“It-​Tjieba Tiegħek Aħjar mill-​Ħajja”

Kif jirrakkonta Calvin H. Holmes

Kien ix-​xahar taʼ Diċembru taʼ l-​1930, u kont għadni kif spiċċajt naħleb il-​baqar meta missieri ġie d-​dar wara li kien żar lil wieħed ġar fil-​viċin. “Dan il-​ktieb silifuli Wyman,” qal hu hekk kif ħareġ pubblikazzjoni kulur blu minn ġol-​but. Kien intitolat Deliverance, ippubblikat mill-​Watch Tower Bible and Tract Society. Missieri, li rari kien jaqra xi ħaġa, qara dak il-​ktieb sa tard bil-​lejl.

IKTAR TARD, missieri ssellef kotba oħrajn, b’titli bħalma huma Light u Reconciliation, mill-​istess pubblikaturi. Hu sab il-​Bibbja qadima t’ommi u baqaʼ mqajjem sa tard bil-​lejl biex jaqra fid-​dawl taʼ lampa tal-​pitrolju. Bidla kbira seħħet fuq missieri. Dik ix-​xitwa tkellem għal sigħat sħaħ magħna​—ommi, it-​tliet ħuti bniet, u jien—​hekk kif tgezzizna flimkien madwar il-​kenur qadim tagħna.

Missieri qal li dawk li kienu qegħdin jippubblikaw dawn il-​kotba kienu jissejħu Studenti tal-​Bibbja u li, skond huma, konna qegħdin ngħixu fl-​“aħħar tad-​dinja.” (2 Timotju 3:1-5) Hu spjega li l-​art ma kellhiex tinqered fl-​aħħar tad-​dinja imma li taħt is-​Saltna t’Alla kellha tinbidel f’ġenna. (2 Pietru 3:5-7, 13; Apokalissi 21:3, 4) Dak kien jinstemaʼ tassew interessanti għalija.

Missieri beda jkellimni waqt li konna nkunu naħdmu flimkien. Niftakar li konna qegħdin inqaxxru l-​qamħirrun meta spjega li l-​isem t’Alla hu Jehovah. (Salm 83:19 [Salm 83:18, NW]) B’hekk, matul ir-​rebbiegħa taʼ l-​1931, meta kelli biss 14-il sena, ħadt il-​waqfa tiegħi favur Jehovah u s-​Saltna tiegħu. Tlabt lil Jehovah fil-​ġnien b’siġar qodma tat-​tuffieħ li kellna wara d-​dar u solennement wegħedtu li se naqdih għal dejjem. Qalbi kienet diġà ġiet imqanqla mill-​qalb tajba bl-​imħabba taʼ dak Alla tagħna taʼ l-​għaġeb.—Salm 63:4 [Salm 63:3, NW].

Konna ngħixu f’razzett madwar 30 kilometru ’l bogħod minn St. Joseph, Missouri, fl-​Amerka, u inqas minn 65 kilometru ’l bogħod minn Kansas City. Missieri twieled f’għarix taʼ l-​injam li l-​bużnannu kien bena fir-​razzett fil-​parti bikrija tas-​seklu 19.

Taħriġ għall-​Ministeru

Fis-​sajf taʼ l-​1931, il-​familja tagħna semgħet fuq ir-​radju t-​taħdita pubblika “Is-​Saltna, it-​Tama tad-​Dinja,” li Joseph Rutherford, li dak iż-​żmien kien il-​president tal-​Watch Tower Society, kien ta f’konvenzjoni ġewwa Columbus, Ohio. Din qanqlitli qalbi, u ħadt gost nieħu sehem maʼ missieri f’li nqassam fost dawk li kienu midħla tagħna l-​ktejjeb li kien fih din it-​taħdita pubblika importanti.

