Il-​familji għandhom bżonnijiet oħrajn, iktar importanti, kif indika Ġesù. Huma għandhom bżonnijiet spiritwali u emozzjonali. (Dewteronomju 8:3; Mattew 4:4) Aħna kontinwament inħabbtu wiċċna maʼ oħrajn, kemm fil-​familja u kemm fil-​kongregazzjoni. Għandna bżonn taʼ gwida tajba biex tqanqalna ħalli nkunu edifikanti. F’dan ir-​rigward l-​irġiel miżżewġin u l-​missirijiet għandhom irwol prinċipali xi jwettqu​—jerġaʼ saħansitra iktar jekk huma anzjani jew qaddejja ministerjali. Meta jkun hemm ġenitur wieħed fil-​familja, dan jeħtieġ kwalitajiet simili meta jkun qiegħed igħin lil uliedu. Il-​ġenituri jridu jifhmu mhux biss dak li qed jintqal minn membri tal-​familja imma wkoll dak li mhux qed jintqal. Dak li jitlob dehen, ħin, u paċenzja. Hija raġuni waħda għala Pietru setaʼ jgħid li rġiel miżżewġin għandhom juru konsiderazzjoni u jgħammru man-​nisa tagħhom skond il-​għarfien.—1 Timotew 3:​4, 5, 12; 1 Pietru 3:7.

Perikli li Trid Tevita

7, 8. (a) X’inhu meħtieġ biex familja tevita nawfraġju spiritwali? (b) X’inhu meħtieġ minbarra bidu tajjeb fil-​korsa Kristjana? (Mattew 24:13)

⁷ L-​attenzjoni għall-​ispiritwalità tal-​familja għala hi tant importanti? Biex nagħtu tixbieha, nistgħu nistaqsu, Għala hu importanti li pilota taʼ vapur jagħti attenzjoni mill-​qrib lill-​mapep tiegħu meta jiggwida vapur minn ilmijiet perikolużi li fihom partijiet baxxi ħafna? F’Awissu tal-​1992 il-​vapur tat-​turisti Queen Elizabeth 2 (QE2) ġie misjuq minn inħawi fejn kien hemm ramel għoli u blat li jqarrqu u fejn żbalji taʼ navigazzjoni jintqal li huma komuni. Resident lokali kkummenta: “Ħafna karrieri ntilfu minħabba f’dawk l-​inħawi.” Il-​QE2 ħabat maʼ xifer taħt l-​ilma. Irriżulta li kien żball li sewa ħafna flus. Terz mill-​qafas tal-​vapur saritlu ħsara, u l-​vapur kellu jitneħħa mis-​servizz għal ħafna ġimgħat għal tiswijiet.

⁸ Bl-​istess mod, jekk il-​“pilota” tal-​familja ma jiflix bir-​reqqa l-​mappa, il-​Kelma t’Alla, il-​familja tiegħu tistaʼ faċilment issofri ħsara spiritwali. Għall anzjan jew qaddej ministerjali, ir-​riżultat jistaʼ jkun telf taʼ privileġġi ġewwa l-​kongregazzjoni u forsi ħsara serja lil xi membri oħrajn tal-​familja. Għalhekk, kull Kristjan għandu jieħu ħsieb li qatt ma jħossu sodisfatt iżżejjed bl-​istat spiritwali tiegħu, billi jafda biss fi drawwiet tajbin taʼ studju u żelu taʼ qabel. Fil-​korsa Kristjana tagħna, mhux biżżejjed sempliċement li nkunu bdejna tajjeb; il-​viaġġ irid jitlesta b’suċċess.—1 Korintin 9:​24-27; 1 Timotew 1 :19.

9. (a) L-​istudju persunali kemm hu importanti? (b) Liema mistoqsijiet pertinenti nistgħu nistaqsu lilna nfusna?

