Ikkultiva l-​Ispirtu tal-​Gratitudni

TABIB fl-​Istat taʼ New York isalva l-​ħajja taʼ Marie f’sitwazzjoni t’emerġenza. Imma Marie, li għandha 50 sena, la tirringrazzja lit-​tabib u lanqas tħallas il-​kont. Kemm huwa dan tipiku taʼ l-​ingratitudni!

Il-Bibbja tirrakkonta li darba, hekk kif wasal ġo raħal, Ġesù ltaqaʼ m’għaxart irġiel li kellhom il-​marda terribbli tal-​lebbra. Huma għajtulu b’ilħna għoljin: “Ġesù, Mgħallem, ikollok ħniena minna!” Ġesù kkmanda: “Morru uru rwieħkom lill-​qassisin.” Il-​lebbrużi għamlu kif qalilhom, u fi triqithom, bdew jaraw u jħossu ’l saħħithom ġejja ’l quddiem.

Disgħa mil-​lebbrużi mfejqin komplew fi triqithom. Imma l-​lebbruż l-​ieħor, Samaritan, mar lura jfittex lil Ġesù. Dan li qabel kien lebbruż faħħar lil Alla, u malli sab lil Ġesù, inxteħet fl-​art quddiemu, u raddlu ħajr. Bi tweġiba Ġesù qal: “M’hux l-​għaxra fiequ mil-​lebbra? Fejn huma d-​disgħa l-​oħra? Ma kien hemm ħadd minnhom li raġaʼ lura biex jagħti glorja lil Alla ħlief dan il-​barrani!”—Luqa 17:11-19.

Lezzjoni importanti hija implikata fil-​mistoqsija: “Fejn huma d-​disgħa l-​oħra?” Bħal Marie, id-​disaʼ lebbrużi kellhom nuqqas serju​—ma wrewx gratitudni. Ingratitudni bħal din hija prevalenti ħafna llum. X’inhi r-​raġuni għal dan?

Il-​Kaġun Bażiku taʼ l-​Ingratitudni

L-​ingratitudni bażikament toriġina mill-​egoiżmu. Ikkunsidra l-​ewwel ġenituri umani tagħna, Adam u Eva. Jehovah ħalaqhom b’attributi divini u pprovda kull ħaġa għall-​hena tagħhom, inklużi dar mill-​isbaħ forma taʼ ġnien, ambjent perfett, u xogħol sinjifikanti u sodisfaċenti. (Ġenesi 1:26-29; 2:16, 17) Madankollu, taħt il-​pressjoni li poġġielhom Satana biex ifittxu l-​interessi tagħhom infushom, bħala koppja huma saru diżubbidjenti u aġixxew bi stmerrija lejn il-​benefiċenza taʼ Jehovah.—Ġenesi 3:1-5; Apokalissi 12:9.

Ikkunsidra wkoll il-​poplu taʼ Iżrael tal-​qedem, li Alla kien għażel biex ikun il-​propjetà speċjali tiegħu. Min jaf kemm kienu grati l-​ġenituri Iżraeliti kollha fil-​lejl taʼ l-​14 taʼ Nisan, 1513 Q.E.K.! F’dak il-​lejl importanti, l-​anġlu t’Alla ġab il-​mewt fuq “kull min hu l-​ewwel fost l-​imweldin fl-​art taʼ l-​Eġittu” imma qabeż lid-​djar Iżraeliti li kienu mmarkati kif suppost. (Eżodu 12:12, 21-24, 30) U malli ġew meħlusin mill-​armata taʼ Fargħun fil-​Baħar l-​Aħmar, bi qlub mimlijin gratitudni, ‘Mosè flimkien maʼ wlied Iżrael għanna lill-​Mulej.’—Eżodu 14:19-28; 15:1-21.

Minkejja dan kollu, ftit ġimgħat biss wara li telqu mill-​Eġittu, “il-​ġemgħa kollha taʼ wlied Iżrael bdew igergru.” Kemm waqgħu vittma malajr taʼ l-​ingratitudni! Kienu jħossu n-​nuqqas taʼ li joqogħdu ‘ħdejn il-​borom tal-​laħam . . . u jieklu ħobż bix-​xabaʼ,’ li kienu gawdew fl-​Eġittu, l-​art tas-​servitù tagħhom. (Eżodu 16:1-3) B’mod ċar, l-​egoiżmu jaħdem kontra l-​ikkultivar u t-​turija tal-​gratitudni.

Billi huma dixxendenti tal-​midneb Adam, il-​bnedmin kollha jitwieldu bi traċċa t’egoiżmu u b’tendenza għall-​ingratitudni. (Rumani 5:12) In-​nuqqas taʼ gratitudni huwa wkoll parti mill-​ispirtu egoistiku li jiddomina lin-​nies taʼ din id-​dinja. Bħall-​arja li nibilgħu, dak l-​ispirtu jinsab kullimkien, u jeffettwana. (Efesin 2:1, 2) Aħna, allura, jeħtieġ li nikkultivaw dispożizzjoni għall-​gratitudni. Kif nistgħu nagħmluh dan?