Fir-rebbiegħa taʼ l-​1932, attendejt l-​ewwel laqgħa tiegħi tax-​Xhieda taʼ Jehovah. Il-​ġar tagħna stieden lil missieri u lili biex nisimgħu taħdita f’St. Joseph minn George Draper, indokratur li jivvjaġġa tax-​Xhieda taʼ Jehovah. Meta wasalna, il-​laqgħa kienet waslet f’nofsha, u jien sibt post bil-​qiegħda wara J. D. Dreyer, li kellu dahru miftuħ u b’saħħtu. Dan ir-​raġel kien se jkollu rwol importanti f’ħajti.

F’Settembru taʼ l-​1933, mort assemblea maʼ missieri ġewwa Kansas City, fejn ħadt sehem għall-​ewwel darba fl-​ippridkar pubbliku. Missieri tani tliet kotba żgħar u qalli biex ngħid: “Jien wieħed mix-​Xhieda taʼ Jehovah u qiegħed nippriedka l-​aħbar tajba tas-​Saltna t’Alla. Bla dubju int smajtu lill-​Imħallef Rutherford fuq ir-​radju. It-​taħditiet tiegħu jiġu mxandrin kull ġimgħa fuq iktar minn 300 stazzjon.” Imbagħad offrejt ktejjeb. Dik il-​lejla, waqt li kont qiegħed naħleb il-​baqar lura fir-​razzett, għaddieli minn moħħi li dan kien l-​iktar jum memorabbli taʼ ħajti.

Fi żmien qasir waslet ix-​xitwa, u l-​ivvjaġġar għalina kien limitat. Imma mbagħad żaruna Ħuna Dreyer u martu u staqsewni jekk ridtx immur id-​dar tagħhom is-​Sibt fil-​għaxija u norqod għandhom. Il-​mixja t’għaxar kilometri sad-​dar tal-​familja Dreyer kienet vallapena għaliex b’hekk l-​għada stajt nakkumpanjahom fil-​ministeru u mmur għall-​Istudju tat-​Torri taʼ l-​Għassa f’St. Joseph. Minn dak in-​nhar ’l hawn, rari mmissjajt li nieħu sehem fil-​ministeru nhar taʼ Ħadd. It-​taħriġ u l-​pariri taʼ Ħuna Dreyer kienu imprezzabbli.

Fit-tnejn taʼ Settembru, 1935, fl-​aħħarnett stajt nissimbolizza d-​dedikazzjoni tiegħi lil Jehovah permezz tal-​magħmudija taʼ l-​ilma f’assemblea ġewwa Kansas City.

Il-​Bidu taʼ Karriera Tul Ħajti Kollha

Kmieni fl-​1936, applikajt biex naqdi bħala pijunier, jew ministru full-time, u ismi tpoġġa fuq il-​lista taʼ dawk li kienu qegħdin ifittxu pijunier bi sħab. Ftit wara rċevejt ittra mingħand Edward Stead taʼ Arvada, Wyoming. Hu spjega li kien mixħut ġo wheelchair u kellu bżonn l-​għajnuna biex jagħmel ix-​xogħol taʼ pijunier. Jien aċċettajt l-​offerta tiegħu immedjatament u nħtart pijunier nhar it-​18 t’April, 1936.

Qabel ma tlaqt biex nissieħeb maʼ Ħuna Stead, ommi kellmitni waħdi. “Ibni, ċert int li dan huwa dak li trid tagħmel?” staqsiet hi.

“Altrimenti l-​ħajja tkun bla skop,” weġibt jien. Kont sirt napprezza li l-​qalb tajba bl-​imħabba taʼ Jehovah hija iktar importanti minn kwalunkwe ħaġa oħra.

Ix-xogħol taʼ pijunier maʼ Ted, kif konna nsejħu lil Ħuna Stead, kien taħriġ eċċellenti. Hu kien mimli żelu u kellu mod li jiġbdek ferm taʼ kif jippreżenta l-​messaġġ tas-​Saltna. Imma dak kollu li Ted setaʼ jagħmel kien li jikteb u jitkellem; il-​ġogi kollha tiegħu kienu miżmumin bl-​artrite rewmatika. Kont inqum kmieni u naħslu u nqaxxarlu l-​leħja, nipprepara l-​kolazzjon, u nagħtih jiekol. Imbagħad kont inlibbsu u nlestih għas-​servizz. Dak is-​sajf għamilna x-​xogħol taʼ pijunier f’Wyoming u f’Montana, u bil-​lejl konna norqdu f’kamp. Ted kien jorqod fil-​kabina speċjali mibnija fuq it-​trakk pickup tiegħu, u jien kont norqod fl-​art. Iktar tard dik is-​sena tlaqt lejn in-​Nofs in-​Nhar biex nagħmel ix-​xogħol taʼ pijunier ġewwa Tennessee, Arkansas, u Mississippi.