⁹ Sabiex nevitaw postijiet baxxi spiritwali, blat spiritwali, u ramel għoli spiritwali, irridu nżommu rwieħna aġġornati mal-​“mapep” tagħna permezz taʼ studju regulari tal-​Kelma t’Alla. Ma nistgħux nistrieħu biss fuq l-​istudju bażiku li għamilna biex dħalna fil-​verità. Is-​saħħa spiritwali tagħna tiddependi minn programm regulari u bbilanċjat taʼ studju u servizz. Per eżempju, hekk kif nattendu l-​Istudju tat-​Torri tal-​Għassa tal-​kongregazzjoni b’din l-​istess ħarġa f’idejna, nistgħu nistaqsu lilna nfusna, ‘Jien, jew aħna bħala familja, studjajnieh verament dan l-​artiklu, billi fittixna l-​iskrittura u mmeditajna fuq l-​applikar tagħhom? Jew sempliċement immarkajna t-​tweġibiet? Ittraskurajna, forsi, saħansitra li naqraw l-​artiklu qabel ma nattendu għal-​laqgħa?’ Tweġibiet onesti għal dawn il-​mistoqsijiet jistgħu jistimulawna biex naħsbu serjament dwar dan u jqanqlu fina xewqa biex nitjiebu​—jekk hemm bżonn.—Ebrej 5:​12-14.

10. Għala hu importanti li ngħarblu lilna nfusna?

¹⁰ Għala hu importanti li ngħarblu lilna nfusna b’dan il-​mod? Għaliex aħna ngħixu f’dinja ddominata mill-​ispirtu taʼ Satana, dinja li, b’ħafna modi sottili, tipprova therri l-​fidi tagħna f’Alla u fil-​wegħdiet tiegħu. Hija dinja li trid iżżommna tant okkupati li ma jkollna ebda ħin biex nieħdu ħsieb tal-​bżonnijiet spiritwali tagħna. Għalhekk nistgħu nistaqsu lilna nfusna, ‘Hija l-​familja tiegħi b’saħħitha spiritwalment? Jien, bħala ġenitur, b’saħħti daqs kemm suppost inkun? Bħala familja qegħdin aħna nikkultivaw dik il-​forza spiritwali li tħaddem il-​moħħ li tgħinna nieħdu deċiżjonijiet ibbażati fuq it-​tjieba u l-​lealtà?’—Efesin 4:​23, 24.

11. Il-​laqgħat Kristjani għala huma taʼ benefiċċju spiritwalment? Agħti eżempju.

¹¹ L-​ispiritwalità taġna għandha tiġi msaħħa b’kull laqgħa li nattendu. Dawk is-​sigħat prezzjużi li nqattgħu fis-​Sala tas-​Saltna jew fl-​Istudju tal-​Ktieb tal-​KOngregazzjoni jgħinu biex jiffriskawna wara s-​sigħat twal li jkollna nqattgħu biex nipprovaw inlaħħqu mal-​ħajja fid-​dinja ostili taʼ Satana. Kemm hu riffreskanti, per eżempju, li nistudjaw il-​ktieb L-​Aqwa Bniedem Li Qatt Għex! Dan igħinna biex niksbu fehma aħjar taʼ Ġesù, tal-​ħajja tiegħu, u tal-​ministeru tiegħu. Naqraw bir-​reqqa l-​iskritturi ċitati, nagħmlu riċerka persunali, u b’hekk nitgħallmu ħafna mill-​eżempju li ħalla Ġesù.—Ebrej 12:​1-3; 1 Pietru 2:21.

