Tfittxija għall-​Ispiritwalità

FIL-​PRIEDKA famuża tiegħu taʼ fuq il-​Muntanja, Ġesù qal: “Henjin dawk li huma konxji tal-​bżonn spiritwali tagħhom.” (Mattew 5:3) X’aktarx li int taqbel maʼ din l-​istqarrija. In-​nies kullimkien jirrikonoxxu l-​bżonn taʼ l-​ispiritwalità f’ħajjithom u jassumu li ladarba jsibuha, din se ġġibilhom l-​hena. Imma x’inhi t-​tifsira tal-​kelma “spiritwalità”?

Dizzjunarju wieħed jispjega li l-​ispiritwalità tfisser li “tkun sensittiv jew marbut maʼ xi valuri reliġjużi” u hija “l-​kwalità jew il-​kundizzjoni li fiha tkun spiritwali.” Għalhekk, termini bħal “spiritwalità” jew li “tkun spiritwali” huma sinonimi. Allura, xi ħadd li jistma ħafna l-​valuri spiritwali jew l-​interessi reliġjużi jissejjaħ individwu spiritwali.

Allura, dak li jkun kif jistaʼ jikseb l-​ispiritwalità vera? Għalkemm kważi kull reliġjon issostni li taf kif wieħed jistaʼ jikseb l-​ispiritwalità vera, tistaʼ tgħid li d-​direzzjonijiet li jingħataw huma numerużi daqs ir-​reliġjonijiet infushom. Xi ħadd Protestant jgħid li reġaʼ kiseb il-​ħeġġa għar-​reliġjon f’laqgħa li attenda. Wieħed Kattoliku jfittex li jikseb is-​sliem m’Alla permezz tal-​Quddiesa. Buddist jipprova jikseb tidwil spiritwali permezz tal-​meditazzjoni. Wieħed Ħindu jistinka biex jeħles minn ċiklu taʼ twelid mill-​ġdid permezz taʼ ċaħda persunali. Qegħdin dawn kollha jiksbu l-​ispiritwalità vera? Twassal xi waħda minn dawn it-​toroq għall-​ispiritwalità?

Għal ħafna, it-​tweġiba għal dawn il-​mistoqsijiet hija le. Huma jemmnu li l-​ispiritwalità tfisser li “temmen mingħajr impenn,” jiġifieri, li temmen f’xi alla mingħajr ma tkun tappartjeni lil xi organizzazzjoni reliġjuża. Oħrajn iħossu li l-​ispiritwalità ma tirreferix għall-​esperjenza reliġjuża, imma għax-​xewqa li jkollok paċi ġewwinija u sinifikat fil-​ħajja. Huma jemmnu li min ifittex l-​ispiritwalità m’għandu ebda bżonn taʼ reliġjon. Minflok, kulma għandhom bżonn hu li jeżaminaw lilhom infushom minn ġewwa, jiġifieri, l-​iktar sentimenti profondi tagħhom. Kittieb wieħed jgħid: “L-​ispiritwalità vera hi xi ħaġa li tinsab fil-​fond ġo fik. Huwa l-​mod kif tħobb, taċċetta u taġixxi mad-​dinja u n-​nies taʼ madwarek. Ma tistax issibha f’xi reliġjon jew billi temmen f’ċertu tagħlim reliġjuż.”

Jidher ċar li n-​nies għandhom ideat tassew differenti dwar l-​ispiritwalità. Hemm eluf taʼ kotba li jsostnu li jistgħu juruk il-​mod kif tgħix ħajja spiritwali, imma spiss min jaqrahom ma jħossux sodisfatt u jibqaʼ konfuż. Madankollu, hemm ktieb li fih gwida taʼ min joqgħod fuqha dwar affarijiet spiritwali. Huwa l-​ktieb li juri biċ-​ċar li huwa ispirat minn Alla. (2 Timotju 3:​16) Ejja naraw x’jgħid dan il-​ktieb, il-​Bibbja, dwar it-​tifsir taʼ l-​ispiritwalità u l-​valur tagħha.

[Sors tal-​Istampa f’paġna 2]

COVER: Background: © Mark Hamblin/​age fotostock