F’Settembru 1937, attendejt l-​ewwel konvenzjoni kbira tiegħi f’Columbus, Ohio. Hemmhekk saru xi arranġamenti biex ix-​xogħol taʼ l-​ippridkar jitmexxa bl-​użu tal-​fonografu. Kull darba li konna nużaw il-​fonografu konna nsejħulha setup. F’xahar wieħed kelli ’l fuq minn 500 setup, u iktar minn 800 individwu taw widen. Wara li tajt xiehda f’ħafna bliet tal-​Lvant taʼ Tennessee, Virginia, u West Virginia, ġejt mistieden biex naqdi bħala pijunier speċjali f’kariga ġdida, billi naħdem id f’id mal-​qaddej taż-​żona, bħalma kienu msejħin dak iż-​żmien l-​indokraturi li jivvjaġġaw.

Kont inżur lil kongregazzjonijiet u gruppi iżolati f’West Virginia​—billi nqattaʼ minn ġimgħatejn sa erbaʼ ġimgħat maʼ kull waħda—​u nieħu t-​tmexxija fil-​ministeru taʼ l-​għalqa. Imbagħad, f’Jannar taʼ l-​1941, ġejt maħtur qaddej taż-​żona. Sa dak iż-​żmien ommi u t-​tliet ħuti bniet​—Clara, Lois, u Ruth—​kienu ħadu l-​waqfa tagħhom favur is-​Saltna. Għalhekk, il-​familja kollha tagħna attendejna flimkien il-​konvenzjoni l-​kbira f’St. Louis dak is-​sajf.

Ftit wara l-​konvenzjoni, il-​qaddejja taż-​żona ġew avżati li x-​xogħol taż-​żona kellu jintemm fl-​aħħar taʼ Novembru taʼ l-​1941. Ix-​xahar taʼ wara, l-​Amerka daħlet fit-​Tieni Gwerra Dinjija. Ġejt inkarigat fis-​servizz taʼ pijunier speċjali, li kien jirrikjedi li wieħed iqattaʼ 175 siegħa kull xahar fil-​ministeru.

Privileġġi Speċjali taʼ Servizz

F’Lulju taʼ l-​1942, irċevejt ittra li kienet tistaqsi jekk kontx lest li naqdi barra l-​pajjiż. Wara li rrispondejt fl-​affermattiv, ġejt mistieden biex immur f’Betel, il-​kwartieri ġenerali dinjin tax-​Xhieda taʼ Jehovah, fi Brooklyn, New York. Madwar 20 ħu li ma kinux miżżewġin ġew imsejħin għal taħriġ speċjali fl-​istess żmien.

Nathan H. Knorr, li dak iż-​żmien kien il-​president tal-​Watch Tower Society, spjega li l-​attività taʼ l-​ippridkar kienet naqset u li aħna kellna niġu mħarrġin biex insaħħu spiritwalment lill-​kongregazzjonijiet. “Ma rridux inkunu nafu biss x’hemm ħażin fil-​kongregazzjoni,” qal hu, “imma xi tkunu għamiltu dwar din il-​ħaġa.”

