Kif Int Tistaʼ Tissodisfa l-​Bżonnijiet Spiritwali Tiegħek

“F’DAWN l-​aħħar għaxar snin, iktar minn 300 ktieb dwar l-​ispiritwalità fuq il-​post tax-​xogħol—b’titli bħal Jesus CEO [Chief Executive Officer] u The Tao of Leadership—invadew il-​ħwienet tal-​kotba,” jgħid il-​U.S.News & World Report. Din it-​tendenza sempliċement turi li f’ħafna pajjiżi sinjuri materjalment, qed tiżdied ix-​xewqa għal direzzjoni spiritwali fil-​ħajja. Fil-​kummenti li saru dwar dan, il-​ġurnal tan-​negozju Training & Development josserva: “Fi żmien meta t-​teknoloġija qed tidderieġi kull aspett ieħor taʼ ħajjitna, aħna qed infittxu sinifikat iktar profond, skop, u sodisfazzjon persunali akbar.”

Iżda, fejn tistaʼ ssib gwida spiritwali sodisfaċenti? Fil-​passat, in-​nies kienu jduru għar-​reliġjonijiet stabbiliti biex jgħinuhom isibu “sinifikat iktar profond” u “skop” fil-​ħajja. Illum, ħafna m’għadhomx jistmawhom lir-​reliġjonijiet stabbiliti. Minn stħarriġ li sar fuq 90 maniġer u uffiċjal taʼ pożizzjoni għolja, instab li “n-​nies jagħmlu distinzjoni kbira bejn ir-​reliġjon u l-​ispiritwalità,” jgħid il-​ġurnal Training & Development. Dawk li ħadu sehem fl-​istħarriġ qiesu r-​reliġjon bħala li hija “intolleranti u li tifred,” filwaqt li l-​ispiritwalità qisuha bħala “universali u tinkludi lil kulħadd.”

Ħafna żgħażagħ li jgħixu f’soċjetajiet inqas reliġjużi, bħall-​Awstralja, New Zealand, ir-​Renju Unit, u l-​Ewropa, ukoll jaraw differenza bejn ir-​reliġjon u l-​ispiritwalità. Il-​Professoressa Ruth Webber kitbet hekk fir-​rivista Youth Studies Australia: “Il-​biċċa l-​kbira miż-​żgħażagħ jemmnu f’Alla, jew f’xi tip taʼ forza sopranaturali imma ma jqisux lill-​knisja bħala li hija importanti jew t’għajnuna biex jesprimu l-​ispiritwalità tagħhom.”

Ir-​Reliġjon Vera Tinkuraġġixxi l-​Ispiritwalità

Wieħed jistaʼ jifhem għala n-​nies huma tant xettiċi dwar ir-​reliġjon. Ħafna organizzazzjonijiet reliġjużi huma mgħaddsin f’intriċċi politiċi u ipokrisija morali u huma ħatjin taʼ demm innoċenti minħabba l-​gwerer bla għadd f’isem ir-​reliġjon. Madankollu, xi wħud li ċaħdu l-​organizzazzjonijiet reliġjużi li huma mċappsin bl-​ipokrisija u l-​qerq żbaljaw meta ċaħdu wkoll il-​Bibbja, għax jaħsbu li din tiskuża prattiċi bħal dawn.

Fir-realtà, il-​Bibbja tikkundanna l-​ipokrisija u l-​ħażen. Ġesù qal lill-​mexxejja reliġjużi taʼ żmienu: “Ħażin għalikom, intom il-​kittieba u l-​Fariżej, uċuħ b’oħra! Qiskom oqbra mbajjda: minn barra jidhru sbieħ, u minn ġewwa mimlija għadam tal-​mejtin u kull xorta taʼ ħmieġ! Hekk intom; minn barra tidhru tassew ġusti quddiem il-​bnedmin, waqt li minn ġewwa kollkom ipokrisija u ħażen!”—Mattew 23:27, 28.

Iktar minn hekk, il-​Bibbja tinkuraġġixxi lill-​Kristjani biex ikunu newtrali fil-​kwistjonijiet politiċi kollha. Minflok ma tħeġġeġ lill-​kredenti biex joqtlu lil xulxin, din turihom li għandhom ikunu lesti jmutu għal xulxin. (Ġwanni 15:12, 13; 18:36; 1 Ġwanni 3:10-12) Minflok ma hi “intolleranti u tifred,” ir-​reliġjon vera, ibbażata fuq il-​Bibbja, “tinkludi lil kulħadd.” L-​appostlu Pietru qal: “Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.”—Atti 10:34, 35.

