Għala Taħfer?

L-​ISTUDJUŻ u kittieb Lhudi Joseph Jacobs darba ddeskriva l-​maħfra bħala “l-​ogħla u l-​iktar diffiċli mil-​lezzjonijiet morali kollha.” Tabilħaqq, ħafna jsibu l-​kelma “Naħfirlek” diffiċli ferm biex jgħiduha.

Il-maħfra, milli jidher, tixbah ħafna lill-​flus. Tistaʼ tintefaq liberament u b’mod taʼ ħniena fuq oħrajn jew wieħed jistaʼ jgezzizha bix-​xeħħa kollha għalih innifsu. Taʼ l-​ewwel huwa l-​mod kif irid Alla. Għandna nikkultivaw drawwiet ġenerużi taʼ nfiq fejn tidħol il-​maħfra. Għala? Għaliex Alla jinkuraġġih dan u għaliex spirtu li ma jaħfirx u vendikattiv jistaʼ biss jgħarraq l-​affarijiet.

Taʼ spiss nisimgħu bil-​kelmiet: “Jien ma nisbilx; inpattiha!” B’dispjaċir, din l-​istqarrija hija prinċipju li jiggwida lil ħafna ħajjiet illum. Waħda mara, per eżempju, irrifjutat li tkellem lill-​mara taʼ ħuha għal iktar minn sebaʼ snin għaliex, kif tgħid il-​mara, “tant qalgħet ħama fuqi u qatt ma kont kapaċi naħfrilha.” Imma trattament sieket bħal dan, meta wżat bħala skuża biex tinkiseb apoloġija mingħand l-​akkużat jew bħala arma li biha wieħed jikkastiga, rari jissodisfa x-​xewqa għall-​vendetta. Minflok, dan jistaʼ sempliċement itawwal il-​kontroversja, billi jwassal biex tiżżviluppa qalb iebsa. Jekk dan iċ-​ċiklu taʼ wġigħ ma jiġix interrott, il-​qabda potenti tal-​vendetta tistaʼ tirrovina r-​relazzjonijiet u saħansitra s-​saħħa taʼ dak li jkun.

Il-​Ħsara Minn Spirtu Li Ma Jaħfirx

Meta persuna ma taħfirx, il-​konflitt li jirriżulta joħloq l-​istress. Imbagħad, l-​istress jistaʼ jwassal għal mardiet serji. Dr. William S. Sadler kiteb: “Ħadd ma jistaʼ japprezza daqstant bis-​sħiħ daqs tabib il-​persentaġġ għoli b’mod li jgħaġġbek tal-​mard u s-​sofferenzi umani li għandhom x’jaqsmu direttament maʼ inkwiet, biżaʼ, konflitt, . . . ħsieb negattiv u mod taʼ ħajja mhux nadif.” Tassew, iżda, kemm jikkaġuna ħsara t-​taqlib emozzjonali? Pubblikazzjoni medika waħda twieġeb: “L-​istatistiċi . . . indikaw li żewġ terzi mill-​pazjenti li marru għand it-​tabib kellhom sintomi kkaġunati jew aggravati minn stress mentali.”

Iva, l-​imrar, li wieħed jieħu fastidju, u d-​dispett, ħadd ma jistaʼ jgħid li ma jagħmlux ħsara. Dawn l-​emozzjonijiet distruttivi huma bħal sadid li bil-​mod il-​mod jherri l-​body taʼ karozza. Il-​karozza minn barra tistaʼ tidher sabiħa, imma taħt iż-​żebgħa proċess distruttiv qiegħed iseħħ.

Saħansitra iktar importanti, l-​irrifjutar tagħna li naħfru fejn hemm bażi għall-​ħniena jistaʼ wkoll jagħmlilna ħsara spiritwali. F’għajnejn Alla Jehovah, nistgħu nsiru bħall-​irsir fit-​tixbieha taʼ Ġesù. L-​irsir inħafirlu dejn enormi minn sidu. Madankollu, meta rsir sieħbu talbu bil-​ħniena biex jaħfirlu d-​dejn li komparattivament kien ċkejken, hu kien aħrax u ma riedx jaħfer. Ġesù għamilha ċara li jekk aħna bl-​istess mod ma nkunux lesti li naħfru, Jehovah se jirrifjuta li jaħfrilna dnubietna. (Mattew 18:21-35) Jekk aħna ma naħfrux, għalhekk, nistgħu nitilfu l-​kuxjenza nadifa tagħna quddiem Alla u saħansitra t-​tama tagħna għall-​futur! (Qabbel 2 Timotew 1:3.) Allura, x’nistgħu nagħmlu?

Tgħallem Aħfer

Il-​maħfra vera toħroġ mill-​qalb. Tinvolvi li taħfer l-​iżball taʼ xi ħadd li offendiek u tneħħi kwalunkwe xewqa għal tpattija. B’hekk, il-​ġustizzja finali u r-​rikompens li jistaʼ jkun hemm jiġu mħollijin f’idejn Jehovah.—Rumani 12:19.