Waqt li konna f’Betel, Fred Franz, li sar president wara Ħuna Knorr fl-​1977, ta taħdita li fiha qal: “It-​Tieni Gwerra Dinjija se tispiċċa, u xogħol kbir taʼ ppridkar se jinfetaħ. Bla dubju miljuni għad iridu jinġabru ġewwa l-​organizzazzjoni taʼ Jehovah!” Dik it-​taħdita bidlitli għalkollox il-​ħarsa tiegħi. Meta ngħataw l-​inkarigi, sirt naf li kelli nżur il-​kongregazzjonijiet kollha fl-​istati taʼ Tennessee u Kentucky. Konna msejħin qaddejja għall-​aħwa, identifikazzjoni li minn dak in-​nhar ’l hawn inbidlet għal indokratur tas-​circuit.

Jien bdejt naqdi lill-​kongregazzjonijiet nhar l-​1 t’Ottubru, 1942, meta kien għad kelli 25 sena. Dak iż-​żmien l-​uniku mod kif wieħed setaʼ jasal għand xi kongregazzjonijiet kien bil-​mixi jew fuq dahar iż-​żiemel. Kultant kont norqod fl-​istess kamra bħall-​familja li tkun laqgħetni għandha.

Meta kont qiegħed naqdi lill-​Kongregazzjoni taʼ Greeneville ġewwa Tennessee f’Lulju taʼ l-​1943, irċevejt stedina biex nattendi t-​tieni klassi tal-​Watchtower Bible School taʼ Gilead. F’Gilead, tgħallimt x’ifisser verament li “nagħtu ħafna aktar kas taʼ dak li smajna” u li dejjem ‘inħabirku fil-​ħidma tal-​Mulej.’ (Lhud 2:1; 1 Korintin 15:58) Il-​ħames xhur tal-​kors taʼ l-​iskola għaddew qishom ħolma, u jum il-​gradwazzjoni ġie nhar il-​31 taʼ Jannar, 1944.

Il-​Kanada u Lejn il-​Belġju

Għadd minna konna assenjati biex immorru l-​Kanada, fejn reċentement kienet tneħħiet il-​projbizzjoni minn fuq l-​attività tax-​Xhieda taʼ Jehovah. Jien kont assenjat għax-​xogħol taʼ l-​ivvjaġġar, li kien jitlob li wieħed jivvjaġġa distanzi kbar bejn xi kongregazzjonijiet. Jien u nivvjaġġa, kien taʼ ferħ li nismaʼ esperjenzi dwar kif ix-​xogħol tagħna taʼ l-​ippridkar kien twettaq matul il-​projbizzjoni fil-​Kanada. (Atti 5:29) Ħafna rrakkontaw dwar l-​hekk imsejjaħ blizz meta matul lejl wieħed, tħalla ktejjeb prattikament f’kull dar minn tarf sa tarf tal-​Kanada. X’aħbar tajba kienet li f’Mejju taʼ l-​1945 sirna nafu li l-​gwerra fl-​Ewropa kienet spiċċat!

Dak is-​sajf, waqt li kont qiegħed naqdi lil kongregazzjoni fil-​belt żgħira taʼ Osage, Saskatchewan, irċevejt ittra mingħand Ħuna Knorr, li kienet taqra hekk: “Qiegħed nestendilek il-​privileġġ li tmur il-​Belġju. . . . Hemm ħafna xogħol x’isir f’dak il-​pajjiż. Hija art imfarrka bil-​gwerra, u ħutna għandhom bżonn l-​għajnuna, u tidher ħaġa tajba li nibagħtu lil xi ħadd mill-​Amerka biex jagħtihom l-​għajnuna u l-​faraġ xierqa li jeħtieġu.” Jien weġibt immedjatament, billi aċċettajt l-​inkarigu.

F’Novembru taʼ l-​1945, kont fil-​Betel taʼ Brooklyn nistudja l-​Franċiż maʼ Charles Eicher, ħu minn Alsace imdaħħal fiż-​żmien. Irċevejt ukoll xi taħriġ taʼ malajr f’dik li hi proċedura tal-​fergħa. Qabel ma tlaqt għall-​Ewropa, għamilt żjara qasira lill-​familja tiegħi u lil ħbiebi f’St. Joseph, Missouri.