Il-​Meditazzjoni Hija Neċessità!

Il-​Webster’s Third New International Dictionary jiddefinixxi l-​gratitudni bħala “l-​istat taʼ li tkun grat: sentiment kordjali u dħuli lejn benefattur u li jqanqal lil dak li jkun biex ipatti għal xi favur.” Sentiment ma tistax tixegħlu u titfih qisu xi swiċċ; dan irid joħroġ spontanjament minn ġewwa persuna. Il-​gratitudni tinvolvi iktar minn sempliċement turija taʼ manjieri tajbin jew xi għamla t’etikett; din trid tiġi mill-​qalb.

Kif nistgħu nitgħallmu nkunu grati mill-​qalb? Il-​Bibbja tattribwixxi ħafna minn dak li aħna nħossu lill-​għażla tagħna taʼ ħsibijiet. (Efesin 4:22-24) Li nitgħallmu nkunu grati jibda billi nimmeditaw b’apprezzament fuq l-​atti taʼ qalb tajba li nirċievu. Fi qbil maʼ dan, Dr. Wayne W. Dyer, li jaħdem fil-​qasam tas-​saħħa mentali, jgħid: “Ma jistax ikollok sentiment (emozzjoni) mingħajr ma qabel tesperjenza xi ħsieb.”

Ħu, per eżempju, il-​kwistjoni tal-​gratitudni għall-​ħolqien taʼ madwarna. Meta tħares lejn sema mimli kwiekeb f’lejla mingħajr sħab, kif tħossok dwar dak li qed tesperjenza? Is-​sultan David esprima l-​għaġeb li ħass: “[I]nħares lejn is-​smewwiet, għemil subgħajk, il-​qamar u l-​kwiekeb li int qegħedt fihom! X’inhu l-​bniedem biex tiftakar fih, bin il-​bniedem, biex taħseb fih?” U fil-​ħemda tal-​lejl, il-​kwiekeb kellmuh lil David, tant li qanqluh biex jikteb: “Is-​smewwiet ixandru l-​glorja taʼ Alla, għemil idejh tħabbar il-​firxa tas-​sema.” Is-​smewwiet kollha kwiekeb għala effettwawh daqshekk lil David? Hu stess iwieġeb: “Naħseb f’kull ma int għamilt, għemil idejk dejjem fi ħsiebi.”—Salm 8:4, 5; 19:2 (Salm 8:3, 4; Salm 19:1, NW); Salm 143:5.

Salamun, bin David, apprezza wkoll il-​valur taʼ li jaħseb fuq l-​għeġubijiet tal-​ħolqien. Per eżempju, rigward l-​irwol li għandu s-​sħab tax-​xita f’li jiffriska l-​art tagħna, hu kiteb: “Ix-​xmajjar kollha lejn il-​baħar jiġru, iżda ma jimteliex il-​baħar bihom; mnejn ikunu bdew il-​mixja tagħhom, ’l hemmhekk ix-​xmajjar jerġgħu jmorru.” (Koħèlet 1:7) Fil-​fatt hekk jiġri, wara li x-​xita u x-​xmajjar ikunu ffriskaw l-​art, l-​ilmijiet tagħhom jiġu rriċiklati mill-​ibħra lura għal ġos-​sħab. Tgħid kif tkun id-​dinja mingħajr dan l-​ippurifikar u r-​riċiklaġġ taʼ l-​ilma? Min jaf kemm ħassu grat Salamun meta qagħad jimmedita fuq dawn il-​ħsibijiet!

Wieħed grat jgħożż ukoll ir-​relazzjonijiet tiegħu mal-​membri tal-​familja, mal-​ħbieb, jew maʼ dawk li jkun jaf. L-​atti tagħhom taʼ qalb tajba jiġbdulu l-​attenzjoni. Hekk kif jikkunsidra b’apprezzament il-​pjaċiri li jkunu għamlulu, hu jħossu grat mill-​qalb.

Nesprimu l-​Gratitudni

Kemm hija sempliċi l-​kelma “grazzi”! Huwa tant faċli li tlissen kelma bħal din. U hemm għadd kbir t’opportunitajiet biex tagħmel dan. Kemm hija rifreskanti l-​espressjoni kordjali u sinċiera Grazzi lil xi ħadd li jiftaħlek il-​bieb jew jiġborlok xi ħaġa li tkun waqqajt maʼ l-​art! Li jisimgħu din l-​espressjoni jistaʼ jagħmel ix-​xogħol taʼ skrivan f’ħanut jew taʼ waitress f’restorant jew taʼ pustier eħfef u iktar premjanti.

Li jintbagħtu kartolini taʼ ringrazzjament huwa mod konvenjenti kif wieħed jesprimi gratitudni għal atti taʼ qalb tajba. Ħafna mill-​kartolini disponibbli fil-​ħwienet jesprimu s-​sentimenti b’mod mill-​isbaħ. Imma ma jkunx ġest persunali sabiħ li kieku int stess iżżid xi kliem t’apprezzament? Xi wħud saħansitra jippreferu li ma jużawx kartolini li jinxtraw, u minflok jibagħtu nota persunali.—Qabbel Proverbji 25:11.