12. Il-​ministeru tal-​għalqa kif ipoġġi għall-​prova l-​ispiritwalità tagħna?

¹² Prova mill-​aħjar taʼ spiritwalità tagħna hi l-​ministeru Kristjan. Sabiex nipperseveraw fil-​għoti taʼ xhieda li nagħtu b’mod formali u informali, taʼ spiss quddiem pubbliku indifferenti jew li jopponi, għandna bżonn il-​motivazzjoni xierqa, imħabba għal Alla u mħabba għall-​proxxmu. M’għandniex xi ngħidu, ħadd ma jieħu pjaċir li jiġi rrifjutat, u dak jistaʼ jiġri fil-​ministeru tagħna tal-​għalqa. Imma rridu niftakru li hi l-​aħbar tajba li qiegħda tiġi rrifjutata, mhux aħna bħala individwi. Ġesù qal: “Jekk id-​dinja tobgħodkom, tafu li bagħdet lili qabel bagħdet lilkom. Kieku kontu parti mid-​dinja, id-​dinja kienet tkun kuntenta b’dak li hu tagħha. Issa għaliex m’intom ebda parti mid-​dinja, imma jien għażiltkom ’il barra mid-​dinja, minħabba f’dawn id-​dinja tobgħodkom. . .Imma se jagħmlu dawn l-​affarijiet kollha kontra tagħkom minħabba f’ismi, għaliex ma jafux lil dak li bagħatni.”—Ġwann 15:​18-21.

L-​azzjonijiet Jagħtu Messaġġ iktar Qawwi milli Jagħti l-​Kliem

13. Persuna waħda kif tistaʼ therri l-​ispiritwalità taʼ familja?

¹³ X’jiġri ġo familja li kieku kulħadd minbarra membru wieħed jirrispetta l-​ordni u l-​indafa tad-​dar? F’jum bix-​xita, kollha minbarra dak il-​wieħed li jinsa joqogħdu attenti biex ma jirfsux tajn u jdaħħluh ġewwa. Passi taʼ tajn maʼ kullimkien jagħtu evidenza tat-​traskuraġni taʼ dak il-​wieħed, billi jagħti iktar xogħol lill-​oħrajn. L-​istess japplika għall-​ispiritwalità. Individwu wieħed biss egoist u ttraskurat jistaʼ jħammeġ ir-​reputazzjoni tal-​familja. Il-​membri kollha tad-​dar, mhux biss il-​ġenituri, għandhom jistinkaw biex jirriflettu d-​dispożizzjoni mentali taʼ Kristu. Kemm hu riffreskanti meta lkoll jaħdmu flimkien billi jżommu l-​ħajja taʼ dejjem quddiem għajnejhom! Il-​ħarsa mentali taʼ dik il-​familja hi spiritwali (imma mhix tajba f’għajnejhom stess). Rari jkun hemm traċċi taʼ traskuraġni spiritwali ġo familja bħal din.—Ekkleżjasti 7:16; 1 Pietru 4:​1, 2.

14. Satana liema tentazzjonijiet materjali jpoġġi fil-​mogħdija tagħna?

¹⁴ Ilkoll kemm aħna għandna bżonnijiet materjali li jridu jitwettqu biex isostnu l-​ħajja tagħna fuq bażi taʼ kuljum. (Mattew 6:​11, 30-32) Imma taʼ spiss il-​bżonnijiet tagħna jsiru insinjifikanti ħdejn dawk l-​affarijiet li rridu. Per eżempju, is-​sistema taʼ Satana toffrilna kull xorta taʼ tagħmir. Jekk aħna dejjem irridu l-​aħħar mudell f’kollox, qatt m’aħna se nkunu sodisfatti, ladarba taʼ l-​aħħar malajr jispiċċa żmienu, u prodott ġdid joħroġ f’loku. Id-​dinja kummerċjali stabbiliet ċirku li ma jieqaf qatt. Hi tħajjarna biex dejjem infittxu iktar flus ħalli dejjem nissodisfaw iktar xewqat. Dan jistaʼ jwassal għal “ħafna xewqat bla sens u li jweġġgħu,” jew “ambizzjonijiet taʼ bluha u perikolużi.” Jistaʼ jirriżulta f’ħajja żbilanċjata b’inqas u inqas ħin għal attivitajiet spiritwali.—1 Timotew 6:​9, 10; The Gerusalem Bible.