Nhar il-​11 taʼ Diċembru, tlaqt minn New York fuq il-​Queen Elizabeth, u erbat ijiem wara wasalt Southampton, l-​Ingilterra. Qgħadt xahar fil-​fergħa tal-​Britannja, fejn irċevejt iżjed taħriġ. Wara dan, fil-​15 taʼ Jannar, 1946, qsamt il-​Kanal Ingliż u żbarkajt f’Ostend, il-​Belġju. Minn hemmhekk mort bit-​trejn lejn Brussell, fejn il-​familja taʼ Betel kollha kemm hi ġiet tilqagħni fl-​istazzjon tal-​ferrovija.

Attività Miżjuda taʼ wara l-​Gwerra

L-​inkarigu tiegħi kien li nindokra x-​xogħol tas-​Saltna fil-​Belġju, u madankollu lanqas biss kont nitkellem il-​lingwa. F’madwar sitt xhur, kont naf biżżejjed Franċiż biex ninqeda. Kien privileġġ li naħdem maġenb dawk li kienu ssograw ħajjithom biex iwettqu x-​xogħol taʼ l-​ippridkar matul ħames snin t’okkupazzjoni Nazista. Xi wħud minnhom kienu għadhom kif ġew meħlusin minn kampijiet taʼ konċentrament.

L-aħwa kienu ħerqanin biex jorganizzaw ix-​xogħol u biex jitimgħu lil dawk li kellhom il-​ġuħ għall-​verità tal-​Bibbja. Għalhekk saru xi arranġamenti biex jinżammu assembleat u biex indokraturi li jivvjaġġaw iżuru l-​kongregazzjonijiet. Kellna wkoll żjarat inkuraġġanti minn Nathan Knorr, Milton Henschel, Fred Franz, Grant Suiter, u John Booth​—kollha rappreżentanti mill-​kwartieri ġenerali taʼ Brooklyn. F’dawk il-​jiem bikrin, qdejt bħala indokratur tas-​circuit, indokratur tad-​distrett, u indokratur tal-​fergħa. Nhar is-​6 taʼ Diċembru, 1952, wara kważi sebaʼ snin taʼ servizz fil-​Belġju, iżżewwiġt lil Emilia Vanopslaugh, li wkoll kienet taħdem fil-​fergħa tal-​Belġju.

Ftit xhur wara, nhar il-​11 t’April, 1953, bagħtu għalija biex immur l-​għassa tal-​pulizija lokali u ġejt informat li l-​preżenza tiegħi kienet perikoluża għas-​sigurtà tal-​Belġju. Mort il-​Lussemburgu biex nistenna waqt li ressaqt appell għall-​każ tiegħi għand il-​Kunsill taʼ l-​Istat.

Fi Frar taʼ l-​1954 il-​Kunsill taʼ l-​Istat tal-​Belġju appoġġja d-​digriet li l-​preżenza tiegħi kienet taʼ periklu għall-​pajjiż. L-​evidenza provduta kienet li minn mindu wasalt il-​Belġju, l-​għadd taʼ Xhieda fil-​pajjiż kien żdied drammatikament​—minn 804 fl-​1946 għal 3,304 fl-​1953—​u li, bħala riżultat taʼ dan, is-​sigurtà tal-​Belġju kienet mhedda għaliex ħafna Xhieda żgħażagħ kienu qegħdin jieħdu waqfa soda favur in-​newtralità Kristjana. B’hekk, Emilia u jien konna assenjati biex immorru l-​Isvizzera, fejn bdejna naqdu fix-​xogħol tas-​circuit fis-​sezzjoni taʼ dawk li jitkellmu bil-​Franċiż.

L-Iskola tal-​Ministeru tas-​Saltna​—skola li tipprovdi taħriġ avanzat għal anzjani Kristjani—​kienet stabbilita fl-​1959 ġewwa South Lansing, New York. Jien kont mistieden biex immur hemmhekk ħalli nirċievi taħriġ sabiex ngħallem lil xi klassijiet taʼ din l-​iskola fl-​Ewropa. Waqt li kont fl-​Istati Uniti, żort lill-​familja tiegħi f’St. Joseph, Missouri. Hemmhekk rajt lill-​għażiża ommi għall-​aħħar darba. Mietet f’Jannar taʼ l-​1962; missieri kien miet f’Ġunju taʼ l-​1955.