Irid jiġi nnotat, madankollu, li ladarba “l-​qalb tinganna iktar minn kull ħaġa oħra u hija ddisprata,” mhux dejjem ixxaqleb lejn il-​maħfra saħansitra meta għandha tagħmel hekk. (Ġeremija 17:9) Ġesù nnifsu qal: “Mill-​qalb joħorġu raġunar mill-​agħar, qtil, adulterji, żina, serqiet, xihdiet foloz, dagħa.”—Mattew 15:19.

Għall-grazzja t’Alla, qalbna tistaʼ tiġi mħarrġa biex tagħmel dak li huwa sewwa. Madankollu, it-​taħriġ li neħtieġu jrid jiġi minn sors ogħla. Ma nistgħux nirnexxu waħedna. (Ġeremija 10:23) Salmista li kien imnebbaħ b’mod divin irrikonoxxieh dan u talab għad-​direzzjoni t’Alla. Bil-​ħeġġa talab lil Jehovah bil-​ħrara: “Għallimni r-​regolamenti tiegħek. Agħmilni nifhem il-​mogħdija taʼ l-​ordnijiet tiegħek stess.”—Salm 119:26, 27.

Skond salm ieħor, is-​Sultan David taʼ Iżrael tal-​qedem beda ‘jifhem il-​mogħdija’ taʼ Jehovah. Esperjenzaha direttament u tgħallem minnha. Għalhekk, kellu l-​ħila jgħid: “Jehovah hu ħanin u grazzjuż, bil-​mod biex jirrabja u abbundanti fil-​qalb tajba bl-​imħabba. Bħalma missier juri ħniena maʼ wliedu, Jehovah wera ħniena lejn dawk li qegħdin jibżgħu minnu.”—Salm 103:8, 13.

Jeħtieġ li nitgħallmu bħalma għamel David. Nistudjaw bit-​talb l-​eżempju perfett t’Alla tal-​maħfra, kif ukoll dak taʼ Ibnu. B’hekk, nistgħu nitgħallmu naħfru mill-​qalb.

Madankollu, xi wħud jistgħu bir-​raġun jistaqsu: Xi ngħidu dwar dnub serju? Id-​dnubiet kollha jridu jiġu maħfurin?

Infittxu Bilanċ

Meta persuna tkun saritilha offiża gravi, l-​uġigħ jistaʼ jkun immens. Dan huwa partikolarment veru jekk dak li jkun hu l-​vittma innoċenti taʼ dnub serju. Xi wħud saħansitra jistgħu jitħassbu, ‘Kif nistaʼ naħfer lil xi ħadd li ttradieni u weġġgħani b’tant krudeltà?’ Fil-​każ taʼ dnub oħxon li jistaʼ jimmerita qtugħ mis-​sħubija, il-​vittma jistaʼ jkollu bżonn japplika l-​parir taʼ Mattew 18:15-17.

Fi kwalunkwe każ, ħafna jistaʼ jiddependi fuq min ikun għamel l-​offiża. Minn mindu sar il-​ħażen kien hemm xi sinjal taʼ ndiema sinċiera? Inbidel il-​midneb, forsi saħansitra għamel attentat biex jagħmel tibdiliet veri? F’għajnejn Jehovah indiema bħal din hija l-​qofol għall-​maħfra saħansitra fil-​każ taʼ dnubiet verament orrendi. Per eżempju, Jehovah ħafer lil Manasse, wieħed mill-​iktar slaten mill-​agħar fl-​istorja taʼ Iżrael. Fuq liema bażi? Alla għamel hekk għaliex Manasse fl-​aħħar mill-​aħħar umilja lilu nnifsu u nidem mill-​mogħdijiet vili tiegħu.—2 Kronaki 33:12, 13.

Fil-Bibbja l-​indiema ġenwina tinvolvi bidla sinċiera fl-​attitudni, dispjaċir mill-​qalb minħabba xi ħażen li sar. Fejn ikun xieraq u possibbli, l-​indiema hija akkumpanjata minn sforz biex isir radd lura lill-​vittma tad-​dnub. (Luqa 19:7-10; 2 Korintin 7:11) Fejn m’hemmx indiema bħal din, Jehovah ma jaħfirx.a Barra minn hekk, Alla ma jistenniex illi l-​Kristjani jaħfru lil dawk li darba kienu mdawlin spiritwalment imma li issa minn jeddhom, mingħajr indiema jipprattikaw il-​ħażen. (Ebrej 10:26-31) F’każi estremi, il-​maħfra tistaʼ verament tkun mhix xierqa.—Salm 139:21, 22; Eżekjel 18:30-32.