15. L-​eżempju tal-​kap tal-​familja b’liema mod hu importanti?

¹⁵ Hawn għal darb’oħra, l-​eżempju mwaqqaf mill-​kap tad-​dar Kristjana hu importanti ħafna. L-​attitudni bbilanċjata tiegħu lejn ir-​responsabbiltajiet sekulari u spiritwali għandha tispira lill-​membri l-​oħrajn tal-​familja. Ikun ċertament taʼ ħsara jekk il-​missier jagħti struzzjoni eċċellenti bil-​fomm imma mbagħad jonqos li jgħix fi qbil maʼ kliemu stess. It-​tfal malajr jindunaw bl-​ipokrezija li tipprova tgħid lilhom biex jagħmlu l-​ħaġa xierqa u mbagħad ma tagħmilhiex int. Bl-​istess mod, anzjan jew qaddej ministerjali li jinkuraġġixxi lill-​oħrajn fil-​ministeruminn dar għal dar u madankollu rari jingħaqad mal-​familja tiegħu f’dik l-​attività malajr jitlef il-​kredibilità, kemm fil-​familja kif ukoll fil-​kongregazzjoni.—1 Korintin 15:58; qabbel Mattew 23:3.

16. Liema mistoqsijiet nistgħu nistaqsu lilna nfusna?

¹⁶ Għaldaqstant, nistgħu bi profitt neżaminaw il-​ħajjiet tagħna. Ninsabu aħna preokkupati b’li niksbu suċċess sekulari u għalhekk nittraskuraw li nagħmlu progress spiritwali? Telgħin aħna ’l fuq fid-​dinja imma neżlin ’l isfel fil-​kongregazzjoni? Ftakar fil-​pariri taʼ Pawlu: “Dik l-​istqarrija hi leali. Jekk xi raġel qiegħed jirsisti għal kariga taʼ indokratur, hu jixtieq xogħol mill-​aħjar.” (1 Timotew 3:1) Sens taʼ responsabbiltà fil-​kongregazzjoni jagħti iktar indikazzjoni taʼ l-​ispiritwalità tagħna milli xi promozzjoni fuq ix-​xogħol. Bilanċ bl-​attenzjoni jrid jinżamm biex dawk li jħaddmuna ma jitħallewx jikkontrollawna bħal li kieku konna ddedikati lilhom u mhux lil Jehovah.​—Mattew 6:24.

Komunikazzjoni Siewja Tavanza l-​Ispiritwalità

17. X’inhu dak li jikkontribwixxi għall-​ikkultivar taʼ mħabba ġenwina fil-​familja?

¹⁷ Miljuni taʼ djar illum saru qishom lukanda. Kif? Il-​membri tal-​familja jiġu biss biex jorqdu u jieklu, mbagħad jaħarbu jiġru ’l barra. Rari li jpoġġu mal-​mejda biex igawdu ikla flimkien. Is-​sens taʼ familja hu nieqes. Ir-​riżultat? Hemm nuqqas taʼ komunikazzjoni, ebda konversazzjoni sinjifikanti. U dak jistaʼ jwassal għal nuqqas taʼ interess f’membri oħrajn, forsi nuqqas taʼ tħassib veru. Meta nħobbu lil xulxin, nagħmlu l-​ħin biex nitkellmu u nisimgħu lil xulxin. Ninkuraġġixxu, u ngħinu. Dan l-​aspett taʼ l-​ispiritwalità jinvolvi komunikazzjoni snjifikanti bejn il-​miżżewġin u bejn il-​ġenituri u l-​ulied.b Jirrikjedi l-​ħin u tattika li noħorġu lil xulxin mill-​qoxra sabiex naqsmu l-​ferħ, l-​esperjenzi, u l-​problemi tagħna.—1 Korintin 13:​4-8; Ġakbu 1:19.