Il-​Bibbja—Gwida taʼ Min Joqgħod Fuqha għal Saħħa Spiritwali

Il-​Bibbja tgħidilna li l-​bnedmin huma maħluqin fuq ix-​xbieha t’Alla. (Ġenesi 1:26, 27) Dan ma jfissirx li l-​bnedmin jixbhu lil Alla b’mod fiżiku, imma jfisser li l-​bnedmin għandhom l-​abbiltà li jirriflettu l-​personalità t’Alla, inkluż il-​kapaċità għal affarijiet spiritwali, jew l-​ispiritwalità.

Ladarba ħalaqna hekk, huwa loġiku li nemmnu li Alla kien se jipprovdilna wkoll mezz kif nissodisfaw il-​bżonnijiet spiritwali tagħna, kif ukoll direzzjoni addattata li biha nistgħu nagħrfu x’inhu taʼ ġid u x’inhu taʼ ħsara għalina spiritwalment. Sewwasew bħalma Alla ħalaq ġisimna b’sistema taʼ immunità disinjata b’mod taʼ l-​għaġeb biex nifilħu għall-​mard u nibqgħu f’saħħitna, hu tana wkoll kuxjenza, jew leħen ġewwieni, li tistaʼ tgħinna nieħdu deċiżjonijiet tajbin u nevitaw prattiċi li jagħmlulna ħsara fiżika u spiritwali. (Rumani 2:14,15) Bħalma nafu, biex is-​sistema tagħna taʼ l-​immunità taħdem tajjeb, irridu mmantnuha kif jixraq. Bl-​istess mod, biex il-​kuxjenza tagħna taħdem, irridu mmantnuha b’ikel spiritwali sustanzjuż.

Biex juri liema tip taʼ ikel se jżommna f’saħħitna spiritwalment, Ġesù qal: “Il-​bniedem mhux bil-​ħobż biss jgħix, iżda b’kull kelma li toħroġ minn fomm Alla.” (Mattew 4:4) Il-​kliem taʼ Jehovah jinsab imniżżel fil-​Kelma tiegħu, il-​Bibbja, u dan ‘jiswa biex wieħed jgħallem, iċanfar, u jwiddeb.’ (2 Timotju 3:16) Għaldaqstant, jiddependi minna biex nagħmlu sforz u nieklu dan l-​ikel spiritwali. Aħna se nibbenefikaw spiritwalment u fiżikament skond kemm insiru nafu l-​Bibbja u nistinkaw biex napplikaw il-​prinċipji tagħha f’ħajjitna.—Isaija 48:17, 18.

Jiswa li Nagħmlu Sforz?

Veru, irridu ż-​żmien biex intejbu s-​saħħa spiritwali tagħna billi nistudjaw il-​Bibbja, u mid-​dehra, iż-​żmien qiegħed iktar ma jmur isir xi ħaġa rari. Imma l-​ġid li joħroġ jiswa kull sforz! Innota kif xi nies professjonali li huma mħabbtin ħafna b’xogħolhom jispjegaw għala jqisuh importanti li jsibu l-​ħin biex jieħdu ħsieb is-​saħħa spiritwali tagħhom.

Marina, tabiba, tgħid: “Qatt ma kont ħsibt bis-​serjetà dwar l-​ispiritwalità tiegħi sakemm mort naħdem fi sptar u bdejt inħoss ħafna s-​sofferenza taʼ ħaddieħor. Kien hemmhekk li rrealizzajt li kelli nagħraf u nissodisfa l-​bżonn spiritwali tiegħi jekk ridt nikseb il-​kuntentizza u t-​trankwillità, ladarba r-​ritmu tal-​ħajja u l-​isforz involut biex tieħu ħsieb il-​problemi tan-​nies jistgħu jirkbu lil xi ħadd li jagħmel ix-​xogħol tiegħi.

“Issa qed nistudja l-​Bibbja max-​Xhieda taʼ Jehovah. Dan l-​istudju jgħinni neżamina l-​azzjonijiet u l-​motivi tiegħi b’mod kostruttiv u jħarreġ il-​ħsibijiet tiegħi biex ikunu iktar pożittivi, u b’hekk inkun nistaʼ ngħix ħajja bilanċjata. Il-​karriera sekulari tiegħi tagħtini sodisfazzjon kbir. Imma huwa l-​istudju tal-​Bibbja tiegħi li jtejjibli saħħti emozzjonalment għax jgħinni nikkontrolla ħsibijiet negattivi, innaqqas it-​tensjoni, u nuri iktar paċenzja u mogħdrija man-​nies. Anki ż-​żwieġ tiegħi mar tajjeb talli applikajt il-​prinċipji Bibliċi. L-​iktar importanti, sirt naf lil Jehovah u qed nesperjenza, f’ammont żgħir, in-​nixxiegħa bla limitu taʼ l-​ispirtu tiegħu, u dan il-​fatt ta sinifikat akbar lil ħajti.”