Jekk il-​maħfra hijiex possibbli jew le, vittma taʼ dnub serju jistaʼ jkun irid jiżen mistoqsija oħra: Irrid jien nibqaʼ f’taqlib emozzjonali kbir, billi nħossni mweġġaʼ u rrabjat b’mod intensiv, sakemm il-​kwistjoni tiġi solvuta għalkollox? Ikkunsidra eżempju. Is-​Sultan David ħassu mweġġaʼ b’mod intensiv meta l-​ġeneral tiegħu, Ġoab, qatel lil Abner u lil Amasa, “żewġt irġiel iktar twajbin u aħjar milli kien [Ġoab].” (1 Slaten 2:32) David esprima r-​rabja tiegħu bil-​kliem u bla dubju lil Jehovah fit-​talb. Maż-​żmien, iżda, l-​intensità kollha kemm hi tas-​sentimenti taʼ David x’aktarx li battiet. Ma kienx iddominat mir-​rabja sa l-​aħħar taʼ ħajtu. David saħansitra kompla jaħdem maʼ Ġoab, imma mhux sempliċement ħafer lil dan il-​qattiel li ma nidimx. David ra li fl-​aħħar tintgħamel il-​ġustizzja.—2 Samwel 3:28-39; 1 Slaten 2:5, 6.

Jistaʼ jirrikjedi ħin u xogħol qabel ma dawk imweġġgħin mid-​dnubiet serji taʼ oħrajn tkun għaddietilhom ir-​rabja inizzjali tagħhom. Il-​proċess taʼ fejqan jistaʼ jkun ferm iktar faċli meta dak li offenda jagħraf il-​ħażin tiegħu u jindem. Madankollu, vittma innoċenti taʼ dnub għandu jkun kapaċi jsib faraġ u konsolazzjoni fl-​għarfien tiegħu tal-​ġustizzja u l-​għerf taʼ Jehovah u fil-​kongregazzjoni Kristjana, tkun xi tkun il-​korsa taʼ dak li għamel il-​ħażin.

Irrikonoxxi, wkoll, li meta tassew taħfer lil xi midneb, dan ma jfissirx li qiegħed tħalli d-​dnub għaddej. Għall-​Kristjan, il-​maħfra tfisser li bil-​fiduċja kollha tħalli l-​kwistjoni f’idejn Jehovah. Hu l-​Imħallef taʼ tjieba taʼ l-​univers kollu, u se jesegwixxi l-​ġustizzja fiż-​żmien xieraq. Dak se jinkludi li jiġġudika “liż-​żienja u lill-​adulteri” qarreqin.—Ebrej 13:4.

Il-​Benefiċċji Tal-​Maħfra

Is-​salmista David għanna: “Għax int, O Jehovah, tajjeb u lest li taħfer; u l-​qalb tajba bl-​imħabba lejn dawk kollha li qegħdin jirrikorru għandek hija abbundanti.” (Salm 86:5) Int, “lest li taħfer,” bħal Jehovah? Il-​benefiċċji huma ħafna.

L-ewwel, li taħfer lill-​oħrajn jippromwovi relazzjonijiet tajbin. Il-​Bibbja tħeġġeġ lill-​Kristjani: “Siru qalbkom tajba maʼ xulxin, billi tagħdru b’tenerezza, billi taħfru lil xulxin liberament sewwa sew bħalma Alla wkoll bi Kristu ħafrilkom liberament.”—Efesin 4:32.

It-tieni, il-​maħfra ġġib il-​paċi. Din m’hijiex biss paċi maʼ sħabna l-​bnedmin imma kif ukoll paċi ġewwinija.—Rumani 14:19; Kolossin 3:13-15.

It-tielet, li naħfru lill-​oħrajn jgħinna niftakru li aħna nfusna neħtieġu l-​maħfra. Iva, ‘kollha dnibna u ma nilħqux il-​glorja t’Alla.’—Rumani 3:23.

Fl-aħħarnett, li naħfru lill-​oħrajn jiftaħ it-​triq biex id-​dnubiet tagħna jiġu maħfurin minn Alla. Ġesù qal: “Jekk taħfru lill-​bnedmin in-​nuqqasijiet tagħhom, Missierkom tas-​sema se jaħfer lilkom ukoll.”—Mattew 6:14.

Immaġina l-​ħafna affarijiet li bil-​fors okkupaw lil moħħ Ġesù kmieni fil-​għaxija tal-​mewt tiegħu. Kien ikkonċernat dwar id-​dixxipli tiegħu, ix-​xogħol taʼ l-​ippridkar, u speċjalment l-​integrità tiegħu lejn Jehovah. Madankollu, saħansitra meta kien qiegħed isofri b’mod intensiv fuq iz-​zokk tat-​tortura, dwar liema ħaġa tkellem? Fost l-​aħħar kelmiet tiegħu kien hemm, “Missier, aħfrilhom.” (Luqa 23:34) Aħna nistgħu nimitaw l-​eżempju perfett taʼ Ġesù billi naħfru lil xulxin mill-​qalb. (w94 9/15)

[Nota taʼ taħt]

[Stampa fpaġna 5]

Ħadtu int il-​punt tat-​tixbieha taʼ Ġesù dwar l-​irsir li ma ħafirx?

[Stampi f’paġna 7]

Li naħfru lill-​oħrajn jippromwovi relazzjonijiet tajbin u jġib l-​hena