18. (a) Liema ħaġa hi taʼ spiss impediment prinċipali għall-​komunikazzjoni? (b) Relazzjonijiet siewja fuq liema ħaġa huma mibnijin?

¹⁸ Komunikazzjoni tajba teħtieġ ħin u sforz. Tfisser li jitwarrab ħin biex nitkellmu u nisimgħu lil xulxin. Wieħed mill-​akbar impediment għal dan hu dak l-​apparat li jikkonsma ħafna ħin u li għandu l-​post taʼ unur f’ħafna djar—it-​TV. Dan jippreżenta sfida—jikkontrollak lilek it-​TV, jew int tikkontrolla lilu? Li tikkontrolla t-​TV jirrikjedi determinazzjoni soda​—inkluża r-​rieda soda li titfih. Imma li nagħmlu hekk se jiftħilna t-​triq biex nintonaw maʼ xulxin bħala membri tal-​familja u bħala aħwa spiritwali. Relazzjonijiet siewja jeħtieġu komunikazzjoni tajba, li wieħed isir jifhem lill-​ieħor, il-​bżonnijiet u l-​ferħ tagħna, li ngħidu lil xulxin kemm napprezzaw l-​affarijiet taʼ qalb tajba kollha li saru għalina. Fi kliem ieħor, konversazzjoni sinjifikanti turi li aħna grati lejn oħrajn u li ngħożżuhom.—Proverbji 31:​28, 29.

19, 20. Jekk nieħdu ħsieb kulħadd fil-​familja, x’se nagħmlu?

¹⁹ Għalhekk, jekk nieħdu ħsieb xulxin fl-​isfond tal-​familja—u dak jinkludi li nieħdu ħsieb taʼ membri tal-​familja li ma jemmnux—se nkunu qegħdin nagħmlu ħafna f’li nibnu u nżommu l-​ispiritwalità tagħna. Fi sfond tal-​familja, se nkunu qegħdin insegwu l-​parir taʼ Pietru: “Fl-​aħħarnett, ilkoll kemm intom kunu taʼ moħħ wieħed, billi turu li tinġiebu, billi jkollkom affezzjoni taʼ l-​aħwa, tagħdru b’mod teneru, umlin fil-​moħħ, mhux billi tpattu ħsara bi ħsara, jew tgħajjir b’tgħajjir, imma, għall-​kuntrarju, billi tixħtu barka, għaliex intom issejjaħtu għal din il-​korsa, biex tkunu tistgħu tirtu barka.”—1 Pietru 3:​8, 9.

²⁰ Nistgħu jkollna l-​barka taʼ Jehovah issa jekk nistinkaw biex inżommu l-​ispiritwalità tagħna, u dan jistaʼ jirriżulta f’li nirtu l-​barka tiegħu fil-​futur meta nirċievu l-​għotja taʼ ħajja taʼ dejjem f’ġenna taʼ l-​art. Hemm affarijiet oħrajn li nistgħu nagħmlu bħala familja biex ngħinu lil xulxin spiritwalment. L-​artiklu li jmiss se jiddiskuti l-​benefiċċji taʼ li nagħmlu l-​affarijiet flimkien bħala familja.—Luqa 23:43; Rivelazzjoni 21:​1-4.

[Noti taʼ taħt]

Tiftakar?

◻ X’inhi l-​ispiritwalità?

◻ Kap taʼ familja kif jistaʼ jimita l-​eżempju taʼ Kristu?

◻ Kif nistgħu nevitaw theddid għall-​ispiritwalità tagħna?

◻ X’inhu li jistaʼ jherri l-​ispiritwalità taʼ familja?

◻ Komunikazzjoni siewja għala hi importanti?

[Stampa f’paġna 5]

Attendenza għall-​Istudju tal-​Ktieb tal-​Kongregazzjoni ssaħħaħ lill-​familja spiritwalment