Nicholas, arkitett, jgħid: “Qabel ma bdejt nistudja l-​Bibbja max-​Xhieda taʼ Jehovah, ma kelli l-​ebda interess spiritwali. L-​uniku skop f’ħajti kien li nirnexxi fil-​karriera li kont għażilt. L-​istudju tal-​Bibbja tiegħi għallimni li fil-​ħajja hemm iktar minn hekk u li nagħmel ir-​rieda taʼ Jehovah iġib kuntentizza vera u dejjiema.

“Il-​karriera sekulari tiegħi tagħtini sens taʼ sodisfazzjon, imma hija l-​Bibbja li għallmitni l-​importanza taʼ li nżomm ħajti sempliċi billi niffoka fuq affarijiet spiritwali. Billi għamilna hekk, jien u marti evitajna ħafna mit-​tensjoni li jġib miegħu stil taʼ ħajja mimli materjaliżmu. Għamilna wkoll ħafna ħbieb taʼ veru permezz tas-​sħubija tagħna maʼ wħud li għandhom l-​istess ħarsa spiritwali lejn il-​ħajja.”

Vincent, avukat, jgħid: “Karriera sekulari tajba tistaʼ tagħtik ammont taʼ sodisfazzjon. Madankollu, sibt li hemm bżonn ħafna iktar minn hekk biex tikseb l-​hena u l-​kuntentizza. Qabel ma sirt naf b’dak li tgħallem il-​Bibbja fuq dan is-​suġġett, niftakar kif f’daqqa waħda rrealizzajt kemm ma tagħmilx sens il-​ħajja—titwieled, tikber, tiżżewweġ, taħdem biex tipprovdi l-​bżonnijiet materjali ħalli trabbi t-​tfal, tħarriġhom biex isegwu bl-​eżatt l-​istess ċiklu tal-​ħajja, u fl-​aħħar tixjieħ u tmut.

“Kien biss wara li studjajt il-​Bibbja max-​Xhieda taʼ Jehovah li rċivejt tweġibiet sodisfaċenti għall-​mistoqsijiet tiegħi dwar l-​iskop tal-​ħajja. L-​istudju tal-​Bibbja tiegħi għenni nsir naf lil Jehovah bħala persuna u niżviluppa mħabba profonda għalih. Dan jifforma l-​bażi biex ikolli ħarsa spiritwali f’saħħitha hekk kif nistinka biex ngħix ħajti fi qbil maʼ dak li naf li hu l-​iskop tiegħu. Issa, kemm jien u kemm marti għandna s-​sodisfazzjon li nafu li qed nużaw ħajjitna bl-​iktar mod sinifikanti possibbli.”

Int ukoll tistaʼ ssib skop u sinifikat fil-​ħajja billi tistudja l-​Bibbja. Ix-​Xhieda taʼ Jehovah huma lesti li jgħinuk minn qalbhom. Bħal Marina, Nicholas, u Vincent, int tistaʼ tikseb is-​sodisfazzjon li jiġi billi titgħallem dwar Jehovah u l-​iskopijiet tiegħu għall-​bnedmin in ġenerali u għalik bħala individwu. Int mhux biss se tkun ferħan li tissodisfa l-​bżonnijiet spiritwali tiegħek issa imma se jkollok ukoll il-​prospett li tgawdi ħajja bla tmiem mimlija saħħa fiżika perfetta—prospett miftuħ biss għal dawk li huma “konxji tal-​bżonn spiritwali tagħhom.”—Mattew 5:3, NW.

Mod wieħed kif niżviluppaw l-​ispiritwalità tagħna huwa permezz tat-​talb. Ġesù ħa l-​ħin biex jgħallem lid-​dixxipli tiegħu kif jitolbu, u tahom dik li spiss tissejjaħ it-​Talba tal-​Missierna. Xi tfisser għalik din it-​talba llum? Kif tistaʼ tibbenefika minnha? It-​tweġibiet se ssibhom fiż-​żewġ artikli li jmiss.

[Stampi f’paġna 6]

Marina

[Stampi f’paġna 7]

Nicholas

[Stampi f’paġna 7]

Vincent