X’aktarx, dawk li l-​iktar jistħoqqilhom il-​gratitudni tagħna huma dawk l-​eqreb tagħna fid-​dar. Il-​Bibbja tgħid dwar mara kapaċi: “Żewġha wkoll ifaħħarha.” (Proverbji 31:28) Ma jwasslux għal ambjent taʼ paċi u kuntentizza ġewwa d-​dar l-​espressjonijiet taʼ ringrazzjament mill-​qalb taʼ raġel lil martu? U ma jiħux pjaċir ukoll ir-​raġel li jmur id-​dar u jiġi milqugħ minn martu b’mod kordjali u b’apprezzament? Illum il-​ġurnata, il-​pressjonijiet fuq iż-​żwieġ huma bosta, u meta jiżdiedu l-​pressjonijiet, it-​tempri jitilgħu faċilment. Il-​wieħed dispost li jkun grat ikun lest li jagħder u malajr jagħlaq għajn waħda u jaħfer.

Iż-żgħażagħ ukoll għandhom bżonn ikunu konxji taʼ li joffru lill-​ġenituri tagħhom espressjonijiet t’apprezzament mill-​qalb. M’għandniex xi ngħidu, il-​ġenituri m’humiex perfetti, imma dik mhix raġuni biex tkun ingrat għal dak li għamlu għalik. Imkien m’int se ssib tixtri l-​imħabba u l-​attenzjoni li tawk minn mindu twelidt. Jekk huma għallmuk l-​għarfien dwar Alla, int għandek iktar għalfejn tkun grat.

“Wirt il-​Mulej huma l-​ulied,” jiddikjara Salm 127:3. Mela l-​ġenituri għandhom ifittxu opportunitajiet biex ifaħħru lil uliedhom minflok ma joqogħdu jaqbdu magħhom fuq il-​ħmerijiet. (Efesin 6:4) U xi privileġġ għandhom li jgħinu liż-​żgħar taħt il-​ħarsien tagħhom biex jikkultivaw l-​ispirtu tal-​gratitudni!—Qabbel Proverbji 29:21.

Grati Lejn Alla

Alla Jehovah hu d-​Donatur taʼ “kull ħaġa tajba li tingħata u kull don perfett.” (Ġakbu 1:17) Taʼ importanza speċjali hija l-​għotja tal-​ħajja, għax dak kollu li għandna jew li nistgħu nippjanaw isir bla valur jekk nitilfu l-​ħajja. L-​Iskrittura tħeġġiġna biex niftakru li maʼ Alla Jehovah “hemm l-​għajn tal-​ħajja.” (Salm 36:6, 8, 10 [Salm 36:5, 7, 9, NW]; Atti 17:28) Biex nikkultivaw qalb grata lejn Alla, jeħtieġ li nimmeditaw fuq il-​provvedimenti ġenerużi tiegħu biex isostni l-​ħajjiet fiżiċi u spiritwali tagħna. (Salm 1:1-3; Salm 77:12, 13 [Salm 77:11, 12, NW]) Qalb bħal din se tqanqalna biex nuru apprezzament bil-​kliem u bil-​fatti.

It-talb huwa mod wieħed ovvju biex nesprimu l-​gratitudni tagħna lejn Alla. Is-​salmista David iddikjara: “Bla għadd l-​għemejjel tiegħek, Mulej, Alla tiegħi; taʼ l-​għaġeb il-​ħsibijiet tiegħek għalina; ħadd ma jħabbatha miegħek! Irrid inxandarhom u fuqhom nitkellem; iżda huma ħafna biex insemmihom.” (Salm 40:6 [Salm 40:5, NW]) Jalla aħna niġu mqanqlin bl-​istess mod.

David kien ukoll determinat li juri lil Alla l-​apprezzament tiegħu b’dak li qal lil oħrajn. Hu qal: “[I]nfaħħrek, Mulej, b’qalbi kollha; [i]nxandar għeġubijietek kollha!” (Salm 9:2 [Salm 9:1, NW]) Li nitkellmu m’oħrajn dwar Alla, u nesprimu lilna nfusna billi naqsmu magħhom il-​verità mill-​Kelma tiegħu, huwa x’aktarx l-​aħjar mod biex nuruh il-​gratitudni tagħna. U dan se jgħinna nkunu iktar grati f’oqsma oħrajn tal-​ħajja.

“Min iroddli sagrifiċċju taʼ radd il-​ħajr, dan isebbaħni; lil min jimxi bis-​sewwa nurih is-​salvazzjoni taʼ Alla,” jgħid Jehovah. Jalla int tesperjenza l-​ferħ li jiġi milli turih kemm int grat mill-​qalb.—Salm 50:23; 100:2.

[Stampa f’paġna 7]

Il-​ħajja hija għotja mingħand Alla. Kun ċert li tniżżel xi nota persunali