Għodda Ġdida Biex Tgħin lin-​Nies Jitgħallmu Dwar Dak Li Alla Jirrikjedi

“IL-​MOD sempliċi, dirett u ħlejju li bih huwa mwassal se jipproduċi riżultati iktar milli huwa mistenni. Is-​suġġetti huma ppreżentati b’manjiera tant mhix ikkomplikata u pjaċevoli li kull persuna sinċiera li qiegħda tfittex se tkun imqanqla biex tgħid, ‘Tassew li Alla f’nofskom.’” (1 Korintin 14:25) Hekk qal wieħed mix-​Xhieda taʼ Jehovah mit-​Tajlandja waqt li ddeskriva l-​brochure il-​ġdid, Alla X’Jirrikjedi Minna? Dan ġie maħruġ mill-​Watch Tower Society fil-​Konvenzjonijiet Distrettwali “Messaġġiera Tal-​Paċi Divina” matul l-​1996/97.

Dan il-​brochure taʼ 32 paġna bil-​kulur, huwa ddisinjat bħala kors taʼ studju tal-​Bibbja. Dan ikopri t-​tagħlim bażiku tal-​Bibbja. Il-​kliem użat huwa sempliċi u konċiż, billi jispjega b’mod ċar dak li Alla jirrikjedi minna. Il-​qarrejja m’għandu jkollhom ebda diffikultà biex jifhmuh. Kif tistaʼ tikkonduċi studju tal-​Bibbja b’dan il-​brochure il-​ġdid?

Uża l-​mistoqsijiet. Hemm mistoqsijiet fil-​bidu taʼ kull lezzjoni. Fil-​parentesi wara kull mistoqsija, se ssib in-​numri tal-​paragrafi li fihom jinstabu t-​tweġibiet. Dawn il-​mistoqsijiet jistgħu jiġu wżati bħala għajnuna taʼ tagħlim kemm bħala previżjoni u kemm bħala reviżjoni. Per eżempju, fil-​bidu taʼ studju tal-​Bibbja fid-​dar, tistaʼ tistaqsi l-​mistoqsijiet lill-​istudent sabiex tikseb il-​kummenti tiegħu. Minflok ma tikkorreġi xi tweġibiet żbaljati immedjatament, tistaʼ tissokta bl-​istudju. Fit-​tmiem tal-​lezzjoni, tistaʼ terġaʼ lura lejn il-​mistoqsijiet biex tara jekk l-​istudent huwiex issa kapaċi jweġibhom f’armonija mal-​Bibbja.

Fittex l-​iskritturi. F’kull lezzjoni, stqarrijiet qosra taʼ veritajiet Bibliċi huma akkumpanjati minn skritturi li jappoġġjawhom. Ladarba l-​biċċa l-​kbira taʼ l-​iskritturi huma ċċitati u mhux ikkwotati, huwa importanti li tinkuraġġixxi lill-​istudent biex ifittex dawn is-​siltiet fil-​Bibbja tiegħu stess. Hu għandu bżonn jaqra u jimmedita fuq il-​Kelma t’Alla qabel ma japplikaha fil-​ħajja.—Ġożwè 1:8.

Agħti importanza lill-​istampi. Il-​brochure fih abbundanza taʼ ritratti u tpinġijiet​—b’kollox iżjed minn 50 biċċa xogħol artistika. Dawn huma pprovduti mhux biss biex ipaxxu l-​għajn imma wkoll bħala iżjed għajnuniet taʼ tagħlim. Per eżempju, l-​aħħar żewġ lezzjonijiet (kull waħda taʼ paġna, faċċata taʼ xulxin) huma intitolati “Ngħinu Lil Oħrajn Jagħmlu R-​Rieda T’Alla” u “Id-​Deċiżjoni Tiegħek Biex Taqdi Lil Alla.” Ir-​ritratti mifruxin maż-​żewġ faċċati juru l-​progress spiritwali taʼ l-​istess persuna, billi juruh jagħti xiehda informali, jieħu sehem fix-​xogħol minn dar għal dar, jagħmel id-​dedikazzjoni tiegħu, u finalment jitgħammed. Billi tidderieġi l-​attenzjoni taʼ l-​istudent lejn dawn l-​istampi, int tgħinu jara l-​passi li huma meħtiġin sabiex jaqdi lil Alla.

Xi ngħidu jekk persuna interessata ma taqrax sew jew ma taf taqra xejn? Is-​Soċjetà qiegħda tagħmel dan il-​brochure il-​ġdid disponibbli fuq audiocassette f’numru taʼ lingwi. Il-​cassette fih it-​test tal-​brochure kif ukoll ħafna mill-​iskritturi ċċitati. Huwa rrekordjat kif ġej: Tinqara l-​ewwel mistoqsija, segwita mill-​paragrafu (jew paragrafi) li jweġibha, flimkien maʼ xi wħud mill-​iskritturi ċċitati. Imbagħad tinqara l-​mistoqsija li jmiss, segwita mit-​test u l-​iskritturi li jweġbuha, u jibqaʼ sejjer hekk. L-​istudent jistaʼ jismaʼ r-​rikording hu u jipprepara għall-​istudju. Il-​cassette jistaʼ jintuża wkoll meta tkun qiegħda tikkonduċi l-​istudju.

Dawk preżenti għall-​konvenzjoni kienu ħerqanin biex jużaw dan il-​brochure il-​ġdid fil-​ministeru taʼ l-​għalqa tagħhom. Per eżempju, ftit jiem biss wara li rċevew dan il-​brochure, żewġ pijunieri (evanġelizzaturi full-time) mill-​Istati Uniti ħallew dan il-​brochure maʼ koppja żagħżugħa li kienu qegħdin iżuru. Meta l-​koppja ħarset lejn il-​werrej, il-​lezzjoni “Prattiċi Li Alla Jobgħod” ġibdet l-​attenzjoni tagħhom. “Jien dejjem kont mgħallma li Alla ma setaʼ qatt jobgħod​—hu kollu mħabba,” qalet il-​mara żagħżugħa. “Dan hu dak li se naqra l-​ewwel.” Meta ż-​żewġ pijunieri reġgħu lura l-​ġimgħa taʼ wara, il-​mara żagħżugħa qalet: “Kont qiegħda naqra l-​brochure il-​ġdid. Kemm hu diffiċli li nagħmlu l-​affarijiet kollha li suppost nagħmlu. Jehovah mhux qiegħed jieħu pjaċir bina​—aħna m’aħniex miżżewġin. Imma għamilna deċiżjoni. Għamilna arranġamenti biex niżżewġu nhar il-​Ġimgħa li ġejja.” Waqt li ħaddnu lill-​koppja pijunieri, huma żiedu: “Niskużaw ruħna talli m’għandniex l-​istudju regulari, imma din neħħietilna piż kbir.”

Bil-qalb kollha, uża l-​brochure il-​ġdid Jirrikjedi. Dan huwa għodda mill-​aħjar biex tgħin lil oħrajn jitgħallmu dwar dak li Alla jirrikjedi.(w97 1/15)

[Stampi f’paġna 11]

Kif se tużah il-​brochure il-​ġdid?