L-Iskola tal-​Ministeru tas-​Saltna f’Pariġi, Franza, bdiet f’Marzu taʼ l-​1961, u Emilia akkumpanjatni. Indokraturi tad-​distrett, indokraturi tas-​circuit, indokraturi tal-​kongregazzjonijiet, u pijunieri speċjali ġew għall-​iskola minn Franza, il-​Belġju, u l-​Isvizzera. Matul l-​14-il xahar taʼ wara, ikkonduċejt 12-il klassi taʼ dan il-​kors t’erbaʼ ġimgħat. Sussegwentement, f’April taʼ l-​1962, sirna nafu li Emilia kienet tqila.

Naġġustaw Ruħna għaċ-​Ċirkostanzi

Aħna rritornajna lejn Ġinevra, l-​Isvizzera, fejn kellna permessi bħala residenti permanenti. Madankollu, ma kienx faċli ssib post fejn toqgħod, għax kien hemm nuqqas kbir taʼ djar. Lanqas ma kien faċli ssib impjieg. Fl-​aħħarnett sibt xogħol fi stabbiliment kbir tan-​negozju fiċ-​ċentru taʼ Ġinevra.

Kont qattajt 26 sena fil-​ministeru full-time, u għalhekk iċ-​ċirkostanzi mibdulin tagħna kienu jirrikjedu aġġustament ġmielu. Matul it-​22 sena li ħdimt fl-​istabbiliment tan-​negozju u għent biex inrabbu liż-​żewġt itfal bniet tagħna, Lois u Eunice, il-​familja tagħna dejjem poġġiet l-​interessi tas-​Saltna l-​ewwel. (Mattew 6:33) Wara li rtirajt mix-​xogħol sekulari tiegħi fl-​1985, bdejt naqdi bħala sostitut taʼ l-​indokratur tas-​circuit.

Is-saħħa taʼ Emilia kienet u għadha batuta ferm, imma tagħmel li tistaʼ fil-​ministeru. Lois qdiet bħala pijuniera għal madwar għaxar snin. Xi ġrajja spiritwali memorabbli kienet li stajt ingawdi magħha dik il-​konvenzjoni internazzjonali wisq taʼ l-​għaġeb f’Moska matul is-​sajf taʼ l-​1993! Ftit taʼ żmien wara, meta kienet fuq btala ġewwa Senegal, l-​Afrika, Lois tilfet ħajjitha waqt li kienet qiegħda tgħum fl-​oċean. L-​imħabba u l-​qalb tajba taʼ ħutna Afrikani u tal-​missjunarji kienu taʼ faraġ kbir għalija meta vvjaġġajt lejn is-​Senegal biex nieħu ħsieb id-​difna. Kemm inħares ’il quddiem biex nara lil Lois fl-​irxoxt!—Ġwann 5:28, 29.

Jien grat li gawdejt l-​appoġġ leali taʼ sieħba li tħobb għal iktar minn erbgħin sena. Tabilħaqq, minkejja l-​weġgħat taʼ qalb u l-​inkwiet tiegħi, il-​qalb tajba bl-​imħabba taʼ Jehovah kienet u għadha ħelwa u tatni skop fil-​ħajja. Qalbi tiġi mqanqla biex tipproklama rigward Alla tagħna, Jehovah, bil-​kliem tas-​salmista: “Għax it-​tjieba tiegħek aħjar mill-​ħajja, xufftejja jxandru t-​tifħir tiegħek.”—Salm 63:4 [Salm 63:3, NW].

[Stampa f’paġna 26]

Aħna mexxejna x-​xogħol taʼ l-​ippridkar bil-​fonografu

[Stampa f’paġna 26]

Il-​ġenituri tiegħi fl-​1936

[Stampa f’paġna 26]

Għoti taʼ xiehda fit-​toroq ġewwa l-​Belġju fl-​1948